ដោយ យ៉ង ចាន់តារា
2017-07-19
តំណាងរាស្ត្រគណបក្សសង្គ្រោះជាតិ លោក សុន ឆ័យ ថ្លែងទៅកាន់ក្រុមអ្នកកាសែតនៅខាងមុខពន្ធនាគារព្រៃស កាលពីព្រឹកថ្ងៃទី១៧ ខែមីនា ឆ្នាំ២០១៧។ RFA/Morm Moniroth
RFA/Morm Moniroth
ប្រធានក្រុមសមាជិកសភាគណបក្សសង្គ្រោះជាតិ លោក សុន ឆ័យ ព្រមានប្រើយន្តការសភាដើម្បីស្នើដកលោក ស៊ុយ សែម ពីតំណែងជារដ្ឋមន្ត្រីក្រសួងរ៉ែ និងថាមពល។ តំណាងរាស្ត្របក្សប្រឆាំង គ្រោងធ្វើបែបនេះដោយយល់ឃើញថា រដ្ឋមន្ត្រីរូបនេះមិនបានបំពេញមុខងាររបស់ខ្លួនឲ្យបានត្រឹមត្រូវ ទាក់ទងនឹងការឆ្លើយបំភ្លឺរឿងភាពមិនប្រក្រតីជុំវិញការនាំចេញខ្សាច់ទៅក្រៅប្រទេស។
ការព្រមានរបស់សមាជិកសភាគណបក្សសង្គ្រោះជាតិ នេះ គឺដោយសារតែក្រសួងរ៉ែ និងថាមពល ខកខានមិនបានឆ្លើយតបនឹងសំណើរបស់លោក សុន ឆ័យ សុំឲ្យក្រសួងបង្ហាញព័ត៌មានលម្អិតនានាទាក់ទងនឹងការនាំចេញខ្សាច់ប្រភេទស៊ីលីកា ឬខ្សាច់ស ទៅក្រៅប្រទេស ដែលលោកបានស្នើតាំងពីពាក់កណ្ដាលខែមិថុនា កន្លងទៅ។
អនុប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក សុន ឆ័យ ថ្លែងប្រាប់អាស៊ីសេរីនៅថ្ងៃទី១៩ កក្កដា ថា ទង្វើបែបនេះរបស់លោក ស៊ុយ សែម គឺជាការបំពានរដ្ឋធម្មនុញ្ញ និងខ្វះការទទួលខុសត្រូវក្នុងនាមជារដ្ឋមន្ត្រី៖ «»។
កាលពីពាក់កណ្ដាលខែមិថុនា កន្លងទៅ លោក សុន ឆ័យ តាមរយៈប្រធានរដ្ឋសភា លោក ហេង សំរិន បានផ្ញើលិខិតមួយច្បាប់ទៅរដ្ឋមន្ត្រីក្រសួងរ៉ែ និងថាមពល លោក ស៊ុយ សែម ស្នើឲ្យរដ្ឋមន្ត្រីរូបនេះបង្ហាញព័ត៌មាន និងឯកសារផ្លូវការទាក់ទងនឹងការនាំខ្សាច់ស៊ីលីកា ឬខ្សាច់ស ចេញទៅក្រៅប្រទេស ក៏ប៉ុន្តែជាងមួយខែមកនេះ ក្រសួងរ៉ែ និងថាមពល មិនទាន់ឆ្លើយតបនឹងសំណើរបស់លោក សុន ឆ័យ នៅឡើយទេ។
អាស៊ីសេរី មិនអាចទាក់ទងអ្នកនាំពាក្យក្រសួងរ៉ែ និងថាមពល លោក ឌិត ទីណា បានទេនៅថ្ងៃទី១៩ កក្កដា ដើម្បីឆ្លើយតបរឿងនេះ ដោយលោកមិនលើកទូរស័ព្ទ ក៏ប៉ុន្តែអ្នកនាំពាក្យរូបនេះធ្លាប់បានបញ្ជាក់កាលពីសប្ដាហ៍មុនថា ក្រសួងកំពុងអនុវត្តតាមនីតិវិធី ដើម្បីឆ្លើយតបនឹងសំណើរបស់លោក សុន ឆ័យ។ អ្នកនាំពាក្យរូបនេះក៏ធ្លាប់បានបញ្ចេញមតិដែរថា អ្វីដែលតំណាងរាស្ត្រគណបក្សសង្គ្រោះជាតិ កំពុងធ្វើនេះជាការកេងចំណេញនយោបាយច្រើនជាង៖ «»។
សកម្មភាពកាយខ្សាច់ប្រភេទស៊ីលីកាដាក់កប៉ាល់ នៅកំពង់ផែ ម៉ុង ឫទ្ធី ឋិតនៅភូមិកែវផុស ឃុំទំនប់រលក ស្រុកស្ទឹងហាវ ខេត្តព្រះសីហនុ កាលពីថ្ងៃទី១ ខែឧសភា ឆ្នាំ២០១៧។ Photo courtesy of Mother Nature Photo courtesy of Mother Nature
កាលពីសប្ដាហ៍មុន ក្រសួងរ៉ែ និងថាមពល បានប្រកាសបញ្ឈប់ជាស្ថាពរនូវការអនុញ្ញាតឲ្យធ្វើអាជីវកម្មនាំខ្សាច់សំណង់ និងខ្សាច់ល្បាយភក់ ចេញពីខេត្តកោះកុង ទៅក្រៅប្រទេស។
ខេត្តកោះកុង គឺជាទីដែលមានការធ្វើអាជីវកម្មខ្សាច់ដ៏ច្រើនសម្បើមរយៈពេលជាច្រើនឆ្នាំមកហើយ ហើយប្រជាពលរដ្ឋមូលដ្ឋានអះអាងថា អាជីវកម្មខ្សាច់នេះបានបង្កផលប៉ះពាល់ដល់ជីវភាពរស់នៅរបស់ពួកគាត់យ៉ាងខ្លាំង។
ការប្រកាសបិទបញ្ចប់ជាស្ថាពរនៃសម័យកាលនាំខ្សាច់ចេញពីខេត្តកោះកុង ទៅបរទេសនេះ ធ្វើឡើងជាង ១០ខែ ក្រោយផ្ទុះរឿងអាស្រូវដ៏រសើបនៃការនាំចេញខ្សាច់ទៅប្រទេសសិង្ហបុរី ដែលកម្ពុជា បាត់ទឹកប្រាក់ជាង ៧០០លានដុល្លារអាមេរិក ហើយដែលអង្គការសង្គមស៊ីវិលផ្នែកបរិស្ថានរកឃើញថា ជាការនាំចេញខុសច្បាប់។
លោក សុន ឆ័យ ស្វាគមន៍ចំពោះវិធានការរបស់ក្រសួងនេះ ក៏ប៉ុន្តែលោកថាវាមិនអាចបញ្ចប់បញ្ហានានាជុំវិញភាពមិនប្រក្រតីរឿងនាំចេញខ្សាច់ទៅក្រៅប្រទេស ក្នុងរយៈកាលកន្លងទៅបាននោះទេ។ លោកបញ្ជាក់ថា ក្នុងនាមលោកជាតំណាងរាស្ត្រ លោកនឹងតាមដានករណីនេះជាបន្តទៀត។ លោកបញ្ជាក់ថា អ្វីដែលលោកកំពុងធ្វើនេះ គឺជាការងាររបស់តំណាងរាស្ត្រ មិនមែនធ្វើដើម្បីផលប្រយោជន៍នយោបាយនោះទេ៖ «»។
លោក សុន ឆ័យ បញ្ជាក់ថា ការគ្រប់គ្រងវិស័យធនធានរ៉ែនេះនៅមានបញ្ហាជាច្រើន ជាពិសេសគឺការខាតបង់ប្រាក់ចំណូលជាតិ និងបង្កផលប៉ះពាល់ដល់បរិស្ថាន តែផលប្រយោជន៍បែរជាធ្លាក់ក្នុងដៃក្រុមអ្នកមានអំណាចទៅវិញ។ លោកលើកទឹកចិត្តដល់ពលរដ្ឋ ឲ្យចូលរួមតាមដានដំណើរការអនុវត្តគម្រោងរបស់រដ្ឋាភិបាលជាមួយក្រុមហ៊ុនធ្វើអាជីវកម្មរ៉ែ ដើម្បីឲ្យមានតម្លាភាព និងគណនេយ្យភាពក្នុងវិស័យមួយនេះ៕
1 comment:
លោក សុន ឆ័យ អើយដកគេម្តេចបានទៅ បើពួក អាគុក ដែលលោកបានរកឃើញថាខុសនោះ ទោះជាលោកថាខុសរាប់រយ ក៍ពួកអាគុក គេថាឥតមានកំហុសដែរ ដូចជាកាប់ព្រៃឈើ យើងថាវាខុស តែគេថាអភិវឍ្យន៍ បើនិយាយពីរឿងយួនវីញ គឺនីយាយមិនបានដាច់ខាត ចង់យួនធ្វើអ្វីបានគ្រប់មុខ សូម្បីតែពាក្យ យួន ដែលខ្មែរហៅ និយាយតៗគ្នា តាំងពីសម័យ អង្គរ មក តែឥឡូវលោកហៅ យួន មិនពានផង ព្រោះគេថាជាមហាមិត្តគេ លោកឃើញស្រាប់ សព្វថ្ងៃ មានយួន ឈ្មោះខ្មែរ កាន់កាប់ ទាហាន ពូលីស អស់ទៅហើយ តើលោកហ៊ាននិយាយទេ? ច្បាស់ជា ពិតជា មិនហ៊ានទេ ព្រោះគេឈ្មោះខ្មែរ ហើយបើលោកដូរបានមែន អាក្រោយមក ច្បាស់ជាចាស់ដៃជាងអានេះទៅទៀត ព្រោះវាឈ្មោះខ្មែរ ។ ឌូម៉ែ ចយដឹកអើយ ចេតរូយ ហើយម្តងនេះ។
Post a Comment