ដោយ វ៉ា សំណព្វ 02/05/2017 02/05/2017
កម្លាំងនគរបាលខេត្តកោះកុង ចុះទៅបកផ្ទាំងប៉ាណូ ស្តីពី យុទ្ធនាការសុំឲ្យដោះលែងសកម្មជនអ្នកការពារសិទ្ធិមនុស្សអាដហុក (Adhoc) នៅថ្ងៃទី ០២ឧសភា ឆ្នាំ២០១៧។
អាជ្ញាធរខេត្តកោះកុង នៅព្រឹកថ្ងៃទី ០២ ឧសភានេះ បានដើរទម្លាក់ បដា ឬផ្ទាំងប៉ាណូ ដែលមានបិទរូបថតរបស់អ្នកការពារសិទ្ធិមនុស្ស ៥នាក់ ចេញពីមុខទីស្នាក់ការរបស់អង្គការសិទ្ធិមនុស្សអាដហុក, លីកាដូ និងអង្គការមាតាធម្មជាតិ ដោយអះអាងថា ការបិទបដាទាំងនោះ មិនបានសុំច្បាប់អាជ្ញាធរនោះទេ។ សូមបញ្ជាក់ថា ដើម្បីតស៊ូមតិសុំឲ្យមានការដោះលែងអ្នកការពារសិទ្ធិមនុស្សទាំង ៥នាក់ អង្គការចំនួន ៥០នៅកម្ពុជា បានធ្វើយុទ្ធនាការជំរុញឲ្យមានការដោះលែងពួកគេ ដោយការតាំងរូបថតរបស់អ្នកការពារសិទ្ធិមនុស្សទាំង ៥នាក់ នៅមុខទីស្នាក់ការរៀងៗខ្លួន ចាប់តាំងពីមានការចាប់ខ្លួនកាលពីខែមេសាឆ្នាំ ២០១៦មក។
អាជ្ញាធរខេត្តកោះកុង បានអះអាងថា ការបិទរូបថតរបស់អ្នកការពារសិទ្ធិមនុស្ស ៥នាក់នៅក្នុងខេត្តកោះកុង បានធ្វើឡើងដោយមិនបានសុំច្បាប់អាជ្ញាធរជាមុននោះទេ។ ដូច្នេះជាវិធានការ របស់អាជ្ញាធរបានសម្រេចដើរដកផ្ទាំងប៉ាណូ ឬបដា ដែលមានបិទរូបថតរបស់អ្នកការពារសិទ្ធិមនុស្សទាំង ៥នាក់ចេញពីទីកន្លែងសាធារណៈ និងទីស្នាក់ការរបស់អង្គការចំនួន ៣នៅថ្ងៃនេះ រួមមាន សមាគមការពារសិទ្ធិមនុស្សអាដហុក, អង្គការលីកាដូ និងទីស្នាក់ការរបស់អង្គការចលនាមាតាធម្មជាតិ ប្រចាំនៅក្នុងខេត្តជាប់ព្រំដែនថៃមួយនេះ។ ស្នងការនគរបាលខេត្តកោះកុង លោក សំ ឃាតវៀន បានចោទជាសំណួរថា តើការដាក់តាំងរូបថតទាំងនោះ មានការសុំច្បាប់អាជ្ញាធរហើយឬនៅ? ហើយថា តើករណីនេះកើតឡើងនៅលើទឹកដីខេត្តកោះកុងឬយ៉ាងណា?
សូមបញ្ជាក់ថា នៅវេលាម៉ោង ១០ព្រឹក ថ្ងៃទី ២ឧសភានេះ កងកម្លាំងនគរបាល ៤នាក់មកពីប៉ុស្តិ៍នគរបាលសង្កាត់ស្មាច់មានជ័យ ក្នុងខណ្ឌខេមរភូមិន្ទ ខេត្តកោះកុង បានដើរដកផ្ទាំងប៉ាណូ ដែលមានបិទរូបថតរបស់អ្នកការពារសិទ្ធិមនុស្សអាដហុក ៤នាក់ រួមមាន លោក នី សុខា, លោក យី សុខសាន្ត, លោក ណៃ វ៉ងដា លោកស្រី លឹម មុនី រួមទាំង លោក នី ចរិយា អគ្គលេខាធិការរង គ.ជ.ប និងជាអតីតមន្រ្តីសិទ្ធិមនុស្សអាដហុក ចេញពីទីស្នាក់ការរបស់សមាគមសិទ្ធិមនុស្សអាដហុក, ទីស្នាក់ការអង្គការសិទ្ធិមនុស្សលីកាដូ និងអង្គការចលនាមាតាធម្មជាតិ ដោយបានលើកហេតុផលថា មិនបានសុំច្បាប់អាជ្ញាធរជាមុន។ ប៉ុន្តែ លោក ញៀប សំអឿន មន្រ្តីសម្របសម្រួលរបស់សមាគមសិទ្ធិមនុស្សអាដហុកប្រចាំនៅខេត្តកោះកុងបានលើកឡើងថា ចំណាត់ការរបស់អាជ្ញាធរលឿនពេក ដែលមិនអាចធ្វើឲ្យក្រុមការងាររបស់លោកត្រៀមខ្លួនជាមុន ខណៈដែលអាជ្ញាធរទើបតែបានកោះហៅរូបលោកឲ្យចូលទៅបំភ្លឺនោះ។ លោក សំអឿន បានហៅសកម្មភាពរបស់អាជ្ញាធរខេត្តកោះកុងថា ជាការបំពានសិទ្ធិមកលើអង្គភាពរបស់លោក ដែលបានចុះបញ្ជីត្រឹមត្រូវនៅក្រសួងមហាផ្ទៃ និងបំពានលើសិទ្ធិក្នុងការជួបជុំ និងការតស៊ូមតិដោយសន្តិវិធីដែលត្រូវបានធានាដោយច្បាប់។
គួរជំរាបជូនថា អង្គការសង្គមស៊ីវិលចំនួន ៥០នៅកម្ពុជា បានផ្តើមធ្វើយុទ្ធនាការតស៊ូមតិ ដោយបិទបដា ឬផ្ទាំងប៉ាណូ ដែលមានរូបថតរបស់អ្នកការពារសិទ្ធិមនុស្សទាំង ៥នាក់ នៅមុខទីស្នាក់ការរបស់ខ្លួន ដើម្បីជំរុញឲ្យមានការដោះលែងពួកគេឲ្យមានសេរីភាពវិញ។ លោក ញៀប សំអឿន បានកត់សំគាល់ថា មានការចាប់អារម្មណ៍ច្រើនពីសាធារណៈជន ទៅលើផ្ទាំងប៉ាណូទាំងនោះ។
សូមបញ្ជាក់ដែរថា គិតត្រឹមថ្ងៃទី ២ឧសភានេះ អ្នកការពារសិទ្ធិមនុស្សទាំង ៥នាក់ បានជាប់ពន្ធនាគារព្រៃស អស់រយៈពេលជាង ១ឆ្នាំមកហើយ ហើយកាលពីថ្ងៃទី ២៨មេសាកន្លងទៅនេះ ពួកគេទើបតែត្រូវបានតុលាការក្រុងភ្នំពេញ សម្រេចពន្យាពេលការឃុំខ្លួនបណ្តោះអាសន្នរយៈពេល ៦ខែទៀត បើទោះបីជាមានការថ្កោលទោសពីសហគមន៍អន្តរជាតិក៏ដោយ៕
1 comment:
Those body guards can be a secret Yuon/Vietnamese agents or spies and also can be dumb Khmer/Cambodian bastards who always focus on money or getting paid to survive. These guys are not aware of the every deadly secret and hidden Yuon/Vietnamese agents/spies among them. You can see that why they were ordered to tear or take down the banners of Human Rights.
Hun Sen and his Khmer supporters will be sorry when Cambodia and Cambodian people are stuck in the hands of Vietnamese/Yuon agents hiding inside Vietnamese-Installed CPP regime
Post a Comment