2023.03.04
សង្គមស៊ីវិលស្នើឱ្យមានការលើកកម្ពស់សីលធម៌សង្គម និងពង្រឹងការអនុវត្តច្បាប់ឱ្យបានតឹងរ៉ឹង ដើម្បីកាត់បន្ថយករណីរំលោភសេពសន្ថវៈលើកុមារ ដែលកំពុងកើតឡើងគួរឱ្យព្រួយបារម្ភ។ ចំណែកមន្ត្រីលើកឡើងថា រដ្ឋាភិបាលនឹងបង្កើតកម្មវិធីអប់រំសង្គមមួយ ដើម្បីផ្សព្វផ្សាយទៅពលរដ្ឋពីប៉ះពាល់ឧក្រិដ្ឋកម្មលើកុមារ។
សង្គមបច្ចុប្បន្នហាក់មិនសូវមានគំរូៗបង្ហាញទៅក្មេងជំនាន់ក្រោយឡើយ ហើយស្ទើររៀងរាល់ថ្ងៃនៅតាមបណ្ដាញសង្គមហ្វេសប៊ុក សម្បូរទៅដោយការផ្សព្វផ្សាយអំពើអសីលធម៌កើតឡើងជាច្រើន ដូចជាការ ឆក់ ប្លន់ កាប់សម្លាប់ ការរំលោភសេពសន្ថវៈនិងករណីឃាតកម្មលើកុមារជាដើម។
ប្រធានផ្នែកស្ត្រីរបស់សមាគមសិទ្ធិមនុស្សអាដហុក (Adhoc) លោកស្រី ម៉ៅ ម៉ាប់ ប្រាប់អាស៊ីសេរីកាលពីថ្ងៃទី៣ មីនា ថា ករណីរំលោភសេពសន្ថវៈលើកុមារបន្តកើតឡើងគួរឱ្យព្រួយបារម្ភ ដោយសារកត្តាធ្លាក់ចុះសីលធម៌សង្គម ការរីកសាយភាយគ្រឿងស្រវឹងនិងគ្រឿងញៀន ជាពិសេសកត្តាជីវភាពដែលបង្ខំឱ្យឪពុកម្ដាយត្រូវធ្វើចំណាកស្រុក ហើយទុកកូនៗឱ្យនៅជាមួយសាច់ញាតិ ដោយមិនមានការមើលថែឱ្យបានដិតដល់។
លោកស្រី ម៉ៅ ម៉ាប់៖ «គួរតែបង្កើតឱ្យមានការងារនៅក្នុងស្រុក ដើម្បីឱ្យគាត់(ឪពុកម្ដាយ)អាចរកការងារធ្វើបាន គាត់អាចមានលទ្ធភាពមើលថែឃុំគ្រងកូន ដែលជាទំពាំងស្នងឫស្សី ហើយយើងមិនបានគ្រប់គ្រងមើថែទាំគាត់(កូន)ឱ្យបានដិតដល់ គាត់មិនអាចក្លាយជាក្មេងល្អ ហើយអាចងាយនឹងរងគ្រោះការរំលោភបំពានពីសាច់ញាតិ ឬអ្នកជិតខាងជាដើម»។
លោកស្រី ម៉ៅ ម៉ាប់ បន្តថា នៅក្នុងឆ្នាំ២០២២ អង្គការអាដហុកបានអង្កេតលើករណីសេពសន្ថវៈលើកុមារចំនួន ១៣២ករណី កើនឡើងបើប្រៀបធៀបនឹងឆ្នាំ២០២១ ដែលមានត្រឹមតែ ៩៨ករណី។ មន្ត្រីអង្គការសង្គមស៊ីវិលរូបនេះបន្ថែមថា ថ្វីត្បិតអាជ្ញាធររដ្ឋាភិបាលមានកិច្ចខិតខំប្រឹងប្រែងខ្លះក្ដី ប៉ុន្តែការអនុវត្តច្បាប់នៅមានកម្រិត ខណៈការរំលោភសេពសន្ថវៈជាករណីព្រហ្មទណ្ឌ ប៉ុន្តែជនល្មើសខ្លះនៅតែអាចប្រើប្រាស់ទឹកលុយសម្របសម្រួលបញ្ចប់រឿង ឬការយល់ព្រមរៀបការបញ្ចប់រឿងជាដើម។
ការលើកឡើងនេះបានធ្វើឡើង បន្ទាប់ពីអង្គភាពការពារកុមារ(CPU)នៃអង្គការមូលនិធិកុមារកម្ពុជា(CCF) បានចុះអនុស្សរណៈយោគយល់គ្នា (MoU) ជាមួយក្រសួងមហាផ្ទៃ កាលពីថ្ងៃទី៣ មីនា ដើម្បីបន្តសហការគ្នាជាលើកទី៤ ក្នុងការបង្ក្រាបបទល្មើសប្រឆាំងលើកុមារ។
កម្មវិធីចុះហត្ថលេខានេះ ធ្វើឡើងរវាងអនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សលោកស្រី ជូ ប៊ុនអេង និងលោក ជេមស៍ ម៉ិក ខាបេ (James Mc Cabe) ប្រធានអង្គភាពការពារកុមារ។
របាយការណ៍អង្គការការពារកុមារបង្ហាញថា នៅក្នុងឆ្នាំ២០២២ ខ្លួនបានបើកការស៊ើបអង្កេតឧក្រិដ្ឋកម្មធំៗចំនួន៣៦៦ករណី ក្នុងនោះមានករណីឃាតកម្ម ការរំលោភសេពសន្ថវៈ និងការរំលោភបំពាន និងឧក្រិដ្ឋកម្មធ្ងន់ធ្ងរជាច្រើនទៀតលើកុមារ។ អង្គការនេះបន្តថា នៅក្នុងនោះមានឃាតកម្មលើកុមារ ៣២ករណី ហើយមានជនល្មើស៣១៣នាក់ត្រូវបានចាប់ខ្លួន។
មន្ត្រីសមាគមសិទ្ធិមនុស្សអាដហុកចង់ឱ្យអាជ្ញាធរពង្រឹងការអនុវត្តច្បាប់ឱ្យបានត្រឹមត្រូវលើជនល្មើស ដោយមិនត្រូវបញ្ចប់រឿងត្រឹមសម្របសម្រួលបង់លុយ ឬព្រមរៀបការឡើយ ព្រោះវាជាគំរូមិនល្អនាំឱ្យមានការរំលោភលើកុមារកាន់តែច្រើន។ លើសពីនេះ រដ្ឋាភិបាលត្រូវទប់ស្កាត់បញ្ហាគ្រឿងញៀនឱ្យបានប្រសិទ្ធភាពខ្ពស់ និងមិនគួរឱ្យមានការផ្សព្វផ្សាយគ្រឿងស្រវឹងផុសផុលដូចសព្វថ្ងៃនេះទេ ខណៈគ្រឿងស្រវឹងអាចធ្វើឱ្យអ្នកផឹកគ្រប់គ្រងសតិខ្លួនឯងមិនបានល្អនិងអាចឈានទៅប្រព្រឹត្តបទល្មើស។
អនុរដ្ឋលេខាធិការក្រសួងមហាផ្ទៃលោកស្រី ជូ ប៊ុនអេង មិនបដិសេធចំពោះការលើកឡើងរបស់មន្ត្រីសង្គមស៊ីវិល ដែលថា គ្រឿងញៀន គ្រឿងស្រវឹង ការធ្លាក់ចុះសីលធម៌សង្គម ការចំណាកស្រុក រួមទាំងការផ្សព្វផ្សាយរូបអាសអាភាសតាមអនឡាញ នាំឱ្យមានការរំលោភសេពសន្ថវៈលើកុមារឡើយ។ មន្ត្រីរូបនេះ ក៏បានស្នើឱ្យមានការរួមគ្នាដើម្បីផ្សព្វផ្សាយឱ្យបានច្រើនលើកកម្ពស់សីលធម៌សង្គមឡើងវិញ។
លោកស្រីបន្តថា នៅក្នុងការចុះអនុស្សរណៈថ្មីជាមួយអង្គភាពការពារកុមារ មានដាក់បញ្ចូលនូវកម្មវិធីបង្ការនិងអប់រំឱ្យបានច្រើនជាងមុន។ លោកស្រីបញ្ជាក់ថា ឆ្លងកាត់បទពិសោធន៍រយៈពេល១០ឆ្នាំនៃកិច្ចសហការគ្នាចុះសិក្សាស្រាវជ្រាវនិងស្វែងរកបទល្មើសលើកុមារ ភាគីទាំងពីរអាចចងក្រងធ្វើជាកម្មវិធីអប់រំសង្គមមួយ ដើម្បីផ្សព្វផ្សាយទៅប្រជាពលរដ្ឋឱ្យបានមុន ពីផលប៉ះពាល់នៃការប្រព្រឹត្តបទល្មើសលើកុមារ។
លោកស្រី ជូ ប៊ុនអេង៖ «គឺយើងចង់ឱ្យមានការបង្ការទប់ស្កាត់ឱ្យបានច្រើន ដើម្បីកាត់បន្ថយបទល្មើស។ មានន័យថា ធ្វើការអប់រំ ស្រាវជ្រាវឫសគល់នៃបញ្ហា ដើម្បីយើងធ្វើការទប់ស្កាត់ឱ្យបានមុន។ ឧទាហរណ៍ថា តើបទល្មើសពាក់ព័ន្ធនឹងអំពើរំលោភហ្នឹង បណ្ដាលពីអ្វី។ ប្រសិនបើរកឃើញឫសគល់វាហើយ យើងអាចធ្វើការស្រាវជ្រាវដើម្បីកាត់ផ្ដាច់ឫសគល់»។
ចំណែកនាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត លើកឡើងថា ការរំលោភសេពសន្ថវៈលើកុមារខ្លះដែលប្រព្រឹត្តឡើងដោយសាច់ញាតិផ្ទាល់ ដូចជាករណីឪពុករំលោភកូនជាដើម មិនមានការប្ដឹងផ្ដល់អនុវត្តច្បាប់លើជនល្មើសឡើយ ដោយសារតែទទួលរងសម្ពាធគ្រួសារ។ លោកបន្តថា តាមផ្លូវច្បាប់រាល់ករណីរំលោភលើកុមារ ត្រូវអនុវត្តច្បាប់ដោយគ្មានការលើកលែងឡើយ។
លោក អំ សំអាត៖ «រាជរដ្ឋាភិបាល គួរតែចាត់វិធានការបន្ថែមទៀត មានន័យថា អាជ្ញាធរពាក់ព័ន្ធនិងតុលាការត្រូវតែពង្រឹង នៅក្នុងការអនុវត្តច្បាប់ឱ្យមានប្រសិទ្ធភាពទៅលើជនដែលប្រព្រឹត្តបទល្មើសរំលោភសេពសន្ថវៈលើកុមារ ឬការសម្លាប់លើកុមារ។ ជាពិសេសគឺសាច់តែម្ដង ហើយតុលាការត្រូវតែបង្កលក្ខណៈងាយស្រួលនិងផ្ដល់យុត្តិធម៌ឱ្យបានពេញលេញ»។
លោក អំ សំអាត បន្តថា រដ្ឋាភិបាលក៏មានគោលនយោបាយដើម្បីការពារ ទប់ស្កាត់ និងលើកកម្ពស់សិទ្ធិកុមារដែរ ប៉ុន្តែការអនុវត្តនៅមានភាពខ្វះចន្លោះ។ លោកបន្ថែមថា ដើម្បីអនុវត្តគោលនយោបាយទទួលបានជោគជ័យនិងប្រសិទ្ធភាពខ្ពស់ ទាល់តែអាជ្ញាធរពាក់ព័ន្ធត្រូវតែអនុវត្តតាមគោលនយោបាយនិងច្បាប់ឱ្យបានត្រឹមត្រូវ ជាពិសេសត្រូវចុះផ្សព្វផ្សាយទៅដល់ប្រជាពលរដ្ឋឱ្យយល់ដឹងចូលរួមបង្ការបញ្ញារំលោភសេពសន្ថវៈនិងករណីឃាតកម្មលើកុមារ៕
No comments:
Post a Comment