ដោយ យ៉ង ចាន់តារា
2017-06-13
rfa
ប្រជាពលរដ្ឋតំណាងឲ្យពលរដ្ឋ ១៨៩គ្រួសារ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ជួបជុំក្នុងបរិវេណសាលាខេត្តកំពត ដើម្បីស្នើសុំអន្តរាគមន៍ឲ្យជួយដោះស្រាយទំនាស់ដីធ្លី និងចាត់វិធានការលើក្រុមបង្កហិង្សា នៅថ្ងៃទី៨ ខែមិថុនា ឆ្នាំ២០១៧។ Photo ADHOC
Photo ADHOC
ពលរដ្ឋចំនួន ១០នាក់បានដាក់ពាក្យបណ្ដឹងទៅសាលាដំបូងខេត្តកំពត ជុំវិញសំណុំរឿងប្រើហិង្សា និងគំរាមកំហែងប្រព្រឹត្តដោយក្រុមឈ្មួញដី និងអាជ្ញាធរភូមិព្រៃពាយ ឃុំត្រពាំងភ្លាំង ស្រុកឈូក។ ក្រុមពលរដ្ឋអំពាវនាវឲ្យតុលាការ ជួយរកយុត្តិធម៌ជូនពួកគាត់ទាក់ទងនឹងហេតុការណ៍នេះ។
ការដាក់ពាក្យបណ្ដឹងរបស់ក្រុមប្រជាពលរដ្ឋទៅកាន់តុលាការខេត្តកំពត នេះ ធ្វើឡើងបន្តបន្ទាប់គ្នាក្រោយផ្ទុះហេតុការណ៍អំពើហិង្សា និងការគំរាមកំហែងជុំវិញរឿងវិវាទដីធ្លីដ៏រ៉ាំរ៉ៃនៅភូមិព្រៃពាយ កាលពីថ្ងៃទី៧ មិថុនា កន្លងទៅ។
តំណាងប្រជាពលរដ្ឋ លោក ថន សុខា បញ្ជាក់ប្រាប់អាស៊ីសេរីនៅថ្ងៃទី១៣ មិថុនា ថា ពលរដ្ឋចំនួន ៩នាក់បានផ្ដិតមេដៃរួមគ្នាប្ដឹងឈ្មួញដីម្នាក់ឈ្មោះ ហ៊ាង គន្ធី និងបក្ខពួក ព្រមទាំងមេភូមិព្រៃពាយ លោក ប្រាក់ នាគ ពីបទហិង្សាដោយចេតនា រុះរើរោងចាំចម្ការ និងកំហែងយកគោយន្តមួយគ្រឿង ព្រមទាំងគំរាមឲ្យផ្ដិតស្នាមមេដៃ ប្រព្រឹត្តនៅចំណុចវាលវែង និងវាលសុត្រាវ នៃភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត៖ «»។
ក្រុមពលរដ្ឋប្ដឹងសុំឲ្យតុលាការខេត្តកំពត ផ្ដន្ទាទោសជនប្រព្រឹត្តិតាមផ្លូវច្បាប់ ព្រមទាំងទារសំណងថ្លៃការខូចខាត និងជំងឺចិត្តចំនួន ៤០លានរៀល។
ចំណែកបណ្ដឹងដាច់ដោយឡែកមួយទៀតក្នុងសំណុំរឿងនេះដែរ គឺជារបស់ពលរដ្ឋម្នាក់ឈ្មោះ ជា ស៊ីនិត ដែលប្ដឹងឈ្មួញដីឈ្មោះ ហ៊ាង គន្ធី និងមេភូមិព្រៃពាយ លោក ប្រាក់ នាគ ពីបទគំរាមកំហែងឲ្យផ្ដិតមេដៃលើលិខិតឆ្លើយបំភ្លឺចុះថ្ងៃទី៧ ខែមិថុនា កន្លងទៅ។
លោក ជា ស៊ីនិត រៀបរាប់នៅក្នុងពាក្យបណ្ដឹងថា ឈ្មោះ ហ៊ាង គន្ធី និងបក្ខពួក រួមទាំងលោក ប្រាក់ នាគ ផង បានបង្ខំឲ្យលោកផ្ដិតមេដៃទទួលស្គាល់ថា លោកមិនមានដីនៅភូមិព្រៃពាយ នោះទេ ហើយការដឹកសម្ភារតាមគោយន្តយកទៅធ្វើផ្ទះនៅចំណុចវាលសុត្រាវនោះ គឺធ្វើតាមការបញ្ចុះបញ្ចូលរបស់អ្នកផ្សេងប៉ុណ្ណោះ។ លោកថា ឈ្មោះ ហ៊ាង គន្ធី និងមេភូមិ បានគំរាមលោកថា បើមិនព្រមផ្ដិតមេដៃទេនោះ នឹងមានគ្រោះថ្នាក់ដល់អាយុជីវិត ហេតុដូចនេះទើបលោកផ្ដិតមេដៃដើម្បីបានត្រឡប់ទៅផ្ទះវិញ។
លោកប្ដឹងសុំឲ្យតុលាការខេត្តកំពត ផ្ដន្ទាទោសជនល្មើសតាមច្បាប់ និងទាមទារសំណងជំងឺចិត្តចំនួន ២០លានរៀល។
ប្រភពពីមន្ត្រីតុលាការខេត្តកំពត ឲ្យដឹងថា ពាក្យបណ្ដឹងរបស់ក្រុមពលរដ្ឋនោះបានទៅដល់ដៃព្រះរាជអាជ្ញាអមសាលាដំបូងខេត្តកំពត ហើយ ហើយតំណាងអយ្យការនឹងកោះហៅពលរដ្ឋមកបំភ្លឺក្រោយពិនិត្យពាក្យបណ្ដឹងរួចរាល់។
អាស៊ីសេរី មិនអាចទាក់ទងសុំការបំភ្លឺពីលោកស្រី ហ៊ាង គន្ធី ដែលរងការប្តឹងផ្តល់ពីក្រុមពលរដ្ឋបាននៅឡើយនៅថ្ងៃទី១៣ មិថុនា ដោយទូរស័ព្ទមិនអាចទាក់ទងបាន។
ចំណែកមេភូមិព្រៃពាយ លោក ប្រាក់ នាគ វិញ ច្រានចោលការចោទប្រកាន់របស់ក្រុមពលរដ្ឋ ដែលថាលោកជាអ្នកគំរាមពួកគេឲ្យផ្ដិតមេដៃទទួលស្គាល់ថាមិនមានដីនៅតំបន់នោះ៖ «»។
កាលពីចុងឆ្នាំ២០១៥ កន្លងទៅ រាជរដ្ឋាភិបាលបានសម្រេចកាត់ដីទំហំ ៥២៣,១៣ហិកតារ ចេញពីគម្របព្រៃឈើឆ្នាំ២០០២ និងធ្វើអនុបយោគជាដីឯកជនរបស់រដ្ឋ សម្រាប់ប្រទានកម្មជាកម្មសិទ្ធិជូនប្រជាពលរដ្ឋ ១០៣គ្រួសារនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ក៏ប៉ុន្តែមកទល់នឹងពេលនេះ ក្រុមប្រជាពលរដ្ឋមិនទាន់ទទួលបានដីធ្លីទាំងនេះនៅឡើយ ដោយពួកគាត់កំពុងរង់ចាំការចុះវាស់វែងពីក្រុមការងារជំនាញថ្នាក់ខេត្ត និងថ្នាក់ជាតិ។
ក្រុមពលរដ្ឋអះអាងថា រយៈកាលកន្លងទៅ បុគ្គលឈ្មោះ ហ៊ាង គន្ធី និងបក្ខពួក តែងចុះគំរាមកំហែង និងប្រើហិង្សាបង្ខំឲ្យពលរដ្ឋចាកចេញពីដីដែលពួកគាត់ធ្លាប់កាន់កាប់ ដោយអះអាងថា ដីទាំងនោះគឺជារបស់ពួកគេទៅវិញ។
ជុំវិញរឿងនេះ មន្ត្រីស៊ើបអង្កេតសមាគមអាដហុក (ADHOC) ខេត្តកំពត លោក ហេង ភារៈ បញ្ជាក់ថា វិវាទដីធ្លីនៅតំបន់នោះកើតមានជាយូរមកហើយ ហើយជាញឹកញាប់ ពលរដ្ឋតែងរាយការណ៍មកថា បុគ្គលឈ្មោះ ហ៊ាង គន្ធី និងបក្ខពួក តែងដើរគំរាមកំហែង និងប្រើអំពើហិង្សា ព្រមទាំងឈូសឆាយដុតបំផ្លាញផលដំណាំ និងផ្ទះសម្បែងរបស់ពលរដ្ឋ។ លោកសំណូមពរដល់តុលាការ ឲ្យជួយរកយុត្តិធម៌ជូនក្រុមពលរដ្ឋដែលរងគ្រោះដោយសារអំពើឧក្រិដ្ឋទាំងនេះ៖ «»។
ទាក់ទងនឹងរឿងវិវាទដីធ្លីនៅភូមិព្រៃពាយ នេះ ប្រជាពលរដ្ឋធ្លាប់បានលើកគ្នាទៅស្នើសុំអន្តរាគមន៍ពីអាជ្ញាធរខេត្តកំពត និងអាជ្ញាធរថ្នាក់ជាតិជាច្រើនលើកច្រើនសារួចមកហើយ ក៏ប៉ុន្តែមិនទាន់ឃើញមានដំណោះស្រាយអ្វីជាក់លាក់នៅឡើយ។ អ្វីដែលពួកគាត់ទន្ទឹងរង់ចាំនោះ គឺប័ណ្ណកម្មសិទ្ធិដីធ្លីដែលចេញដោយអាជ្ញាធរជំនាញ ដើម្បីអាចឈានទៅបញ្ចប់ទំនាស់ដីធ្លីនៅតំបន់នោះ៕
No comments:
Post a Comment