ដោយ ហេង រស្មី
2019-09-28
លោក សឿន ស្រ៊ាង (ឆ្វេង) ដែលអាជ្ញាធរខេត្តកំពង់ចាម ចាប់ខ្លួនកាលពីថ្ងៃទី២៦ ខែកញ្ញា ឆ្នាំ២០១៩ និងកញ្ញា សៅ ឧសភា សកម្មជនគណបក្សសង្គ្រោះជាតិ ខេត្តព្រះសីហនុ ដែលអាជ្ញាធរតាមចាប់ខ្លួន។
រូប៖ ហ្វេសប៊ុកស្នងការដ្ឋាននគរបាលខេត្តកំពង់ចាម និងរូបពលរដ្ឋផ្ដល់ឱ្យ
អាជ្ញាធររបបក្រុងភ្នំពេញ បានចាប់ខ្លួនសកម្មជនគណបក្សសង្គ្រោះជាតិម្នាក់ទៀត នៅក្នុងខេត្តកំពង់ចាម ខណៈសកម្មជន ៨នាក់ទៀតទាំងនៅខេត្តកំពង់ចាម និងនៅខេត្តព្រះសីហនុ បានភៀសខ្លួនរកកន្លែងមានសុវត្ថិភាព ដើម្បីគេចចេញពីដីកាស្វែងរកចាប់ខ្លួនពីតុលាការ។
ខណៈពេលថ្ងៃកំណត់លោក សម រង្ស៊ី វិលចូលមកកាន់មាតុប្រទេសវិញ នៅថ្ងៃទី៩ វិច្ឆិកា កាន់តែខិតចូលមកដល់។ អាជ្ញាធររបបក្រុងភ្នំពេញបានបង្កើនការចាប់ខ្លួន និងចេញដីកាកោះហៅសកម្មជនគណបក្សសង្គ្រោះជាតិឲ្យចូលខ្លួនមកបំភ្លឺនៅក្នុងតុលាការជាបន្តបន្ទាប់។
សមាជិកក្រុមប្រឹក្សាគណបក្សសង្គ្រោះជាតិស្រុកកំពង់សៀម លោកស្រី លី គឹមហ៊ាង ប្រាប់អាស៊ីសេរីថា អាជ្ញាធរមានសមត្ថកិច្ចខេត្តកំពង់ចាម កាលពីថ្ងៃទី២៦ កញ្ញាកន្លងទៅនេះបានចាប់ខ្លួន លោក សឿន ស្រ៊ាង ដោយពុំមានដីកាបង្គាប់ឲ្យចាប់ខ្លួន។
អ្នកស្រីបញ្ជាក់ថាក្រុមគ្រួសារសាច់ញត្តិនៅមិនទាន់បានទទួលដំណឹងថា លោក សឿន ស្រ៊ាង ត្រូវសមត្ថកិច្ចយកទៅឃុំឃាំងនៅកន្លែងណាទេ ហើយក៏មិនដឹងពីសុវត្ថិភាពរបស់លោកយ៉ាងណាដែរ៖ «ឃើញទង្វើទាំងនេះវាអយុត្តិធម៌ណាស់សម្រាប់ជនរងគ្រោះ។ ចង់និយាយថា អ្នកដឹកនាំ អ្នកដែលប្រព្រឹត្តអំពើហ្នឹងគាត់អត់មានគិតថា អ្វីជាអំពើយង់ឃ្នងដល់កម្រិតណាទេ។ តែសម្រាប់ខ្ញុំវិញឈឺចាប់ណាស់ ចាប់មនុស្សទៅទាំងអយុត្តិធម៌ដោយគ្មានកំហុសអ្វីសោះ»។
អាស៊ីសេរី មិនអាចសុំការបញ្ជាក់ពីស្នងការប៉ូលិសខេត្តកំពង់ចាម លោក ឯម កុសល ជុំវិញការចាប់ខ្លួន សកម្មជនគណបក្សប្រឆាំងនេះទេ កាលពីថ្ងៃទី២៧ ខែកញ្ញា ដោយសារលោកប្រាប់ថា ជាប់កិច្ចការ៖ «សុំទោសខ្ញុំកំពុងជាប់ធ្វើការនៅកន្លែងបន្តិច»។
ទោះជាយ៉ាងនេះក្តី សាលាដំបូងខេត្តកំពង់ចាម កាលពីថ្ងៃទី២៦ កញ្ញា បានចេញសេចក្ដីប្រកាសព័ត៌មាន ដោយចោទប្រកាន់ លោក សឿន ស្រ៊ាង ក្រុមយុវជនគាំទ្រគណបក្សសង្គ្រោះជាតិពីបទ «រួមគំនិតក្បត់» តាមមាត្រា ៤៥៣ នៃក្រមព្រហ្មទណ្ឌ។
ការចោទប្រកាន់លើសកម្មជនគណបក្សសង្គ្រោះជាតិនេះ ដោយសារតុលាការខេត្តកំពង់ចាមលើកហេតុផលថា លោក សឿង ស្រ៊ាង ជាប់ពាក់ព័ន្ធនឹងការកៀរគរ ប្រជាពលរដ្ឋនៅស្រុកកំពង់សៀម និងស្រុកចម្ការលើ មកកាន់ទីក្រុងភ្នំពេញដើម្បីចូលរួមគាំទ្រគម្រោងវិលត្រឡប់មកកាន់មាតុប្រទេសវិញរបស់លោក សម រង្ស៊ី នៅថ្ងៃទី៩ វិច្ឆិកាខាងមុខនេះ ។
ការចាប់ខ្លួនសកម្មជនគណបក្សសង្គ្រោះជាតិនៅក្នុងខេត្តកំពង់ចាម នេះបានកើតមានឡើង ស្របពេលដែលសកម្មជននៅស្រុកកងមាសខេត្តនេះ ៧នាក់ទៀត កំពុងរត់ភៀសខ្លួនរកកន្លែងសុវត្ថិភាព កាលពីថ្ងៃទី២៧ កញ្ញា។ ការរត់គេចខ្លួននេះ គឺបន្ទាប់ពីពួកគេទទួលដីកាពីតុលាការឱ្យចូលបំភ្លឺ ពាក់ព័ន្ធនឹងការជួបប្រជុំគ្នាសម្ដែងមតិជំរុញរបបក្រុងភ្នំពេញឱ្យស្ដារប្រជាធិបតេយ្យឡើងវិញ ដើម្បីរក្សាប្រព័ន្ធពន្ធ EBA របស់សហភាពអឺរ៉ុប និងគាំទ្រឱ្យប្រធានស្ដីទីគណបក្សសង្គ្រោះជាតិលោក សម រង្ស៊ី វិលចូលស្រុកវិញ នៅពេលខាងមុខ។
សមាជិកក្រុមប្រឹក្សាស្រុកកងមាសជាប់ឆ្នោតគណបក្សសង្គ្រោះជាតិ លោក ឈួន កុសល ប្រាប់អាស៊ីសេរី កាលពីរសៀលថ្ងៃទី២៧ កញ្ញាថា សកម្មជនបក្សរបស់លោកទាំង ៧រូបក្នុងនោះ ក៏មានស្ត្រីម្នាក់ដែរ បានរត់ភៀសខ្លួនទៅដល់កន្លែងមានសុវត្ថិភាពហើយ គឺមួយថ្ងៃបន្ទាប់ពីពួកគេទទួលដីការបស់តុលាការ។
ចំណែកឯសកម្មជនម្នាក់ទៀត នៅក្នុងខេត្តព្រះសីហនុ បានភៀសខ្លួនរកកន្លែងមានសុវត្ថិភាពដែរ ដើម្បីគេចចេញពីដីកាស្វែងរកចាប់ខ្លួនពីតុលាការ។
ចៅក្រមស៊ើបសួរសាលាដំបូងរាជធានីភ្នំពេញ លោក កូយ សៅ កាលពីថ្ងៃទី១៦ កញ្ញា កន្លងទៅនេះបានចេញដីកាបង្គាប់ឲ្យចាប់ខ្លួនកញ្ញា សៅ ឧសភា អាយុ ២៥ឆ្នាំ ពីបទ «រួមគំនិតក្បត់ និងញុះញង់ឲ្យមានភាពវឹកវរដល់សង្គម» ដែលបានប្រព្រឹត្តកាលពីអំឡុងឆ្នាំ២០១៩។
សមាជិកប្រតិបត្តិគណបក្សសង្គ្រោះជាតិ ដែលកំពុងភៀសខ្លួននៅក្រៅប្រទេស លោក គង់ ស៊ីវង្ស មានប្រសាសន៍ថា កញ្ញា សៅ ឧសភា បានទៅដល់ទីតាំងមានកន្លែងសុវត្ថិភាពហើយ។
ប្រធានចលនាយុវជនCNRPស្រុកព្រៃនប់ ខេត្តព្រះសីហនុ និងជាសកម្មជនបរិស្ថាន មាតាធម្មជាតិ កញ្ញា សៅ ឧសភា ប្រាប់អាស៊ីសេរីថា ការចោទប្រកាន់មកលើកញ្ញាគឺជាអំពើអយុត្តិធម៌ ដែលមិនអាចទទួលយកបាន៖ «ចំពោះដីកាមួយនេះវាមានភាពអយុត្តិធម៌ខ្លាំងណាស់ សម្រាប់ខ្ញុំជាប្រជាពលរដ្ឋមួយរូបដែលខ្ញុំមិនបានប្រព្រឹត្តិបទល្មើសដូចដែលគាត់ចោទ។បទរួមគំនិតក្បត់ បទញុះញង់អីហ្នឹង គឺបើនិយាយពីសកម្មភាពរបស់ខ្ញុំគឺមិនមានដូចអ្វីដែលគាត់ចោទហ្នឹងទេ។ ខ្ញុំក៏សំណូមពរដល់អាជ្ញាធរដែលចេញដីកាហ្នឹងសូមឲ្យគាត់ក្រឡេកមកមើលសកម្មភាពរបស់ខ្ញុំម្ដងទៀត ហើយនឹងក្រឡេកទៅមើលដីការបស់គាត់ម្ដងទៀតថាការចេញដីកាចាប់ខ្លួនខ្ញុំវាត្រឹមត្រូវស្របច្បាប់ដែរឬអត់»។
កញ្ញា សៅ ឧសភា ត្រូវសមត្ថកិច្ចខេត្តព្រះសីហនុឃាត់ខ្លួនម្ដងរួចហើយ កាលថ្ងៃទី២៣ សីហាកន្លងទៅ ទាក់ទងករណីប្រើហ្វេសប៊ុក (facebook) បង្ហោះសារជេរប្រមាថមេដឹកនាំរបបក្រុងភ្នំពេញ។ ប៉ុន្តែក្រោយការសាកសួរ និងស្រាវជ្រាវសមត្ថកិច្ចបានអនុញ្ញាតឲ្យកញ្ញាត្រឡប់មកផ្ទះវិញ។
គិតត្រឹមថ្ងៃទី២៨ កញ្ញា អាជ្ញាធររបបក្រុងភ្នំពេញ បានចាប់ខ្លួនសកម្មជនបក្សប្រឆាំង នៅតាមមូលដ្ឋានសរុប ២៩នាក់ ដាក់ក្នុងពន្ធនាគារ ហើយបានកោះហៅ និងចោទប្រកាន់សកម្មជនបក្សប្រឆាំងកើនដល់ ១៥៨នាក់ហើយ។ ក្រៅពីនេះ សកម្មជនបក្សប្រឆាំងមួយចំនួនទៀត ក៏កំពុងទទួលរងការគំរាមកំហែង និងរងការវាយដំតាមរូបភាពផ្សេងៗ ទៀត។
ប្រធានក្រុមសមាជិកសភាអាស៊ានដើម្បីសិទ្ធិមនុស្ស ហៅកាត់ថា APHR លោក ឆាល សាន់ទីយ៉ាហ្គោ (Charles Santiago) ចាត់ទុកការធ្វើទុក្ខបុកម្នេញលើសកម្មជនគណបក្សប្រឆាំងនេះថា ជាការគំរាមកំហែង ក្នុងហេតុផលនយោបាយ នៃរបបផ្ដាច់ការរបស់លោក ហ៊ុន សែន ប៉ុណ្ណោះ។ លោកស្នើឲ្យរបបនេះ កុំរារាំងដំណើរវិលត្រឡប់ដោយសន្តិវិធីរបស់លោក សម រង្ស៊ី និងមន្ត្រីបក្សប្រឆាំង ដើម្បីប្រយោជន៍ប្រជាធិបតេយ្យ។ លោកព្រមានថា កេរ្តិ៍ឈ្មោះរបស់កម្ពុជា នឹងបន្តអាក្រក់ នៅក្នុងក្រសែភ្នែកសហគមន៍អន្តរជាតិ បើស្ថានភាពបច្ចុប្បន្ននៅតែមិនប្រសើរ៕
No comments:
Post a Comment