ដោយ សាន សែល
2016-10-10
អ្នកបឹងកក់ ស្រែកតវ៉ា គោះចានឆ្នាំង អង្រួនទ្វាររបង និងគប់ពងមាន់ដាក់ស្លាកឈ្មោះរបស់ធនាគារពិភពលោក (World Bank) ទាមទារដំណោះស្រាយដីធ្លី នៅព្រឹកថ្ងៃទី១៥ ខែកុម្ភៈ ឆ្នាំ២០១៦។ RFA/Leng Maly
លទ្ធផលស៊ើបអង្កេតរបស់អង្គការសិទ្ធិមនុស្សអន្តរជាតិមួយរកឃើញថា ស្ថាប័នមួយរបស់ធនាគារពិភពលោក (World Bank) ផ្តល់ប្រាក់កម្ចីដល់ក្រុមហ៊ុន និងគម្រោងដែលបានបណ្ដេញប្រជាជនចេញដោយបង្ខំរាប់សិបពាន់នាក់ ដែលធ្វើឲ្យពួកគេធ្លាក់ទៅក្នុងភាពក្រីក្រ។
របាយការណ៍ស៊ើបអង្កេតរបស់អង្គការអន្តរជាតិសម្រាប់ការអភិវឌ្ឍទាំងអស់គ្នា (Inclusive Development International) ដែលចេញផ្សាយកាលពីសប្ដាហ៍មុន (ថ្ងៃទី៣ តុលា) បង្ហាញថា ស្ថាប័នសាជីវកម្មហិរញ្ញវត្ថុអន្តរជាតិ (International Finance Corporation) ដែលស្ថិតក្រោមការគ្រប់គ្រងរបស់ធនាគារពិភពលោក តាមរយៈប្រាក់វិនិយោគរបស់ខ្លួន បានបង្កឲ្យមានការប្រែប្រួលអាកាសធាតុ បំផ្លាញប្រភពទឹក និងសម្លាប់ជីវចម្រុះជិតផុតពូជ។ សកម្មជនដែលតស៊ូមតិដើម្បីការពារប្រជាជន និងបរិស្ថាន ក៏ត្រូវគេចាប់ដាក់ពន្ធនាគារ វ៉ៃដំ និងសម្លាប់។
សាជីវកម្មហិរញ្ញវត្ថុអន្តរជាតិ (IFC) របស់ធនាគារពិភពលោក អះអាងថា ខ្លួនផ្ដល់សេវាកម្មប្រាក់កម្ចីដើម្បីជួយអាជីវកម្មខ្នាតតូច នៅតាមបណ្ដាប្រទេសកំពុងអភិវឌ្ឍ ឲ្យទទួលបានដើមទុន ដោយជួយជំរុញកំណើនសេដ្ឋកិច្ច និងកាត់បន្ថយភាពក្រីក្រ។
នាយកគ្រប់គ្រងនៃអង្គការអន្តរជាតិសម្រាប់ការអភិវឌ្ឍទាំងអស់គ្នា (Inclusive Development International) លោក ដេវីឌ ប្រេដ (David Pred) មានប្រសាសន៍ថា ការស៊ើបអង្កេតរបស់អង្គការលោក រកឃើញថា តាមពិត IFC កំពុងប្រើប្រាស់ថវិការបស់ធនាគារពិភពលោក គាំទ្រការរកស៊ីខ្នាតធំ ដែលបង្កគ្រោះថ្នាក់បំផុតដល់ពិភពលោក រួមទាំងប្រទេសកម្ពុជា។
លោកឲ្យដឹងទៀតថា គម្រោងដែល IFC ផ្ដល់ប្រាក់ឲ្យខ្ចីជាអាជីវកម្មដែលមានគ្រោះថ្នាក់ខ្ពស់ ដូចជាថាមពល កសិពាណិជ្ជកម្ម រ៉ែ ដឹកជញ្ជូន និងផ្លូវថ្នល់ ដែលមានទីតាំងនៅក្នុងតំបន់អាស៊ី អាហ្វ្រិក និងឡាទីនអាមេរិក។
ការស៊ើបអង្កេតរបស់អង្គការអន្តរជាតិសម្រាប់ការអភិវឌ្ឍទាំងអស់គ្នា (Inclusive Development International) រកឃើញថា ធនាគារពិភពលោក បានជួយគាំទ្រផ្នែកថវិកាដល់គម្រោងវិនិយោគទំនប់វារីអគ្គិសនីសេសានក្រោម២ នៅខេត្តស្ទឹងត្រែង គម្រោងសម្បទានរ៉ែមាសអង្គរហ្គោល (Angkor Gold) និងគម្រោងវិនិយោគចម្ការកៅស៊ូ។ គម្រោងទាំងបីនេះ កំពុងប៉ះពាល់ដល់ប្រជាជនមូលដ្ឋាន និងបរិស្ថាន ដោយបណ្ដាលឲ្យមានការបណ្ដេញចេញដោយបង្ខំ រំលោភសិទ្ធិជនជាតិដើមភាគតិច និងប៉ះពាល់ទន្លេមេគង្គ។
អាស៊ីសេរី មិនអាចទាក់ទងតំណាងសាជីវកម្មហិរញ្ញវត្ថុអន្តរជាតិ (International Finance Corporation) របស់ធនាគារពិភពលោក ប្រចាំប្រទេសកម្ពុជា ដើម្បីសួរពីបញ្ហានេះបានទេ នៅថ្ងៃទី១០ ខែតុលា។
របាយការណ៍អង្គការអន្តរជាតិសម្រាប់ការអភិវឌ្ឍទាំងអស់គ្នា (Inclusive Development International) ចន្លោះពីឆ្នាំ២០១០ ដល់ឆ្នាំ២០១៥ ឲ្យដឹងថា IFC បានផ្តល់ប្រាក់ ៥០ពាន់លានដុល្លារដល់ធនាគារពាណិជ្ជកម្ម មូលនិធិសមធម៌ឯកជន និងក្រុមហ៊ុនធានារ៉ាប់រង។
មន្ត្រីផ្នែកគោលនយោបាយនៃវិទ្យាស្ថានហិរញ្ញវត្ថុអន្តរជាតិ លោក បូល វ៉ាន់ដេវ៉ូត (Pol Vandevoort) បានឆ្លើយតបនឹងលទ្ធផលស៊ើបអង្កេតនេះថា ជារឿងគួរឲ្យព្រួយបារម្ភ។ ប៉ុន្តែអ្វីដែលជាអាថ៌កំបាំង គឺរបៀបដែល IFC លាក់បាំងពីទិសដៅចុងក្រោយនៃប្រាក់វិនិយោគ។ លោកថា វិធីតែមួយគត់ដើម្បីស្វែងរកព័ត៌មាននេះ គឺត្រូវប្រើប្រព័ន្ធទិន្នន័យដែលត្រូវចំណាយប្រាក់ច្រើន និងព្យាយាមអត់ធ្មត់ ដើម្បីតាមដានរបាយការណ៍របស់ក្រុមហ៊ុន ដែលវិនិយោគប៉ះពាល់សហគមន៍ច្រើនជាងគេ។
នាយកគ្រប់គ្រងនៃអង្គការអន្តរជាតិសម្រាប់ការអភិវឌ្ឍទាំងអស់គ្នា បញ្ជាក់ថា ស្ថាប័នហិរញ្ញវត្ថុ ឬធនាគារដែលទទួលបានប្រាក់វិនិយោគពី IFC បានឲ្យក្រុមហ៊ុនវិនិយោគខ្ចីប្រាក់ ដោយផ្ទុយពីគោលការណ៍ធានាសង្គម និងបរិស្ថានរបស់ IFC ដែលជាលទ្ធផល ធនាគារពិភពលោក ទទួលបានប្រាក់ចំណេញពីសកម្មភាពរកស៊ីដែលធ្វើឲ្យមនុស្សឈឺចាប់ បំផ្លាញបរិស្ថាន និងបង្កើតឧក្រិដ្ឋកម្ម។
អង្គការអន្តរជាតិសម្រាប់ការអភិវឌ្ឍទាំងអស់គ្នា អំពាវនាវឲ្យ IFC បញ្ឈប់ជាបន្ទាន់ក្នុងការវិនិយោគជាមួយស្ថាប័នហិរញ្ញវត្ថុ ដែលមិនមានទំនួលខុសត្រូវ ហើយ IFC ត្រូវចាត់ការជាបន្ទាន់ ដើម្បីឲ្យស្ថាប័នហិរញ្ញវត្ថុដែលខ្លួនដាក់ប្រាក់វិនិយោគ អនុវត្តតាមស្តង់ដារអនុវត្ត IFC (IFC Performance Standards) និងតាមគោលការណ៍ណែនាំរបស់អង្គការសហប្រជាជាតិ ស្ដីពីសិទ្ធិមនុស្ស និងអាជីវកម្ម៕
No comments:
Post a Comment