ដោយ ម៉ៅ សុធានី
2022-02-17
លោក វីទិត មុនតាប៊ន (Vitit Muntarbhorn) អ្នករាយការណ៍ពិសេសស្ដីពីស្ថានការណ៍សិទ្ធិមនុស្សនៅកម្ពុជា ថ្លែងក្នុងកិច្ចពិភាក្សានៅក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី១៦ ខែមិថុនា ឆ្នាំ២០១៤។
រូប៖ UN
មន្ត្រីសិទ្ធិមនុស្ស និងសហជីព យល់ស្របដូចគ្នាថា ការលើកឡើងរបស់ក្រុមអ្នកជំនាញរបស់អង្គការសហប្រជាជាតិថា កម្ពុជាកំពុងរំលោភច្បាប់សិទ្ធិមនុស្សអន្តរជាតិ ដោយរារាំងកូដកម្មរបស់កម្មករណាហ្គាវើលដ៍ ក្រោមលេសអនុវត្តវិធានការសុខាភិបាល គឺជាការពិតជាក់ស្ដែងកំពុងកើតមានឡើង។
ការលើកឡើងរបស់មន្ត្រីសិទ្ធិមនុស្ស និងសហជីពនេះ ធ្វើឡើងក្រោយពេលដែលស្ថានបេសកកម្មអចិន្រ្តៃយ៍កម្ពុជា នៅទីក្រុងហ្សឺណែវ ចោទក្រុមអ្នកជំនាញរបស់អង្គការសហប្រជាជាតិថា បំពេញការងារមិនផ្អែកលើមូលដ្ឋានអង្គហេតុពិត និងកំពុងធ្វើនយោបាយូបនីកម្មនៅកម្ពុជា។
មន្ត្រីសិទ្ធិមនុស្សរិះគន់ថា ស្ថានបេសកកម្មអចិន្ត្រៃយ៍កម្ពុជា នៅទីក្រុងហ្សឺណែវ តែងតែចេញសេចក្ដីថ្លែងការណ៍បដិសេធ ចំពោះរបាយការណ៍ ឬការលើកឡើងរបស់អង្គការសង្គមស៊ីវិលជាតិ និងអន្តរជាតិ ជាពិសេស ក្រុមអ្នកជំនាញរបស់អង្គការសហប្រជាជាតិ ដែលបារម្ភពីវិធានការរបស់អាជ្ញាធរ និងក្រសួងសុខាភិបាល ទៅលើក្រុមកម្មករណាហ្កាវើលដ៍។
នាយករងទទួលបន្ទុកសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ប្រាប់វិទ្យុអាស៊ីសេរីថា ប្រសិនបើអាជ្ញាធរមានសុឆន្ទៈដោះស្រាយ នោះបញ្ហារបស់ក្រុមកម្មករណាហ្គាវើលដ៍ មិនបានអូសបន្លាយរហូតមកដល់ពេលនេះទេ៖ «មិនមែនជាលើកទី១ ទេ ស្ទើរគ្រប់របាយការណ៍ និងសេចក្ដីថ្លែងការណ៍របស់អ្នកជំនាញអង្គការសហប្រជាជាតិ ជាពិសេស អ្នកជំនាញផ្នែកសិទ្ធិមនុស្សនៅកម្ពុជា តែងតែមានការបដិសេធដោយលើកឡើងថា មានពាក់ព័ន្ធនឹងនយោបាយជាដើម ហ្នឹងអត់មានប្លែកទេ។ ប៉ុន្តែបញ្ហានៅណាហ្គាវើលដ៍ យើងសង្គមស៊ីវិលក្នុងស្រុក អត់ចង់ឃើញការធ្វើកូដកម្មកាន់តែពន្យារពេល រហូតដល់ចាប់ខ្លួន»។
នៅថ្ងៃទី១៧ ខែកុម្ភៈ ស្ថានបេសកកម្មអចិន្ត្រៃយ៍កម្ពុជា នៅទីក្រុងហ្សឺណែវ ចេញសេចក្ដីថ្លែងការណ៍ ទទូចឲ្យអ្នករាយការណ៍ពិសេស នៃអង្គការសហប្រជាជាតិ ត្រូវបំពេញការងាររបស់ខ្លួនដោយផ្អែក លើមូលដ្ឋានអង្គហេតុពិត គណនេយ្យភាព និងមិនត្រូវធ្វើនយោបាយូបនីកម្មនោះឡើយ។ សេចក្ដីថ្លែងការណ៍ដដែលបន្តថា ការលើកឡើងរបស់ក្រុមអ្នកជំនាញរបស់អង្គការសហប្រជាជាតិទាំងនោះ បង្កឱ្យមានការភ័ន្តច្រឡំ គ្មានទំនួលខុសត្រូវ និងពុំផ្អែកលើមូលដ្ឋាននៃអង្គហេតុពិត ពាក់ព័ន្ធនឹងវិធានសុខាភិបាល និងវិធានការផ្លូវច្បាប់ អនុវត្តចំពោះការធ្វើកូដកម្មខុសច្បាប់ ដែលបានអូសបន្លាយជាច្រើនខែ។
ប្រតិកម្មរបស់មន្ត្រីស្ថានបេសកកម្មអចិន្ត្រៃយ៍កម្ពុជា នៅទីក្រុងហ្សឺណែវ (Geneva) ប្រទេសស្វីស (Switzerland) ធ្វើឡើងក្រោយពេលដែលក្រុមអ្នកជំនាញរបស់អង្គការសហប្រជាជាតិចំនួន៥រូប ក្នុងនោះរួមមានទាំងអ្នករាយការណ៍ពិសេសស្ដីពីស្ថានការណ៍សិទ្ធិមនុស្សនៅកម្ពុជា លោក វីទិត មុនតាប៊ន (Vitit Muntarbhorn) បាន រិះគន់រដ្ឋាភិបាលកម្ពុជាថា កំពុងរំលោភច្បាប់សិទ្ធិមនុស្សអន្តរជាតិ ដោយរារាំងកូដកម្មរបស់កម្មករណាហ្គាវើលដ៍ ក្រោមលេសអនុវត្តវិធានការសុខាភិបាល និងយកលេសបង្ក្រាបកូដកម្មស្របច្បាប់ និងដោយសន្តិវិធី។
ឆ្លើយតបនឹងការលើកឡើងនេះ ស្ថានបេសកកម្មអចិន្ត្រៃយ៍កម្ពុជា នៅទីក្រុងហ្សឺណែវ បន្តថា ការអះអាងថា កូដកម្មនោះស្របច្បាប់ គឺជាការយល់ខុសទាំងស្រុង។ កម្មករនិយោជិត និងសហជីពមានសិទ្ធិធ្វើកូដកម្ម ក៏ប៉ុន្តែត្រូវបំពេញលក្ខខណ្ឌចាំបាច់នានា មុនកូដកម្មនោះអាចធ្វើឡើងដោយស្របច្បាប់បាន។ បន្ថែមពីនេះ ពិធីសារបង្ការ និងទប់ស្កាត់ការរាតត្បាតជំងឺកូវីដ១៩ គឺអនុលោមតាមច្បាប់ជាតិ និងអន្តរជាតិ សម្រាប់សុវត្ថិភាព សណ្ដាប់ធ្នាប់សាធារណៈ និងដើម្បីការពារសុខភាពសាធារណៈ។ ចំពោះការចោទប្រកាន់ថា ពេលណាកម្មករណាហ្គាវើលដ៍ នឹងត្រូវបានអនុញ្ញាតឱ្យឈប់ធ្វើចត្តាទ្បីស័ក គឺជាការបង្ហាញថា អ្នករាយការណ៍ពិសេស ផ្អែកទាំងស្រុងទៅលើប្រភពព័ត៌មានតែមួយជ្រុង និងពុំបានផ្ទៀងផ្ទាត់ត្រឹមត្រូវនោះទេ។
ទោះបីយ៉ាងណាក្ដី ទាំងអង្គការសង្គមស៊ីវិលជាតិ អន្តរជាតិ ក្រុមកូដករ និងអ្នករាយការណ៍ពិសេសនៃអង្គការសហប្រជាជាតិ យល់ស្របគ្នាថា អាជ្ញាធរកំពុងអនុវត្តវិធានការសុខាភិបាល ដែលមានស្តង់ដារ២ ផ្សេងគ្នារវាងក្រុមកូដករ និងសាធារណជនទូទៅ ដែលនេះបង្ហាញថាអាជ្ញាធរប្រឹងប្រែងរារាំងសកម្មភាពស្របច្បាប់របស់ក្រុមកូដករ។
ប្រធានសហភាពសហជីពកម្ពុជាលោក រ៉ុង ឈុន មានប្រសាសន៍ថា លោកគាំទ្រទាំងស្រុងនូវការលើកឡើងរបស់ក្រុមអ្នកជំនាញរបស់អង្គការសហប្រជាជាតិ ស្ដីពីបញ្ហារបស់ក្រុមកម្មករណាហ្គាវើលដ៍ ដែលអាជ្ញាធរមិនបានដោះស្រាយ ប៉ុន្តែប្រើប្រព័ន្ធច្បាប់ យកលេសចាប់ឃុំខ្លួនតំណាងសហជីព និងកម្មករទៅវិញ៖ «អ្វីដែលគាត់លើកឡើង ឆ្លុះបញ្ចាំងការពិតនៅកម្ពុជា ហើយយើងឃើញ អាជ្ញាធរមិនបានប្រើពេលវេលា ដើម្បីរកដំណោះស្រាយកម្មករណាហ្គាវើលដ៍ទេ។ តែផ្ទុយទៅវិញ យកប្រព័ន្ធតុលាការ ចាប់ខ្លួន និងបង្ខិតបង្ខំក្រុមកម្មករណាហ្គាវើលដ៍ឲ្យទទួលយកមិនសមហេតុផល។ មួយទៀត ប្រតិកម្មរបស់ស្ថានបេសកកម្មអចិន្ត្រៃយ៍កម្ពុជា នៅទីក្រុងហ្សឺណែវ គ្រាន់តែជាលេស និងបដិសេធមិនទទួលស្គាល់ការពិតរឿងសិទ្ធិមនុស្ស សិទ្ធិមូលដ្ឋានម្ដងហើយម្ដងទៀត»។
បន្ថែមពីនេះ ក្រុមអ្នកជំនាញរបស់អង្គការសហប្រជាជាតិ ព្រួយបារម្ភ ចំពោះវិធានការរបស់អាជ្ញាធរកម្ពុជា ដែលអាចនឹងមានការចាប់ខ្លួនបន្ថែមទៀត និងអំពើហិង្សាពីសំណាក់ប៉ូលិសលើក្រុមកម្មករផងដែរ។ រហូត មកដល់ពេលនេះមានសហជីព និងកម្មករណាហ្គាវើលដ៍ សរុប១១ នាក់កំពុងជាប់ឃុំ ដោយសារការតវ៉ានេះ។
ក្រុមអ្នកជំនាញ អ.ស.ប បញ្ជាក់ជាថ្មីទៀត ថា រដ្ឋាភិបាលកម្ពុជា មានកាតព្វកិច្ចក្រោមសន្ធិសញ្ញា និងអនុសញ្ញា ដែលបានផ្តល់សច្ចាប័នជាច្រើន ដើម្បីការពារសិទ្ធិមនុស្ស ឬសិទ្ធិរបស់ក្រុមកូដករ។
កម្ពុជាក៏មានកាតព្វកិច្ចគោរពសិទ្ធិបញ្ចេញមតិ សេរីភាពជួបប្រជុំដោយសន្តិវិធី និងសិទ្ធិបង្កើត និងចូលរួមសហជីព ស្របតាមសេចក្ដីប្រកាសសិទ្ធិមនុស្ស អាស៊ាន និងលិខិតូបករណ៍ ពាក់ព័ន្ធនានា៕
No comments:
Post a Comment