ដោយ សុ ជីវី
2017-06-30
ក្រុមសមាជិកនៃបន្ទប់ស្ថានការណ៍សម្រាប់ការបោះឆ្នោតឆ្នាំ២០១៧ ធ្វើសន្និសីទសារព័ត៌មាននៅថ្ងៃទី១២ ខែមិថុនា ឆ្នាំ២០១៧។
RFA/Chea Sophearin
ក្រុមអង្គការអន្តរជាតិ និងក្រុមសមាជិកសភាអាស៊ានរិះគន់រដ្ឋាភិបាលថា កំពុងរំលោភបំពានសិទ្ធិ និងកាតព្វកិច្ចរបស់អង្គការសង្គមស៊ីវិលក្នុងស្រុកដើម្បីឃ្លាំមើលការបោះឆ្នោត ដែលជាផ្នែកមួយនៃការគាំពារដល់ដំណើរការប្រជាធិបតេយ្យ។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែមិថុនា បានបញ្ជាអោយរដ្ឋមន្ត្រីក្រសួងមហាផ្ទៃ លោក ស ខេង ពិនិត្យផ្លូវច្បាប់ទៅលើក្រុមអង្គការសង្គមស៊ីវិលដែលឃ្លាំមើលការបោះឆ្នោត ដែលហៅថា បន្ទប់ស្ថានការណ៍ បន្ទាប់ពីបណ្ដុំអង្គការនេះបានវាយតម្លៃ និងផ្ទៀងផ្ទាត់លទ្ធផលបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១៧។
ក្រុមអង្គការអន្តរជាតិ និងក្រុមសមាជិកសភាអាស៊ានជំរុញអោយរដ្ឋាភិបាលទម្លាក់ចោលដំណើរការស៊ើបអង្កេត ឬចាត់វិធានការផ្លូវច្បាប់ណាមួយប្រឆាំងបណ្ដុំអង្គការសង្គមស៊ីវិលឃ្លាំមើលការបោះឆ្នោត ឬហៅថា បន្ទប់ស្ថានការណ៍ ដើម្បីធានាការពារតួនាទីសង្គមស៊ីវិល និងសិទ្ធិសេរីភាពបញ្ចេញមតិក្នុងដំណើរការបោះឆ្នោត។
សេចក្ដីថ្លែងការណ៍រួមរបស់អង្គការអន្តរជាតិចំនួន៤ កាលពីថ្ងៃទី៣០ ខែមិថុនា បានលើកឡើងថា ពួកគេមានការព្រួយបារម្ភចំពោះការគំរាមកំហែងលើអង្គការសង្គមស៊ីវិលនៃបន្ទប់ស្ថានការណ៍ ដ្បិតវាធ្វើអោយប៉ះពាល់ដល់សកម្មភាពស្របច្បាប់របស់សង្គមស៊ីវិល ជាពិសេសចំណាត់ការរបស់រដ្ឋាភិបាលគឺជាការគំរាមកំហែងសង្គមស៊ីវិលដទៃទៀតអោយបានមុនការបោះឆ្នោតជាតិ ឆ្នាំ២០១៨។ អង្គការអន្តរជាតិទាំង៤នោះ រួមមានបណ្ដាញប្រជាធិបតេយ្យអាស៊ី (Asia Democracy Network) វេទិកាសិទ្ធិមនុស្សអាស៊ី (Asian Forum for Human Rights and Development) បណ្ដាញអាស៊ីសម្រាប់ការបោះឆ្នោតដោយសេរី (Asian Network for Free Election) សម្ព័ន្ធសារព័ត៌មានអាស៊ីអាគ្នេយ៍ (Southeast Asian Press Alliance)។
No comments:
Post a Comment