ដោយ ប្រាជ្ញ ចេវ
2017-02-14
ស្ត្រីពីរនាក់ដែលរងរបួសដោយក្រុមសន្តិសុខសាលាក្រុងភ្នំពេញ ប្រើហិង្សានៅក្បែរវត្តលង្កា រារាំងមិនឲ្យធ្វើដំណើរឆ្លងកាត់មុខផ្ទះលោក ហ៊ុន សែន នៅថ្ងៃទី១៤ ខែកុម្ភៈ ឆ្នាំ២០១៧។ RFA/Brach Chev
RFA/Brach Chev
ក្បួនដើរថ្មើរជើងរបស់ក្រុមពលរដ្ឋមានជម្លោះដីធ្លីពីខេត្តកោះកុង បានប៉ះទង្គិចគ្នាមួយប្រាវជាមួយសន្តិសុខរាជធានីភ្នំពេញ នៅពេលពលរដ្ឋព្យាយាមដើរកាត់មុខផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីសុំអន្តរាគមន៍ករណីជម្លោះដីធ្លីនៅខុទ្ទកាល័យរបស់លោក ហ៊ុន សែន នៅថ្ងៃទី១៤ កុម្ភៈ។ ចំណែកខុទ្ទកាល័យរបស់លោក ហ៊ុន សែន ស្នើឲ្យពលរដ្ឋវិលត្រឡប់ទៅលំនៅឋានវិញ ទើបអាចដោះស្រាយបញ្ហានេះបាន។
ការប៉ះទង្គិចគ្នានេះ កើតឡើងនៅចំណុចក្បែរវត្តលង្កា នៅពេលពលរដ្ឋមានជម្លោះដីធ្លីមកពីខេត្តកោះកុង ប្រមាណ ២០០នាក់ ធ្វើដំណើរពីផ្លូវព្រះសីហនុ សំដៅទៅខុទ្ទកាល័យដោយកាត់មុខផ្ទះលោកនាយករដ្ឋមន្ត្រី ហ៊ុន សែន។
នៅពេលពួកគេមកដល់កែងផ្លូវប៉ាស្ទ័រ ត្រូវបានក្រុមសន្តិសុខប្រមាណ ៣០នាក់រារាំង និងតម្រូវឲ្យដើរវាងទៅខាងក្រោយរបងវត្តលង្កា វិញ ប៉ុន្តែពលរដ្ឋមិនព្រម។ ទីបំផុត ក្រុមសន្តិសុខសម្រេចប្រើហិង្សារុញច្រាន និងអូសក្រុមពលរដ្ឋទាំងនោះចេញពីផ្លូវ។ យ៉ាងហោចណាស់មានស្ត្រីពីរនាក់រងគ្រោះ ព្រោះករណីហិង្សានេះដែលមិនអាចឲ្យពួកគេទៅដល់គោលដៅបាន តម្រូវរកជិះម៉ូតូ និងកង់បី។
ក្បួនដើរថ្មើរជើងរបស់ក្រុមពលរដ្ឋមានជម្លោះដីធ្លីពីខេត្តកោះកុង មានបំណងឆ្ពោះទៅកាន់ខុទ្ទកាល័យលោកនាយករដ្ឋមន្ត្រីនេះ ដើម្បីស្នើលោក ហ៊ុន សែន ពន្លឿនដោះស្រាយជម្លោះដីធ្លីជូនពួកគេ។
ស្ត្រីម្នាក់រងរបួសព្រោះការប៉ះទង្គិចនេះ លោកស្រី ណុម វ៉ានរី មកពីស្រុកស្រែអំបិល ខេត្តកោះកុង ឲ្យដឹងថា លោកស្រីត្រូវរបួសដៃ ខ្នង និងចង្កេះ ព្រោះក្រុមសន្តិសុខឡើងជង្គង់ និងចាប់អូសលោកស្រី។ លោកស្រីយល់ថា មូលហេតុដែលក្រុមសន្តិសុខហាមមិនឲ្យពលរដ្ឋដើរហែកាត់ផ្ទះនាយករដ្ឋមន្ត្រីនេះ ព្រោះពួកគេចង់លាក់ព័ត៌មាននៃការទាមទារនេះមិនឲ្យលោក ហ៊ុន សែន បានដឹង៖ «ត្រូវខ្លាំងដែរ មិនដឹងអ្នកណាគេឡើងជង្គង់ ខ្ញុំឈឺណាស់ ចំកន្លែងមុខរបួសស្បូន គាត់អូសសែងទៀត»។
ពលរដ្ឋដែលមានបញ្ហាដីធ្លីមកពីខេត្តកោះកុង មានជិត ២០០គ្រួសារ ប៉ះពាល់ដីធ្លីជិត ៨០០ហិកតារ នៅស្រុកស្រែអំបិល និងស្រុកបុទុមសាគរ មានជម្លោះដីធ្លីជាមួយក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ និងឈ្មួញដីធ្លីផ្សេងទៀតតាំងពីអំឡុងឆ្នាំ២០០៧ មក។
ប្រជាពលរដ្ឋមានជម្លោះដីធ្លីពីខេត្តកោះកុង ប៉ះទង្គិចគ្នាមួយប្រាវជាមួយសន្តិសុខរាជធានីភ្នំពេញ ក្បែរវត្តលង្កា រាជធានីភ្នំពេញ នៅថ្ងៃទី១៤ ខែកុម្ភៈ ឆ្នាំ២០១៧។ RFA/Brach Chev RFA/Brach Chev
ក្រោយការប៉ះទង្គិច ក្រុមពលរដ្ឋបន្តដំណើរទៅមុខដោយដើរតាមផ្លូវផ្សេងជៀសវាងការប៉ះទង្គិច។ នៅទីបំផុត ពួកគេបានទៅជួបតំណាងខុទ្ទកាល័យរបស់លោក ហ៊ុន សែន ប៉ុន្តែមិនជួបគ្នានៅមុខខុទ្ទកាល័យទេ គឺជួបចរចាគ្នានៅក្រោមដើមពោធិ៍មុខវត្តបទុមវតី វិញ។
មន្ត្រីខុទ្ទកាល័យ និងជាទីប្រឹក្សារាជរដ្ឋាភិបាល លោក ប៉ាល់ ចន្ទតារា ដែលចេញមកជួបពលរដ្ឋ ថ្លែងក្នុងកិច្ចប្រជុំសាធារណៈជាមួយក្រុមពលរដ្ឋ ដោយលោកស្នើទៅក្រុមពលរដ្ឋឲ្យវិលទៅលំនៅឋានវិញ។ លោកបញ្ជាក់ថា បញ្ហាដីធ្លីនេះមិនអាចដោះស្រាយនៅភ្នំពេញបានទេ ព្រោះមន្ត្រីដែលដោះស្រាយរឿងនេះ ត្រូវផ្ទៀងផ្ទាត់ដីប៉ះពាល់ជាមួយក្រុមពលរដ្ឋ។ ក្រៅពីនេះ លោក ប៉ាល់ ចន្ទតារា នឹងទៅជួបមន្ត្រីក្រសួងដែនដីដើម្បីឲ្យពន្លឿនការដោះស្រាយបញ្ហានេះ៖ «ខ្ញុំសន្យាថា ខ្ញុំនឹងទៅជួបជាមួយក្រសួងដែនដី ហើយបងប្អូនសន្យាជាមួយខ្ញុំវិញដែរ អញ្ជើញទៅវិញដែរ អញ្ជើញទៅកោះកុង វិញសិនទៅ»។
មន្ត្រីថ្នាក់ក្រោមរបស់លោក ហ៊ុន សែន រូបនេះ ព្រមានអ្នកកាសែតថា នឹងប្ដឹង បើសិនជាមិនចាក់សំឡេងសម្ភាសលោកទាំងស្រុង ហើយកាត់ផ្នែកណាមួយនៃសំឡេងរបស់លោកនោះ៖ «ខ្ញុំជម្រាបបងៗអ្នកកាសែត បើថតសំឡេងខ្ញុំ ថតរូបខ្ញុំទៅផ្សាយដាក់ឲ្យពិស្ដារ តែកាត់សំឡេងខ្ញុំមួយកំណាត់ៗទៅផ្សាយ ខ្ញុំប្ដឹង ខ្ញុំនិយាយឲ្យហើយ ខ្ញុំប្ដឹង»។
យ៉ាងណាក៏ដោយចុះ តំណាងពលរដ្ឋមានបញ្ហាដីធ្លី លោកស្រី ផាវ ញ៉ឺង ថាក្រុមពលរដ្ឋជឿលើការអះអាងរបស់មន្ត្រីខុទ្ទកាល័យរូបនេះតែ ៣០ភាគរយប៉ុណ្ណោះ។ លោកស្រីបន្តថា ក្រុមពលរដ្ឋមិនទាន់អាចវិលត្រឡប់ទៅលំនៅឋានក្នុងពេលនេះបានទេ។ ពួកគេត្រូវរស់នៅភ្នំពេញក្នុងវត្តសាមគ្គីរង្សី ដើម្បីរង់ចាំឃ្លាំមើលការដោះស្រាយការងាររបស់ក្រុមមន្ត្រីរបស់លោក ហ៊ុន សែន៖ «ពួកយើងនឹងព្យាយាមតាមឃ្លាំមើលទៀតបង ព្រោះអីបើយើងទៅបាត់ យើងទូរស័ព្ទមកខ្ញុំអត់ដែលជួបឆ្លងកាត់ពាក្យសម្ដីរបស់ឯកឧត្តមផ្ទាល់ទេ ប៉ុន្តែបុគ្គលមួយចំនួននៅក្នុងខុទ្ទកាល័យសម្ដេចនេះ គឺលោក គង់ សុវណ្ណ ដែលជួបខ្ញុំមិញនោះ ខ្ញុំចំណាំមុខគាត់ធ្លាប់យកឯកសារ ប៉ុន្តែអត់ដែលមានផលអីទេ»។
ការលើកគ្នារបស់ក្រុមពលរដ្ឋទៅខុទ្ទកាល័យរបស់លោក ហ៊ុន សែន នៅពេលនេះ ជាលើកទី២ហើយក្រោយពីពួកគេបានទៅសុំការអន្តរាគមន៍ម្តងរួចហើយកាលពីប៉ុន្មានខែមុន ប៉ុន្តែមិនទាន់ទទួលបានដំណោះស្រាយ។ ក្រុមពលរដ្ឋទាមទារសំណងនៃការខូចខាតរយៈពេល ១០ឆ្នាំ ដោយក្នុងមួយគ្រួសារដីទំហំពីរហិកតារ និងថវិកា ៤.៥០០ដុល្លារសហរដ្ឋអាមេរិក៕
No comments:
Post a Comment