ដោយ មួង ណារ៉េត
2019-09-26
អ្នករាយការណ៍ពិសេសអង្គការសហប្រជាជាតិស្ដីពីស្ថានភាពសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) (រូបកណ្ដាល) ជួបរដ្ឋមន្រ្តីក្រសួងការបរទេស លោក ប្រាក់ សុខុន កាលពីថ្ងៃទី៧ ខែឧសភា ឆ្នាំ២០១៩។
Photo courtesy of Special Rapporteur Cambodia
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) អំពាវនាវឱ្យរដ្ឋាភិបាលស្ដារសិទ្ធិមនុស្ស និង ប្រជាធិបតេយ្យឡើងវិញ ដោយយកប្រជារាស្ត្រជាធំ។
នៅក្នុងសេចក្ដីថ្លែងការណ៍ កាលពីថ្ងៃទី២៥ ខែកញ្ញា នេះ អ្នកស្រី រ៉ូណា ស្មីត បានលើកឡើងអំពីបញ្ហាសិទ្ធិប្រជាពលរដ្ឋ និងសិទ្ធិនយោបាយ ដែលរងការរឹតត្បិត រួមទាំងការរម្លាយគណបក្សសង្គ្រោះជាតិ។ អ្នកស្រីបញ្ជាក់ថា តាមនិយមន័យ ពាក្យថា សិទ្ធិមនុស្ស គឺដើម្បីមនុស្ស មិនមែនដើម្បីនយោបាយទេ។ អ្នកស្រីបន្ថែមថា សន្លឹកឆ្នោត និងសំឡេងប្រជាពលរដ្ឋម្ចាស់ឆ្នោត ៤២ ភាគរយ ដែលបោះឆ្នោតគាំទ្រគណបក្សសង្គ្រោះជាតិ ក្នុងការបោះឆ្នោតឃុំសង្កាត់ ត្រូវបានគេបំបាត់ចោល និងមិនទាន់ផ្ដល់ឱ្យមកវិញនៅឡើយទេ។
អ្នកស្រីថា ពេលនេះ គឺដល់ពេលដែលត្រូវគិតគូរឡើងវិញ អំពីវិធីដោះស្រាយបញ្ហាសិទ្ធិមនុស្ស និង សេរីភាពនៅកម្ពុជា ដើម្បីធានាឱ្យប្រជាពលរដ្ឋខ្មែរគ្រប់រូប ទទួលបានសិទ្ធិទាំងនេះដូចគ្នា។
អ្នកស្រី រ៉ូណា ស្ម៊ីត ក៏បានអំពាវនាវឱ្យរបបលោក ហ៊ុន សែន ដោះលែងប្រធានគណបក្សសង្គ្រោះជាតិ លោក កឹម សុខា ពីការឃុំខ្លួន។
អាស៊ីសេរី មិនទាន់អាចសុំការឆ្លើយតបពីខាងរបបលោក ហ៊ុន សែន ជុំវិញសាររបស់មន្ត្រីអង្គការសហប្រជាជាតិនេះនៅឡើយទេ។ ប៉ុន្តែ កន្លងមក របបលោក ហ៊ុន សែន ថ្លែងសារជាលក្ខណៈស៊ីសង្វាក់គ្នា ថាចំណាត់ការលើសំឡេងប្រឆាំង គឺធ្វើស្របច្បាប់កម្ពុជា ដើម្បីការពារសន្តិភាព។
ប៉ុន្តែ សហគមន៍អន្តរជាតិ រួមទាំងសហភាពអឺរ៉ុបផង សុទ្ធតែថ្កោលទោសរបបនេះជុំទិស ជុំវិញការមិនព្រមស្ដារសិទ្ធិមនុស្ស និងប្រជាធិបតេយ្យឡើងវិញ។ សហភាពអឺរ៉ុប នឹងចេញរបាយការណ៍បឋម ជុំវិញស្ថានភាពសិទ្ធិមនុស្សនេះ នៅខែវិច្ឆិកា ខាងមុខ ក្នុងផ្នែកនៃនីតិវិធីព្យួរការអនុគ្រោះពន្ធ EBA ពីកម្ពុជា ប្រសិនបើស្ថានភាពសិទ្ធិមនុស្ស និង ប្រជាធិបតេយ្យ នៅតែមិនប្រសើរ៕
No comments:
Post a Comment