ដោយ ហេង រស្មី
2020-12-04
អ្នកជំនាញកសិកម្មស្វាគមន៍កម្ពុជានាំចេញផ្លែស្វាយលើកដំបូងទៅប្រទេសចិន ក្រុមកម្មករនៅក្រុមហ៊ុន ហ៊ុន ទី កំពុងវេចខ្ចប់ផ្លែស្វាយសម្រាប់នាំចេញទៅប្រទេសចិន ថ្ងៃទី៣ ខែធ្នូ ឆ្នាំ២០២០។
រូប៖ ហ្វេសប៊ុកក្រសួងកសិកម្ម
កម្ពុជាបាននាំចេញផ្លែស្វាយខ្ចីស្រស់ ជាលើកដំបូងទៅកាន់ប្រទេសចិន កាលពីថ្ងៃទី៣ ខែធ្នូ តាមរយៈក្រុមហ៊ុនឯកជនមួយដែលគ្រប់គ្រងដោយជនជាតិចិន។អ្នកជំនាញកសិកម្មស្វាគមន៍ចំពោះដំណឹងនេះ ប៉ុន្តែស្នើឱ្យក្រសួងកសិកម្មគួរ តែបង្កើតសមាគមប្រមូលទិញស្វាយពីកសិករនៅក្នុងស្រុក ដើម្បីឱ្យពួកគេអាចទ្រទ្រង់សេដ្ឋកិច្ចគ្រួសារ។
អ្នកជំនាញកសិកម្មនិង ជាមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន លោកបណ្ឌិត យ៉ង សាំងកុមារ មានប្រសាសន៍ថា ការនាំផ្លែស្វាយចេញពីកម្ពុជា ទៅកាន់ប្រទេសចិន គឺជារឿងល្អ ដោយសារតែកន្លងមក ផ្លែស្វាយភាគច្រើននៅកម្ពុជាមានការលំបាកក្នុងការរកទីផ្សារសម្រាប់លក់ចេញ ហើយម៉្យាងវិញទៀត រដូវប្រមូលផលផ្លែស្វាយជិតឈានមកដល់ ដែលជាឱកាសមួយសម្រាប់ដែលកសិករមួយចំនួនបានទទួលផលចំពោះកសិផលរបស់ខ្លួន។
លោកបន្ថែមថា ដើម្បីនាំចេញផ្លែស្វាយទៅប្រទេសចិនអោយតាមកម្រិតស្តង់ដារ កសិករគួរតែចងក្រង ជាសមាគម ហើយក្រសួងកសិកម្មត្រូវគាំទ្រដល់សមាគម ដើម្បីងាយស្រួលក្នុងការប្រមូលផ្ដុំ និងការចរចាជាមួយក្រុមហ៊ុន។ លោកថា នៅកម្ពុជាកាលពីឆ្នាំ២០១៩ មានសល់ផ្លែស្វាយយ៉ាងច្រើនសន្ធឹកសន្ធាប់ ដែលកសិករពិបាកក្នុងការរកទីផ្សារសម្រាប់នាំចេញ៖ «ដំណាំស្វាយគឺជាដំណាំមួយមានសក្ដានុពលខ្ពស់សម្រាប់សេដ្ឋកិច្ចកម្ពុជា ជាពិសេសបើយើងមានឱកាសនាំចេញទៅទីផ្សារចិន ជប៉ុន កូរ៉េ។ ប៉ុន្តែអ្វីដែលសំខាន់គឺរដ្ឋាភិបាលជាពិសេសក្រសួងកសិកម្ម ត្រូវមានគោលនយោបាយគាំទ្រដល់សមាគមជាតិដែលទាក់ទងការដាំស្វាយ»។
ការលើកឡើងរបស់អ្នកជំនាញផ្នែកកសិកម្មនេះ គឺក្រោយពេលគេហទំព័ររបស់ក្រសួងកសិកម្ម បានផ្សាយកាលពីថ្ងៃទី៣ ធ្នូថា ក្រុមហ៊ុនឯកជនដែលគ្រប់គ្រងដោយជនជាតិចិនមួយឈ្មោះ ក្រុមហ៊ុន ហ៊ុន ទី បានចាប់ផ្ដើមនាំចេញផ្លែស្វាយស្រស់ជាលើកដំបូងពីកម្ពុជាទៅកាន់ប្រទេសចិន បន្ទាប់ពីបានបោះទុនវិនិយោគលើការអភិវឌ្ឍន៍វិស័យកសិកម្ម ការលាងសម្អាត ការវេចខ្ចប់ ការបង្កើតឃ្លាំងស្តុកត្រជាក់ និងការនាំចេញផលិតផលកសិកម្មនៅកម្ពុជាកាលពីឆ្នាំ២០១៧។
គេហទំព័ររបស់ក្រសួងកសិកម្ម មិនបានបញ្ជាក់ចំនួនផ្លៃស្វាយដែលកម្ពុជានាំចេញទៅកាន់ប្រទេសចិនជាលើកដំបូងមានចំនួនប៉ុន្មាននោះទេ គ្រាន់តែបញ្ជាក់ថា មានចំនួនមួយកុងតឺន័រប៉ុណ្ណោះ។
អាស៊ីសេរីមិនអាចទាក់ទងមន្ត្រីក្រុមហ៊ុន ហ៊ុន ទី ដែលមានទីតាំងនៅតាមបណ្ដោយផ្លូវជាតិលេខ៣ បានទេ កាលពីថ្ងៃទី៣ ធ្នូ។ ចំណែកអ្នកនាំពាក្យក្រសួងកសិកម្មលោក ស្រី វុទ្ធី នៅពេលទូរស័ព្ទចូលជាច្រើនដងគ្មានអ្នកទទួល។
ប៉ុន្តែ ក្រសួងកសិកម្ម និងអគ្គរដ្ឋបាលគយរបស់ប្រទេសចិន កាលពីថ្ងៃទី៩ ខែមិថុនា ឆ្នាំ២០២០ បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ពីកម្ពុជាទៅកាន់ប្រទេសចិន ដែលរំពឹងថា ឱ្យបានដល់ ៥០ម៉ឺនតោន នៅក្នុងមួយឆ្នាំ។
ទាក់ទិននឹងបញ្ហានាំផ្លែស្វាយស្រស់ទៅកាន់ប្រទេសចិននេះ។ កសិករដាំស្វាយមួយរូបនៅក្នុងខេត្តកំពត លោកស្រី សេង គូន មានប្រសាសន៍ថា លោកស្រីបានដាំស្វាយប្រមាណជាង ៣៣៥ដើម កាលពី ៥ឆ្នាំមុន ហើយឥឡូវនេះផ្លែស្វាយកំពុងប្រមូលផល តែមិនសូវបានល្អដូចឆ្នាំ២០១៩ ទេ។
លោកស្រីបានបញ្ជាក់ថា កន្លងមកមិនដែលមានក្រុមហ៊ុនរបស់ប្រទេសចិនមកទាក់ទងទិញផ្លែស្វាយស្រស់ពីលោកស្រីទេ គឺមានតែឈ្មួញរកស៊ីក្នុងស្រុកមកទិញផ្លែស្វាយដើម្បីទៅលក់បន្តតែប៉ុណ្ណោះ។
លោកស្រីបន្ថែមថា បើរដ្ឋាភិបាលជួយបង្កើតសមាគមជាតិ ដើម្បីប្រមូលទិញផ្លែស្វាយស្រស់ពីកសិករនោះ វាល្អប្រសើរដោយសារអាចលក់បានថ្លៃជាងឈ្មួញនៅក្នុងស្រុក៖ «បើគេមកទិញ វាស្រួលលក់។ឆ្នាំទៅដោយសារបញ្ហាកូវីដ ស្វាយជ្រុះចោលពេញណាពេញណីទាំងអស់»។
អគ្គនាយកដ្ឋានកសិកម្មឲ្យដឹងថា អគ្គនាយកដ្ឋានកសិកម្ម បានទទួលពាក្យស្នើសុំចុះបញ្ជីចម្ការស្វាយ និងទីតាំងវេច ខ្ចប់សម្រាប់នាំចេញផ្លែស្វាយស្រស់ពីកម្ពុជាទៅកាន់ប្រទេសចិនចំនួន ៤៨ក្រុមហ៊ុន ម្ចាស់ចម្ការ និងសមាគមកសិកម្ម។
ដើម្បីបំពេញតាមលក្ខខណ្ឌតម្រូវភូតគាមអនាម័យឱ្យបានល្អ សម្រាប់ការនាំចេញផ្លែស្វាយស្រស់ពីកម្ពុជាទៅកាន់ប្រទេសចិន អគ្គនាយកដ្ឋានកសិកម្ម កំពុងអនុវត្តសកម្មភាពមួយចំនួននៅតាមទីតាំងចម្ការដែលបានដាក់ពាក្យស្នើសុំ ឱ្យបំពេញបាននូវលក្ខខណ្ឌតម្រូវភូតគាមអនាម័យរបស់ប្រទេសចិន។
សកម្មភាពទាំងនោះរួមមាន បណ្ដុះបណ្ដាលបច្ចេកទេសស្ដីពីការអនុវត្តកសិកម្មល្អ បណ្ដុះបណ្ដាលបច្ចេកទេសស្ដីពីការគ្រប់គ្រងសមាសភាពចង្រៃ បណ្ដុះបណ្ដាលបច្ចេកទេសស្ដីពីលក្ខខណ្ឌតម្រូវភូតគាមអនាម័យសម្រាប់នាំចេញផ្លែស្វាយស្រស់ និងអង្កេតតាមដាន និងរៀបចំប្រព័ន្ធព្យាករណ៍សមាសភាពចង្រៃនៅតាមចម្ការដែលបានចុះបញ្ជីនាំចេញ ព្រមទាំងត្រួតពិនិត្យគុណភាព និងសុវត្ថិភាពដំណាំស្វាយ។
គិតត្រឹមថ្ងៃទី១៧ ខែវិច្ឆិកា ឆ្នាំ២០២០ នេះ មានក្រុមហ៊ុនចំនួន ៤ កំពុងប្រតិបត្តិការសាងសង់ទីតាំងវេច ខ្ចប់ ដោយបំពាក់ហេដ្ឋារចនាសម្ព័ន្ធសម្រាប់កម្ចាត់ពងរុយចោះផ្លែស្វាយ។ ក្រុមហ៊ុនទាំងនោះមានទីតាំងនៅស្រុកភ្នំស្រួច ខេត្តកំពង់ស្ពឺ ស្រុកកំពង់សីលា ខេត្តព្រះសីហនុ និងខណ្ឌសែនសុខ ក្រុងភ្នំពេញ៕
Mango_for_export_1.jpg ផ្លែស្វាយនៅក្រុមហ៊ុន ហ៊ុន ទី កម្ពុជា ត្រូវបានវេចខ្ចប់ សម្រាប់នាំទៅប្រទេសចិន នៅថ្ងៃទី៣ ខែធ្នូ ឆ្នាំ២០២០។ រូប៖ ហ្វេសប៊ុកក្រសួងកសិកម្
No comments:
Post a Comment