ដោយ អាស៊ីសេរី
2017-10-09
គ្រូពេទ្យបញ្ជូនកម្មកររោងចក្រ គ័នថេក (Kuantech) ដែលដួលសន្លប់ចូលបន្ទប់ព្យាបាលនៅមន្ទីរពេទ្យបង្អែកខេត្តតាកែវ នៅថ្ងៃទី៣១ មីនា ២០១៥។
Photo: RFA
កម្មករដែលធ្វើការក្នុងវិស័យកាត់ដេរ បានត្អូញត្អែរថា ពួកគេនៅតែទទួលបានការរើសអើងពីក្រុមគ្រូពេទ្យនៅតាមមន្ទីរពេទ្យមួយចំនួន ដែលក្រសួងការងារ បានចុះហត្ថលេខាជាមួយដើម្បីពិនិត្យសុខភាព កម្មករ កម្មការិនី រោងចក្រ ដោយមិនគិតថ្លៃ។ ពួកគេថា ការខ្វះចន្លោះ ឬភាពខ្ជីខ្ជានេះ គឺជាកំហុសរបស់ក្រុមគ្រូពេទ្យ មិនមែនខាងបេឡាជាតិរបបសន្តិសុខសង្គម (ប.ស.ស) មិនយកចិត្តទុកដាក់នោះទេ។
ទោះជាក្រុមមន្ត្រីជាន់ខ្ពស់នៃក្រសួងសុខាភិបាល ធ្លាប់បានណែនាំឲ្យក្រុមគ្រូពេទ្យ ឲ្យយកចិត្តទុកដាក់ចំពោះសេវាពិនិត្យ និងព្យាបាលដល់កម្មករកាត់ដេរ ដែលបានបង់ថ្លៃព្យាបាលតាមរយៈ ប.ស.ស ក៏ដោយ ក៏កម្មករខ្លះ នៅតែអះអាងថា ពួកគាត់ត្រូវបានក្រុមគ្រូពេទ្យរើសអើង ចំពោះការព្យាបាល។
ថ្លែងនៅក្នុងកម្មវិធីជួបប្រជុំជាមួយតំណាង និងសកម្មជនសហជីព ប្រមាណជិត៣០០នាក់ នៅទីស្នាក់ការសហភាពចលនាកម្មករកម្ពុជា នារាជធានីភ្នំពេញ លើប្រធានបទចំណាប់អារម្មណ៍ កម្មករចំពោះការដំឡើងប្រាក់ឈ្នួលកម្មករ១៧០ដុល្លារ ក្នុងមួយឆ្នាំ នៅព្រឹកថ្ងៃទី៨ ខែតុលា កម្មករ ម្នាក់ យល់ថា ការដំឡើងប្រាក់ខែរបស់កម្មករដល់កម្រិត១៧០ដុល្លារនេះ គឺជាការទាមទាររបស់កម្មករសុទ្ធសាធ ព្រោះកាលពីឆ្នាំ២០១៣ កម្មករបានតវ៉ា ដើម្បីទទួលបានជីវភាពសមរម្យ ខណៈដែលមន្ត្រីក្រសួងការងារ កន្លងមកមិនដែលបានអើពើចំពោះប្រាក់ខែកម្មករ។ លោកក៏បានទទូចឲ្យមន្ត្រី ប.ស.ស ខិតខំពង្រឹង និងជួយសម្រួលដល់ឥរិយាបថរបស់ក្រុមគ្រូពេទ្យ ដែលទទួលព្យាបាលកម្មករ តាមរយៈការបង់ថ្លៃសេវាដោយប.ស.ស បន្ថែមទៀត។
បេឡារបបសន្តិសុខសង្គម គឺជាផ្នែកមួយនៃក្រសួងការងារ និងបណ្ដុះបណ្ដាលវិជ្ជាជីវៈ។ តាមគេហទំព័រនៃអង្គភាពនេះ ប.ស.ស មានភារកិច្ចផ្ដល់នូវសន្តិសុខសង្គមជាមូលដ្ឋានជូនកម្មករនិយោជិកទាំងអស់ដែលធ្វើការក្នុងវិស័យឯកជន។ ប.ស.ស ចុះបញ្ជិកាសមាជិក ទទួលភាគទានរបស់សមាជិកនោះ គ្រប់គ្រងមូលនិធិនៃរបបដំណើរការ និងផ្ដល់តាវកាលិកដល់សមាជិក ឬអ្នកនៅក្នុងបន្ទុក។ បេសកកម្មរបស់ ប.ស.ស គឺដើម្បីបម្រើសេវាកម្មផ្នែកហានិភ័យការងារដល់សមាជិកទាំងអស់ ដែលបានចុះបញ្ជិកាទាន់ពេលវេលា ដើម្បីជួយបន្ធូរបន្ថយបន្ទុកក្នុងសង្គម និងជួយលើកកម្ពស់ស្ថិរភាពសង្គម។
កម្មករកាត់ដេរ អះអាងថា ពួកគាត់បានបង់ប្រាក់ឲ្យទៅ ប.ស.ស ៣ដុល្លារក្នុងមួយខែ ដើម្បីទទួលបានប័ណ្ណមួយក្នុងការពិនិត្យ និងព្យាបាលជំងឺ ដោយមិនគិតថ្លៃនៅតាមមន្ទីរពេទ្យរដ្ឋ។ តែផ្ទុយមកវិញ ពួកគាត់ មើលឃើញថា គ្រូពេទ្យនៅតាមមន្ទីរពេទ្យដែលជាដៃគូរបស់ប.ស.ស មួយចំនួន មិនសូវយកចិត្តទុកដាក់ ចំពោះសេវាសុខភាពកម្មករដែលទៅទទួលការព្យាបាលនោះទេ។
តំណាងសហជីពរោងចក្រអ៊ីហ្វា លោក គឹម សាវ៉ាត សំដែងការខកចិត្តចំពោះ ប.ស.ស ដែលកាត់លុយ កម្មករដើម្បីយកទៅឲ្យមន្ទីរពេទ្យ តែខាងមន្ទីរពេទ្យវិញ ហាក់បានកេងចំណេញលុយកម្មករដែល ប.ស.ស បង់ឲ្យ។ លោកស្នើមន្ត្រី ប.ស.ស ជួយកែតម្រូវបន្ថែមទៀត ដល់ក្រុមគ្រូពេទ្យមួយចំនួនដែលប្រើអាកប្បកិរិយាមិនល្អ ចំពោះកម្មករដែលកាន់ប័ណ្ណប.ស.ស។
កាលពីព្រលប់ថ្ងៃទី២៨ ខែឧសភា កម្មការិនីរោងចក្រកាត់ដេរម្នាក់ ឈ្មោះ ឈា សារិន ហៅ ស្រីមុំ បានស្លាប់ទាំងកូននៅក្នុងផ្ទៃ នៅពេលសម្រាលកូនស្រីដែលជាកូនទី៣ នៅបន្ទប់សម្រាលកូននៃមន្ទីរពេទ្យស្រលាញ់ទារក ឬហៅពេទ្យជប៉ុន។ ស្វាមីសព អះអាងថា ការណ៍ដែលប្រពន្ធ និងកូនស្លាប់ គឺដោយសារក្រុមគ្រូពេទ្យ បានរើសអើងចំពោះប្រពន្ធលោក ដែលកាន់ប័ណ្ណ ប.ស.ស ដើម្បីជួយសម្រាលលុយក្នុងការសម្រាលកូន។ ជិតកន្លះឆ្នាំមកនេះ ស្វាមីនៃសព្វកម្មការិនី ឈា សារិន ប្រាប់ថា ក្រុមគ្រួសារនៅមិនទាន់ទទួលបានយុត្តិធម៌ ករណីប្រពន្ធ និងកូនរបស់លោក ស្លាប់ដោយការរើសអើសនោះនៅឡើយទេ។
ប្រធានសហជីពចលនាកម្មករកម្ពុជា លោក ប៉ាវ ស៊ីណា យល់ថា ទោះប្រាក់ខែកម្មករឡើងដល់កម្រិតខ្ពស់មួយក៏ដោយ ប៉ុន្តែកម្មករនៅតែបានត្អូញត្អែរចំពោះសេវាផ្នែកសុខាភិបាល ដែលកំពុងស្ថិតនៅកម្រិតអន់សម្រាប់កម្មករ។ លោកថា ខាងសហជីពនឹងយកសំណើរបស់កម្មករដែលបានលើកឡើង នៅទីស្នាក់ការសហជីព ទៅជជែក និងជំរុញឲ្យមន្ត្រីនៅក្រសួងការងារ និងប.ស.ស ជំរុញទៅក្រសួងសុខាភិបាល ឲ្យយកចិត្តទុកដាក់បន្ថែមទៀត លើការត្រួតពិនិត្យសុខភាពកម្មករ។
សហជីពយល់ថា បើទោះជា ប្រាក់ខែកម្មករត្រូវបានដំឡើងដល់១៧០ដុល្លារ ប៉ុន្តែបញ្ហាប្រឈមរបស់កម្មករដូចជា តម្លៃបន្ទប់ជួលកម្មករនឹងត្រៀមឡើងថ្លៃតាមប្រាក់ខែ និងការឡើងថ្លៃទំនិញនៅលើទីផ្សារជារៀងរាល់ថ្ងៃ នៅតែជាកង្វល់របស់កម្មករក្នុងវិស័យកាត់ដេរ៕
No comments:
Post a Comment