អាស៊ីសេរី
2018-07-18
តំណាងរាស្ត្រគណបក្សប្រជាជនកម្ពុជា និងជាប្រធានក្រុមប្រឹក្សាយុវជនអាស៊ី លោក ហ៊ុន ម៉ានី ថ្លែងក្នុងសន្និសីទសារព័ត៌មានបូកសរុបលទ្ធផលនៃវេទិកាយុវជនអាស៊ី នៅថ្ងៃទី២៧ ខែកុម្ភៈ ឆ្នាំ២០១៦ នារាជធានីភ្នំពេញ។
Photo: RFA
នៅលើគណនីហ្វេសប៊ុក (Facebook) របស់លោក នៅថ្ងៃទី១៨ កក្កដា នេះ លោក ហ៊ុន ម៉ានី បានសរសេរសារថ្កោលទោសលោក សម រង្ស៊ី មេដឹកនាំចលនាសង្រ្គោះជាតិ ដែលកំពុងធ្វើយុទ្ធនាការម្រាមដៃស្អាត អំពាវនាវកុំអោយពលរដ្ឋចេញទៅបោះឆ្នោតថ្ងៃទី២៩ កក្កដាខាងមុខនេះ។
លោក ហ៊ុន ម៉ានី សរសេរ ថា៖ លោក សម រង្ស៊ី! លោកបានប្រើឧបាយកលជាច្រើនក្នុងអាជីពនយោបាយ រួមទាំងចេតនាចុងក្រោយនេះ ដែលប្រើព្រះនាមព្រះមហាក្សត្រមកបោកបញ្ឆោតប្រជាជន។ លោក ហ៊ុន ម៉ានី បន្តថា ទង្វើនេះកាន់តែបន្ទាបស្តង់ដាររបស់លោក សម រង្ស៊ី ឲ្យកាន់តែទាបទៀតហើយ។
ការបង្ហោះសារថ្កោលទោសនេះ គឺបន្ទាប់ពីលោក សម រង្ស៊ី កាលពីថ្ងៃទី១៥ កក្កដា បានបង្ហោះព្រះឆាយាល័ក្ខណ៍របស់ព្រះមហាក្សត្រ ព្រះបាទ នរោត្ដម សីហមុនី អមដោយសារថា៖ «ទោះបីព្រះអង្គជាចំណាប់ខ្មាំងរបស់លោក ហ៊ុន សែន យ៉ាងណាក៏ដោយ ក៏ព្រះអង្គបានអោយដឹងថា ព្រះអង្គមិនយាងទៅបោះឆ្នោតទេ ថ្ងៃ២៩ កក្កដា ២០១៨នេះ សូមបងប្អូនជនរួមជាតិ ធ្វើតាមព្រះអង្គទាំងអស់គ្នា! នៅថ្ងៃបោះឆ្នោតនោះ សូមធ្វើអព្យាក្រឹតដូចព្រះអង្គចុះ!»។
មួយថ្ងៃបន្ទាប់ពីលោក សម រង្ស៊ី បង្ហោះសារនេះ លោក ហ៊ុន ម៉ានី បានប្រតិកម្មម្ដងរួចមកហើយ ដោយសរសេរនៅលើគណនីហ្វេសប៊ុករបស់លោកថាដោយចោទសួរថា តើជារឿងត្រឹមត្រូវទេ ដែលលោក សម រង្ស៊ី យកអង្គព្រះមហាក្សត្រ មកពាក់ព័ន្ធនឹងរឿងនយោបាយ។
ក្នុងកម្មវិធីផ្សាយរបស់វិទ្យុអាស៊ីសេរីកាលពីថ្ងៃទី១៦ កក្កដា លោក សម រង្ស៊ី បានបកស្រាយថា ពលរដ្ឋគ្រប់រូប មានសិទ្ធិប្រកាន់ជំហរអព្យាក្រឹត្យ ដូចព្រះមហាក្សត្រដែរ ដោយមិនចាំបាច់ចេញទៅបោះឆ្នោតទេ ជាពិសេស មិនទៅចូលរួមការបោះឆ្នោតណាមួយ ដែលពុំមានគណបក្ស ដែលខ្លួនអាចពេញចិត្តនៅលើសន្លឹកឆ្នោត។
ចាប់តាំងពីចលនាសង្គ្រោះជាតិរបស់បក្សប្រឆាំងចាប់ផ្ដើមប្រើបណ្ដាញសង្គមហ្វេសប៊ុកធ្វើយុទ្ធនាការជំរុញឲ្យពលរដ្ឋធ្វើពហិការការបោះឆ្នោតមក សហភាពសហព័ន្ធយុវជនកម្ពុជា (ហៅកាត់ថា ស.ស.យ.ក) ដឹកនាំដោយលោក ហ៊ុន ម៉ានី ក៏បានចាប់ផ្ដើមកៀរគរក្រុមយុវជនធ្វើយុទ្ធនាការយ៉ាងសកម្មនៅលើបណ្ដាញសង្គមនេះដែរ ដោយអំពាវនាវឲ្យពលរដ្ឋចេញទៅបោះឆ្នោត។ ក្រៅពីនេះក្រុមយុវជនរបស់លោក ហ៊ុន ម៉ានី ក៏បានចុះទៅឃោសនាដល់មូលដ្ឋាន និងដាក់ភ្នាក់ងារសង្កេតការណ៍បោះឆ្នោតនៅទូទាំងប្រទេសផងដែរ៕
1 comment:
Yang Mech Touv Heuy Ah Oknha Cham Khoy Hun Many?
If Khmer people don't use the rope to pull Ah Runteas Banh Hun Sen down, Khmer people's suffering will continue and the Vietnamization of Cambodia will be completed soon.
Post a Comment