2024.04.22
គណបក្សកម្លាំងជាតិ នៅថ្ងៃទី២២ មេសា បានប្រមូលផ្ដុំសកម្មជនធ្វើបាតុកម្មទាមទាររដ្ឋាភិបាលឱ្យស្តារប្រជាធិបតេយ្យ និងដោះលែងអ្នកជាប់ឃុំក្រោមហេតុផលនយោបាយ។ ចំណែកមន្ត្រីសិទ្ធិមនុស្សយល់ថា រដ្ឋាភិបាលគួរដោះស្រាយវិវាទនយោបាយឱ្យបានឆាប់ ជាពិសេស ទទួលយកមតិយោបល់របស់ពលរដ្ឋ និងសហគមន៍អន្តរជាតិទៅកែលម្អ ដើម្បីតម្កល់ផលប្រយោជន៍ជាតិរួម។
ដូចការគ្រោងទុក ថ្នាក់ដឹកនាំ និងសកម្មជនគណបក្សកម្លាំងជាតិ រួមជាមួយគ្រួសារអ្នកជាប់ឃុំប្រមាណ ២០០នាក់ បានប្រមូលផ្ដុំគ្នាធ្វើបាតុកម្មដោយសន្តិវិធី នៅមុខទីស្នាក់ការបក្សស្ថិតនៅភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ បន្ទាប់ពីអាជ្ញាធរក្រុងភ្នំពេញ ហាមឃាត់ពួកគេមិនឱ្យសម្ដែងមតិនៅទីលានប្រជាធិបតេយ្យ។
តែយ៉ាងណាពួកគេបង្ខំចិត្តប្រមូលផ្ដុំសម្ដែងមតិនៅមុខទីស្នាក់ការបក្សវិញដោយអ្នកខ្លះឈរលើកបដា អ្នកខ្លះទៀតលើករូបថតអ្នកជាប់ឃុំ និងស្រែកទាមទារឲ្យរដ្ឋាភិបាលដោះលែងសមាជិកបក្សកម្លាំងជាតិពីររូបគឺលោក គា វិសាល និងលោក អ៊ំ វីរៈរដ្ឋ រួមជាមួយថ្នាក់ដឹកនាំ សកម្មជននយោបាយ សកម្មជនសិទ្ធិមនុស្ស និងមេសហជីពផ្សេងទៀត រួមមាន លោក ថាច់ សេដ្ឋា កញ្ញា សេង ធារី កញ្ញា ឈឹម ស៊ីថរ និងលោក កើត សារ៉ាយ ជាដើម។
សម្រែកទាមទារ៖ «សូមដោះលែងលោក អ៊ំ វីរៈរដ្ឋ! ដោះលែងៗ! សូមដោះលែងលោក មឺ សេងហ៊! ដោះលែងៗ!»។
ទន្ទឹមនឹងនេះ គ្រួសារនិងសាច់ញាតិអ្នកជាប់ឃុំ ព្រមទាំងតំណាងពលរដ្ឋរងគ្រោះដីធ្លីក៏បានកាន់ក្បាលមេក្រូរៀបរាប់ពីទុក្ខសោក ការឈឺចាប់បណ្ដាលមកពីអំពើអយុត្តិធម៌នៅក្នុងសង្គមកន្លងមកដែរ។
តំណាងក្រុមស្រ្តីថ្ងៃសុក្រលោកស្រី ព្រំ ចាន់ថា ថ្លែងថា ប្ដីលោកស្រីគឺលោក កាក់ កុម្ភារ និងសកម្មជននយោបាយមួយចំនួនទៀតកំពុងជាប់ឃុំដោយគ្មានកំហុស។ លោកស្រី ព្រំ ចាន់ថា រៀបរាប់ថា ជាច្រើនឆ្នាំមកនេះពួកលោកស្រីរស់នៅលំបាកទាំងជីវភាព និងគ្រាំគ្រាផ្លូវចិត្ត ដោយសាររដ្ឋាភិបាលយកប្រព័ន្ធតុលាការចាប់ចងអ្នកដែលមាននិន្នាការផ្ទុយយកទៅដាក់គុករាប់ឆ្នាំឱ្យព្រាត់ពីប្រពន្ធកូន។ លោកស្រីស្នើយ៉ាងទទូចដល់តុលាការទម្លាក់ការចោទប្រកាន់ និងដោះលែងសមាជិកគ្រួសារឲ្យមានសេរីភាពឡើងវិញ។
លោកស្រី ព្រំ ចាន់ថា៖ «សូមសំណូមពរក៏ដូចសម្តេច ហ៊ុន ម៉ាណែត សូមបម្រើប្រជាពលរដ្ឋឱ្យបានល្អ ប្រជាពលរដ្ឋតំណាងឱ្យប្រទេសមួយ រដ្ឋាភិបាល និងក្រសួងពាក់ព័ន្ធជាអ្នកបម្រើពលរដ្ឋ មិនមែនមកធ្វើបាបពលរដ្ឋ មិនមែនមកចាប់ពលរដ្ឋដាក់គុកអ៊ីចឹងទេ ខ្ញុំសុំឱ្យឈប់ធ្វើបាបរាស្ត្រខ្មែរទៀតទៅ សូមដោះលែងក្រុមគ្រួសារពួកខ្ញុំមកដើម្បីជួបជុំប្រពន្ធកូន»។
ចំណែកទីប្រឹក្សាគណបក្សកម្លាំងជាតិ លោក រ៉ុង ឈុន ថ្លែងទៅកាន់អ្នកគាំទ្រថា ចាប់តាំងពីរំលាយគណបក្សសង្គ្រោះជាតិមក សិទ្ធិសេរីភាពពលរដ្ឋ និងលទ្ធិប្រជាធិបតេយ្យបានធ្លាក់ចុះជាបន្តបន្ទាប់។ លោក រ៉ុង ឈុន ប្ដេជ្ញាចិត្តតស៊ូការពារយុត្តិធម៌ជូនប្រជាពលរដ្ឋ ជាពិសេស ជនរងគ្រោះពីការរំលោភបំពាននានានៅក្នុងសង្គម។ លោកផ្ញើសារទៅរដ្ឋាភិបាល និងអាជ្ញាធរពាក់ព័ន្ធបញ្ឈប់ការធ្វើទុក្ខបុកម្នេញលើសកម្មជននយោបាយ សកម្មជនសង្គមជាបន្ទាន់ដើម្បីស្ដារប្រជាធិបតេយ្យ និងគោរពសិទ្ធិមនុស្សដូចមានចែងនៅក្នុងកិច្ចព្រមព្រៀងសន្តិភាពទីក្រុងប៉ារីស ។
លោក រ៉ុង ឈុន៖ «ការចង្អុលបង្ហាញពីសហគមន៍អឺរ៉ុប សហរដ្ឋអាមេរិក ក៏ដូចមតិជាតិ គឺគេចង់ឃើញកម្ពុជាស្ដារឡើងវិញនូវការគោរពសិទ្ធិមនុស្ស សេរីភាព និងប្រជាធិបតេយ្យដែលបានកំណត់នៅក្នុងកិច្ចព្រមព្រៀងទីក្រុងប៉ារីស ដូច្នេះសូមឱ្យពិចារណាឡើងវិញទាក់ទងរឿងទាំងអស់នេះ ដើម្បីបញ្ចប់វិវាទ បញ្ឈប់ការប្រើប្រាស់ប្រព័ន្ធតុលាការមកដាក់សម្ពាធលើសកម្មជននយោបាយ និងសកម្មជនសង្គមត្រូវបញ្ចប់ពីពេលនេះតទៅបងប្អូន»។
ការចេញតវ៉ារបស់គណបក្សប្រឆាំង និងគ្រួសារជនជាប់ឃុំនេះគឺបន្ទាប់ពីអាជ្ញាធររដ្ឋាភិបាលលោក ហ៊ុន ម៉ាណែត បង្កើនការចាប់ខ្លួនសកម្មជនបក្សប្រឆាំង សកម្មជនសិទ្ធិមនុស្ស អ្នករិះគន់រដ្ឋាភិបាលដាក់ពន្ធនាគារសាជាថ្មីនៅរយៈពេលចុងក្រោយនេះ។ ការចាប់ខ្លួនជាបន្តបន្ទាប់នេះបានធ្វើឱ្យចំនួនសកម្មជនបរិស្ថាន និងមន្ត្រីបក្សប្រឆាំងកើនឡើងដល់ជាង ៥០នាក់ហើយ។
សូមចុចលើរូបខាងក្រោមនេះ ដើម្បីមើលរូបមួយចំនួនផ្សេងទៀត៖
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា និងអ្នកនាំពាក្យក្រសួងយុត្តិធម៌លោក ជិន ម៉ាលីន ដើម្បីឆ្លើយតបជុំវិញរឿងនេះបានទេ នៅថ្ងៃទី២២ ខែមេសា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADO) លោក អំ សំអាត មានប្រសាសន៍ថាការតវ៉ារបស់គណបក្សកម្លាំងជាតិ ដើម្បីស្វែងរកយុត្តិធម៌នេះគឺជាការប្រើប្រាស់សិទ្ធិសេរីភាពដោយសន្តិវិធីក្នុងការជួបជុំសម្ដែងមតិ ស្របពេលសហគមន៍អន្តរជាតិបន្តទាមទារឱ្យរដ្ឋាភិបាលកម្ពុជាបើកលំហសេរីភាពជាមូលដ្ឋានរបស់ពលរដ្ឋ និងដោះលែងអ្នកជាប់ឃុំដោយសារការអនុវត្តសិទ្ធិនយោបាយ។ លោកយល់ថា កម្ពុជាដែលជាប្រទេស បានផ្តល់សច្ចាប័នជាច្រើនស្ដីពីសិទ្ធិមនុស្សគួរទទួលយកអនុសាសន៍ ឬសំណើទាំងនោះទៅពិនិត្យ និងធ្វើឱ្យប្រសើរឡើងវិញនូវលទ្ធិប្រជាធិបតេយ្យ និងការគោរពសិទ្ធិមនុស្ស។
លោក អំ សំអាត៖ «បើយើងមើលទៅស្ថានភាពនយោបាយ ដែលនៅសេសសល់មួយចំនួន គឺអ្នកនយោបាយទាំងអស់ហ្នឹងគួរតែអាចវិលមកជជែកគ្នាដើម្បីបញ្ចប់រឿងនយោបាយដែលនៅសល់ដោយតម្កល់នូវឧត្តមប្រយោជន៍ជាតិ ប្រជាពលរដ្ឋជាធំ អាហ្នឹងក៏ជារឿងល្អប្រសើរដែរ កាលពីមុនមកអ្នកនយោបាយតែងតែធ្វើនោះបាទ»។
អ្នកជំនាញសិទ្ធិមនុស្សរបស់អង្គការសហប្រជាជាតិកាលពីពេលថ្មីៗ នេះ បានរកឃើញថារដ្ឋាភិបាលកម្ពុជាបានយាយីលើសកម្មជននយោបាយ សកម្មជនសិទ្ធិមនុស្ស និងមន្ត្រីសង្គមស៊ីវិលជាដើម។ បញ្ហានេះនឹងជះឥទ្ធិពលអាក្រក់ និងរារាំងពលរដ្ឋមិនឱ្យចូលរួមឈឺឆ្អាលពីបញ្ហាសង្គម។ អ្នកជំនាញអង្គការសហប្រជាជាតិក៏អំពាវនាវដល់រដ្ឋាភិបាលថ្មីគួរតែអនុវត្តមាគ៌ានយោបាយឱ្យខុសពីអតីតកាល និងគោរពតាមការប្ដេជ្ញាចិត្តរបស់ខ្លួនចំពោះការអនុវត្តសិទ្ធិមនុស្ស។
គម្រោងជួបជុំសម្ដែងមតិនេះគណបក្សកម្លាំងជាតិគ្រោងធ្វើរយៈពេលបីថ្ងៃចាប់ពីថ្ងៃទី២២ ដល់២៤ ខែមេសា តែដោយសារតែបញ្ហាអាកាសធាតុក្ដៅខ្លាំង គណបក្សកម្លាំងជាតិសម្រេចធ្វើឡើងតែរយៈពេលមួយថ្ងៃវិញ។ ទោះជាយ៉ាងណាក្ដី គណបក្សកម្លាំងជាតិ និងគ្រួសារជនជាប់ឃុំបញ្ជាក់ជំហរថាពួកគេមិនរាថយក្នុងការធ្វើសកម្មភាពស្វែងរករកយុត្តិធម៌ឡើយ។ ពួកគេព្រមានថា ប្រសិនបើរដ្ឋាភិបាលមិនព្រមស្ដារប្រជាធិបតេយ្យ ជាពិសេស ដោះលែងអ្នកទោសមនសិការឱ្យមានសេរីភាពនោះទេ ពួកគេនឹងប្រមូលផ្ដុំគ្នាធ្វើបាតុកម្មដោយសន្តិវិធីនៅទូទាំងប្រទេស រហូតមានដំណោះស្រាយ៕
1 comment:
Hun Sen has crushed all opposition parties, paving the way for his master Yuon to remove him easily.
Post a Comment