ដោយ ម៉ែន សុធីរ
ទិដ្ឋភាពរមណីយដ្ឋានអេកូទេសចរណ៍សម្រស់ធម្មជាតិទន្លេមេគង្គ ស្ថិតក្នុងសង្កាត់សាមគ្គី ក្រុងស្ទឹងត្រែង កាលពីថ្ងៃទី១៤ ខែមករា ឆ្នាំ២០១៧។ RFA/Men Sothyr
RFA/Men Sothyr
តំបន់រមណីយដ្ឋានធម្មជាតិថ្មីមួយ ឋិតនៅកណ្ដាលទន្លេមេគង្គ របស់ភូមិខេ សង្កាត់សាមគ្គី ក្រុងស្ទឹងត្រែង បានទាក់ទាញអ្នកទេសចរមកកម្សាន្តច្រើន ក្នុងពិធីបុណ្យចូលឆ្នាំចិន-វៀតណាម នេះ។ សហគមន៍អភិរក្សតំបន់កោះនោះចាត់ទុកថា ជាជំហានជោគជ័យនៃការចាប់ផ្ដើមបង្កើតតំបន់រមណីយដ្ឋានធម្មជាតិថ្មីមួយនេះ។
មនុស្សជាង ១ពាន់នាក់ក្នុងមួយថ្ងៃៗ បាននាំគ្នាទៅកម្សាន្តនៅតំបន់រមណីយដ្ឋានធម្មជាតិនៅលើកោះ ស្ថិតនៅកណ្ដាលទន្លេមេគង្គ សម្រាប់រយៈពេល ៣ថ្ងៃក្នុងពិធីបុណ្យចូលឆ្នាំចិននេះ។
តំបន់កោះហាន ឋិតនៅឆ្ងាយពីទីរួមខេត្តស្ទឹងត្រែង ប្រហែល ៣០គីឡូម៉ែត្រ ដែលសហគមន៍ទើបតែបង្កើតឡើងរយៈពេលជាង ១ខែប៉ុណ្ណោះ។
ការធ្វើដំណើរទៅកាន់តំបន់នោះ គឺអាចធ្វើដំណើរតាមរយៈរថយន្ត ឬម៉ូតូ ពីទីរួមខេត្តស្ទឹងត្រែង ឆ្លងស្ពានមេគង្គ តាមផ្លូវជាតិលេខ ៧អា ទៅដល់ចំណុចសង្កាត់សាមគ្គី មានផ្លូវបត់ឆ្វេងចូលទៅកាន់ដងទន្លេមេគង្គ ក្នុងភូមិខេ។
នៅតំបន់កោះហាន មានទីប្រជុំកោះតូចៗជាច្រើននៅកណ្ដាលទន្លេមេគង្គ ចម្ងាយប្រមាណជាង ២គីឡូម៉ែត្រពីច្រាំងទន្លេ។ អ្នកទេសចរអាចឆ្លងទៅកាន់កោះនោះ តាមរយៈមធ្យោបាយកាណូត ឬទូកដឹកជញ្ជូនរបស់សហគមន៍។
ប្រធានមន្ទីរទេសចរណ៍ខេត្តស្ទឹងត្រែង លោក អ៊ន់ ប៉ោសឿន សម្ដែងមោទនភាព ខណៈអ្នកទេសចរច្រើនបានទៅកម្សាន្តនៅតំបន់រមណីយដ្ឋាននេះជាលើកដំបូង ដែលជាសញ្ញាបង្ហាញឲ្យឃើញថា តំបន់រមណីយដ្ឋាននេះមានសក្ដានុពលទាក់ទាញអ្នកទេសចរយ៉ាងល្អប្រសើរ ដែលជាផ្នែកមួយរួមចំណែកកាត់បន្ថយភាពក្រីក្រ។
លោកថា សហគមន៍កំពុងអភិវឌ្ឍន៍តំបន់កោះ កាន់តែប្រសើរទៅថ្ងៃខាងមុខទៀត ដើម្បីកសាងតំបន់នោះឲ្យកាន់តែទាក់ទាញបន្ថែមទៀត។ លោកបន្ថែមថា មន្ទីរទេសចរណ៍បានចាត់មន្ត្រីជំនាញចុះអប់រំផ្សព្វផ្សាយសហគមន៍ ឲ្យយល់ដឹងពីការគ្រប់គ្រងអនាម័យ និងសេវាកម្ម ដើម្បីលើកម្ពស់សេវាកម្មទេសចរណ៍ឲ្យកាន់តែប្រសើរ៖ «បង្កើតប្រាក់ចំណូលទេសចរណ៍ បង្កើនប្រាក់ចំណូលភ្លាមៗ។ ការរៀបចំហ្នឹងឲ្យមានក្នុងតំបន់ឲ្យមានសហគមន៍ចូលរួមសកម្មភាពក្នុងមូលដ្ឋាន អ៊ីចឹងចំណូលចូលដល់ភ្លាមៗក្នុងមូលដ្ឋាន ចូលរួមចំណែកកាត់បន្ថយភាពក្រីក្រ បង្កើតការងារជូនពួកគាត់»។
ទិដ្ឋភាពទេសចរទៅកម្សាន្តនៅរមណីយដ្ឋានសម្រស់ធម្មជាតិទន្លេមេគង្គ ឋិតនៅភូមិខេ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង កាលពីថ្ងៃទី២៨ ខែមករា ឆ្នាំ២០១៧។ Photo provided Photo provided
នៅតំបន់រមណីយដ្ឋានសម្រស់ធម្មជាតិទន្លេមេគង្គ អ្នកទេសចរអាចមុជទឹកលេងឆ្នេរខ្សាច់ ទស្សនារុក្ខជាតិដុះចេញពីផ្ទៃទឹកដ៏ស្រស់ស្អាត និងសម្រាប់ពិសាម្ហូបអាហារលើផ្ទះទឹកជាលក្ខណៈជួបជុំគ្រួសារ មិត្តភ័ក្ដិ អមដោយខ្យល់បរិសុទ្ធនៅកណ្ដាលទន្លេមេគង្គ ដែលជាសម្រស់ធម្មជាតិពិតៗ។
អ្នកទេសចរទៅទស្សនាតំបន់នោះ ត្រូវបង់ប្រាក់ថ្លៃផ្ញើរថយន្ត និងម៉ូតូ ថ្លៃជិះទូកដ និងថ្លៃជួលផ្ទៃទឹក។ សហគមន៍បានកំណត់តម្លៃម្ហូបអាហារសមរម្យស្របតាមគោលការណ៍ណែនាំរបស់មន្ទីរទេសចរណ៍។
ទេសចរដែលបានទៅកម្សាន្តនៅរមណីយដ្ឋាននៅថ្ងៃអាទិត្យ ដែលជាថ្ងៃទី២ នៃបុណ្យចូលឆ្នាំចិន ត្រូវនឹងថ្ងៃទី២៩ ខែមករា លោក លី ហូវ ថ្លែងកោតសរសើរថា លោក និងមិត្តភ័ក្ដិបានទៅកម្សាន្តតំបន់នោះជាលើកដំបូង។ លោកបន្តថា សម្រស់ធម្មជាតិនៅរមណីយដ្ឋានសម្រស់ធម្មជាតិទន្លេមេគង្គ ពិតជាកន្លែងកម្សាន្តដ៏មានប្រជាប្រិយសម្រាប់អ្នកទេសចរជាតិ និងអន្តរជាតិ។ ក៏ប៉ុន្តែលោកបារម្ភពីផលប៉ះពាល់បរិស្ថាន ដូចជាបន្ទរសំឡេងខ្លាំង គ្រប់គ្រងកាកសំណល់មិនត្រឹមត្រូវ ដែលអាចប៉ះពាល់គុណភាពទឹកទន្លេ ពិសេសប្រព័ន្ធជីវចម្រុះទន្លេមេគង្គ៖ «ភ្ញៀវទេសចរទៅចង់ទស្សនាចង់មើលសម្រស់ធម្មជាតិមានទន្លេ ព្រៃឈើលក្ខណៈធម្មជាតិ នៅពេលយើងដាក់មនុស្សទៅ វាទៅជាការរំខានរញ៉េរញ៉ៃ រាំធុងបាសអ៊ីចឹង។ ទាក់ទងសេវាកម្មទូកនៅខ្វះខាតច្រើនអត់បំពេញតម្រូវការបានទេ»។
ប្រធានសហគមន៍អភិរក្សតំបន់ទេសចរណ៍សម្រស់ធម្មជាតិទន្លេមេគង្គ លោក ហ្វយ ប៊ុនវី កត់សម្គាល់ថា រយៈពេលបុណ្យចូលឆ្នាំចិន ២ថ្ងៃកន្លងទៅនេះ សេវាដឹកជញ្ជូនភ្ញៀវឆ្លងទៅតំបន់កោះនោះ មានការមមាញឹកខ្លាំង ខណៈដែលទូកដឹកជញ្ជូនចំនួន៦ មិនអាចបម្រើអ្នកទេសចរបានតាមតម្រូវការ។
លោកថា សហគមន៍គ្រោងនឹងរៀបផែនការអភិវឌ្ឍន៍បន្ថែមទៀតនូវសេវាដឹកជញ្ជូនរួមជាមួយសេវារក្សាសុវត្ថិភាពជូនអ្នកទេសចរ ដើម្បីធានាសុខ សុវត្ថិភាពជូនទេសចរដែលទៅលេងនៅតំបន់នោះ៖ «រឿងសំរាម ពេលភ្ញៀវចេញទៅអស់ក្រុមការងាររបស់ខ្ញុំជញ្ជូនមកត្រើយខាងនោះ និងជួលឡានទៅចាក់ចោលកន្លែងសំរាម ហើយអំពីបាស គឺតំបន់រ៉ាំសា របស់យើងគឺកន្លែងអភិរក្សសត្វ អ៊ីចឹងដើរប្រាប់បងប្អូនដែរ កុំចាក់បាសឮៗពេក អ្នកខ្លះគាត់ស្ដាប់ អ្នកខ្លះទៅគាត់អត់ស្ដាប់»។
តាមការប៉ានស្មានរបស់តំណាងសហគមន៍រយៈពេល ៣ថ្ងៃ នៃពិធីបុណ្យចូលឆ្នាំចិន នេះយ៉ាងហោចណាស់មានអ្នកទេសចរជាង ៣ពាន់នាក់បានមកកម្សាន្តនៅរមណីយដ្ឋានសម្រស់ធម្មជាតិទន្លេមេគង្គ។
តំបន់កោះហាន ត្រូវបានសហគមន៍រៀបចំឡើងជាង ១ខែកន្លងមកហើយ។ ក្នុងថ្ងៃធម្មតាសហគមន៍អាចរកប្រាក់ចំណូលបានពី ៥០ម៉ឺនរៀល ដល់ ៦០ម៉ឺនរៀល។ ចំណែកនៅថ្ងៃបុណ្យចូលឆ្នាំចិន សហគមន៍អាចរកប្រាក់ចំណូលក្នុងមួយថ្ងៃចាប់ពី ២លានរៀល ទៅ ៣លានរៀល៕
No comments:
Post a Comment