2023.03.30
លោក សម រង្ស៊ី ប្រធានស្ដីទីគណបក្សសង្គ្រោះជាតិ អះអាងថា ឧក្រិដ្ឋកម្មគប់គ្រាប់បែកសម្លាប់ជនស្លូតត្រងចំនួន ១៦នាក់ កាលពី ២៦ឆ្នាំមុន មានពន្លឺយុត្តិធម៌ខ្លះហើយ បើទោះជាអាជ្ញាធរកម្ពុជារកមុខឧក្រិដ្ឋជន និងអ្នកនៅពីក្រោយមិនទាន់ឃើញក្ដី។ ចំណែកគណបក្សភ្លើងទៀនទាមទារទៅរដ្ឋាភិបាលលោក ហ៊ុន សែន ឱ្យមានឆន្ទៈក្នុងស៊ើបអង្កេតករណីនេះដើម្បីផ្ដន្ទាទោសជនប្រព្រឹត្តិទៅតាមច្បាប់។
ថ្ងៃនេះ ២៦ឆ្នាំមុនឧក្រិដ្ឋជនបានគប់គ្រាប់បែកដៃចំនួន ៤គ្រាប់សម្លាប់ជនស្លូតត្រងអស់ ១៦នាក់ និងមនុស្សជាង ១០០នាក់ទៀតរងរបួស។ ក្រុមជនដៃដល់ប៉ុនប៉ង សម្លាប់លោក សម រង្ស៊ី ភរិយារបស់លោកគឺ អ្នកស្រី ជូឡុង សូមូរ៉ា លោក ជា វិជ្ជា ប៉ុន្តែអំពើឃាតកម្មនេះ គ្រាន់តែបណ្ដាលឱ្យលោក សម រង្ស៊ី រងរបួសធ្ងន់ ហើយអ្នកស្លាប់ភាគច្រើន គឺជាកម្មកររោងចក្រ បញ្ញវន្ត និស្សិត និងអង្គរក្សរបស់លោក សម រង្ស៊ី។
លោក សម រង្ស៊ី ដែលរួចជីវិតពីការវាយប្រហារនេះព្រោះអង្គរក្សរបស់លោកយកខ្លួនទៅពាំងរងគ្រាប់ជំនួស លោកចោទប្រកាន់ថា លោកនាយករដ្ឋមន្ត្រី ហ៊ុន សែន ជាមេខ្លោងធំ ដែលបញ្ជាឱ្យមេកងអង្គរក្សរបស់ខ្លួនគឺលោក ហ៊ុយ ពិសិដ្ឋ និងលោក ហ៊ីង ប៊ុនហៀង ប្រព្រឹត្តិអំពើឧក្រិដ្ឋកម្មនេះ។ លោក សម រង្ស៊ី លើកឡើងដូច្នេះតាមរយៈទំព័រហ្វេសប៊ុករបស់លោកថ្ងៃទី៣០ ខែមីនា។ លោក សម រង្ស៊ី ឱ្យដឹងទៀតថា ខុសពីខួបលើកមុនៗ ខួបលើកទី២៦ នេះ មានពន្លឺយុត្តិធម៌ក្នុងការវែកមុខជនដៃដល់ និងអ្នកបញ្ជានៅពីក្រោយជនដៃដល់ទាំងនោះហើយ។ លោកអះអាងទៀតថា កាលពីថ្ងៃ៣០ ធ្នូ ឆ្នាំ២០២១ តុលាការបារាំង នៅទីក្រុងប៉ារីស បានចេញដីកាឱ្យចាប់ខ្លួនលោក ហ៊ុយ ពិសិដ្ឋ និងលោក ហ៊ីង ប៊ុនហៀង។ លោក សម រង្ស៊ី កំពុងរស់នៅប្រទេសបារាំង និងមានសញ្ជាតិបារាំងផងនោះ ដែលជាដើមបណ្ដឹងក្នុងសំណុំរឿងនេះ អះអាងទៀតថា ចាប់ពីឆ្នាំ២០២៣ តទៅ នឹងមានការកាត់ទោស លោក ហ៊ុយ ពិសិដ្ឋ និងលោក ហ៊ីង ប៊ុនហៀង ហើយឈានទៅដល់កាត់ទោសលោក ហ៊ុន សែន ដែលជាអ្នកបញ្ជាជនដៃដល់ទាំង ២នាក់នេះ។
ជនរងគ្រោះក្នុងព្រឹត្តិការណ៍គប់គ្រាប់បែកនោះ និងជាអង្គរក្សលោក សម រង្ស៊ី គឺលោក សូ តារា ដែលកំពុងភៀសខ្លួននៅប្រទេសថៃ ឱ្យវិទ្យុអាស៊ីសេរីដឹងថា លោកគ្មានរំពឹងថា រដ្ឋាភិបាលលោក ហ៊ុន សែន អាចផ្ដល់យុត្តិធម៌ជូនរូបលោក និងជនរងគ្រោះផ្សេងទៀតបានឡើយ។ លោក សូ តារា ដែលជាប់អំបែងគ្រប់ចំនួន ៥គ្រាប់ក្នុងជើងខាងស្ដាំរបស់លោក លើកឡើងថា ទោះហេតុការណ៍នេះមានរយៈពេល ២៦ឆ្នាំហើយក្ដី ប៉ុន្តែរូបភាពនោះនៅតែតាមលងបន្លាចរូបលោកមកដល់សព្វថ្ងៃនេះ។
លោក សូ តារា៖ «ខ្ញុំមិនដឹងថា ទៅពឹងអីទេ ចំពោះរដ្ឋាភិបាលកម្ពុជា ប៉ុន្តែ បើសិនជាសហគមន៍អន្តរជាតិ ឬក៏អង្គការក្រៅរដ្ឋាភិបាល និងតុលាការអន្តរជាតិអាចជួយឱ្យពួកយើងខ្ញុំមានសង្ឃឹមខ្លះ»។
ថ្ងៃខួប ២៦ឆ្នាំនៃគប់គ្រាប់បែកសម្លាប់ក្រុមបាតុករនេះដែរ គណបក្សភ្លើងទៀន បានជួបជុំដាក់កម្រងផ្កា និងនិមន្តព្រះសង្ឃធ្វើពិធីបង្សុកូលជូនជនរងគ្រោះ ១៦នាក់ ដែលបានបាត់បង់ជីវិតក្នុងព្រឹត្តិការណ៍គប់គ្រាប់បែកនេះ។ ពិធីសាសនានេះធ្វើនៅកន្លែងកើតហេតុស្ថិតនៅបរិវេណស្តូបវីរបាតុករ មុខអតីតមន្ទីររដ្ឋសភា ព្រឹកថ្ងៃទី៣០ ខែមីនា។ ពិធីនេះមានព្រះសង្ឃចំនួន ៩អង្គ ធ្វើពិធីសាសនា និងថ្នាក់ដឹកនាំគណបក្សភ្លើងទៀន និងអ្នកចូលរួមជាង ១០០នាក់។
គណបក្សភ្លើងទៀនចេញសេចក្ដីថ្លែងការណ៍ចុះថ្ងៃទី៣០ ខែមីនា អំពាវនាវទៅរដ្ឋាភិបាលលោក ហ៊ុន សែន ឱ្យវែកមុខ និងចាប់ខ្លួនឃាតកពិត និងអ្នកនៅពីក្រោយខ្នងនៃអំពើភេរវកម្មនេះ យកមកផ្ដន្ទាទោស ដើម្បីផ្ដល់យុត្តិធម៌ដល់ក្រុមគ្រួសារជនរងគ្រោះ និងបញ្ចប់វប្បធម៌និទ្ទណ្ឌភាពនៅកម្ពុជា។
អនុប្រធានគណបក្សភ្លើងទៀន លោក រ៉ុង ឈុន លើកឡើងក្នុងពេលប្រារព្ធពិធីនេះដែរថា ២៦ឆ្នាំមកនេះ មិនទាន់មានពន្លឺយុត្តិធម៌ទេ ព្រោះអាជ្ញាធររកមុខឃាតកមិនទាន់ឃើញ។ លោកបន្តទៀតថា មិនមែនតែករណីឃាតកម្មនេះមួយទេ គឺករណីបាញ់សម្លាប់លើអ្នកសារព័ត៌មាន មេសហជីព និងអ្នកធ្វើការងារសង្គមផ្សងទៀត ក៏សមត្ថកិច្ចរកមុខជនប្រព្រឹត្តិមិនទាន់ឃើញដែរ។ អនុប្រធានគណបក្សភ្លើងទៀនរូបនេះ លើកឡើងទៀតថា បើការបោះឆ្នោតខែកក្កដា ខាងមុខគណបក្សភ្លើងទៀនឈ្នះឆ្នោត គឺរដ្ឋាភិបាលគណបក្សភ្លើងទៀននឹងរៀបចំបង្កើតគណៈកម្មការស៊ើបអង្កេតរឿងនេះឡើងវិញ។
លោករ៉ុងឈុន៖ «សព្វថ្ងៃយើងមិនទាន់បានកាន់អំណាចក៏ដោយ ក៏យើងគ្រាន់តែមានសិទ្ធិក្នុងជំរុញតែបើនៅពេលយើងកាន់អំណាចដឹកនាំប្រទេសបន្ទាប់ថ្ងៃទី២៣ កក្កដា យើងនឹងវែកមុខរកឃាតក និងអ្នកនៅពីក្រោយខ្នងឃាតកយកមកផ្ដន្ទាទោស ដើម្បីយុត្តិធម៌ជនរងគ្រោះក៏ដូចជាសាច់ញាតិ»។
ទាក់ទងរឿងនេះ វិទ្យុអាស៊ីសេរីមិនអាចឆ្លើយតបពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី៣០ ខែមីនា។ ចំណែកប្រធានកងអង្គរក្សរបស់លោក ហ៊ុន សែន គឺលោក ហ៊ីង ប៊ុនហៀង នៅពេលអ្នករាយការណ៍ព័ត៌មានសុំសួរលោកពីករណីគប់គ្រាប់បែកនេះលោកបិទទូរស័ព្ទឈប់និយាយ។
រីឯអ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងការពារជំនួសក្រុមមេយោធាដែលរងការចោទប្រកាន់នេះថា អ្វីដែលលោក សម រង្ស៊ី ចោទប្រកាន់មិនមែនជាពិតឡើយ ហើយមានតែជនបរទេសពីរបីនាក់ប៉ុណ្ណោះ ដែលជឿលោក សម រង្ស៊ី។
អ្នកវិភាគនយោបាយលោក គឹម សុខ យល់ថា ឃាតកម្មកាលពី ២៦ឆ្នាំមុនជាឃាតកម្មប្រឆាំងមនុស្សជាតិ ព្រោះការប៉ុនប៉ងសម្លាប់មនុស្សជាក្រុមដោយការគប់គ្រាប់បែកយ៉ាងឃោរឃៅ។ លោកបន្តទៀតថា នៅពេលរដ្ឋាភិបាលលោក ហ៊ុន សែន នៅតែរកមិនឃើញឃាតកនៃឃាតកម្មនេះ និងឃាតកម្មផ្សេងៗ ទៀត គឺជៀសមិនផុតពីការរិះគន់ថា រដ្ឋាភិបាលជាប់ពាក់ព័ន្ធនឹងឧក្រិដ្ឋទាំងនោះទេ។ អ្នកវិភាគរូបនេះយល់ថា ក្រុមអ្នកប្រជាធិបតេយ្យ ឬអ្នកច្បាប់អន្តរជាតិ គួររួមគ្នារៀបចំឯកសារប្ដឹងលោក ហ៊ុន សែន ទៅតុលាការព្រហ្មទណ្ឌអន្តរជាតិ (ICC)។
លោក គឹម សុខ៖ «លោក ហ៊ុន សែន បានទាំងសារភាពខ្លួនគាត់ថា គាត់មានផែនការកម្ទេចអ្នកប្រឆាំង ឬក៏អ្នកប្រជាធិបតេយ្យ។ ដូច្នេះ នេះជាផែនការឧក្រិដ្ឋកម្មប្រឆាំងមនុស្សជាតិ ពីព្រោះកម្ទេចមនុស្សជាបណ្ដាញ ជាក្រុម ជាសហគមន៍ នៃអ្នកដែលស្រលាញ់ប្រជាធិបតេយ្យមែនទែនទៅលោក ហ៊ុន សែន ត្រូវឡើងតុលាការអន្តរជាតិ ICC ក្នុងករណីហ្នឹង»។
បើទោះជាសមត្ថកិច្ចនៃរដ្ឋាភិបាលលោក ហ៊ុន សែន មិនទាន់អាចរកមុខឃាតក និងអ្នកនៅក្រោយឧក្រិដ្ឋទាំងនេះឃើញក្ដី តែរបាយការណ៍ស៊ើបអង្កេតរបស់ការិយាល័យស៊ើបអង្កេតសហព័ន្ធរបស់អាមេរិក (FBI) លាតត្រដាងថា លោក ហ៊ីង ប៊ុនហៀង និងលោក ហ៊ុយ ពិសិដ្ឋ ដែលកាលនោះជាប្រធាន និងអនុប្រធានក្រុមកងអង្គរក្ស លោក ហ៊ុន សែន ជាអ្នករៀបចំ និងបញ្ជាផ្ទាល់ការគប់គ្រាប់បែកលើអ្នកតវ៉ាអហិង្សានោះ៕
No comments:
Post a Comment