2023.03.14
មេធាវីការពារក្ដីលោក សុន ឆ័យ បារម្ភថា អនុប្រធានគណបក្សភ្លើងទៀន លោក សុន ឆ័យ ប្រឈមបាត់បង់ដីធ្លី ខណៈលោក សុន ឆ័យ គ្មានប្រាក់ ១លានដុល្លារបង់ជំងឺចិត្តឱ្យបក្សកាន់អំណាច។ មន្ត្រីសង្គមស៊ីវិល ចង់ឃើញភាគីឈ្នះក្ដី គួរបញ្ចប់ត្រឹមក្នុងនាមជាអ្នកឈ្នះ ចំណែកប្រាក់ជំងឺចិត្ត ១លានដុល្លារ គណបក្សកាន់អំណាចគួរអនុគ្រោះមិនទាមទារពីលោក សុន ឆ័យ។
មេធាវីការពារក្ដីឱ្យលោក សុន ឆ័យ និងមន្ត្រីសង្គមស៊ីវិលធ្វើការងារផ្នែកបោះឆ្នោត លើកឡើងថា គណបក្សកាន់អំណាច នៅតែមានលទ្ធភាពក្នុងការអនុគ្រោះមិនយកប្រាក់ជំងឺចិត្ត ១លានដុល្លារពីលោក សុន ឆ័យ។ ទោះយ៉ាងណា ក្ដី មន្ត្រីជាន់ខ្ពស់គណបក្សប្រជាជនកម្ពុជា នៅតែរក្សាជំហរទាមទារប្រាក់ជំងឺចិត្តពីលោក សុន ឆ័យ ដដែល។
មេធាវីការពារក្ដីលោក សុន ឆ័យ លោកមេធាវី កែត ឃី ឱ្យវិទ្យុអាស៊ីសេរីដឹងនៅថ្ងៃទី១៤ ខែមីនា កូនក្ដីរបស់លោកពេលនេះ គ្មានប្រាក់បង់ជំងឺចិត្តចំនួន ១លានដុល្លារឱ្យទៅភាគីឈ្នះក្ដីគណបក្សប្រជាជនកម្ពុជាទេ។ មេធាវីព្រួយបារម្ភថា សាលដីការបស់តុលាការកំពូល ដែលសម្រេច កាលពីពេលថ្មីៗ នេះ នឹងធ្វើឱ្យលោក សុន ឆ័យ បាត់បង់ដីផ្ទះពីរកន្លែង នៅរាជធានីភ្នំពេញ និងនៅខេត្តសៀមរាប។ មេធាវីការពារក្ដីអនុប្រធានគណបក្សភ្លើងទៀនរូបនេះ លើកឡើងទៀតថា បើទោះជាសំណុំរឿងលោក សុន ឆ័យ ត្រូវបានតុលាការកំពូលបិទផ្លូវតវ៉ាក្ដី ក៏លោកយល់ថា ប្រសិនបើភាគីគណបក្សកាន់អំណាច ផ្ដល់ការយោគយល់ដល់លោក សុន ឆ័យ គឺអាចរកដំណោះស្រាយបាន។
លោកមេធាវី កែត ឃី៖ «ដីកាហ្នឹងចូលជាស្ថាពរហើយ អ៊ីចឹងគាត់ (លោក សុន ឆ័យ) មិនមានថវិកាក្រៅទេ មានតែទ្រព្យសម្បត្តិហ្នឹងឯង។ អ៊ីចឹង ការដោះស្រាយសំណងមានតែនៅលើទ្រព្យសម្បត្តិរបស់គាត់។ បើសិនបើមានការជជែកគ្នាបានជាធម្មតាទេ រឿងកន្លងមកតែងតែមានការលើកលែងពីព្រះមហាក្សត្រ កាលណាលើកលែងទោសហើយ អស់មានទណ្ឌកម្មហើយ គណបក្សប្រជាជនគេការទាមទារសំណងទៅចប់រឿងបាត់ហើយ»។
លោកមេធាវី កែត ឃី ឱ្យដឹងដែរថា មកដល់ពេលនេះ ក្រុមមេធាវីមិនទាន់ទទួលព័ត៌មានពីតុលាការ ស្ដីពីការបង្គាប់ឱ្យលោកកូនក្ដីរបស់លោកត្រូវបង់ជំងឺចិត្តប្រាក់ ១លានដុល្លារទៅគណបក្សគណបក្សប្រជាជនកម្ពុជានៅពេលណានៅឡើយទេ។
កាលពីថ្ងៃទី២៣ ខែកុម្ភៈ តុលាការកំពូលសម្រេចបិទផ្លូវតវ៉ាលើសំណុំរឿងបក្សកាន់អំណាច និង គ.ជ.ប ប្ដឹងលោក សុន ឆ័យ ពីបទបរិហារកេរ្តិ៍ ដោយបន្តឱ្យលោក សុន ឆ័យ ចាញ់ក្ដីភាគីដើមបណ្ដឹងដដែល។ តុលាការចោទប្រកាន់ថា ករណីលោក សុន ឆ័យ រិះគន់ថា ការបោះឆ្នោតឃុំសង្កាត់អាណត្តិទី៥ កន្លងទៅដែលថាមិនបានឆ្លុះបញ្ចាំងពីឆន្ទៈប្រជាពលរដ្ឋ មានការបំភិតបំភ័យ ជាដើមនោះ ជាការប្រព្រឹត្តបទល្មើសបរិហារកេរ្តិ៍។
តុលាការកំពូលក៏បង្គាប់ឱ្យលោក សុន ឆ័យ ត្រូវបង់ប្រាក់ជំងឺចិត្តទៅគណបក្សប្រជាជនកម្ពុជាជាង ១លានដុល្លារ និងបង់ប្រាក់ជំងឺចិត្តប្រមាណ ២.៥០០ដុល្លារ ទៀតទៅ គ.ជ.ប ផងដែរ។
ទាក់ទងរឿងនេះ នាយកប្រតិបត្តិអង្គការ ឃ្លាំមើលការបោះឆ្នោតនៅកម្ពុជា ហៅកាត់ថា និចហ្វិច (Nicfec) លោក សំ គន្ធាមី សង្កេតឃើញថា ការរិះគន់របស់លោក សុន ឆ័យ រឿងបោះឆ្នោត គឺលោក សុន ឆ័យ គ្មានចេតនាវាយប្រហារលើ គណបក្សនយោបាយណាមួយ ឬស្ថាប័នណាមួយទេ។ លោកយល់ថា អ្វីដែលលោក សុន ឆ័យ លើកឡើងជាសេរីភាពបញ្ចេញមតិ ដោយសំអាងតាមការរកឃើញពីភ្នាក់ងាររបស់គណបក្សភ្លើងទៀននៅតាមមូលដ្ឋាន។ លោកយល់ថា ការសម្រេចរបស់តុលាការគ្រប់ជាន់ថ្នាក់ឱ្យលោក សុន ឆ័យ ចាញ់ក្ដីក្នុងសំណុំរឿងនេះ ល្មមអាចឱ្យគណបក្សប្រជាជនកម្ពុជា ទទួលយកបាន ហើយភាគីឈ្នះក្ដីនេះគួរមានសម្របសម្រួលជាមួយលោក សុន ឆ័យ ក្នុងការលើកលែងមិនយកប្រាក់ជំងឺចិត្ត ១លានដុល្លារពីលោក សុន ឆ័យ។
លោក សំ គន្ធាមី៖ «បាទបើសិនជាដើមបណ្ដឹងទទួលយកការសុំទោសហើយ ទៅតុលាការ ដើម្បីបញ្ចប់សំណងតុលាការគេអាចសម្របសម្រួលតាមហ្នឹងដែរបាទ រឿងហ្នឹងលើដើមបណ្ដឹងបាទ»។
ឆ្លើយតបការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន នៅតែរក្សាជំហរទាមទារប្រាក់ជំងឺពីលោក សុន ឆ័យ ដដែល។ លោកចាត់ទុកការសុំទោសរបស់លោក សុន ឆ័យ កាលពីពេលថ្មីៗ នេះ គឺយឺតពេលទៅហើយ។ ទោះជាបែបនេះក្ដី លោក សុខ ឥសាន មិនទាន់ដឹងថា គណបក្សរបស់លោកនឹងត្រូវទទួលបានប្រាក់ជំងឺចិត្តពីលោក សុន ឆ័យ នៅពេលណានោះទេ ដោយលោកទុកឱ្យតុលាការជាអ្នកចាត់ចែងលើរឿងនេះ។
លោក សុខ ឥសាន៖ «យើងគោរពតាមសាលក្រមរបស់តុលាការ ទោះបីមានចិត្តអាណិតអាសូរគាត់ (លោក សុន ឆ័យ) ក៏មិនដឹងធ្វើម៉េចដែរ។ យើងត្រូវតែគោរពច្បាប់ បើតុលាការគេកាត់យ៉ាងម៉េច យើងចាត់ទុកថា ជាច្បាប់ហើយ។ ដូច្នេះ យើងត្រូវគោរពបាទ»។
កាលពីថ្ងៃទី១៣ ខែកុម្ភៈ ឆ្នាំ២០២៣ លោក សុន ឆ័យ បានសរសេរលិខិតមួយ ផ្ញើជូន លោក ហ៊ុន សែន ដើម្បីសុំទោស ចំពោះអ្វីដែលលោកបានលើកឡើងកន្លងទៅ ពាក់ព័ន្ធនឹងបញ្ហាលួចសន្លឹកឆ្នោត។ ទោះយ៉ាងណា ក្ដី លោក ហ៊ុន សែន មិនព្រមទទួលយកការសុំទោសនេះទេ។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាហៅកាត់ថា ច្រាក់ (CHRAC) លោក រស់ សុដ្ឋា សង្កេតឃើញថា សង្គមខ្មែរពេលនេះមិនបានបង្កបរិយាកាសនយោបាយឱ្យបានទូលំទូលាយដល់អ្នកនយោបាយប្រឆាំងទេ ទើបអ្នកនយោបាយបញ្ចេញមតិ តែបែរជាត្រូវរងការចោទប្រកាន់តាមផ្លូវតុលាការទៅវិញ។ លោកចង់ឃើញរដ្ឋសភា ដែលជាស្ថាប័នធ្វើច្បាប់ គួរពិនិត្យឡើងវិញ ពីការពិន័យប្រាក់ក្នុងសំណុំរឿងបរិហារកេរ្តិ៍នេះ។ លោកសង្កេតឃើញថា ប្រទេសសេរីមួយចំនួន បង្គាប់ភាគីចាញ់ក្ដីក្នុងសំណុំរឿងបរិហារកេរ្តិ៍នេះ បង់ប្រាក់ទៅភាគីឈ្នះក្ដីតែ ១ដុល្លារប៉ុណ្ណោះ។
លោក រស់ សុដ្ឋា៖ «បើសិនជាយើងមានឆន្ទៈក្នុងការសម្រុះសម្រួលគ្នាយើងឃើញហើយថា លោក សុន ឆ័យ បានសុំទោសហើយណា ខ្ញុំឱ្យតម្លៃអ៊ីចេះវិញទេ ខ្ញុំឱ្យតម្លៃលើការសុំទោស ព្រោះថា ទោះបីមុនក្រោយក្ដីការសុំទោសនៅតែជាការសុំទោសដដែល ហើយអ្វីដែលគណបក្សប្រជាជនចង់បានហ្នឹង គឺបានហើយ សាធារណជនបានឮហើយ គួរតែយល់អធ្យាស្រ័យដល់គាត់ (លោក សុន ឆ័យ) ហើយបើសិនជាយើងមិនយល់អធ្យាស្រ័យឱ្យគ្នាទេ គឺហាក់បីដូចថា យើងការមានការប្រកាន់គ្នា»។
តុលាការក្រុងភ្នំពេញបានចេញដីការឹបអូសជាបណ្ដោះអាសន្ននូវអចលនទ្រព្យរបស់លោក សុន ឆ័យ ចំនួនពីរកន្លែង គឺនៅខណ្ឌទួលគោក រាជធានីភ្នំពេញ និងនៅក្រុងសៀមរាប ខេត្តសៀមរាបដើម្បីត្រៀមទុកសងគណបក្សប្រជាជនកម្ពុជា។នៅរយៈពេលចុងក្រោយនេះ រដ្ឋាភិបាលលោក ហ៊ុន សែន បានធ្វើទុក្ខបុកម្នេញលើមេដឹកនាំគណបក្សភ្លើងទៀនជាបន្តបន្ទាប់ក្រៅពីលោក សុន ឆ័យ ប្រឈម អស់ដីអស់ផ្ទះនៅពេលនេះ ឧត្ដមទីប្រឹក្សាគណបក្សភ្លើងទៀន លោក គង់ គាំ ត្រូវបង្ខំចិត្តប្រគល់ដីផ្ទះ តម្លៃរាប់លានដុល្លារឱ្យទៅរដ្ឋាភិបាលលោក ហ៊ុន សែន។
ចំណែក អនុប្រធានគណបក្សភ្លើងទៀននេះម្នាក់ទៀត គឺលោក ថាច់ សេដ្ឋា កំពុងជាប់ពន្ធនាគារក្នុងសំណុំរឿងចេញសែកអត់លុយ។ រីឯអ្នកនយោបាយមានឥទ្ធិពលម្នាក់ទៀត គឺលោក កឹម សុខា ប្រធានគណបក្សសង្គ្រោះជាតិ ក៏ត្រូវបានតុលាការក្រុងភ្នំពេញផ្ដន្ទាទោសដាក់ពន្ធនាគារ ២៧ឆ្នាំ ពីបទក្បត់ជាតិ តែតុលាការអនុញ្ញាតឱ្យលោកជាប់ឃុំនៅក្នុងផ្ទះ និងត្រូវដកហូតសិទ្ធិសំខាន់ៗ មួយចំនួន៕
No comments:
Post a Comment