ដោយ ប្រាជ្ញ ចេវ
2015-11-10 rfa
 |
| តំណាងរាស្ត្រគណបក្សសង្គ្រោះជាតិ ដែលរងរបួសដោយការវាយប្រហារពីមនុស្សមួយក្រុម លោក ញ៉យ ចំរើន (ឆ្វេង) និងលោក គង់ សភា (កណ្ដាល) ត្រូវបានបញ្ជូនចេញពីទីស្នាក់ការគណបក្សទៅព្យាបាលនៅមន្ទីរពេទ្យ កាលពីថ្ងៃទី២៦ តុលា ឆ្នាំ២០១៥។
RFA/Brach Chev
|
តំណាងរាស្ត្រ ២រូប របស់គណបក្សសង្គ្រោះជាតិ ដែលរងរបួសដោយការវាយប្រហារដោយក្រុមបាតុករកាលពីថ្ងៃទី២៦ ខែតុលា សម្រេចចិត្តដាក់ពាក្យប្ដឹងក្រុមបាតុករទៅសាលាដំបូងរាជធានីភ្នំពេញ ហើយនៅថ្ងៃទី១០ ខែវិច្ឆិកា នេះ។ ក្នុងបណ្ដឹងដែលធ្វើឡើងតាមរយៈមេធាវីរបស់ខ្លួន តំណាងរាស្ត្រម្នាក់ៗ ទាមទារសំណងជាទឹកប្រាក់ចំនួន ១០០លានរៀល និងប្ដឹងជនបង្កពីបទប៉ុនប៉ងឃាតកម្មគិតទុកជាមុន និងធ្វើខូចខាតដោយចេតនាមានស្ថានទម្ងន់ទោស។
បណ្ដឹងដែលតំណាងរាស្ត្រគណបក្សសង្គ្រោះជាតិ ដាក់ពាក្យប្ដឹងនោះ ចែកចេញពីរដាច់ពីគ្នា ពោលលោក ញ៉យ ចំរើន ធ្វើមួយបណ្ដឹង និងលោក គង់ សភា ប្ដឹងមួយបណ្ដឹងទៀត ប៉ុន្តែប្ដឹងពីបទចោទដូចគ្នា និងទាមទារប្រាក់សំណងដូចគ្នា។
មេធាវីការពារក្ដីរបស់តំណាងរាស្ត្រទាំងពីរ គឺលោក ជូង ជូងី ប្រាប់ពីមូលហេតុនៃការដាក់បណ្ដឹងនេះថា ដើម្បីធ្វើឲ្យភាគីតំណាងរាស្ត្រមានសិទ្ធិឈរជាដើមបណ្ដឹង ដែលអាចទាមទារសំណង និងសុំឲ្យសមត្ថកិច្ចដាក់ទោសជនល្មើសតាមច្បាប់។ លោកបន្តទៀតថា លោកបានដាក់បណ្ដឹងទៅតុលាការតាមបែបបទរដ្ឋបាល និងតុលាការបានទទួលបណ្ដឹងរបស់លោករួចហើយដែរ៖ «បើកាលណាយើងមិនប្ដឹង យើងមិនទាន់អាចតាំងខ្លួនជាដើមបណ្ដឹង ចឹងយើងមិនអាចចូលទៅដើម្បីទាមទារសិទ្ធិ និងសំណង។ ខ្ញុំរំពឹងថា សមត្ថកិច្ចនឹងធ្វើការតាមបច្ចេកទេស ដើម្បីចាប់ខ្លួនជនល្មើសយកមកផ្ដន្ទាទោសតាមច្បាប់»។
គិតមកទល់ពេលនេះ សមត្ថកិច្ចមិនទាន់បានចាប់ខ្លួនអ្នកបង្កហិង្សាលើតំណាងរាស្ត្រគណបក្សសង្គ្រោះជាតិដទៃទៀតបាននៅឡើយទេ ក្រៅពីមានជនសង្ស័យ ៣នាក់ ចេញមុខមកសារភាព។ អ្នកទាំង ៣នាក់នោះ ត្រូវបានតុលាការចោទចំនួន ២ករណី គឺបទបង្កហិង្សាដោយចេតនាមានស្ថានទម្ងន់ទោស និងមួយករណីទៀត គឺធ្វើឲ្យខូចខាតទ្រព្យសម្បត្តិដោយចេតនាមានស្ថានទម្ងន់ទោស។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត យល់ថា ការដាក់ពាក្យបណ្ដឹងនេះ ជាសិទ្ធិរបស់តំណាងរាស្ត្រដែលរងរបួសក្នុងការទាមទាររកយុត្តិធម៌និងសំណង។ ទោះជាប្រព័ន្ធតុលាការសព្វថ្ងៃរងការចោទប្រកាន់ស្ថិតក្រោមគំនាបរបស់អ្នកនយោបាយក្ដី ប៉ុន្តែលោក អំ សំអាត លើកឡើងថា នេះជាកាតព្វកិច្ចផ្លូវច្បាប់ដែលជនរងគ្រោះស្វែងរកការអន្តរាគមន៍ពីសមត្ថកិច្ច និងពីតុលាការ៖ «ជនរងគ្រោះ និងមេធាវីតំណាង ត្រូវតែខិតខំតាមលទ្ធភាព ដើម្បីស្វែងរកយុត្តិធម៌ ប៉ុន្តែទាក់ទងនឹងដំណើរការ និងការស្វែងរកយុត្តិធម៌យ៉ាងណានោះ យើងចាំមើលបន្តទៀត»។
អ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់មានប្រសាសន៍ថា គណៈកម្មការជំនាញរបស់ក្រសួងមហាផ្ទៃ នៅតែបន្តធ្វើការងារនេះ ដើម្បីស្វែងរកជនប្រព្រឹត្តិផ្សេងទៀត។
កាលពីថ្ងៃទី២៦ ខែតុលា អ្នកតំណាងរាស្ត្រគណបក្សសង្គ្រោះជាតិ ចំនួន ២រូប គឺលោក ញ៉យ ចំរើន និងលោក គង់ សភា ត្រូវក្រុមបាតុករព្រួតគ្នាវាយឲ្យរបួសធ្ងន់ ក្នុងពេលក្រុមបាតុករតវ៉ានៅខាងមុខរដ្ឋសភា ធ្វើបាតុកម្មទាមទារទម្លាក់លោក កឹម សុខា ពីតំណែងជាអនុប្រធានទី១ រដ្ឋសភានោះ។
សង្គមស៊ីវិលរិះគន់ថា ការអនុវត្តការងាររបស់សមត្ថកិច្ចមានស្តង់ដារពីរផ្សេងគ្នា ខណៈដែលជនសង្ស័យគំរាមសម្លាប់មន្ត្រីរដ្ឋាភិបាល ត្រូវសមត្ថកិច្ចចាប់ខ្លួនបានភ្លាមៗ។ ប៉ុន្តែជនបង្កហិង្សាលើតំណាងរាស្ត្រគណបក្សប្រឆាំង បើទោះជាមានការបង្ហាញរូបថត និងខ្សែវីដេអូតាមបណ្ដាញសង្គមយ៉ាងណាក្ដី គេមិនទាន់ឃើញសមត្ថកិច្ចបង្ហាញពីលទ្ធផលការងាររបស់ខ្លួននៅឡើយទេ៕
No comments:
Post a Comment