2023.04.09
រដ្ឋមន្ត្រី និងប្រធានស្ថាប័នរបស់ជាតិយ៉ាងហោចណាស់ជាង ១០ស្ថាប័ន មានកូនៗ និងសាច់ញាតិរបស់ខ្លួនធ្វើជារដ្ឋលេខាធិការ អនុរដ្ឋលេខាធិការនិងមុខតំណែងសំខាន់ៗក្នុងស្ថាប័នទាំងនោះ។ ចំណែកការតែងតាំងមន្ត្រីនៅថ្នាក់មូលដ្ឋានរដ្ឋាភិបាល លោក ហ៊ុន សែន ក៏កំពុងបើកដៃឱ្យអាជ្ញាធរមូលដ្ឋានរួមមានប្រធានប៉ុស្តិ៍នគរបាល និងមេឃុំ ឬចៅសង្កាត់មានសិទ្ធិជ្រើសរើសសាច់ញាតិរបស់ខ្លួនឱ្យចូលធ្វើប៉ូលិសផងដែរ។
ក្រុមមន្ត្រីធំៗនៃរដ្ឋាភិបាលលោក ហ៊ុន សែន កំពុងប្រឹងញាត់កូនៗរបស់ខ្លួនឱ្យកាន់តួនាទីខ្ពស់ ឬត្រៀមស្នងតំណែងរបស់ខ្លួននាពេលខាងមុខដ៏ខ្លី។ អ្នកវិភាគនិងមន្ត្រីសិទ្ធិមនុស្សព្រមានថា រដ្ឋាភិបាលដែលកើតចេញពីគ្រួសារនិយមបែបនេះអាចមានភាពរង្គោះរង្គើ ឬការគ្រប់គ្រងអំណាចមិនបានយូរអង្វែងទេ។
អ្នកវិភាគនយោបាយ លោក គឹម សុខ សង្កេតឃើញថា លោក ហ៊ុន សែន លេងក្បួនពីរ ក្នុងការរៀបចំអ្នកបន្តវេន ទី១ឱ្យរដ្ឋមន្ត្រី ឬប្រធានស្ថាប័ននានាអាចដាក់កូនរបស់ពួកគេត្រៀមស្នងតំណែងពីឪពុក។ លោកសង្កេតបន្តទៀតថា ចំពោះការតែងតាំងមន្ត្រីថ្នាក់មូលដ្ឋាន គឺលោក ហ៊ុន សែន មិនបានផ្ដល់លទ្ធភាពឱ្យលោក ស ខេង អាចតែងតាំងទេ តែលោកកំពុងឱ្យកូនៗរបស់លោកជ្រើសរើសមនុស្សរបស់ខ្លួនធ្វើការងារនៅថ្នាក់ខេត្ត ឬថ្នាក់ស្រុក។ លោកយល់ថា ទង្វើបែបនេះ ខុសពីគោលការណ៍លទ្ធិប្រជាធិបតេយ្យ ខុសបែបបទរដ្ឋបាល និងពិបាកជ្រើសរើសមនុស្សមានសមត្ថភាពអាចបម្រើពលរដ្ឋបានណាស់។
លោក គឹម សុខ៖ «រៀបចំមន្ត្រីថ្នាក់ក្រោមតាំងពីថ្នាក់ភូមិនគរបាលឃុំសង្កាត់រហូតដល់ស្រុកក្រុងខណ្ឌខេត្តទូទាំងប្រទេស សុទ្ធតែជាមនុស្សរបស់ក្រុមគ្រួសារហ៊ុន ទាំងអស់ ហើយគម្រាមមិនឱ្យ ស ខេង លូកដៃទៅថ្នាក់ក្រោមជាតិទេ ដើម្បីកូនៗលោក ហ៊ុន សែន ហ្នឹងរៀបចំរចនាសម្ព័ន្ធហ្នឹងឱ្យរឹងមាំ បំណងរបស់លោក ហ៊ុន សែន ដើម្បីធានាថា ក្រុមលោក ស ខេង ក្ដីក្រុមលោក ទៀ បាញ់ មិនអាចប្រមូលឃើញក្រោមដើម្បីតវ៉ានឹងការផ្ទេរអំណាចពី ហ៊ុន សែន ទៅ ហ៊ុន ម៉ាណែត»។
អ្នកវិភាគលើកឡើងដូច្នេះ ក្រោយពេលលោកនាយករដ្ឋមន្ត្រី ហ៊ុន សែន បើកដៃឱ្យរដ្ឋមន្ត្រី និងប្រធានស្ថាប័នរបស់ជាតិយ៉ាងតិចជាង១០ស្ថាប័នស្នើតែងតាំងកូនៗរបស់ខ្លួនឱ្យធ្វើជារដ្ឋលេខាធិការ អនុរដ្ឋលេខាធិការ និងមុខតំណែងសំខាន់ៗនៅក្នុងស្ថាប័នទាំងនោះ។ ក្រុមអ្នកឃ្លាំមើលយល់ថា កូនៗរបស់មន្ត្រីជាន់ខ្ពស់ទាំងនោះអាចនឹងទទួលបានតួនាទីជារដ្ឋមន្ត្រី ឬប្រធានស្ថាប័នជាតិទាំងនោះនៅពេលលោក ហ៊ុន ម៉ាណែត ឡើងដឹកនាំប្រទេសជំនួសឪពុករបស់លោកនាពេលខាងមុខដ៏ខ្លី។ ក្រៅពីការតែងតាំងមុខតំណែងគ្រួសារនិយមនៅថ្នាក់ជាតិបែបនេះ រដ្ឋមន្ត្រីក្រសួងមហាផ្ទៃ លោក ស ខេង បានអនុញ្ញាតឱ្យប្រធានប៉ុស្តិ៍នគរបាល មេឃុំឬចៅសង្កាត់ មានសិទ្ធិជ្រើសរើសប៉ូលិសនៅមូលដ្ឋានរបស់ពួកគេផងដែរ។
លោក ស ខេង ថ្លែងកាលពីចុងខែមីនា ថា ការជ្រើសរើសបែបនេះ អាចនឹងទទួលរងការរិះគន់ថា បក្ខពួកនិយម ប៉ុន្តែលោករំពឹងថា ការធ្វើបែបនេះអាចនឹងមានប្រសិទ្ធភាពការងារជាងជ្រើសរើសមន្ត្រីនគរបាលនៅក្រសួងមហាផ្ទៃរួចហើយ បញ្ជូនមន្ត្រីទាំងនោះឱ្យមកបំពេញការងារនៅមូលដ្ឋាន។
លោក ស ខេង៖ «ឯណាជាប់សាច់ញាតិបក្ខពួកអី ខ្ញុំថា ជៀសមិនផុតទេ ទាល់តែមនុស្សគេដឹងដែរគេយកបងប្អូនយកទៅ ប៉ុន្តែធ្វើម៉េចឱ្យធ្វើការកើតទៅយកអ្នកផឹកស៊ីអាឡេអាឡូធ្វើការម៉េចកើត?»
ទាក់ទងការតែងតាំងមុខតំណែងគ្រួសារនិយមក្នុងស្ថាប័នជាតិ ដល់ថ្នាក់មូលដ្ឋានបែបនេះ មន្ត្រីជាន់ខ្ពស់គណបក្សកាន់អំណាចទទួលស្គាល់បានកើតឡើងជាច្រើនឆ្នាំមកហើយ និងក៏មិនមែនជារឿងចម្លែកអ្វីដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យវិទ្យុអាស៊ីសេរីដឹងថា ការតែងតាំងមន្ត្រីរដ្ឋាភិបាល ឬសមត្ថកិច្ចមូលដ្ឋាន ជាសិទ្ធិរបស់គណបក្សឈ្នះឆ្នោត។ លោកនិយាយបែបផ្លែផ្កាទៀតថា គណបក្សកាន់អំណាចមិនអាចយកកូនៗមន្ត្រីបក្សប្រឆាំងឱ្យមកកាន់ការងាររដ្ឋាភិបាលឡើយ។ លោកអះអាងទៀតថា គណបក្សរបស់លោកតែងតាំងមន្ត្រីរបស់ខ្លួនបែបនេះជាងជាង៤០ឆ្នាំមកហើយ តែមិនឃើញកើតឡើងនូវទំនាស់ផលប្រយោជន៍ឬការបែកបាក់ផ្ទៃក្នុងទេ។
លោក សុខ ឥសាន៖ «ប្រទេសណាខ្លះនៅលើពិភពលោកហ្នឹងដែលយកកូនចៅបក្សប្រឆាំងយកតែងតាំងអត់មានទេ អ៊ីចឹងសរុបមកវិញបក្សទេវតាបើតែងតាំង គឺយកកូនទេវតាយកតែងតាំងគេមិនដែលយកកូនប្រេតកូននរកយកមកតែងតាំងទេបាទ»។
ចាប់តាំងពីលោកនាយករដ្ឋមន្ត្រី ហ៊ុន សែន រៀបចំឱ្យកូនប្រុសច្បងរបស់លោកគឺលោក ហ៊ុន ម៉ាណែត ត្រៀមកាន់តំណែងនាយករដ្ឋមន្ត្រីមក។ រដ្ឋមន្ត្រីនានាក៏ស្នើតែងតាំងកូនរបស់ខ្លួនឱ្យមានតួនាទីខ្ពស់ៗនៅជិតខ្លួនផងដែរ។ ក្នុងនោះ រដ្ឋមន្ត្រីក្រសួងមហាផ្ទៃលោក ស ខេង មានកូនប្រុសច្បងឈ្មោះ ស សុខា ជារដ្ឋលេខាធិការក្រសួងអប់រំ និងកូនប្រុសពៅម្នាក់ទៀតឈ្មោះ ស រដ្ឋា មានឋានន្តរសក្ដិជាឧត្ដមសេនីយ៍ឯកផ្កាយ ៣ រួមទាំងក្មួយៗ របស់លោកមួយចំនួនទៀត ក៏ជាមន្ត្រីជាន់ខ្ពស់ក្នុងជួរប៉ូលិសផងដែរ។ រដ្ឋមន្ត្រីក្រសួងការពារជាតិ លោក ទៀ បាញ់ មានកូនប្រុសច្បងម្នាក់ឈ្មោះ ទៀ សីហា ជាអភិបាលខេត្តសៀមរាប ហើយប្អូនម្នាក់ទៀតរបស់លោកគឺលោកនាយឧត្ដមនាវី ទៀ វិញ ជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងទឹក។
ប្រធានព្រឹទ្ធសភាលោក សាយ ឈុំ ប្រធានព្រឹទ្ធសភាមានកូនប្រុសឈ្មោះ សាយ សំអាល់ ជារដ្ឋមន្ត្រីក្រសួងបរិស្ថាន។ ប្រធានរដ្ឋសភាលោក ហេង សំរិន មានកូនប្រសាឈ្មោះ វង សូត ជារដ្ឋមន្ត្រីក្រសួងសង្គមកិច្ច។ ចំណែករដ្ឋមន្ត្រី ឬប្រធានស្ថាប័នមួយចំនួនក៏ចាប់ផ្ដើមតែងតាំងកូនៗរបស់ពួកគេឱ្យកាន់ការងារជារដ្ឋលេខាធិការ អនុរដ្ឋលេខាធិការ នៅក្នុងក្រសួងឬស្ថាប័នរបស់ខ្លួនគ្រប់គ្រងដែរ។ រដ្ឋមន្ត្រីក្រសួងដែនដីលោក ជា សុផារ៉ា មានកូនប្រុសម្នាក់ឈ្មោះ ផារ៉ា មង្គល ជារដ្ឋលេខាធិការនៃក្រសួងនេះ។ រដ្ឋមន្ត្រីរ៉ែ និងថាមពលលោក ស៊ុយ សែម មានកូនប្រុសឈ្មោះ ស៊ុយ ឌីម៉ង់ គឺជារដ្ឋលេខាធិការក្រសួងនោះដែរ។ រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ មានកូនស្រីឈ្មោះ លឹម លីនដា ជារដ្ឋលេខាធិការក្រសួងនេះ និងកូនប្រុសរបស់លោកម្នាក់ទៀត លោក លឹម កាន់បេរ៉ា ជាអនុរដ្ឋលេខាធិការក្រសួងនោះផងដែរ។ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង មានកូនប្រុស ២នាក់របស់លោកឈ្មោះ យ៉ិនទៀង ពុទ្ធិរិទ្ធ និងយ៉ិនទៀង ពុទ្ធិរ៉ា ជាជំនួយការនៃអង្គភាពមួយនេះ ដែលមានឋានៈស្មើរដ្ឋលេខាធិការ និងអនុរដ្ឋលេខាធិការ។ មនុស្សជំនិតលោក ហ៊ុន សែន រូបនេះ ក៏មានកូនស្រីម្នាក់ទៀតឈ្មោះ យ៉ិនទៀង ពុទ្ធិរស្មី ជារដ្ឋលេខាធិការក្រសួងការបរទេសផងដែរ។
ទោះយ៉ាងណា ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា រូបភាពទាំងនេះមិនមែនជាគំរូល្អទេ។ លោកបន្តទៀតថា បញ្ហានេះនឹងធ្វើឱ្យមានវប្បធម៌អញជួយឯង ឯងជួយអញចាក់ឫសគល់ នៅក្នុងស្ថាប័នរដ្ឋ និងមិនផ្ដល់ផលល្អដល់ប្រយោជន៍ជាតិទេ។ មន្ត្រីសង្គមស៊ីវិលរូបនេះ បារម្ភថា រូបភាពបែបនេះ នឹងបង្កឱ្យមានទំនាស់ផលប្រយោជន៍សង្គម ប៉ះពាល់ប្រសិទ្ធភាពការងារ និងការបាត់បង់ឯករាជ្យរបស់ស្ថាប័នជាតិជាដើម។
លោក រស់ សុដ្ឋា៖ «មិនដឹងមូលហេតុអីបានជារឿងហ្នឹងធ្លាក់ដល់ពីរចនាសម្ព័ន្ធខាងលើរហូតដល់ខាងក្រោម ឬក៏មកពីថ្នាក់ដឹកនាំយើងមិនអាចធានាបញ្ហាហ្នឹង បានជាសម្របសម្រួលឱ្យបញ្ហាហ្នឹងកើតឡើងទូទាំងប្រទេសអ៊ីចឹងខ្ញុំក៏មិនយល់ដែរ»។
ចំណែក មន្ត្រីគណបក្សសង្គ្រោះជាតិ ដែលកំពុងភៀសខ្លួននៅប្រទេសថៃ លោក ដួង ចន្ត្រា យល់ថា គណបក្សប្រជាជនកម្ពុជាលែងទុកចិត្តយុវជនដែលមានសមត្ថភាព ហើយប៉ុន្តែពួកគេទុកចិត្តតែសែស្រឡាយ ឬសាច់ញាតិរបស់ខ្លួនប៉ុណ្ណោះ។
លោក ដួង ចន្ត្រា៖ «មិនឱ្យអនុវត្តទៅតាមការរៀបចំបន្តវេនរបៀបបន្តពូជពីឪពុក ទៅកូនតាមសេណារីយ៉ូបែបនេះទេ ដែលធ្វើឱ្យយុវជនគឺគាត់អស់សង្ឃឹមក្នុងការតស៊ូនៃការសិក្សាពិសេសឱ្យយុវជនទាំងអស់ក្នុងការតស៊ូក្នុងការសិក្សា»។
លោកថា ទង្វើបែបនេះនឹងធ្វើឱ្យការដឹកនាំប្រទេសកម្ពុជាក្លាយទៅជាការដឹកនាំបែបផ្ដាច់ការ។ លោកបន្តទៀតថា រូបមន្តដឹកនាំប្រទេសដែលជាការបន្តអំណាចពីឪពុកទៅកូន ពីថ្នាក់ជាតិដល់មូលដ្ឋានបែបនេះមិនអាចដឹកនាំប្រទេសយូរអង្វែងទេ៕
No comments:
Post a Comment