ដោយ អេង គីមហុង 04/08/2017 04/08/2017
rfi
លោក ញឹក ប៊ុនឆៃ ប្រមុខបក្សខ្មែររួបរួមជាតិ។
លោក ញឹក ប៊ុនឆៃ ប្រធានគណបក្សខ្មែររួបរួមជាតិ និងធ្លាប់មានតំណែងអតីតឧបនាយករដ្ឋមន្ត្រី ត្រូវបានតុលាការចេញដីកាឃាត់ខ្លួន កាលពីម្សិលមិញពាក់ព័ន្ធសំណុំរឿងគ្រឿងញៀនមួយដែលបានកើតឡើងតាំងពី១០ឆ្នាំមុន។ មួយថ្ងៃក្រោយការឃាត់ខ្លួនលោក ញឹក ប៊ុនឆៃ សំណួរចោទឡើងថា គណបក្សខ្មែររួបរួមជាតិប្រឈមនឹងការរំលាយទេ ខណៈប្រធានបក្សត្រូវបានឃាត់ខ្លួនពាក់ព័ន្ធបទល្មើសគ្រឿងញៀន។
គណបក្សខ្មែររួបរួមជាតិ រំលាយទៅបានលុះត្រាតែសំណុំរឿងគ្រឿងញៀននេះកើតចេញពីអំពើរបស់បក្សទាំងមូល។ តែបើបញ្ហានេះផ្ដើមចេញពីទង្វើបុគ្គលលោក ញឹក ប៊ុនឆៃ ទេ គណបក្សខ្មែររួបរួមជាតិមិនអាចរំលាយបានឡើយ។ បើផ្អែកតាមអង្គហេតុ គណបក្សខ្មែររួបរួមជាតិបង្កើតឡើងក្រោយអំពើនៃការប្រព្រឹត្តរបស់ប្រធានបក្សទៅទៀត។ នេះជាការពន្យល់ពីលោកមេធាវី សុក សំអឿន ប្រធានក្រុមការិយាល័យមេធាវីអម្រិទ្ទ។
លោកបន្ថែមថា គេនៅតែអាចសង្គ្រោះគណបក្សខ្មែររួបរួមជាតិពីការរំលាយបានដដែល ទោះ លោក ញឹក ប៊ុនឆៃ ក្លាយជាទណ្ឌិតក៏ដោយ នេះប្រសិនបើសាលក្រមស្ថាពរចេញ។ សង្គ្រោះបានតាមរយៈលោក ញឹក ប៊ុនឆៃ លាចេញពីតំណែងបក្ស។ លោក សុក សំអឿន សង្កត់ធ្ងន់ថា គណបក្សខ្មែររួបរួមជាតិរំលាយទៅបានលុះត្រាតែ គណបក្សហ្នឹងគ្មានលទ្ធភាពទ្រទ្រង់បក្ស ឬបក្សគ្មានប្រធានថ្មី។
ចំណែក លោក សម គន្ធាមី ប្រធានអង្គការនិចហ្វិកដែលធ្វើការងារទាក់ទងការបោះឆ្នោតក៏មើលឃើញស្រដៀងនេះដែរថា គណបក្សខ្មែររួបរួមជាតិរំលាយទៅបានអាស្រ័យលើដើមបណ្ដឹង ប្ដឹងក្នុងនាមជាបុគ្គល ឬក៏គណបក្សទាំងមូល។ ប្រសិនបើក្នុងនាមជាបុគ្គលមិនជាប់ពាក់ព័ន្ធជាមួយគណបក្ស គឺគណបក្សខ្មែររួបរួមជាតិនៅតែអាចចូលរួមដំណើរការបោះឆ្នោតជាតិឆ្នាំ២០១៨ បានដដែល។ មួយវិញទៀត គណបក្សអាចរើសប្រធានថ្មីជំនួសលោក ញឹក ប៊ុនឆៃ ប្រសិនបើសាលក្រមតុលាការសម្រេចផ្ដន្ទាទោស។
និយាយដោយឡែក លោក សម គន្ធាមី មើលឃើញថា គណបក្សខ្មែររួបរួមជាតិមិនអាចឈានដល់ការរំលាយបានទេ ព្រោះគណបក្សនេះមិនមែនជាគូរប្រកួតប្រជែងរបស់គណ បក្សកាន់អំណាច ដូចគណបក្សសង្គ្រោះជាតិទេ។
បើផ្អែកតាមច្បាប់គណបក្សនយោបាយដែលធ្វើវិសោធកម្មនៅលើកទី១បានហាមឃាត់ទណ្ឌិតមិនឲ្យក្លាយជាប្រធានគណបក្សនយោបាយឡើយ។ វិសោធកម្មច្បាប់គណបក្សលើកទី២ដែលទើបប្រកាសឲ្យប្រើប្រាស់នាពេលថ្មីៗនេះ ហាមគណក្សនយោយបាយមិនឲ្យទាក់ទងជាមួយទណ្ឌិតមិនថា ជារូបភាព ឬសារជាសំឡេងនោះទេ ។ ដោយសារវិសោធកម្មនេះ ធ្វើឲ្យលោក សម រង្ស៊ី លាចេញពីតំណែប្រធានគណបក្សសង្គ្រោះជាតិដើម្បីបញ្ចៀសការរំលាយគណបក្ស។
ត្រឡប់មកនិយាយពី លោក ញឹក ប៊ុនឆៃ អតីតមេបញ្ជាការយោធារបស់គណបក្សហ្វ៊ុនស៊ិនប៉ិចត្រូវបានសង្ស័យថា ពាក់ព័ន្ធនៅក្នុងករណីគ្រឿងញៀនធំមួយក្នុងឆ្នាំ២០០៧នៅខេត្តកំពង់ស្ពឺហើយនៅពេលនោះទីប្រឹក្សារបស់លោកម្នាក់ឈ្មោះជា ជុង ត្រូវបានផ្ដន្ទាទោសឲ្យជាប់ពន្ធនាគារ២៥ឆ្នាំពាក់ព័ន្ធនៅក្នុងការផលិតគ្រឿងញៀននេះ៕
No comments:
Post a Comment