ដោយ មួង ណារ៉េត
2018-06-29
Photo: RFA
ប្រទេសជប៉ុនបញ្ជាក់ជំហរថា ខ្លួននឹងមិនផ្តាច់ជំនួយទៅគណៈកម្មាធិការជាតិរៀបចំការបោះឆ្នោតទេ ប៉ុន្តែនៅតែចង់ឃើញការបោះឆ្នោតមួយ ដែលឆ្លុះបញ្ចាំងឆន្ទៈរាស្រ្តពិតប្រាកដ។
ទីប្រឹក្សារបស់ស្ថានទូតជប៉ុន ប្រចាំនៅកម្ពុជាលោក ហ៊ីរ៉ូណូរ៊ិ ស៊ុយស៊ូគី (Hironori SUZUKI) បញ្ជាក់ប្រាប់អាស៊ីសេរី តាមសារអេឡិចត្រូនិក កាលពីថ្ងៃទី២៨ ខែមិថុនាថា ជំហររបស់រដ្ឋាភិបាលជប៉ុន គឺមិនផ្លាស់ប្តូរទេ ជុំវិញជំនួយដើម្បីកែទម្រង់ការបោះឆ្នោតនៅកម្ពុជានេះ។
ប្រទេសជប៉ុនចាត់ទុកជំនួយទៅដល់ស្ថាប័នរៀបចំការបោះឆ្នោតនេះថា ជាជំនួយបច្ចេកទេស ដែលមានភាពចាំបាច់ ក្នុងការកែលម្អដំណើរការរៀបចំការបោះឆ្នោត។ បើការរៀបចំការបោះឆ្នោតនេះបានល្អ នោះនឹងអាចជួយពង្រឹងស្ថេរភាព និងតម្លាភាពនៃការរៀបចំការបោះឆ្នោត។ លោក ហ៊ីរ៉ូណូរ៊ិ ស៊ុយស៊ូគី បញ្ជាក់បន្ថែមថា ជំនួយបច្ចេកទេសសម្រាប់កែទម្រង់ គ.ជ.ប នេះ គឺដើម្បីពង្រឹងលទ្ធិប្រជាធិបតេយ្យនៅកម្ពុជា សម្រាប់រយៈពេលយូរអង្វែងផងដែរ។
ទោះជាយ៉ាងនេះ លោក ហ៊ីរ៉ូណូរ៊ិ ស៊ុយស៊ូគី បន្តថា ជប៉ុននៅតែយល់ថា វាជារឿងដ៏សំខាន់បំផុត ដែលកម្ពុជាត្រូវតែរៀបចំការបោះឆ្នោតនៅខែកក្កដាខាងមុខ ធ្វើយ៉ាងណាឲ្យឆ្លុះបញ្ចាំងឆន្ទៈរាស្រ្តពិតប្រាកដ។ ជប៉ុននៅតែតាមដានស្ថានការណ៍នយោបាយនៅកម្ពុជាយ៉ាងយកចិត្តទុកដាក់បំផុត និងនៅតែជំរុញឲ្យគ្រប់ភាគីពាក់ព័ន្ធ ចាត់វិធានការវិជ្ជមានចាំបាច់ ដើម្បីត្រួសត្រាយផ្លូវសម្រាប់អនាគត និងការរីកចម្រើនរបស់ពលរដ្ឋខ្មែរ តាមរយៈការបោះឆ្នោតតាមបែបប្រជាធិបតេយ្យត្រឹមត្រូវមួយ។
អនុប្រធានគណបក្សសង្រោះជាតិ អ្នកស្រី មូរ សុខហួរ ដែលបានចូលរួមមហាបាតុកម្មនៅប្រទេសកូរ៉េខាងត្បូង ជាមួយអ្នកតវ៉ារាប់ពាន់នាក់ កាលពីថ្ងៃទី២៤ ខែមិថុនា ដែលទាមទារឲ្យជប៉ុនដកជំនួយពី គ.ជ.ប និងប្រកាសកុំទទួលស្គាល់លទ្ធផលបោះឆ្នោត នៅតែសង្ឃឹមថា ប្រទេសជប៉ុននឹងប្រកាស មិនទទួលស្គាល់ការបោះឆ្នោតជាតិខាងមុខ ព្រោះអ្នកស្រីយល់ថា គ្មានការបោះឆ្នោតណាមួយ អាចប្រព្រឹត្តទៅដោយសេរី ត្រឹមត្រូវ និងយុត្តិធម៌ ឬអាចឆ្លុះបញ្ចាំងឆន្ទៈពិតប្រាកដរបស់ពលរដ្ឋម្ចាស់ឆ្នោតទៅរួចទេ នៅពេលដែលគណៈបក្សប្រឆាំងស្របច្បាប់តែមួយគត់ ត្រូវបានគេរម្លាយចោល ប្រធានគណបក្សនេះ ត្រូវបានគេចាប់ដាក់ពន្ធនាគារ មន្រ្តីបក្សនេះត្រូវបានគេហាមឃាត់សិទ្ធិនយោបាយ សកម្មជនបក្សត្រូវបានធ្វើទុក្ខបុកម្នេញ និងអង្គការសង្គមស៊ីវិល ប្រព័ន្ធផ្សព្វផ្សាយឯករាជ្យ សុទ្ធតែរងការធ្វើទុក្ខបុកម្នេញបែបនេះ។ អ្នកស្រី មូរ សុខហួរ អះអាងថា អ្នកគាំទ្រគណបក្សសង្គ្រោះជាតិ នឹងនៅតែបន្តការតវ៉ាទ្រង់ទ្រាយធំ នៅទូទាំងពិភពលោកជាបន្តទៀត ដើម្បីឲ្យមានដំណោះស្រាយនយោបាយ៖ «យើងនៅតវ៉ារហូតទៅដល់ថ្ងៃបោះឆ្នោត ថ្ងៃទី២៩ ខែកក្កដា។ យើងមានផែនការទៅហើយ និងកំពុងរៀបចំធ្វើមហាបាតុកម្មអហិង្សា នៅគ្រប់ទីកន្លែង ទូទាំងសាកលលោក ដែលមានសាខាគណបក្សសង្គ្រោះជាតិ។ យើងអំពាវនាវ សូមឲ្យសហគមន៍ និងសមាគមប្រជាពលរដ្ឋខ្មែរទាំងឡាយ ទាំងក្នុង និងក្រៅប្រទេស តាមលក្ខណៈដែលអាចធ្វើទៅបាន ចូលរួមជាមួយគណបក្សសង្គ្រោះជាតិ នៅក្នុងការបញ្ចេញមតិ ដែលយើងមិនអាចទទួលយកបាន នូវការបោះឆ្នោតមួយ ដែលមិនសេរី ត្រឹមត្រូវ និងយុត្តិធម៌ ហើយសម្លាប់ប្រជាធិបតេយ្យនៅកម្ពុជា»។
ស្របពេលដែលការបោះឆ្នោត កាន់តែខិតជិតមកដល់ ប្រទេសជប៉ុនកំពុងរងសម្ពាធយ៉ាងខ្លាំង ពីអ្នកគាំទ្រគណបក្សសង្គ្រោះជាតិនៅក្រៅប្រទេស ដែលបានធ្វើបាតុកម្មតវ៉ាជាបន្តបន្ទាប់ ស្ទើរគ្រប់ទិសទី ដើម្បីឲ្យប្រទេសជប៉ុន ប្រកាសកុំទទួលស្គាល់ការបោះឆ្នោតជាតិខាងមុខ។ អ្នកតវ៉ាទាំងនោះ សុទ្ធតែចង់ឃើញប្រទេសជប៉ុនបង្ហាញជំហរដាច់ខាត ដាក់ទណ្ឌកម្មរបបលោក ហ៊ុន សែន ដូចប្រទេសប្រជាធិបតេយ្យដទៃទៀត ដើម្បីដាក់សម្ពាធឲ្យលោក ហ៊ុន សែន ងាកមកស្តារលទ្ធិប្រជាធិបតេយ្យឡើងវិញ៕
No comments:
Post a Comment