ដោយ មួង ណារ៉េត
2019-10-03
អ្នកស្រី មូរ សុខហួរ អនុប្រធានគណបក្សសង្គ្រោះជាតិ។
រូប៖ សន ចាន់រដ្ឋា/RFA
មន្រ្តីជាន់ខ្ពស់គណបក្សសង្គ្រោះជាតិ អំពាវនាវឲ្យអ្នកគាំទ្រគណបក្សប្រឆាំងទាំងអស់ បន្តក្រោកឡើង ទាមទារប្រជាធិបតេយ្យ និងការតស៊ូដើម្បីការផ្លាស់ប្ដូរជាវិជ្ជមាននៅកម្ពុជា ចៀសវាងចាញ់កលឃោសនារបស់របបលោក ហ៊ុន សែន ឲ្យចូលសារភាព ទាំងមិនបានប្រព្រឹត្តអ្វីខុសទាល់តែសោះបែបនេះ។
អនុប្រធានគណបក្សសង្គ្រោះជាតិអ្នកស្រី មូរ សុខហួរ ចាត់ទុកសាររបស់លោក ហ៊ុន សែន និង តុលាការនៃរបបក្រុងភ្នំពេញ ដែលអំពាវនាវឲ្យសកម្មជន និង ថ្នាក់ដឹកនាំនៃគណបក្សសង្គ្រោះជាតិ ចូលសារភាពនោះថា ជាល្បិចចាស់គំរឹល ដែលជាកម្អែលរបបកុម្មុយនិស្តខ្មែរក្រហម បន្សល់ទុកក្នុងផ្នត់គំនិតអតីតកម្មាភិបាលខ្មែរក្រហម ដូចជា លោក ហ៊ុន សែន នេះតែប៉ុណ្ណោះ៖ «គ្មានអ្វីខុសពីរបបខ្មែរក្រហមទេ! សារភាពហើយយកទៅសម្លាប់ចោល។ ទោះបីសារភាពយ៉ាងណាក៏ដោយ បើគ្មានយុត្តិធម៌ ក៏សង្គមយើងនៅតែមានការបាក់បែក នៅតែមានការឈឺចាប់។ ដូច្នេះគ្មានអ្វីត្រូវសារភាពទេ មានតែការបន្តការតស៊ូ ការបញ្ចេញមតិ ដើម្បីការពារលទ្ធិប្រជាធិបតេយ្យ»។
ប្រតិកម្មរបស់មន្ត្រីជាន់ខ្ពស់គណបក្សប្រឆាំងរូបនេះ ធ្វើឡើងក្រោយតុលាការនៃរបបលោក ហ៊ុន សែន ក្នុងខេត្តចំនួនបី មានខេត្តកំពង់ចាម ស្វាយរៀង និងប៉ៃលិន បានចេញសេចក្ដីប្រកាសព័ត៌មានជាបន្តបន្ទាប់ កាលពីសប្ដាហ៍កន្លងទៅ ចោទប្រកាន់សកម្មជនគណបក្សសង្គ្រោះជាតិ ៦នាក់ ដោយបង្កប់សារអំពាវនាវឲ្យមន្ត្រី និងសកម្មជនបក្សប្រឆាំង ដែលរងការចោទប្រកាន់ពីបទ “រួមគំនិតក្បត់” ទាំងនោះ ចូលខ្លួនមកសារភាពឲ្យទាន់ពេលវេលា ដើម្បីជាថ្នូរនឹងការលើកលែងឲ្យរួចទោស។
នៅដើមសប្ដាហ៍នេះ ពោលគឺក្រោយសារអំពាវនាវចេញពីតុលាការលោក ហ៊ុន សែន ដែលជាមេដឹកនាំផ្នែកនីតិប្រតិបត្តិ ក៏បានថ្លែងសារដូចគ្នាទៅនឹងស្ថាប័នតុលាការដែរ។ លោក ហ៊ុន សែន បានចោទប្រកាន់សកម្មជនគណបក្សសង្គ្រោះជាតិ ដែលគាំទ្រដំណើរមាតុភូមិនិវត្តន៍របស់លោក សម រង្ស៊ី ថា ចូលរួមគំនិតក្បត់ ដើម្បីធ្វើរដ្ឋប្រហារ និងព្រមានចាត់ការ បើមិនចូលសារភាព៖ «ហើយអ្នកនៅក្នុងស្រុក កុំព្រហើន! កុំព្រហើន! ហើយបើសិនជាអ្នកបែរជាជ្រុលចូលរួម អ្នកសារភាពឲ្យត្រង់ នឹងរួចទោស»។
សារអំពាវនាវឲ្យសកម្មជនគណបក្សសង្គ្រោះជាតិសារភាព និងចុះចូលនេះ របបលោក ហ៊ុន សែន ធ្លាប់ធ្វើដែរ កាលពីក្រោយរម្លាយគណបក្សសង្គ្រោះជាតិ។ ប៉ុន្តែ មិនបានជោគជ័យទេ។ សមាជិកក្រុមប្រឹក្សាជាប់ឆ្នោតឃុំសង្កាត់របស់គណបក្សសង្គ្រោះជាតិ នៅទូទាំងប្រទេស សុខចិត្តរត់ភៀសខ្លួនទៅក្រៅប្រទេស ឬ បន្តជីវភាពជាប្រជាពលរដ្ឋសាមញ្ញ ជាជាងចុះចូលជាមួយគណបក្សកាន់អំណាច ដែលបានរម្លាយគណបក្សខ្លួន។ ជាងនេះទៅទៀត ភាគច្រើនលើសលប់ នៃមន្ត្រីជាន់ខ្ពស់គណបក្សសង្គ្រោះជាតិទាំង ១១៨នាក់ ដែលរងការហាមឃាត់សិទ្ធិនយោបាយ មិនព្រមចុះចូល ឬសុំសិទ្ធិនយោបាយ តាមការអំពាវនាវរបស់លោក ហ៊ុន សែន នោះដែរ។
អ្នកស្រី មូរ សុខហួរ ថា នោះជាភាពខ្លាំង និង រឹងប៉ឹងរបស់មន្ត្រី និងសកម្មជនបក្សប្រឆាំង ដែលនៅតស៊ូ ក្រាញននាល មិនក្បត់ឆន្ទៈប្រជាពលរដ្ឋ និង ការបន្តហ៊ាននិយាយការពិត៖ «ខ្ញុំសុំយកឱកាសនេះ ថ្លែងអំណរគុណ ថ្លែងនូវការកោតសរសើរដល់ថ្នាក់ដឹកនាំនៅមូលដ្ឋាន នៃគណបក្សសង្គ្រោះជាតិ ក៏ដូចជា ប្រជាពលរដ្ឋទាំងឡាយ ដែលហ៊ាននិយាយការពិត ហើយមិនចុះញ៉ម មិនត្រូវការឲ្យសារភាពទេ»។
រហូតមកដល់ថ្ងៃទី៤ ខែតុលានេះ អាជ្ញាធរនៃរបបលោក ហ៊ុន សែន បានចាប់ និងឃុំខ្លួនមន្ត្រីបក្សប្រឆាំងចំនួន ៣០នាក់ និងបានចេញដីកាកោះ ឬចោទប្រកាន់សកម្មជនបក្សនេះចំនួន ១៦៥នាក់ហើយ ស្របពេលដែលមន្ត្រី និងសកម្មជនមូលដ្ឋាន របស់បក្សនេះជាច្រើនផ្សេងទៀត កំពុងរត់ភៀសខ្លួន ដើម្បីសុវត្ថិភាព។
អ្នកវិភាគនយោបាយបណ្ឌិត ឡៅ ម៉ុងហៃ មិនភ្ញាក់ផ្អើលនឹងសាររបស់របបលោក ហ៊ុន សែន នោះទេ ព្រោះវិធីសាស្រ្តនេះ មានអនុវត្តជាពិសេសក្នុងរបបកុម្មុយនិស្ត។ ទៅជាយ៉ាងនេះក្តី លោកចាត់ទុកថា នេះជាការបង្ខិតបង្ខំមួយ រួមផ្សំនឹងការគំរាមកំហែងដាក់ទោសទណ្ឌ បើមិនព្រមចូលសារភាព។ បណ្ឌិត ឡៅ ម៉ុងហៃ ថា ទម្លាប់បែបនេះ មិនគួរយកមកអនុវត្តទាល់តែសោះ ព្រោះវាបង្ហាញឲ្យឃើញការប្រព្រឹត្តខុសរបស់អាជ្ញាធរទៅវិញ៖ «នេះគឺជាទម្លាប់មួយអាក្រក់! ព្រោះបង្ខំគ្នាឲ្យទទួលកំហុស មុននឹងរកឃើញថា គ្នាមានកំហុស។ នេះជាការឆ្គាំឆ្គង ឬខុសពីសំណាក់អាជ្ញាធរ»។
ចំនួនមនុស្សរបស់បក្សប្រឆាំង ដែលរងការធ្វើទុក្ខបុកម្នេញនេះ បានកើនឡើងជាលំដាប់ និងយ៉ាងគំហុកក្នុងរយៈពេលមួយខែចុងក្រោយនេះ ជាពិសេសក្រោយលោក សម រង្ស៊ី ប្រកាសយកថ្ងៃទី៩ ខែវិច្ឆិកា ជាថ្ងៃសន្យាវិលចូលស្រុកខ្មែរវិញ។ ថ្មីៗនេះ ស្របពេលដែលសហភាពអឺរ៉ុប នៅសល់តែជាងមួយខែទៀត នឹងសរសេររបាយការណ៍បឋម ស្ដីពីស្ថានភាពសិទ្ធិមនុស្សនៅកម្ពុជា មុននឹងសម្រេចព្យួរការអនុគ្រោះពន្ធ EBA ស្រាប់តែវិធីសាស្ត្រអំពាវនាវឲ្យមនុស្ស ដែលតុលាការមិនទាន់សម្រេចទោស ថាមានកំហុសនៅឡើយនោះ ចូលសារភាពទោសកំហុសខ្លួន ជាថ្នូរនឹងការរួចទោសទៅវិញ។
បណ្ឌិត ឡៅ ម៉ុងហៃ ចាត់ទុកការអំពាវនាវឲ្យចូលមកសារភាពជាថ្នូរ នឹងរួចទោសនេះ ថា អាចជាចេតនារបស់របបលោក ហ៊ុន សែន ក្នុងការកាត់បន្ថយភាពខ្ចរខ្ចាយ នៃអំពើធ្វើទុក្ខបុកម្នេញលើមន្ត្រីបក្សប្រឆាំង កុំឲ្យវាខ្លាំងពេក និង កាត់បន្ថយការទិតៀនប្រព័ន្ធតុលាការខ្មែរ។ ម្យ៉ាងទៀត លោកលើកឡើងថា តុលាការក៏ពិបាករកភស្តុតាងឲ្យចំបទចោទប្រកាន់ ដែលមានចែងក្នុងក្រមព្រហ្មទណ្ឌកម្ពុជានោះដែរ៕
No comments:
Post a Comment