rfa
គណបក្សសង្គ្រោះជាតិ ប្រកាសមិនទទួលស្គាល់ការផ្សព្វផ្សាយ និងសកម្មភាពរបស់បុគ្គលណាមួយទាក់ទងនឹងទណ្ឌិតដែលពុំមែនជាការសម្រេចផ្លូវការរបស់គណបក្សនេះ។
សេចក្ដីថ្លែងការណ៍របស់គណបក្សសង្គ្រោះជាតិ នៅថ្ងៃទី១០ ខែសីហា បញ្ជាក់ថា រាល់សេចក្ដីសម្រេចរបស់គណបក្ស គឺជាសេចក្ដីសម្រេចរបស់សមាជក្រុមប្រឹក្សាជាតិ គណៈកម្មការនាយក និងគណៈកម្មាធិការអចិន្ត្រៃយ៍គណបក្ស ដែលស្របតាមលក្ខន្តិកៈរបស់បក្ស។
គណបក្សនេះមិនទទួលស្គាល់ការផ្សព្វផ្សាយ និងសកម្មភាពបុគ្គលដែលមិនមែនជាសេចក្ដីសម្រេចរបស់គណបក្សដែលរួមមាន ការប្រើប្រាស់សំឡេង រូបភាព ឯកសារលាយលក្ខណ៍អក្សរ សកម្មភាពទណ្ឌិត រួមនឹងការយល់ព្រមដោយចំហ ដោយតុណ្ហីភាព ឬដោយនៅស្ងៀមស្ងាត់ ការឃុបឃិតជាមួយទណ្ឌិត ទាំងអ្នកជាប់ទោសឧក្រិដ្ឋ ឬមជ្ឈិម ដោយផ្សារភ្ជាប់ទៅនឹងគណបក្ស។
ការប្រកាសរបស់គណបក្សសង្គ្រោះជាតិនេះ គឺបន្ទាប់ពីច្បាប់គណបក្សនយោបាយដែលទើបត្រូវបានធ្វើវិសោធនកម្មថ្មីៗនេះ បានហាមគ្រប់គណបក្សនយោបាយមិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួន។ ចំពោះគណបក្សណាដែលហ៊ានបំពាន ប្រព្រឹត្តផ្ទុយពីច្បាប់នេះ គឺតុលាការអាចសម្រេចផ្អាកសកម្មភាពនយោបាយរយៈពេល ៥ឆ្នាំ ឬអាចរំលាយគណបក្សនោះចោលតែម្ដង។ ច្បាប់នេះ ក្រៅពីគណបក្សប្រឆាំងរិះគន់ ក៏រងការរិះគន់ពីសង្គមស៊ីវិលជាតិ និងអន្តរជាតិ ថាផ្ទុយទៅនឹងរដ្ឋធម្មនុញ្ញ ខណៈច្បាប់កំពូលមួយនេះ ថាពលរដ្ឋទាំងអស់មានសិទ្ធិចូលរួមក្នុងកិច្ចការនយោបាយ៕
No comments:
Post a Comment