09 តុលា 2017
កាន់ វិច្ឆិកា
voa
រូបឯកសារ៖ ស្ត្រីម្នាក់កាន់រូបភាពលោក កែម ឡី ខណៈពេលប្រជាពលរដ្ឋរាប់ម៉ឺននាក់ចូលរួមជូនដំណើរលោក កែម ឡី នៅថ្ងៃអាទិត្យ ទី២៤ ខែកក្កដា ឆ្នាំ២០១៦។
អតីតគណៈកម្មការរៀបចំបុណ្យសព លោក កែម ឡី បានដាក់ពាក្យសុំពន្យារពេលចូលបំភ្លឺ បន្ទាប់ពីតុលាការកោះហៅសាកសួរពាក់ព័ន្ធនឹងការប្រមូលបច្ច័យបុណ្យ តាមបណ្តឹងរបស់ប្រធានគណបក្សយុវជនកម្ពុជា។
ភ្នំពេញ —
អតីតសមាជិកចំនួនពីររូបនៃគណៈកម្មការរៀបចំបុណ្យសពលោក កែម ឡី បានដាក់ពាក្យសុំពន្យារពេលចូលបំភ្លឺ បន្ទាប់ពីតុលាការកោះហៅសាកសួរពាក់ព័ន្ធនឹងការប្រមូលបច្ច័យបុណ្យ តាមបណ្តឹងរបស់ប្រធានគណបក្សយុវជនកម្ពុជា ដែលប្តឹងពីបទរំលោភលើសេចក្តីទុកចិត្ត។
លោក កែម ឡី អ្នកវិភាគសង្គមដ៏ល្បីល្បាញត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃ នៅកណ្តាលរាជធានីភ្នំពេញ កាលពីខែកក្កដាឆ្នាំទៅមិញ។ មុនពេលដង្ហែរសពលោក កែម ឡី ទៅកាន់ផ្ទះកំណើតរបស់លោកក្នុងខេត្តតាកែវ គណៈកម្មការរៀបចំបុណ្យសពត្រូវបានបង្កើតឡើង ដើម្បីរៀបចំបុណ្យសពរបស់លោក កែម ឡី ឱ្យបានអធិកអធមក្នុងវត្តមួយនៅភ្នំពេញ។
ប៉ុន្មានខែក្រោយមក គ្រួសាររបស់លោកបានប្រារព្ធខួបបុណ្យនៃការស្លាប់របស់លោក និងមានព័ត៌មានថា ខ្វះខាតថវិកាក្នុងការប្រារព្ធបុណ្យខួបសពលោក កែម ឡី។
លោក ប៉ា ងួនទៀង (ឆ្វេង) នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងលោក មឿន តុលា (កណ្តាល) នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស និងព្រះតេជព្រះគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ត្រូវបានកោះហៅឲ្យចូលបំភ្លឺនៅថ្ងៃទី១១ ខែតុលា។
កាលពីថ្ងៃទី៨ ខែកញ្ញាកន្លងទៅ លោក ពេជ ស្រស់ ប្រធានគណបក្សយុវជនកម្ពុជា ដែលទើបតែបង្កើតថ្មីមុនពេលបោះឆ្នោតឃុំ-សង្កាត់ កាលពីខែមិថុនា បានដាក់ពាក្យបណ្តឹងទៅសាលាដំបូងរាជធានីភ្នំពេញ ស្នើឲ្យអយ្យការស៊ើបអង្កេតស្វែងរកការណ៍ពិតពាក់ព័ន្ធនឹងថវិកាដែលប្រជាពលរដ្ឋចូលបុណ្យសពលោក កែម ឡី ក្នុងពេលកន្លងមក។
កាលពីថ្ងៃទី២២ ខែកញ្ញា ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅអតីតគណៈកម្មការចំនួន៣រូប ដែលរៀបចំបុណ្យសពរបស់លោក កែម ឡី ដើម្បីសាកសួរពាក់ព័ន្ធនឹងបទរំលោភលើសេចក្តីទុកចិត្ត។
អ្នកទាំង៣រូបមានដូចជា លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងលោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ត្រូវបានកោះហៅឲ្យចូលបំភ្លឺនៅថ្ងៃទី៩ ខែតុលា ព្រមទាំងព្រះតេជព្រះគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ដែលត្រូវបានកោះហៅឲ្យចូលបំភ្លឺនៅថ្ងៃទី១១ ខែតុលា។
ពាក្យសុំពន្យារពេលចូលបំភ្លឺចេញដោយលោក សំ ចំរើន ដែលជាមេធាវីរបស់លោក ប៉ា ងួនទៀង ចេញកាលពីថ្ងៃទី៨ ខែតុលា បានបញ្ជាក់ពីមូលហេតុថា ដោយសារកូនក្តីរបស់ខ្លួនពុំមានពេលវេលាគ្រប់គ្រាន់ដើម្បីពិគ្រោះយោបល់ទៅលើដំណើររឿងដែលត្រូវចូលបំភ្លឺ និងមិនទាន់ពិនិត្យមើលឯកសារពាក្យបណ្តឹង រួមទាំងឯកសារពាក់ព័ន្ធផ្សេងៗទៀត។
ចំណែកពាក្យសុំលើកពេលចូលបំភ្លឺរបស់លោក មឿន តុលា ចេញកាលពីថ្ងៃទី៦ ខែតុលា បញ្ជាក់ពីមូលហេតុថា លោកមិនទាន់ទទួលបានដីកាកោះហៅរបស់តុលាការដោយផ្ទាល់ដៃ ដោយសារលោកទើបត្រឡប់មកពីបំពេញបេសកកម្មនៅបរទេស និងថា ដីកាដែលចេញដោយតុលាការបានសរសេរខុសអាស័យដ្ឋានបច្ចុប្បន្នរបស់លោក។ លោកបានបន្ថែមក្នុងពាក្យសុំពន្យារនោះដោយស្នើឲ្យតុលាការចេញដីកាកោះសារជាថ្មី។
លោក មឿន តុលា បានបញ្ជាក់ក្នុងលិខិតនោះដោយសម្រង់ន័យដើមថា៖ «ខ្ញុំបាទនឹងចូលបំភ្លឺនៅចំពោះមុខតំណាងអយ្យការ ប្រសិនបើខ្ញុំបានទទួលដីកាកោះសារជាថ្មី ដោយមានអាស័យដ្ឋានផ្ទះលេខ៣៥៩ ផ្លូវ៦៩ BT សង្កាត់បឹងទំពុន ខណ្ឌមានជ័យ រាជធានីភ្នំពេញ»។
VOA មិនអាចទាក់ទងសុំការអធិប្បាយពីលោក លី សុផាណា និងលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានទេ។ ចំណែកលោក មឿន តុលា និងលោក ប៉ា ងួនទៀង ក៏វីអូអេមិនអាចទាក់ទងបាន ដើម្បីសុំការបញ្ជាក់បន្ថែមដែរ រហូតដល់ល្ងាចថ្ងៃចន្ទនេះ៕
No comments:
Post a Comment