ដោយ យាង សុជាមេត្តា
2017-03-02
រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី៩ ខែឧសភា ឆ្នាំ២០១៦។
Photo: RFA
មន្ត្រីរដ្ឋាភិបាល និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងប្រាប់អាស៊ីសេរីនៅយប់ថ្ងៃទី២ មីនា ថា លោកមិនទាន់ដឹងថា តើគ្រួសារលោកនាយករដ្ឋមន្ត្រី ហ៊ុន សែន នឹងប្ដឹងទៅសមត្ថកិច្ច ឬតុលាការដើម្បីស្វែងរកមុខជនអនាមិកដែលបានបញ្ចេញសារឆ្លើយឆ្លងតាមទូរស័ព្ទ (SMS) របស់គ្រួសារត្រកូល ហ៊ុន ជាមួយអ្នកជំនួញមួយចំនួន ហើយដែលត្រូវបានអតីតប្រធានគណបក្សសង្គ្រោះជាតិ លោក សម រង្ស៊ី ផ្ញើទៅឲ្យបណ្ដាញសារព័ត៌មានកាលពីថ្ងៃទី១ មីនា។
លោក ផៃ ស៊ីផាន ថ្លែងថា លោកមិនដឹងពីការលេចធ្លាយឯកសារនេះទេ ហើយក៏មិនដឹងថា អ្នកណាជាអ្នកបញ្ចេញសារទាំងអស់នោះដែរ។ ទោះជាយ៉ាងណា នៅពេលសួរថា តើរដ្ឋាភិបាល ឬគ្រួសារលោកនាយករដ្ឋមន្ត្រី ហ៊ុន សែន នឹងប្ដឹងទៅកាន់សមត្ថកិច្ច ឬតុលាការ ដើម្បីស្វែងរកមុខអ្នកទម្លាយឬយ៉ាងណា? លោក ផៃ ស៊ីផាន ឆ្លើយតបថា លោកមិនមែនជាមេធាវីរបស់លោកនាយករដ្ឋមន្ត្រី ហ៊ុន សែន ហើយក៏មិនមែនជាមេធាវីគ្រួសារលោក ហ៊ុន សែន នោះដែរ។
លោកថា បញ្ហានេះវាស្រេចតែទៅលើម្ចាស់សាមីដែលសាររបស់ខ្លួនត្រូវបានគេទម្លាយនោះ៖ «ខ្ញុំមិនមែនជាមេធាវីរបស់នាយករដ្ឋមន្ត្រីទេ ហើយក៏មិនមែនជាមេធាវីគ្រួសាររបស់នាយករដ្ឋមន្ត្រីដែរ អ្នកពាក់ព័ន្ធផលប្រយោជន៍របស់គេ អ្នកហ្នឹងហើយមានសិទ្ធិក្នុងការស្វែងរកយុត្តិធម៌ ឬការពារកិត្តិយសរបស់គេ ហើយបើសិនជាគេយល់ឃើញថាវាមិនមានផលប្រយោជន៍ គេអត់ឆ្លើយតប ហ្នឹងជាជម្រើសពីរ»។
ក្នុងសារលេចធ្លាយដែលជនអនាមិកផ្ញើជូនលោក សម រង្ស៊ី ហើយដែលលោក សម រង្ស៊ី ផ្ញើបន្តទៅកាន់បណ្ដាញសារព័ត៌មាននៅពេលនេះ បង្ហាញនូវការទាក់ទងគ្នារវាងសមាជិកគ្រួសារត្រកូល ហ៊ុន និងមន្ត្រីរដ្ឋាភិបាលមួយចំនួនជាមួយអ្នកជំនួញ និងម្ចាស់កាស៊ីណូណាហ្គាវើល (Naga World) ដែលអត្ថន័យនៃសារទាំងនោះ គឺពាក់ព័ន្ធនឹងការស្នើឲ្យគ្រួសារត្រកូល ហ៊ុន ជួយពួកគេ ជាដើម។
សមាជិកគ្រួសារត្រកូល ហ៊ុន និងមន្ត្រីរដ្ឋាភិបាលដែលមាននៅក្នុងសារបែកធ្លាយទាំងនោះ រួមមានភរិយាលោក ហ៊ុន សែន អ្នកស្រី ប៊ុន រ៉ានី និងកូនៗរបស់លោក គឺលោក ហ៊ុន ម៉ាណែត លោក ហ៊ុន ម៉ានិត ព្រមទាំងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងមន្ត្រីជំនិតលោក ហ៊ុន សែន លោក ហូ សុទ្ធី ជាដើម៕
No comments:
Post a Comment