2024.04.19
អ្នកឃ្លាំមើល និងប្រជាពលរដ្ឋថា ការបង្ហាញតួលេខភ្ញៀវទេសចរ ដើរលេងកម្សាន្ត ជាង២១លាននាក់ ក្នុងពិធីបុណ្យចូលឆ្នាំថ្មី រយៈពេល៤ថ្ងៃ របស់មន្ទីរទេសចរណ៍ រាជធានី-ខេត្ត មិនឆ្លុះបញ្ចាំងការពិតនោះទេ។ ពួកគាត់ថា តួលេខនេះ ធ្វើឡើងជាការបំពេញចិត្តថ្នាក់លើ ដើម្បីកេងចំណេញផលប្រយោជន៍នយោបាយ។
អ្នកឃ្លាំមើល និងប្រជាពលរដ្ឋ ហាក់អស់សំណើចចំពោះតួលេខអ្នកទេសចរជាតិ និងអន្តរជាតិជាង២១លាននាក់ ដែលបង្ហាញដោយរដ្ឋាភិបាលលោក ហ៊ុន ម៉ាណែត ព្រោះពួកគាត់ជឿថា ជាការបំផ្លើសជ្រុលហួសហេតុ និងផ្ដល់និយមន័យអ្នកទេសចរណ៍មិនបានត្រឹមត្រូវ។
ប្រធានសមាគមស្ត្រីអ្នករត់រ៉ឺម៉កកង់បី នៅខេត្តសៀមរាប លោកស្រី គឹម សុខលាង ប្រាប់វិទ្យុអាស៊ីសេរីនៅថ្ងៃទី១៨ ខែមេសា ថា ពិធីបុណ្យចូលឆ្នាំប្រពៃណីជាតិ ក្នុងខេត្តសៀមរាប ថ្មីៗនេះ ពុំសូវឃើញមានភ្ញៀវទេសចរ ដើរលេងកម្សាន្ត ដូចមុនៗនោះទេ ដោយសារតែ ការរៀបចំ ពិធីប្រពៃណី មិនបានធ្វើនៅតាមប្រាសាទបុរាណ ស្របពេលជីវភាពពលរដ្ឋកាន់តែខ្វះខាត។
រីឯ ការចេញតួលេខរបស់មន្ទីរទេសចរណ៍រាជធានី-ខេត្ត ពីភ្ញៀវទេសចរណ៍ ក្នុងពិធីបុណ្យចូលឆ្នាំប្រពៃណីជាតិ នៅពេលថ្មីៗនេះ ជាង២១លាន់នាក់នោះ លោកស្រីថា ពុំត្រឹមត្រូវ។ ជាក់ស្ដែង ពលរដ្ឋភាគច្រើន ពុំសូវមានថវិកាដើរលេងសប្បាយនោះទេ។ ចំណែកភ្ញៀវបរទេស ក៏មានតិចតូច ដែលមក លេងខេត្តសៀមរាប។
លោកស្រី គឹម សុខលាង៖ «ក្រសួងទេសចរណ៍បង្ហាញតួលេខខុស។ បើក្រសួងទេសចរណ៍ ពិតជាក្រសួងទេសចរណ៍ដ៏ត្រឹមត្រូវ មកផ្ទៀងផ្ទាត់ ហើយមកនិយាយ ហើយប្រឹក្សា ជាមួយនឹងប្រជាជនផ្ទាល់ដែលគាត់ដឹកភ្ញៀវរាល់ថ្ងៃ។ ក្រសួងទេសចរណ៍ មិនដែលសហការជាមួយពួកយើងទាល់តែសោះ។ កន្លងមកក្រសួងធ្លាប់អញ្ជើញខ្ញុំទៅ ខ្ញុំតែងលើការតវ៉ា ឥឡូវក្រសួងទេសចរណ៍ មិនដែលអញ្ជើញខ្ញុំ ទៅទៀត»។
ការលើកឡើងនេះ ស្របដែលលោកនាយករដ្ឋមន្ត្រី ហ៊ុន ម៉ាណែត ហាក់រំភើបចិត្ត និងបានបង្ហោះលើហ្វេសប៊ុក (Facbook) របស់លោក នៅថ្ងៃទី១៨ ខែមេសា ដោយបង្ហាញពីស្ថិតិភ្ញៀវទេសចរជាតិ និងអន្តរជាតិថា ពិធីបុណ្យចូលឆ្នាំប្រពៃណីជាតិ រយៈពេល៤ថ្ងៃ មានភ្ញៀវទេសចរជាតិ និងអន្តរជាតិជាង ២១លាន់នាក់ បានដើរលេងកម្សាន្ត។ ក្នុងនោះក៏មានភ្ញៀវបរទេស ជាង១០ម៉ឺននាក់។
អ្នកឃ្លាំមើលសង្គមលើកឡើងថា ស្ថិតិភ្ញៀវទេសចរជាតិ និងអន្តរជាតិ ដែលបង្ហាញមកនេះ ពុំឆ្លុះបញ្ចាំងពីការពិតនោះទេ។ បើប្រៀបធៀបនឹងពិធីបុណ្យចូលឆ្នាំមុនៗ មានភ្ញៀវទេសចរណ៍ជាតិ និងអន្តរជាតិ ប្រមាណជាង៥លាននាក់ ទៅ៦លាននាក់។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក លោក វន់ ពៅ ប្រាប់វិទ្យុអាស៊ីសេរីថា រយៈពេល៤ថ្ងៃ ក្នុងពិធីបុណ្យចូលឆ្នាំប្រពៃណីជាតិនេះ ប្រជាពលរដ្ឋ និងយុវជនច្រើនដើរលេងកម្សាន្ត។ ក៏ប៉ុន្តែ ពុំច្រើនលើសលប់ ដូចការអះអាង របស់មន្ទីរទេសចរណ៍ រាជធានី-ខេត្តនោះទេ ស្របពេលដែលប្រជាជនខ្មែរប្រមាណតែ ១៦លាន់នាក់។
យ៉ាងណា លោក វន់ ពៅ ថា ការបង្ហាញស្ថិតិចំនួនភ្ញៀវទេសចរជាតិ ឬអន្តរជាតិច្រើន ឬអត់ ពុំសំខាន់នោះឡើយ ។ លោកបន្ត អ្វីដែលសំខាន់នោះ គឺរដ្ឋាភិបាល ត្រូវគិតគូរ ពីជីវភាពពលរដ្ឋ និងគោរពសិទ្ធិមនុស្សឱ្យបានពេញលេញទើបជារឿងប្រសើរ ជាជាង គិត តែពីចំនួន តួលេខ ភ្ញៀវទេសចរ កើន ឬក៏ថយចុះ។
លោក វន់ ពៅ៖ «ទី១ធ្វើយ៉ាងណា ឱ្យសេដ្ឋកិច្ចពលរដ្ឋនឹងមានការកើនឡើង បានស៊ីជាមួយនឹងចំនួនអ្នកដែលទៅដើរលេងនៅតំបន់កម្សាន្ត ឬក៏ភ្ញៀវទេសចរ ។ អ្វីដែលសំខាន់ធ្វើឱ្យសេដ្ឋកិច្ច ពលរដ្ឋកើនឡើង មានជីវភាពធូរធារ ឈប់ជំពាក់បំណុលធនាគារ។ ធ្វើឱ្យទាក់ទាញភ្ញៀវទេសចរ រៀបចំសន្តិសុខ សង្គម ឱ្យបានស្អាតឱ្យបានល្អ។ ហើយអំពើអយុត្តិធម៌ក្នុងសង្គមមានការគោរពសិទ្ធិមនុស្ស មានលំហប្រជាធិបតេយ្យ ខ្ញុំគិតថាជារឿងល្អវិញ»។
នៅថ្ងៃទី៥ ខែមីនា ក្រសួងទេសចរណ៍បង្ហាញថា នៅខែមករា ឆ្នាំ២០២៤ មានភ្ញៀវបរទេសជាង ៥០ម៉ឺននាក់ (៥៤០.០២៣) នាក់ ចូលមកប្រទេសកម្ពុជា។ បើធៀប កាលពីខែមករា ឆ្នាំ២០២៣ ជាង៤០ម៉ឺន (៤០២.៩៤៣)នាក់។ ក្នុងចំណោមភ្ញៀវខាងលើ គឺភ្ញៀវមកពីប្រទេសថៃ វៀតណាម និងឡាវ។
មន្ត្រីសង្គមស៊ីវិល និងប្រជាពលរដ្ឋមើលឃើញថា បើទោះបីវិបត្តិកូវីដ-១៩ ត្រូវបានបិទបញ្ចប់ក្ដី ប៉ុន្តែ ភ្ញៀវទេសចរជាតិនិង អន្តរជាតិ ដែលមកដើរលេងកម្សាន្ត នៅតំបន់អង្គរវត្ត និងរមណីយដ្ឋាន នានា ពុំសូវឃើញមានច្រើននោះទេ។ ករណីនេះ ពលរដ្ឋ ដែលរកស៊ីពឹងអាស្រ័យលើវិស័យទេសចរណ៍ ដូចជាអ្នកលក់ដូរម្ហូបអាហារ វត្ថុអនុស្សាវរីយ៍ អ្នករត់រ៉ឺម៉កកង់បី និងក្រុមមគ្គទេសចរណ៍ ត្អូញត្អែរ ពីជីវភាពលំបាក គ្មានចំណូលទៀងទាត់ បើទោះបីកម្ពុជា បានរៀបចំពិធីបុណ្យជាតិ ដើម្បីទាក់ទាញ ភ្ញៀវទេសចរជាហូរហែក៏ដោយ៕
No comments:
Post a Comment