ដោយ តាំង សារ៉ាដា
2018-06-29
លោក គឹម សុខ (ក្នុងឯកសណ្ឋានអ្នកទោស) អ្នកឃ្លាំមើលបញ្ហាសង្គម និងនយោបាយ ពេលបញ្ជូនចេញពីសវនាការសាលាឧទ្ធរណ៍ នៅថ្ងៃទី៦ ខែមីនា ឆ្នាំ២០១៧។
Photo: RFA
តុលាការកំពូលនៅថ្ងៃទី២៩ មិថុនា សម្រេចតម្កល់សាលដីកាកាត់ទោសអ្នកវិភាគនយោបាយឯករាជ្យ លោក គឹម សុខ របស់សាលាឧទ្ធរណ៍ទុកជាបានការដដែល។ លោក កឹម សុខ ត្រូវបានតុលាការនៃរបបលោក ហ៊ុន សែន កាត់ទោសឱ្យជាប់ពន្ធនាគាររយៈពេល ១៨ខែ ពាក់ព័ន្ធនឹងការលើកឡើងថា គណបក្សកាន់អំណាចជាអ្នកនៅពីក្រោយខ្នងនៃការសម្លាប់បណ្ឌិត កែម ឡី។ មន្ត្រីសិទ្ធិមនុស្ស យល់ឃើញថា អាជ្ញាធរគួរតែពន្លឿននីតិវិធីស៊ើបអង្កេតក្នុងសំណុំរឿងឃាតកម្មលើបណ្ឌិត កែម ឡី ប្រសើរជាងការចាត់វិធានការឥតត្រាប្រណីចំពោះអ្នកហ៊ានរិះគន់ករណីឃាតកម្មដ៏រសើបមួយនេះ។
លោក គឹម សុខ ត្រូវបន្តជាប់ឃុំក្នុងពន្ធនាគារតទៅទៀត តាមអំណាចសាលដីការរបស់តុលាការកំពូល ដែលជាសេចក្តីសម្រេចជាចុងក្រោយ បិទផ្លូវតវ៉ាក្នុងសំណុំរឿងនេះ។ គិតត្រឹមខែចុងខែមិថុនា ឆ្នាំ២០១៨ នេះ លោកបានជាប់ពន្ធនាគារអស់រយៈពេលជាង ១៦ខែរួចទៅហើយ ហើយលោកទំនងជានឹងត្រូវអនុវត្តទោសទាំងស្រុងក្នុងពន្ធនាគារសរុប ១៨ខែ តាមការសម្រេចរបស់តុលាការទាំងពីរថ្នាក់។
ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត សម្តែងការសោកស្តាយចំពោះការសម្រេចរបស់តុលាការកំពូល ព្រោះលោកយល់ថា សំណុំរឿងសំខាន់បំផុតដែលតុលាការត្រូវចាត់ការ គឺការរកយុត្តិធម៌ជូនលោកបណ្ឌិត កែម ឡី ដែលត្រូវបានឃាតកបាញ់សម្លាប់ទាំងកណ្តាលថ្ងៃនោះទៅវិញទេ មិនមែនជាការចាត់វិធានការតាមផ្លូវច្បាប់យ៉ាងរហ័សទៅលើអ្នករិះគន់ក្នុងករណីនេះឡើយ។ លោកបន្តថា ការប្រើប្រព័ន្ធតុលាការប្រឆាំងលោក គឹម សុខ បានជះឥទ្ធិពលខ្លាំងដល់សេរីភាពក្នុងការបញ្ចេញមតិ និងជាការគំរាមកំហែងទៅដល់អ្នកវិភាគផ្សេងទៀត កុំឱ្យបញ្ចេញគំនិតដោយឯករាជ្យរបស់ខ្លួនតទៅទៀត៖ «»
កាលពីខែសីហា ឆ្នាំ២០១៧ តុលាការក្រុងភ្នំពេញបានកាត់ទោសឱ្យលោក គឹម សុខ ជាប់ពន្ធនាគារ ១ ឆ្នាំកន្លះ ពីបទចោទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្ត៍ជាសាធារណៈ តាមពាក្យបណ្តឹងរបស់លោក ហ៊ុន សែន។ តុលាការក៏បានពិន័យអ្នកវិភាគរូបនេះ ចំនួន ២ពាន់ដុល្លារ បង់ចូលថវិការរដ្ឋ និងសងជំងឺចិត្តលោក ហ៊ុន សែន ចំនួន ២០ម៉ឺនដុល្លារអាមេរិកផងដែរ។
ក្រៅពីនេះ លោក គឹម សុខ ក៏កំពុងជាប់បណ្តឹងមួយផ្សេងទៀតនៅតុលាការក្រុងភ្នំពេញដែរ គឺបណ្តឹងរបស់មេដឹកនាំរបបក្រុងភ្នំពេញ ហ៊ុន សែន ដដែល ដែលប្តឹងលោកអំពីការលើកឡើងថា របប បច្ចុប្បន្នបង្កើតប្រព័ន្ធមួយដែលមានការសម្លាប់មនុស្ស ហើយរកមុខឃាតកមិនឃើញ។ មេធាវីតំណាងរបស់លោក ហ៊ុន សែន គឺលោក គី តិច បានប្តឹងឱ្យតុលាការដាក់ទោសលោក គឹម សុខ និងទាមទារសំណងចំនួន ១០លានរៀលបន្ថែមទៀតទៅឱ្យលោក ហ៊ុន សែន។
មន្ត្រីសិទ្ធិមនុស្ស លោក អំ សំអាត យល់ឃើញថា ការដាក់ទោសលោក គឹម សុខ ក្នុងសំណុំរឿងទីមួយនេះ មានលក្ខណៈធ្ងន់ធ្ងរសឹងដល់កម្រិតអតិបរមានៃបទល្មើសរួចទៅហើយ ដូច្នេះលោកស្នើឱ្យតុលាការទម្លាក់ចោលសំណុំរឿងមួយទៀត ដើម្បីទុកឱកាសឱ្យបញ្ញាវន្តរូបនេះអាចចូលរួមការអភិវឌ្ឍន៍សង្គមតាមរយៈការបញ្ចេញទស្សនៈរបស់ខ្លួន៖ «»
លោក គឹម សុខ គឺជាអ្នកវិភាគម្នាក់ ដែលហ៊ាននិយាយឥតសំចៃមាត់លើចំណុចអវិជ្ជមាននៃរបៀបដឹកនាំ និងល្បិចកលនយោបាយរបស់គណបក្សកាន់អំណាចទៅលើគណបក្សប្រឆាំង។ លោកបានបង្ហាញភាពលេចធ្លោរបស់ខ្លួនតាមរយៈការបញ្ចេញទស្សនៈតាមប្រព័ន្ធផ្សព្វផ្សាយ បន្ទាប់ពីបណ្ឌិត កែម ឡី ត្រូវបានឃាតកបាញ់សម្លាប់ នៅថ្ងៃទី១០ ខែកក្កដា ឆ្នាំ២០១៧ រួចមក។
ប្រភពជិតស្និទ្ធនឹងលោក គឹម សុខ ដែលថ្លែងសុំមិនបញ្ចញឈ្មោះ និងសំឡេង ឱ្យអាស៊ីសេរីដឹងថា លោក គឹម សុខ មានសុខភាពល្អធម្មតាទេនៅក្នុងពន្ធនាគារ ក៏ប៉ុន្តែលោកត្រូវបានគេផ្លាស់ឱ្យទៅនៅក្នុងបន្ទប់ដែលមានបំពាក់កាមេរ៉ាសុវត្ថិភាព តាំងពីថ្ងៃទី១ ខែឧសភាមកម្ល៉េះ ក្រោយពេលលោក ហ៊ុន សែន ខឹងសម្បារនឹងលោក មាជ សុវណ្ណារ៉ា ដែលមានប្រើទូរស័ព្ទក្នុងបន្ទប់ឃុំឃាំង។
ប្រភពដដែលបន្តថា ខាងពន្ធនាគារបានរឹតបន្តឹងសន្តិសុខកាន់តែខ្លាំង ធ្វើឱ្យលោក គឹម សុខ ទទួលបានព័ត៌មានតិចតួចបំផុតពីស្ថានភាពនយោបាយ និងសង្គមនៅខាងក្រៅពន្ធនាគារ ដែលកំពុងកើតឡើងនាពេលបច្ចុប្បន្ន។
ប្រភពដដែលអះអាងថា សុខភាពផ្លូវចិត្តរបស់ លោក គឹម សុខ នៅល្អដូចដើម គឺលោកនៅមានសេចក្តីក្លាហាន មិនមានការតក់ស្លុត និងហ៊ាននិយាយរិះគន់ចំៗ ចំពោះចំណុចអវិជ្ជមានរបស់របបក្រុងភ្នំពេញដដែល។
ជាងនេះទៅទៀត លោក គឹម សុខ បានអំពាវនាវពីក្នុងពន្ធនាគារឱ្យមានការដោះលែងលោក គឹម សុខា លើកលែងបម្រាមលើអ្នកនយោបាយបក្សប្រឆាំងចំនួន ១១៨ នាក់ ឱ្យមានសិទ្ធិធ្វើនយោបាយឡើងវិញ និងបើកឱ្យគណបក្សសង្គ្រោះជាតិបានចូលរួមការបោះឆ្នោតជាតិអាណត្តិទី ៦ នេះឡើងវិញ បើពុំដូច្នេះទេ លោកសុំឱ្យពលរដ្ឋកុំទៅបោះឆ្នោត ព្រោះវាជាការបោះឆ្នោតបែបប្លន់អំណាចពីពលរដ្ឋប៉ុណ្ណោះ៕
No comments:
Post a Comment