2023.03.14
សហមេធាវីលោក កឹម សុខា គឺលោក អាង ឧត្ដម ឲ្យដឹងនៅព្រលប់ថ្ងៃទី១៤ មីនាថា កម្លាំងសមត្ថកិច្ចយាមនៅផ្ទះលោក កឹម សុខា មិនអនុញ្ញាតឲ្យក្រុមមេធាវីចូលជួបលោក កឹម សុខា នោះទេ។
លោក មេធាវី អាង ឧត្ដម បញ្ជាក់ថា សហមេធាវី បានទៅផ្ទះលោក កឹម សុខា នៅថ្ងៃទី១៤ មីនានេះ ដើម្បីពិភាក្សាជាមួយកូនក្ដី ដើម្បីរៀបចំដាក់ពាក្យប្ដឹងឧទ្ធរណ៍ បែរជាសមត្ថកិច្ច មិនអនុញ្ញាតឲ្យចូលទៅជួបកូនក្ដីរបស់លោក។ លោកថា ការហាមមិនឲ្យលោកជួបកូនក្ដីនេះ មិនត្រឹមតែប៉ះពាល់សិទ្ធិកូនក្ដីប៉ុណ្ណោះទេ គឺថែមទាំងប៉ះពាល់ដល់សិទ្ធិរបស់មេធាវីថែមទៀតផង
លោកមេធាវី អាង ឧត្ដម បញ្ជាក់ថា ក្រុមសមត្ថកិច្ចមិនបានប្រាប់ពីមូលហេតុនៃការមិនឲ្យជួបលោក កឹម សុខា នោះទេ គ្រាន់តែពួកគេប្រាប់ថា ឲ្យទៅសួរមេ តែមិនប្រាប់មេនោះជាអ្នកណានោះឡើយ។
តាមគម្រោង សហមេធាវីចង់ចូលទៅជួបពិភាក្សាជាមួយកូនក្ដី លោក កឹម សុខា នៅថ្ងៃទី១៤ មីនានេះ ដើម្បីប្ដឹងទាស់សាលក្រមសាលាដំបូងរាជធានីភ្នំពេញ ដែលបានផ្ដន្ទាទោសលោក កឹម សុខា ចំនួន ២៧ឆ្នាំពីបទសន្ទិដ្ឋភាពជាមួយបរទេស ឬបទឃុបឃិតត្រូវរ៉ូវគ្នាជាមួយបរទេស។ ការកាត់ទោសឱ្យជាប់គុកនេះ ត្រូវបានជំនួសដោយការឃុំខ្លួនក្នុងផ្ទះ និងទោសបន្ថែមមួយចំនួន ដូចជា ដកហូតសិទ្ធិបោះឆ្នោត សិទ្ធិឈរឈ្មោះឱ្យគេបោះឆ្នោត និងសិទ្ធិធ្វើសកម្មភាពនយោបាយ ពេញមួយជីវិត។ ទន្ទឹមនឹងនេះ លោកក៏ត្រូវបានដាក់ឱ្យស្ថិតក្រោមវិធានការត្រួតពិនិត្យតាមផ្លូវតុលាការ ហាមមិនឱ្យចេញពីបរិវេណនៃលំនៅឋាន និងមិនឱ្យជួបបុគ្គលណាម្នាក់ ទាំងខ្មែរ និងបរទេស ដោយផ្ទាល់ ឬដោយប្រយោលតាមប្រព័ន្ធបច្ចេកវិទ្យា លើកលែងតែសមាជិកគ្រួសារ។
ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិ ថ្កោលទោសសាលក្រមកាត់ទោសមេបក្សប្រឆាំង លោក កឹម សុខា។ ពួកគេព្រមានថា ការកាត់ទោសនេះជះឥទ្ធិពល និងរារាំងដល់សកម្មភាពនយោបាយ និងសេរីភាពនៃការបញ្ចេញមតិនៅមុនពេលបោះឆ្នោតជាតិ ខែកក្កដាខាងមុខ៕
No comments:
Post a Comment