លោក កឹម សុខា ផ្ញើសារ​តាម​មេធាវី ថា​កុំយក​ឈ្មោះ​លោក​ទៅ​ពាក់ព័ន្ធនឹង​​បំណង​បង្កើត​រដ្ឋាភិបាល​ក្រៅ​ប្រទេស

ដោយ សុជីវី
2021-08-08 rfa
 

លោក កឹម សុខា ប្រធាន​​គណបក្ស​​សង្គ្រោះជាតិ​ ដែលកំពុងជាប់ក្តីក្តាំនៅតុលាការពីបទក្បត់ជាតិ។
រូប៖ Provided photo


ប្រធាន​​គណបក្ស​សង្គ្រោះ​ជាតិ​​លោក​ កឹម​ ​សុខា​ ​បាន​ផ្ញើ​សារ​តាមរយៈ​មេធាវី​​របស់​​លោក​​មួយ​​រូប​ ​​ថា​​កុំ​យក​ឈ្មោះ​​លោក​​ទៅ​​ប្រឡាក់ប្រឡូស​​នឹង​​បំណង​​បង្កើត​​រដ្ឋាភិបាល​​ក្រៅ​​ប្រទេស​ ​ព្រោះ​​លោក​​មិន​​ពាក់ព័ន្ធ​ ​មិន​​គាំទ្រ​ ​និង​​ចូលរួម​​ក្នុង​​ចលនា​​នោះ​​ទេ​។​

សារ​នេះ​​ធ្វើឡើង​តាមរយៈ​លោក​​មេធាវី​ ​ចាន់​ ចេន​ ​កាលពី​ថ្ងៃ​ទី​៧​ ​ខែ​​សីហា​ ​ដោយ​មេធាវី​ ​និង​​ជា​​សហការី​របស់​ប្រធាន​បក្ស​ប្រឆាំង​រូប​នេះ​​បញ្ជាក់​ថា​ ​លោក​ កឹម​ ​សុខា​ ​មិន​​ត្រឹមតែ​មិន​គាំទ្រ​ការ​បង្កើត​រដ្ឋាភិបាលបង្រួបបង្រួម​ជាតិ​នោះ​​ទេ​ ​លោក​ថែមទាំង​មិន​គាំទ្រ​ការ​បង្កើត​គណបក្ស​នយោបាយ​ថ្មីៗ​របស់​បុគ្គល​ ​ឬ​ក្រុម​ណា​នោះ​​ដែរ​។​

​ប្រធាន​ស្ដីទី​គណបក្ស​សង្គ្រោះ​ជាតិ​លោក​ ​សម​ ​រង្ស៊ី ​កាលពី​ថ្ងៃ​ទី​​១​៧​ ​ខែ​​កក្កដា​ ​បាន​ប្រកាស​អំពាវនាវ​ឲ្យ​ពលរដ្ឋ​ ​និង​កងកម្លាំង​ប្រដាប់​អាវុធ​ដែល​​ស្នេហា​​ប្រជាធិប​តេយ្យ​ ​និង​​ការ​ផ្លាស់ប្តូរ​ ​នាំគ្នា​ចូលរួម​បង្កើត​រដ្ឋាភិបាលបង្រួបបង្រួម​ជាតិ​មួយ​ ​ដើម្បី​ទាមទារ​យក​លទ្ធិប្រជាធិបតេយ្យ​ ​និង​ការគោរព​សិទ្ធិមនុស្ស​មកវិញ​ ​ពីរ​ប​ប​លោក​ ​ហ៊ុន​ ​សែន​។​

​នៅ​ប្រទេសភូមា​ (​ឬ​មីយ៉ាន់ម៉ា​) ​ក្រោយ​រដ្ឋប្រហារយោធា​ ​ដែល​ដណ្ដើមអំណាចដោយ​ក​ម្រោ​ល​ពី​គណបក្ស​ដែល​ជាប់ឆ្នោត​ ​និង​ចាប់​មេដឹកនាំ​គណបក្សប្រឆាំង​ដាក់​​ពន្ធ​នាគា​រ​ ​មន្រ្តី​បក្ស​ប្រឆាំង​ដែល​ជាប់ឆ្នោត​ ​និង​ពលរដ្ឋ​ម្ចាស់​ឆ្នោត​ ​រួម​ទាំង​ឧត្តមសេនីយ៍​យោធា​ដែល​មិន​ពេញចិត្ត​រដ្ឋប្រហារ​នោះ​ផង​ ​បាន​រួមគ្នា​បង្កើត​រដ្ឋាភិបាល​ស្រមោល​មួយ​ ​ហៅថា​ «រដ្ឋាភិបាលបង្រួបបង្រួម​ជាតិ»​ ​ដើម្បី​បញ្ចប់​របប​យោធា​ផ្តាច់ការ​នៅ​ភូមា​។​

លោក​ ​សម​ ​រង្ស៊ី ​ចង់​យក​គំរូ​តាម​អ្នក​ស្រលាញ់​ប្រជាធិបតេយ្យ​នៅ​ភូមា​ ​និង​សង្ឃឹម​ថា ​មានការ​គាំទ្រ​ពី​សហគមន៍​អន្តរជាតិ​។​ ​ប៉ុន្តែ​រហូត​មកដល់ពេលនេះ​ ​គម្រោង​របស់​​លោក​ក្នុង​ការ​បង្កើត​រដ្ឋាភិបាល​ក្រៅ​ប្រទេស​នេះ​ ​នៅ​មិនទាន់​ចេញ​ជា​រូបរាង​នៅឡើយ​។​

​ប្រធាន​គណបក្ស​សង្គ្រោះ​ជាតិ​លោក​ កឹម​ ​សុខា​ ​កំពុង​ជាប់​ក្ដីក្តាំ​នៅ​តុលាការ​ពី​បទ​ក្បត់ជាតិ​។​ ​តុលាការ​បាន​ដាក់​លោក​ឲ្យ​ស្ថិត​ក្រោម​ការ​ត្រួតពិនិត្យ​តាមផ្លូវ​តុលាការ​ ដោយ​មិន​ឲ្យ​ចាកចេញ​ពី​ប្រទេស​កម្ពុជា​ ​និង​គ្មាន​សិទ្ធិ​ធ្វើនយោបាយឡើយ​៕