ដោយ អាស៊ីសេរី
2017-10-08
ទិដ្ឋភាពទឹកលិចភូមិស្រែគរ (ចាស់) ឃុំស្រែគរ ស្រុកសេសាន ខែត្រស្ទឹងត្រែង នៅថ្ងៃទី២៩ កក្កដា ឆ្នាំ២០១៧។
RFA/Men Sothyr
មន្ត្រីសង្គមស៊ីវិល និងអាជ្ញាធរមូលដ្ឋាននៅឃុំស្រែគរ ខែត្រស្ទឹងត្រែង ព្រួយបារម្ភពីសុវត្ថិភាពរបស់ពលរដ្ឋជាង ១០០គ្រួសារនៅឃុំស្រែគរ និងឃុំក្បាលរមាស ដែលបដិសេធមិនទទួលសំណងពីក្រុមហ៊ុន នៅគ្រាដែលទំនប់វារីអគ្គិសនីសេសានក្រោមពីរ ត្រូវបានបិទជាស្ថាពរ។ ការបិទទ្វារទឹកនេះ បណ្ដាលឲ្យកម្ពស់ទឹកបានឡើងលិចភូមិស្រែគរចាស់ និងផ្ទះពលរដ្ឋមួយចំនួន ខណៈកម្ពស់ទឹកកើនឡើងជិត ២ម៉ែត្រ។
ពលរដ្ឋជាង ១០០គ្រួសាររស់នៅឃុំក្បាលរមាស និងភូមិស្រែគរ បានត្រៀមទីទួលសុវត្ថិភាពរូចហើយ និងបានដឹកជញ្ជូនសម្ភារៈរបស់ខ្លួនទៅទីទួលសុវត្ថិភាព ស្របពេលកម្ពស់ទឹកបានបន្តឡើងខុសពីថ្ងៃធម្មតា និងគំរាមកំហែងអាយុជីវិតមនុស្ស និងសត្វ។ មេឃុំស្រែគរថា កម្លាំងសមត្ថកិច្ចនៅតែបន្តដាក់ពង្រាយតាមច្រកចេញចូលឃុំស្រែគរមួយចំនួន ក្នុងបំណងរារាំងអ្នកខាងក្រៅ និងអ្នកសារព័ត៌មានមិនឲ្យទៅតំបន់នោះ។
ពលរដ្ឋរស់នៅភូមិស្រែគរចាស់ ដែលបដិសេធមិនទទួលសំណង ជាជនជាតិភាគតិចឡាវ លោក ហ្វុត ឃឿន ឲ្យដឹងនៅថ្ងៃទី៨ តុលា ថា កម្ពស់ទឹកបានកើនឡើងខ្ពស់ខុសប្រក្រតីអំឡុងរយៈពេល ៣ថ្ងៃចុងក្រោយនេះ បណ្ដាលឲ្យផ្ទះពលរដ្ឋមួយចំនួនត្រូវលិច ហើយផ្លូវសំខាន់ៗ ដែលអ្នកភូមិធ្វើដំណើរបានកាត់ផ្ដាច់ទាំងស្រុងដោយទឹកជំនន់ បង្កការលំបាកក្នុងការធ្វើដំណើររបស់ពលរដ្ឋនៅតំបន់នោះ។ តែយ៉ាងណាលោកថា ពលរដ្ឋបានត្រៀមទូក សម្រាប់ជួយសង្គ្រោះអ្នកភូមិ និងដឹកជញ្ជូនសម្ភារៈទៅកាន់ទីទូលខ្ពស់។ លោកថា បើទោះបីជា ភូមិឋានរបស់អ្នកភូមិបានក្លាយជាអាងស្តុកទឹកនៃទំនប់វារីអគ្គិសនី សេសានក្រោមពីរក្ដី ក៏អ្នកភូមិនៅតែក្រាញននៀលរស់នៅទីនោះ និងស្វែងរកទីទូលសុវត្ថិភាពដោយខ្លួនឯង ដោយមិនព្រមទទូលសំណងដាច់ខាត៖ «បង្កការលំបាកពេលខ្លះយើងឆ្លងទៅនេះទៅនោះវាលំបាក ក្នុងការទៅរកគ្នា មួយទៀតដីស្រែដែលយើងធ្លាប់ដាំ និងធ្លាប់ស្ទូងរួចហើយហ្នឹងវា រលួយខ្លះហើយ»។
អាជ្ញាធរឃុំស្រែគរ ឲ្យដឹងថា អាជ្ញាធរខែត្របានបន្ទន់ឥរិយាបថ ក្នុងការដោះស្រាយបញ្ហាសំណងជូនពលរដ្ឋ ដោយផ្ដល់ជម្រើសផ្សេងៗរួមមាន បង្កើតក្រុមការងារចុះពិភាក្សាជាមួយពលរដ្ឋ បើពលរដ្ឋមិនទទួលសំណង នឹងចង់ទៅរស់នៅដីចម្ការដែលជាតំបន់ទីទួលខ្ពស់ អាជ្ញាធរនឹងឯកភាព តែបើពលរដ្ឋចង់មករស់នៅភូមិថ្មី ក្រុមហ៊ុនបានសង់ផ្ទះជូនពលរដ្ឋរួចហើយ និងដីកសិកម្មផង។
មេឃុំស្រែគរ មកពីគណបក្សសង្គ្រោះជាតិ សៀក មេគង្គ បារម្ភថា ពលរដ្ឋដែលបដិសេធមិនទទូលសំណង នឹងប្រឈមបញ្ហាច្រើនរួមមាន បញ្ហាសុខភាព អនាម័យទឹកស្អាត ជីវភាព សុវត្ថិភាព កុមារបោះបង់ការសិក្សា និងទ្រព្យសម្បត្តិជាដើម នៅគ្រាដែលទឹកជំនន់កំពុងគំរាមកំហែងលំនៅឋានពួកគាត់។ លោកថា គិតត្រឹមថ្ងៃទី៨ តុលា កម្ពស់ទឹកបានកើនឡើង ៧០ម៉ែត្រ ធៀបរយៈកម្ពស់នីវ៉ូទឹកសមុទ្រ ហើយភូមិស្រែគរចាស់បានកើនឡើងជាង ៥ម៉ែត្រ បង្កឲ្យលិចផ្ទះពលរដ្ឋ។ ចំណែកអាជ្ញាធរខែត្រ និងក្រុមហ៊ុនបានត្រៀមទូកសម្រាប់ជួយសង្គ្រោះ និងជម្លៀសពលរដ្ឋទៅកាន់ទីទួលសុវត្ថិភាព។ លោកអះអាងថា មកទល់ពេលនេះ ពលរដ្ឋរស់នៅតំបន់នោះពុំមានជួបគ្រោះថ្នាក់នៅឡើយទេ ហើយបញ្ហាសុខភាព នៅពុំមានបញ្ហាចោទនៅឡើយទេ ក៏ប៉ុន្តែលោកភ័យព្រួយរឿងអាជ្ញាធរខែត្រ នៅតែដាក់ពង្រាយកម្លាំងសមត្ថកិច្ចរឹតត្បិតមិនឲ្យអ្នកខាងក្រៅ ចូលឃុំស្រែគរ ដែលជាមូលហេតុនាំឲ្យពលរដ្ឋរឹតតែខឹងសម្បារអាជ្ញាធររដ្ឋាភិបាល៖ «យើងមើលទៅការពារ មិនឲ្យមានសារព័ត៌មានផ្សេងៗចូលមក ទី១ និងទី២ និស្សិតដែលចុះមកសិក្សាស្រាវជ្រាវ ទាក់ទងហ្នឹង ធនធានធម្មជាតិក៏មិនឲ្យចូលមកដែរ អ៊ីចឹងការពារទាំងអស់ទាក់ទងហ្នឹង កងកម្លាំងប្រដាប់អាវុធគេនិយាយថា មិនឲ្យមាន ចលាចល ទាក់ទងចលនាអ្វីមួយ»។
កាលពីថ្ងៃទី២៥ កញ្ញា លោកនាយករដ្ឋមន្ត្រី ហ៊ុន សែន បានសម្ពោធចុចបិទកុងតាក់ នៅទំនប់វារីអគ្គិសនី ជាស្ថាពរនៅស្រុកសេសាន ខែត្រស្ទឹងត្រែង។ លោកចាត់ទុកគម្រោងផលិតថាមពល អគ្គិសនីនេះ ថាបង្កើនសេដ្ឋកិច្ចជាតិ និងបង្កើតជីវភាពរស់នៅរបស់ពលរដ្ឋ។ លោក ហ៊ុន សែន ក៏មិនភ្លេចអរគុណរដ្ឋាភិបាលចិន ដែលបានគាំទ្រនិងជំរុញអ្នកវិនិយោគចិនមកវិនិយោគនៅកម្ពុជា។
គម្រោងសាងសង់ទំនប់វារីអគ្គិសនីសេសានក្រោម២ ដែលអនុម័តដោយគណៈរដ្ឋមន្ត្រី កាលពីខែវិច្ឆិកា ឆ្នាំ២០១២ គឺមាន ៣ក្រុមហ៊ុន ដែលដាក់ទុនវិនិយោគ ក្នុងនោះមានក្រុមហ៊ុនក្នុងស្រុកឈ្មោះ រ៉ូយ៉ាល់ គ្រុប (Royal Group) របស់លោកឧកញ៉ា គិត ម៉េង មានទុនវិនិយោគ ៣៩ភាគរយ ក្រុមហ៊ុនចិន ៥១ភាគរយ និងក្រុមហ៊ុនអគ្គិសនីវៀតណាម មានទុនវិនិយោគ ១០ភាគរយ។
កាលពីដើមខែ កញ្ញា ឆ្នាំ ២០១៧ សមត្ថកិច្ចខែត្រស្ទឹងត្រែង បានរារាំងយុវជនប្រមាណ៣០នាក់ ពីរាជធានីភ្នំពេញ មិនឲ្យចូលទៅឃុំស្រែគរ នៃស្រុកសេសាន ក្រោមហេតុផល ការពារសុវត្ថិភាព ខណៈដែលក្រុមយុវជនបានធ្វើដំណើរទៅតំបន់នោះ ក្នុងបំណងសិក្សាពីស្ថានភាពពលរដ្ឋដែលរងផលប៉ះពាល់ដោយសារទំនប់វារីអគ្គិសនីសេសានក្រោមពីរ។
មន្ត្រីសម្របសម្រួលសមាគមអាដហុក ខែត្រស្ទឹងត្រែង លោក ហូ សំ ចាត់ទុកការដាក់កម្លាំងពង្រាយចម្រុះរបស់អាជ្ញាធរខែត្រស្ទឹងត្រែងថា គឺជាការអនុវត្តផ្ទុយពីច្បាប់ដែលគាំពារសិទ្ធិសេរីភាពរបស់ពលរដ្ឋ ដូចមានចែងនៅក្នុងរដ្ឋធម្មនុញ្ញ និងកតិការសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ៖ «ពាក់ព័ន្ធការស្ទាក់ផ្លូវគាត់ អាហ្នឹងដូចជាមិនគួរឲ្យមានការកើតមានទេ។ អាហ្នឹងប៉ះពាល់ទៅលើសិទ្ធិសេរីភាពគាត់ខ្លាំងណាស់។ ទី១ ការរស់នៅរបស់គាត់ និងទី២ ការដើរហើរចេញចូលពិបាកអីចឹង»។
របាយការណ៍អាជ្ញាធរឃុំស្រែគរឲ្យដឹងថា រយៈពេលប្រមាណ ៣ខែចុងក្រោយនេះ ពលរដ្ឋជាង ៦០គ្រួសារថ្មីទៀត នៅឃុំស្រែគរ បានយល់ព្រមទទួលសំណង និងចាកចេញពីភូមិចាស់ទៅរស់នៅភូមិថ្មី ហើយបច្ចុប្បន្នពលរដ្ឋរស់នៅឃុំក្បាលរមាស ៥៧ គ្រួសារ និងឃុំស្រែគរ ជាង៦០គ្រួសារនៅមិនទាន់យល់ព្រមទទួលសំណងពីក្រុមហ៊ុននៅឡើយ៕
No comments:
Post a Comment