ដោយ វណ្ណ សុគន្ធា 13/03/2017 13/03/2017
rfi
បក្សប្រឆាំងកំពុងរង់ចាំភ្លើងខៀវពីអាជ្ញាធរ ដើម្បីដំឡើងអង់តែងទូរទស្សន៍ព្រះអាទិត្យ
គណបក្សសង្រ្គោះជាតិ កំពុងរង់ចាំការអនុញ្ញាតពីអាជ្ញាធររាជធានីភ្នំពេញ ដើម្បីរៀបចំដំឡើងអង់តែនទូរទស្សន៍ព្រះអាទិត្យដែលបានជួបឧបសគ្គជាបន្តបន្ទាប់នាពេលកន្លងមក។ នេះបើតាមលោកអេង ឆៃអ៊ាង អនុប្រធានគណបក្សសង្រ្គោះជាតិដែលបានបញ្ជាក់ប្រាប់វិទ្យុបារាំងអន្តរជាតិនៅព្រឹកនេះ។ ក៏ប៉ុន្តែអាជ្ញាធររាជធានីភ្នំពេញ បញ្ជាក់ថា មិនទាន់ទទួលបានលិខិតស្នើសុំពីបក្សប្រឆាំងនៅឡើយទេ។
វាសនារបស់ទូរទស្សន៍ព្រះអាទិត្យរបស់គណបក្សសង្រ្គោះជាតិ នៅមិនទាន់ច្បាស់លាស់នៅឡើយទេនៅពេលនេះ ព្រោះថា អាជ្ញាធររាជធានីភ្នំពេញមិនទាន់អនុញ្ញាតទៅតាមការស្នើសុំដំឡើងអង់តែងរបស់គណបក្សប្រឆាំង។ លោកអេង ឆៃអ៊ាង អនុប្រធានគណបក្សសង្រ្គោះជាតិ បានលើកឡើងថា ក្រុមការងាររបស់បក្សប្រឆាំង បានដាក់ពាក្យស្នើសុំទៅកាន់អាជ្ញាធររាជធានីភ្នំពេញតាំងពីខែកុម្ភៈ ប៉ុន្តែរហូតមកដល់ពេលនេះនៅមិនទាន់ទទួលការឆ្លើយតបណាមួយនោះទេ។
លោកម៉េត មាសភក្តី អ្នកនាំពាក្យសាលារាជធានីភ្នំពេញ បានបញ្ជាក់ថា លោកមិនដឹងថា គណបក្សសង្រ្គោះជាតិដាក់ពាក្យស្នើសុំដំឡើងអង់តែននៅក្របខណ្ឌថា្នក់សង្កាត់ ខណ្ឌ ឬក៏ដាក់មកដល់រដ្ឋបាលរាជធានីភ្នំពេញឡើយ។ ក៏ប៉ុន្តែសម្រាប់រដ្ឋបាលរាជធានីភ្នំពេញ អ្នកនាំពាក្យរូបនេះគូសបញ្ជាក់ថា លោកមិនទទួលបានការស្នើសុំណាមួយពីបក្សប្រឆាំងនោះទេ។
គួរបញ្ជាក់ថា ទូរទស្សន៍ព្រះអាទិត្យបានចាប់ផ្តើមមានពន្លឺឡើងវិញ បន្ទាប់ពីគណបក្សសង្រ្គោះជាតិរកបានដីសម្រាប់សាងសង់នៅក្នុងរាជធានីភ្នំពេញតែម្តង។ ដីនោះ គឺជាអំណោយសប្បុរធម៌ពីអ្នកគាំទ្ររបស់ខ្លួនម្នាក់ដែលមានតម្លៃជាង ២០ម៉ឺនដុល្លារអាមេរិក។ ទូរទស្សន៍ព្រះអាទិត្យរបស់គណបក្សសង្គ្រោះជាតិ បានទទួលអាជ្ញាប័ណ្ណពីក្រសួងព័ត៌មានតាំងតែពីថ្ងៃទី ២៧ ខែវិច្ឆិកា ឆ្នាំ ២០១៤ ប៉ុន្តែត្រូវបានជួបឧបសគ្គជាបន្តបន្ទាប់។ ដំបូងឡើយបក្សប្រឆាំងគ្រោងសាងសង់នៅទួលគោកតែក៏ត្រូវផ្អាកទៅវិញដោយសារតែមានការតវ៉ាមិនឲ្យលើកអង់តែន។ ក្រោយមកបក្សប្រឆាំង ក៏ប្តូរទៅទិញដីនៅក្រុងតាខ្មៅអស់ជាង ១០ម៉ឺនដុល្លារ តែក៏ត្រូវរាំងស្ទះទៀតដោយសារតែការផ្ទេរកម្មសិទ្ធិនិងរឿងហេតុផ្សេងៗដូចជាការទាមទារដកលុយវិញពីសំណាក់អ្នកចូលលុយពីមុនៗជាដើម។
លោកអេង ឆៃអ៊ាង បានសង្កត់ធ្ងន់ថា ប្រសិនបើអាជ្ញាធរផ្តល់ភ្លើងខៀវភ្លាម នោះក្រុមការងារគណបក្សសង្រ្គោះជាតិនឹងចាប់ផ្តើមរៀបចំផ្នែកបច្ចេកទេស ដើម្បីដំឡើងអង់តែងនោះភ្លាមតែម្តង ដើម្បីត្រៀមផ្សាយសាកល្បងនាពេលខាងមុខ។ យ៉ាងណាក៏ដោយ លោកអនុប្រធានបក្សប្រឆាំងរូបនេះអះអាងបន្ថែមថា ទូរទស្សន៍ព្រះអាទិត្យទំនងមិនអាចនឹងចេញផ្សាយនៅអំឡុងការបោះឆ្នោតឃុំសង្កាត់បានទេ ព្រោះរៀបចំមិនទាន់ តែទាន់សម្រាប់ការបោះឆ្នោតថ្នាក់ជាតិឆ្នាំ ២០១៨ បើសិនអាជ្ញាធរអនុញ្ញាតនៅក្នុងខែនេះឬខែក្រោយនោះ៕
No comments:
Post a Comment