16 មិនា 2017
រូបឯកសារ៖ លោកឧបនាយករដ្ឋមន្ត្រី សុខ អាន (ឆ្វេង) ពេលនៅមានជីវិត ថតរូបជាមួយនឹងលោក ម៉ាក ផតធឺ (Mark Porter) និងប្រតិភូខ្មែរក្រោយពេលទទួលរូបចម្លាក់ពលរាម (Balarama) កាលពីថ្ងៃពុធទី៧ ខែឧសភាឆ្នាំ ២០១៤ នៅ សារៈមន្ទីរ Christie's នៅទីក្រុងញូវយ៉ក សហរដ្ឋអាមេរិក។ (ម៉ែន គឹមសេង/វីអូអេ)
ភ្នំពេញ —
លោក សុខ អាន ដែលគេដឹងថា បានកាន់តួនាទីជាច្រើននៅក្នុងរដ្ឋាភិបាលលោក ហ៊ុន សែន បានទទួលមរណភាពកាលពីថ្ងៃពុធ នៅក្នុងសាធារណរដ្ឋប្រជាមានិតចិន ដោយរោគាពាធ ក្នុងជន្មាយុ ៦៦ ឆ្នាំ។ នេះបើយោងតាមសេចក្ដីប្រកាសព័ត៌មានរបស់រាជរដ្ឋាភិបាល កម្ពុជាដែលបានចេញផ្សាយជាសាធារណៈកាលពីថ្ងៃពុធទី ១៥ ខែមីនា ឆ្នាំ២០១៧នេះ។
ការស្លាប់របស់លោក សុខ អាន បានកើតឡើងតែពីរថ្ងៃប៉ុណ្ណោះ បន្ទាប់ពីព្រះមហាក្សត្រខ្មែរព្រះបាទនរោត្តម សីហ មុនី បានប្រោសព្រះរាជទានគោរមងារលោក ជា «សម្ដេចវិបុលបញ្ញា សុខ អាន»។
យោងតាមលិខិតរបស់គណៈរដ្ឋមន្ត្រីនៃរាជរដ្ឋាភិបាលកម្ពុជា ចុះនៅថ្ងៃទី ១៥ ខែ មិនា លោក សុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានទទួលមរណភាពនៅវេលាម៉ោង ៦ និង៣២នាទីល្ងាច នៅមន្ទីរពេទ្យទីក្រុងប៉េកាំង។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់ VOA នៅថ្ងៃពុធនេះថា លោក សុខ អាន បានធ្លាក់ខ្លួនឈឺជាច្រើនខែមកហើយ និងបានទៅទទួលការព្យាបាលនៅប្រទេសសិង្ហបុរី។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ផ្តល់បទសម្ភាសន៍ជាមួយ VOA នៅឯទីស្នាក់ការគណបក្ស ក្នុងរាជធានីភ្នំពេញ កាលពីថ្ងៃទី១២ ខែតុលា ឆ្នាំ២០១៦។ (ហ៊ាន សុជាតា/VOA)
លោក សុខ ឥសាន បញ្ជាក់ថា ការស្លាប់លោក សុខ អាន ជាការបាត់បង់ដ៏ធំមួយរបស់គណបក្សប្រជាជនកម្ពុជា។
«មិនជារឿងធម្មតាទេ មានការបាត់បង់ធំធេងណាស់ចំពោះគណបក្សប្រជាជនកម្ពុជាដែលជាប្រភពធនធានមនុស្សសំខាន់ ហើយត្រូវបាត់បង់នេះ។ ធ្វើឲ្យយើងគិតគូរសម្បើមណាស់ ក៏ប៉ុន្តែអាហ្នឹងវាក្រិតក្រមធម្មជាតិទៅហើយ យើងធ្វើម៉េច»។
លោក សុខ អាន គឺជាសមាជិកសភារបស់គណបក្សប្រជាជនកម្ពុជាមកពីមណ្ឌលខេត្តតាកែវផងដែរ។
យោងតាមជីវប្រវត្តិសង្ខេបរបស់លោក សុខ អាន ដែលបានបង្ហោះនៅលើគេហទំព័រ របស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី បានឲ្យដឹងថា លោក សុខ អាន កើតនៅថ្ងៃទី ១៦ ខែមេសា ឆ្នាំ ១៩៥០ នៅឃុំព្រះបាទជាន់ជុំ ស្រុកគីរីវង់ ខេត្តតាកែវ។
លោកបានរៀបអាពាហ៍ពិពាហ៍ជាមួយលោកស្រី ថេង អាយអាន្នី និងបានកូនប្រុសស្រីចំនួន ៥នាក់។
នៅឆ្នាំ ១៩៨១ លោកមានតួនាទីជា អគ្គលេខាធិការនៃក្រសួងការបរទេស ប្រធានខុទ្ទកាល័យផ្ទាល់របស់ លោក ហ៊ុន សែននៅក្រសួងការបរទេស។ នៅឆ្នាំ ១៩៨៥ លោកបានក្លាយជា ឯកអគ្គរដ្ឋទូតវិសាមញ្ញ និងពេញសមត្ថភាពប្រចាំនៅប្រទេសឥណ្ឌា។ នៅឆ្នាំ ១៩៨៨ លោកត្រូវបានតែងតាំងជាអនុរដ្ឋមន្ត្រីក្រសួងការបរទេស។
ក្រោយការបោះឆ្នោតជាតិដែលរៀបចំឡើងដោយអង្គការសហប្រជាជាតិនៅឆ្នាំ ១៩៩៣ លោកបានក្លាយជា សហរដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី។ ចាប់ពីឆ្នាំ ២០០៤ រហូតមកដល់ពេលបច្ចុប្បន្ននេះ លោកជាឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ប្រាប់ VOA កាលពីថ្ងៃពុធ ថា លោក សុខ អាន ជាអតីតអ្នកការទូតដ៏ចំណានម្នាក់ និងជាឥស្សរជនខ្មែរនាំមុខគេ ក្នុងកិច្ចការវប្បធម៌ ដោយលោកបានធ្វើឲ្យបេតិកភណ្ឌជាតិខ្មែរ ក្លាយជាបេតិកភណ្ឌពិភពលោក ក្នុងនោះមានប្រាង្គប្រាសាទព្រះវិហារ។
«លោកបានប្រាសាទព្រះវិហារទៅក្នុងបញ្ជីបេតិកភណ្ឌពិភពលោកហ្នឹងដោយជោគជ័យ ទោះជាមានឧបសគ្គយ៉ាងណាក៏ដោយ ដែលទូតអាមេរិកាំងបាននិយាយថា លោកមានភាពជំនាញវ័យឆ្លាត ប្រកបដោយវិជ្ជាជីវៈខ្ពស់ក្នុងការងារទូត ដែលធ្វើឲ្យប្រាសាទព្រះវិហារទទួលស្គាល់ដោយមិនបាន ចាំបាច់បោះឆ្នោត គឺទទួលស្គាល់ដោយឯកច្ឆន្ទឆ្នាំ ២០០៨»។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានបន្ថែមថា លោក សុខ អាន បានបំពេញការងារជាច្រើនផ្សេងទៀត ទាក់ទិនបញ្ហាព្រំដែន និងទំនាក់ទំនងខ្មែរ-សៀម ក៏ដូចជាកិច្ចការរដ្ឋបាលក្នុងវិស័យនយោបាយរបស់ប្រទេសកម្ពុជា។
លោក សុខ អាន ដែលជាដន្លងរបស់ លោក ហ៊ុន សែន ធ្លាប់ត្រូវបានលោក ហ៊ុន សែន ស្តីបន្ទោសលើការលេងល្បែងប្រជល់មាន់។
លោកក៏ត្រូវបាន រដ្ឋាភិបាលលោក ហ៊ុន សែន ដកចេញពីមុខតំណែងជាច្រើន ក្នុងនាមជាប្រធានគណៈកម្មការ និងក្រុមប្រឹក្សានានារួមមាន ប្រធានគណៈកម្មាធិការ ទទួលស្គាល់គុណភាពអប់រំនៃកម្ពុជា ប្រធានក្រុមប្រឹក្សាភិបាល រាជបណ្ឌិតសភាវិជ្ជាជីវៈតុលាការ និងក្រុមប្រឹក្សាសាលាភូមិន្ទរដ្ឋបាលជាដើម។
លោក មាស នី អ្នកសិក្សាស្រាវជ្រាវកិច្ចអភិវឌ្ឍសង្គមប្រាប់ VOA នៅថ្ងៃពុធនេះថា គណបក្សប្រជាជនកម្ពុជា បានបាត់បង់ធនធានមនុស្សដ៏មានសារៈសំខាន់មួយរូប ក្រោយការទទួលមរណភាពរបស់លោក សុខ អាន។
លោកថ្លែងថា ដោយហេតុលោក សុខ អាន មានតួនាទីច្រើនក្នុងរដ្ឋាភិបាល លោកពិបាកកត់សម្គាល់អំពីស្នាដៃរបស់លោក ក្នុងការកសាងប្រទេសកម្ពុជា។
«បើសម្រាប់គ្រួសារគាត់តែម្ដង អាហ្នឹងយើងឃើញថា គាត់បានទទួលប្រយោជន៍ច្រើន ច្រើនមែនទែន តាំងពីមុខតំណែង ទាំងកេរ្តិ៍ឈ្មោះអីហ្នឹង។ ក៏ប៉ុន្តែសម្រាប់ប្រទេសជាតិវិញ ខ្ញុំពិបាកហ្នឹងនិយាយ ដោយសារតែការងាររបស់គាត់ច្រើនពេក។ ដល់អញ្ចឹង យើងមិនដឹងថាតើការងារណាមួយ ដែលជាការងារពិតប្រាកដរបស់គាត់»។
ក្រុមគ្រួសារសពលោក សុខ អាន ត្រូវគេដឹងថា ជាម្ចាស់អាជីវកម្មធំៗរួមមានវិស័យកសិកម្ម និងទូរគមនាគមន៍នៅក្នុងប្រទេស។ កូនប្រុសរបស់លោកចំនួនបីរូប បានចូលរួមយ៉ាងសកម្មក្នុងកិច្ចការជំនួញ និងនយោបាយ។
លោក សុខ ពុទ្ធិវុធ ប្រធានសហព័ន្ធស្រូវអង្ករកម្ពុជា នៅក្នុងសន្និសីទសារព័ត៌មានមួយក្នុងរាជធានីភ្នំពេញ កាលពីថ្ងៃទី៩ ខែមិនា ឆ្នាំ២០១៦។ (ហ៊ាន សុជាតា/VOA)
កូនប្រុសច្បងលោក សុខ អាន គឺលោកសុខ ពុទ្ធិវុធ ត្រូវគេដឹងថា ជាប្រធានសហព័ន្ធផលិតស្រូវអង្ករកម្ពុជា។ ចំណែកកូនប្រុសបីនាក់ផ្សេងទៀត គឺលោក សុខ សូកេន ត្រូវបានព្រះមហាក្សត្រខ្មែរតែងតាំងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ លោក សុខ សង្វារ គឺជាអគ្គនាយករងអាជ្ញាធរជាតិអប្សរា និងលោក សុខ សូកាន ត្រូវបានជ្រើសរើសឲ្យធ្វើជាតំណាងរាស្ត្រខេត្តតាកែវរបស់គណបក្សប្រជាជនកម្ពុជាជំនួសឲ្យលោក សូ ឃុន អតីតតំណាងរាស្ត្រគណបក្សកាន់អំណាច និងជាអតីតរដ្ឋមន្ត្រីក្រសួងប្រៃសណីយ៍ និងទូរគមនាគមន៍ដែលបានទទួលមរណភាព។
លោក សុខ អាន បានបញ្ចប់ការសិក្សាកម្រិតបរិញ្ញាបត្រភូមិសាស្ត្រ ប្រវត្តិសាស្ត្រ និងសង្គមសាស្ត្រ និងបានបន្តយកសញ្ញាប័ត្រផ្នែកគរុវិជ្ជាជាន់ខ្ពស់និងបានបន្តការសិក្សានៅសាលាជាតិរដ្ឋបាលជាន់ខ្ពស់ ផ្នែកការទូត នៅមុនពេលលោកចូលបម្រើក្នុងកិច្ចការងាររដ្ឋចាប់ពីសម័យរដ្ឋកម្ពុជា រហូតមកដល់រដ្ឋាភិបាលសព្វថ្ងៃ។
ស្របពេលនឹងការស្លាប់របស់លោក សុខ អាន រដ្ឋមន្ត្រីស្ដីទីនៃទីស្ដីការគណៈរដ្ឋមន្ត្រីលោក ប៊ុន អ៊ុយ បានចេញលិខិតមួយនៅល្ងាចថ្ងៃពុធ ដោយយោងតាមសំណើរបស់លោកនាយករដ្ឋមន្ត្រី ហ៊ុន សែន ដែលស្នើសុំប្រាក់ចំនួន បីពាន់លានរៀលពីក្រសួងសេដ្ឋកិច្ច និងហិរញ្ញវត្ថុ «សម្រាប់ចំណាយរៀបចំពិធីបុណ្យសព សម្ដេចវិបុល បញ្ញាសុខអាន»។
បើតាមការបញ្ជាក់របស់លោក សុខ ឥសាន អ្នកនាំពាក្យគណបក្សប្រជាជនកម្ពុជា សពលោក សុខ អាន កំពុងត្រូវបានរៀបចំដឹកបញ្ជូនចេញពីទីក្រុងប៉េកាំងប្រទេសចិន វិលមកកាន់ប្រទេសកម្ពុជា៕
4 comments:
Sok An (Hus Sen's buddy) is a hug lost of MY ASS AND SHIT. Let him go to the hell. That is sit. He is a thief and a corrupted CPP bastard that did a huge damage to Cambodia's natural resources and environment.
Sok An stole the money from the country, and his family members become multi-millionaires. Now HS spends $750,000 of tax payers’ money for his funeral, but how much does the government spend for his medical expenses?
No wonder the US want their money back.
Yes, Sok An's death is a huge loss of shit !!
Ngorp Muoy Kbal spent $750,000.
Is there any law stipulating that?
Yumphubal should come getting Ah Kwack Hun Sen this year too.
Post a Comment