ដោយ សូត សុខប្រាថ្នា
2016-03-07 rfa
អគ្គមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា (រូបច្រត់ជង្គង់) ពេលចុះត្រួតពិនិត្យគំនរឈើក្នុងបរិវេណក្រុមហ៊ុនដីសម្បទានសេដ្ឋកិច្ចចិនក្នុងឃុំរលួស ស្រុកសំបូរ ខែត្រក្រចេះ នៅថ្ងៃទី១៩ មករា ឆ្នាំ២០១៦។
RFA/Men Sothyr
មន្ត្រីសង្គមស៊ីវិលដែលធ្វើការងាររឿងធនធានធម្មជាតិ យល់ថា ការចុះពិនិត្យបញ្ហាបទល្មើសព្រៃឈើនៅតំបន់មួយចំនួននៅខេត្តនៅជាប់ព្រំដែនកម្ពុជា-វៀតណាម ពីសំណាក់គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ នៅតែមិនទាន់ធ្វើឲ្យពួកគេពេញចិត្តឡើយ។
ការលើកឡើងនេះ ក្រោយពេលមន្ត្រីកងរាជអាវុធហត្ថ ដឹកនាំដោយនាយឧត្តមសេនីយ៍ សៅ សុខា ចុះពិនិត្យមើលស្ថានភាពបទល្មើសព្រៃឈើនៅតំបន់ភូមិភាគឦសាន ដោយចាប់ផ្តើមមុនគេពីខេត្តត្បូងឃ្មុំ នៅព្រឹកថ្ងៃទី៧ មីនា។
កម្លាំងរាជរដ្ឋាភិបាល កំពុងបំពេញការងារស្រាវជ្រាវទីតាំងស្តុកទុកឈើមួយចំនួន ព្រមទាំងបទល្មើសព្រៃឈើនៅតំបន់ភូមិភាគឦសានជាបន្តបន្ទាប់យ៉ាងណាក៏ដោយ ប៉ុន្តែមន្ត្រីសង្គមស៊ីវិលវិញនៅមិនទាន់មានជំនឿចិត្តនៅឡើយទេ។
ពួកគេមើលឃើញថា មកទល់ពេលនេះ អ្នកពាក់ព័ន្ធបទល្មើសព្រៃឈើនៅស្រុកខ្មែរ អាជ្ញាធរមិនទាន់ចាប់ខ្លួន ពោលគឺការងាររបស់រាជរដ្ឋាភិបាលស្ថិតនៅក្នុងភាពងងឹតដដែល។
ប្រធានក្រុមកិច្ចការពិសេសសិទ្ធិមនុស្សកម្ពុជា លោក អ៊ួច ឡេង មានប្រសាសន៍នៅថ្ងៃទី៧ មីនា ថា ការងារចុះត្រួតពិនិត្យរបស់មន្ត្រីកងរាជអាវុធហត្ថ គឺគ្មានអ្វីប្លែកនោះទេ ពីព្រោះមុខសញ្ញារកស៊ីឈើធំៗនៅស្រុកខ្មែរ នៅតែអាចរស់នៅក្រៅសំណាញ់ច្បាប់បាន។ បន្ថែមពីនេះ ការងាររបស់គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ នៅពុំទាន់បង្ហាញលទ្ធផលជាផ្លូវការនៅឡើយ៖ «មានសង្ឃឹមបានទាល់តែគណៈកម្មាធិការហ្នឹងគាត់បង្ហាញថា គាត់ចាប់ឈ្មួញនេះ ឈ្មួញនោះ ហើយបង្ហាញថាឈ្មោះប៉ុន្មានគូបដែលពួកគេធ្លាប់រកស៊ីកន្លងមក»។
គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ ដែលដឹកនាំដោយ លោក សៅ សុខា ជាប្រធានគណៈកម្មាធិការ បានចុះពិនិត្យមើលស្ថានភាពបទល្មើសឈើនៅតាមខេត្តជាប់ព្រំប្រទល់កម្ពុជា-វៀតណាម ដោយចាប់ផ្ដើមពីខេត្តត្បូងឃ្មុំ។ ក្នុងនោះ គឺមានកិច្ចប្រជុំជាមួយអាជ្ញាធរខេត្តត្បូងឃ្មុំ អំពីលទ្ធផលការងាររបស់ខ្លួនកន្លងមក និងបញ្ហាមួយចំនួនទៀត។
រហូតដល់រសៀលថ្ងៃទី៧ មីនា មន្ត្រីនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មិនបានបកស្រាយយ៉ាងណាទេ ដោយលោកប្រាប់ថា កំពុងជាប់ប្រជុំ។
កាលពីថ្ងៃទី៥ មីនា លោកបានបញ្ជាក់ថា មានមនុស្ស ៩នាក់ ក្នុងនោះមានទាំងមេការក្រុមហ៊ុន ព្រមទាំងមុខសញ្ញាឃ្លាំងស្តុកទុកឈើមួយចំនួន ត្រូវបានតុលាការខេត្តត្បូងឃ្មុំ ចេញដីកាកោះហៅឲ្យចូលបំភ្លឺ ប៉ុន្តែលោកមិនបានបញ្ជាក់ព័ត៌មានលម្អិតឡើយ។
ចាប់តាំងពីគណៈកម្មាធិការជាតិមួយនេះបង្កើតឡើងកាលពីថ្ងៃទី១៥ មករា សកម្មភាពបទល្មើសឈើឆ្លងដែនទៅប្រទេសវៀតណាម ត្រូវបានទប់ស្កាត់ ហើយគំនរឈើប្រណីតរាប់ពាន់ម៉ែត្រគូប និងរាប់រយដើម ត្រូវបានសមត្ថកិច្ចរកឃើញនៅតាមឃ្លាំងស្តុកឈើមួយចំនួន ដូចជានៅស្រុកអូររាំងឪ ស្រុកមេមត់ ខេត្តត្បូងឃ្មុំ។ គំនរឈើប្រណីតរបស់ក្រុមហ៊ុនវៀតណាម នៅខេត្តក្រចេះ ស្ទឹងត្រែង មណ្ឌលគិរី រតនគិរី ជាដើម ប៉ុន្តែអ្នកពាក់ព័ន្ធបទល្មើសព្រៃឈើទាំងនោះ នៅមិនទាន់បានចាប់ខ្លួន ឬផ្ដន្ទាទោសទៅតាមផ្លូវច្បាប់ឡើយ។
លោក អ៊ួច ឡេង លើកឡើងទៀតថា បទល្មើសព្រៃឈើជាបទល្មើសជាក់ស្តែង ប៉ុន្តែអាជ្ញាធរចេះតែពន្យារពេល ក្រោមហេតុផលថា ធ្វើទៅតាមនីតិវិធីដែលនាំឲ្យលោកយល់ថា អាចជាមធ្យោបាយសម្រាប់សម្រួលឲ្យជនល្មើសទាំងនោះរួចខ្លួនប៉ុណ្ណោះ។
ច្បាប់ព្រៃឈើឆ្នាំ២០០២ មាត្រា១០០ ចែងថា សកម្មភាពទាំងឡាយដែលធ្វើឡើងដោយមន្ត្រីអាជ្ញាធរដែនដី មន្ត្រីនគរបាល កងកម្លាំងប្រដាប់អាវុធដែលបានអន្តរាគមន៍ ឬផ្តល់ការអនុញ្ញាតដោយផ្ទាល់ ឬប្រយោលជួយដល់អាជីវកម្មព្រៃឈើ និងគំរាមកំហែងមន្ត្រីរដ្ឋបាលព្រៃឈើ ឬរារាំងកិច្ចការរបស់មន្ត្រីរដ្ឋបាលព្រៃឈើ គឺចាត់ទុកជាបទល្មើស ដោយត្រូវផ្ដន្ទាទោសពី ១ឆ្នាំទៅ ៥ឆ្នាំ និងពិន័យជាប្រាក់ពី ១០លានរៀលដល់ ១០០លានរៀល។
ទោះបីជាច្បាប់បានចែងពីការកំណត់ទោសទណ្ឌតឹងរ៉ឹងបែបនេះក្ដី ប៉ុន្តែមកទល់ពេលនេះ គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ នៅមិនទាន់ចាប់អ្នកជួញដូរឈើខុសច្បាប់ ព្រមទាំងមន្ត្រីពាក់ព័ន្ធយកមកផ្ដន្ទាទោសនៅឡើយទេ៕
No comments:
Post a Comment