ដោយ ម៉ម ពិសី 14/12/2017 14/12/2
យុវជន Nguyen Van Hoa ដែលត្រូវតុលាការវៀតណាម កាត់ទោសឲ្យជាប់គុក ៧ឆ្នាំ
RFI
សភានៃសហភាពអឺរ៉ុប បានចេញសេចក្តីប្រកាសមួយ នៅថ្ងៃព្រហស្បតិ៍ទី ១៤ធ្នូ អំពាវនាវឲ្យរដ្ឋាភិបាលសង្គមនិយមវៀតណាម ដោះលែងជាបន្ទាន់ និងដោយឥតលក្ខខណ្ឌ យុវជនម្នាក់ ឈ្មោះ ង្វៀន វ៉ាន់ហួ ដែលបានរិះគន់រដ្ឋាភិបាលវៀតណាម តាមបណ្តាញសង្គមហ្វេសប៊ុក ស្តីពីការបំពុលបរិស្ថាន។ សភាអឺរ៉ុប ក៏បានអំពាវនាវ ផងដែរ ឲ្យវៀតណាម ធ្វើការកែប្រែច្បាប់ ដែលមានលក្ខណៈ រារាំងការប្រើសិទ្ធិសេរីភាព ក្នុងការបញ្ចេញមតិរបស់ប្រជាពលរដ្ឋខ្លួន។
យុវជនអាយុ២២ឆ្នាំ ឈ្មោះ ង្វៀន វ៉ាន់ហួ (Nguyen Van Hoa) បានសរសេរសាររិះគន់ ទៅលើរដ្ឋាភិបាលវៀតណាម នៅលើទំព័រហ្វេសប៊ុករបស់ខ្លួន កាលពីឆ្នាំ២០១៦។ សាររិះគន់ បញ្ចេញមតិនេះ គឺយុវជននេះ បានសរសេរ ដោយបានលើកឡើងពីករណីបំពុលបរិស្ថាន បង្ហូរជាតិពុលទៅក្នុងទឹកសមុទ្រ ដោយរោងចក្រចិនតៃវ៉ាន់មួយ។ យុវជននេះ បានលើកឡើងពីភាពអសកម្ម និងការស៊ុំគ្រលំពុករលួយរបស់អាជ្ញាធរវៀតណាម។
កាលពីចុងខែវិច្ឆិកា កន្លងទៅនេះ យុវជន ង្វៀន វ៉ាន់ហួ ត្រូវបានតុលាការវៀតណាម ផ្តន្ទាទោស ឲ្យជាប់ពន្ធនាគារ រយៈពេល៧ឆ្នាំ ពីបទឃោសនាប្រឆាំងនឹងរដ្ឋាភិបាល ដែលមានចែងក្នុងមាត្រា ៨៨ នៃក្រមព្រហ្មទណ្ឌវៀតណាម។
សភាអឺរ៉ុបអំពាវនាវនៅក្នុងសេចក្តីប្រកាស កាលពីថ្ងៃព្រហស្បតិ៍ទី ១៤ធ្នូ ថាវៀតណាម ត្រូវតែដោះលែងយុវជន ង្វៀន វ៉ាន់ហួ ព្រោះអ្វីដែលយុវជននេះធ្វើ គឺគ្រាន់តែជាអនុវត្តសិទ្ធិសេរីភាព ក្នុងការបញ្ចេញមតិ តែប៉ុណ្ណោះ។ ក្រុមសមាជិកសភាអឺរ៉ុប បានលើកឡើងថា អាជ្ញាធរវៀតណាម មានការយល់ឃើញ កាន់តែចង្រ្អៀតទៅៗ ទាក់ទិនទៅនឹងការអនុវត្តសិទ្ធិសេរីភាព របស់ប្រជាពលរដ្ឋខ្លួន។ វៀតណាម បានប្រើគ្រប់មធ្យោបាយ ដូចជាការគំរាមកំហែងលើរូបរាងកាយ ចាប់បង្ឃាំងមនុស្ស ដោយគ្មានឆ្លងកាត់ការជុំនុំជំរះពីតុលាការ ការសំឡុតបំភ័យ បំបាក់ស្មារតី មិនឲ្យមានការរិះគន់តវាជាដើម មិនថាទៅលើសកម្មជនសិទ្ធិមនុស្ស សកម្មជនការពារបរិស្ថាន សិល្បៈករ ឬអ្នកច្បាប់នោះទេ។
សភាអឺរ៉ុប ក៏បានអំពាវនាវដែរថា មាត្រា៨៨ នៃក្រមព្រហ្មទណ្ឌវៀតណាម គឺជាមាត្រាច្បាប់ ដែលរដ្ឋាភិបាលប្រទេសនេះ យកមកធ្វើជាលេស ដើម្បីចាប់ចង បំបិទមាត់អ្នកប្រឆាំងរិះគន់ខ្លួនតែប៉ុណ្ណោះ។ វៀតណាម ត្រូវតែធ្វើកំណែទម្រង់ មិនត្រូវយកលេសថា “ដើម្បីសន្តិសុខ ស្ថិរភាពជាតិ” យកទៅប្រើដើម្បីរំលោភសិទ្ធិមនុស្ស សិទ្ធិសេរីភាពក្នុងការបញ្ចេញមតិ របស់ប្រជាជនខ្លួនឡើយ។
គួរបញ្ជាក់ថា វៀតណាម ដែលមានរបបកុម្មនីស្តសង្គមនិយម តែងតែត្រូវអង្គការសិទ្ធិមនុស្ស រិះគន់ជាប្រចាំ ទាក់ទិននឹងការរំលោភសិទ្ធិមនុស្ស។ ជាមួយនឹងការឡើងមកកាន់តំណែង របស់ថ្នាក់ដឹកនាំនយោបាយថ្មី កាលពីឆ្នាំទៅ វៀតណាមបានដំឡើងសាច់ដុំ ចាប់អ្នកប្រឆាំង កាន់តែច្រើន។ ចាប់ពីដើមឆ្នាំ២០១៧មក បើតាមតួលេខរបស់អង្គការ Amnesty International អាជ្ញាធរវៀតណាម បានធ្វើការឃុំឃាំងអ្នកតវ៉ារិះគន់ខ្លួន ចំនួន១៥នាក់ ហើយក្នុងចំណោមនោះ មានអ្នកខ្លះត្រូវទទួលទោសជាប់ពន្ធនាគារយូរឆ្នាំ៕
No comments:
Post a Comment