ដោយ វ៉ែន សុមេធ
2017-12-23
rfa
អ្នកបុរីកីឡាអង្គុយតវ៉ាមុខផ្ទះវីឡារបស់អ្នកស្រី ស៊ុយ សុផាន ប្រធានក្រុមហ៊ុន ផាន អ៊ីម៉ិច (Phan Imex) នៅព្រឹកថ្ងៃទី៨ ខែឧសភា ឆ្នាំ២០១៧។
RFA
សហគមន៍មានជម្លោះដីធ្លីនៅតំបន់បុរីកីឡា ឲ្យដឹងថា អាជ្ញាធរមិនទាន់ប្រើកម្លាំង ឬគ្រឿងចក្រឈូសឆាយផ្ទះសម្បែងរបស់ពួកគេទេ នៅថ្ងៃផុតឱសានវាទថ្ងៃដំបូងនេះ។ ពួកគាត់បារម្ភថា នៅថ្ងៃអាទិត្យ ទី២៤ ធ្នូ កម្លាំងអាជ្ញាធរនឹងប្រើកងកម្លាំងអាវុធ និងគ្រឿងចក្រមកឈូសឆាយផ្ទះរបស់ពួកគាត់ជាថ្មី ដោយសារថ្ងៃអាទិត្យ ជាថ្ងៃដែលពលរដ្ឋ និងអ្នកសារព័ត៌មានសម្រាក ហើយអាជ្ញាធរអាចឆ្លៀតឱកាសពេលនោះ។
ក្រុមស្ត្រីដែលមានជម្លោះដីធ្លីទាំង ១១គ្រួសារ បានទៅទាមទារសុំជួបអ្នកស្រី ស៊ុយ សុផាន ជាថ្មីម្ដងទៀត នៅព្រឹកថ្ងៃទី២៣ ខែធ្នូ នៅមុខភូមិគ្រឹះម្ចាស់ក្រុមហ៊ុន ផានអ៊ីម៉ិច ស្ថិតក្នុងខណ្ឌទួលគោក រាជធានីភ្នំពេញ ដើម្បីទទូចឲ្យអ្នកស្រី ស៊ុយ សុផាន ចេញមុខរកដំណោះស្រាយដោយផ្ទាល់ជាមួយពលរដ្ឋដែលមិនព្រមទទួលយកសំណងដ៏តិចតួចពីតំបន់បុរីកីឡា នោះ។
តំណាងសហគមន៍បុរីកីឡា អ្នកស្រី ង៉ូវ ណារី ឲ្យដឹងថា ការទាមទារនៅព្រឹកថ្ងៃទី២៣ ធ្នូ ក្រុមសហគមន៍បានត្រៀមចាន ឆ្នាំង វែក អុស មុងភួយ កន្ទេលជាដើម ដើម្បីនាំគ្នាទៅដេករង់ចាំជួបអ្នកស្រី ស៊ុយ សុផាន នៅមុខភូមិគ្រឹះរបស់គាត់ ប៉ុន្តែនៅពេលតវ៉ា អ្នកយាមភូមិគ្រឹះអ្នកស្រីបានចេញមកប្រាប់ក្រុមអ្នកតវ៉ាថា អ្នកស្រី ស៊ុយ សុផាន ណែនាំឲ្យក្រុមអ្នកតវ៉ាទៅរកដំណោះស្រាយនៅសាលាក្រុងភ្នំពេញ ចុះ ហើយអ្នកស្រី ស៊ុយ សុផាន នឹងជំរុញឲ្យមានដំណោះស្រាយជាមួយសាលាក្រុង។ អ្នកស្រី ង៉ូវ ណារី អះអាងថា មន្ត្រីជាន់ខ្ពស់សាលាក្រុងភ្នំពេញម្នាក់ ឈ្មោះ ជាង ដែលអភិបាលរង លោក មាន ចាន់យ៉ាដា ចាត់ឲ្យមកសម្របសម្រួលជាមួយអ្នកបុរីកីឡា ប្រាប់ថា ក្រុមហ៊ុនគ្មានសិទ្ធិបញ្ជាអាជ្ញាធរឲ្យដោះស្រាយរបៀបណានោះទេ៖ «»។
អ្នកស្រី ង៉ូវ ណារី បន្តថា ពួកគាត់ទាំង ១១គ្រួសារ ដែលមិនព្រមទទួល កសំណងដ៏តិចតួចនេះ បារម្ភពីសុវត្ថិភាពផ្ទះសម្បែងខ្លាំងណាស់ក្រោយពេលដែលអាជ្ញាធរចេញមុខគំរាមប្រើគ្រប់វិធានការដើម្បីយកផ្ទះរបស់ពួកគាត់។ ប៉ុន្តែបើទោះជាយ៉ាងណា អ្នកស្រីអះអាងថា ប្រសិនបើបាត់បង់ផ្ទះ ពួកគាត់ក៏មិនអាចរស់នៅបានដែរ ដូច្នេះពួកគាត់នឹងនៅតស៊ូជាមួយអាជ្ញាធរ និងគ្រឿងចក្រដើម្បីការពារផ្ទះរបស់ពួកគេ។ បន្ថែមពីនេះ ពួកគាត់នឹងនាំគ្នាយកញត្តិទៅដាក់នៅតាមស្ថានទូតនានា ដើម្បីសុំអន្តរាគមន៍ដែរ។
អភិបាលរងរាជធានីភ្នំពេញ លោក មាន ចាន់យ៉ាដា បានចេញសេចក្ដីជូនដំណឹងកំណត់ត្រឹមថ្ងៃទី២២ ខែធ្នូ តម្រូវឲ្យពលរដ្ឋដែលមិនទាន់ទទួលយកសំណងពីក្រុមហ៊ុនផានអ៊ីម៉ិច ត្រូវទៅទទួលយកសំណងជាកំហិត។ លោកព្រមានថា ផុតពីថ្ងៃទី២២ ខែធ្នូ អាជ្ញាធររាជធានីភ្នំពេញ នឹងអនុវត្តវិធានការរដ្ឋបាល និងប្រើប្រាស់យន្តការតុលាការដោយមិនទទួលខុសត្រូវចំពោះការបាត់បង់ផលប្រយោជន៍ និងថែមទាំងបញ្ឈប់រាល់ការដោះស្រាយសំណង ដោយសារអាជ្ញាធរក្រុងភ្នំពេញ ចាត់ទុកថា ពលរដ្ឋទាំងនោះបានបោះបង់សិទ្ធិក្នុងការទទួលយកសំណងគោលនយោបាយរបស់ខ្លួន។
សាលាក្រុងភ្នំពេញ ផ្ដល់សំណងដល់ពលរដ្ឋទាំង ១១គ្រួសារ ដែលកំហិតឲ្យពលរដ្ឋចាកចេញពីផ្ទះទៅរស់នៅឯភូមិអណ្ដូង ខណ្ឌសែនសុខ ជាយរាជធានីភ្នំពេញ និងលុយ ៣.០០០ដុល្លារ។ ពលរដ្ឋហៅទង្វើរបស់សាលាក្រុងថា ជាការសម្លាប់ពលរដ្ឋក្រីក្រដែលជាម្ចាស់ដី ហើយបច្ចុប្បន្នម្ចាស់ដីទាំងនោះកំពុងប្រឈមមុខជីវភាពទីទ័លក្រ ព្រោះសំណងប៉ុណ្ណឹង នឹងធ្វើឲ្យពួកគាត់កាន់តែលំបាកវេទនាថែមទៀត។
មន្ត្រីអង្កេតជាន់ខ្ពស់នៃសមាគមសិទ្ធិមនុស្សអាដហុក លោក យី សុខសាន្ដ យល់ថា បញ្ហាជម្លោះដីធ្លីនៅសហគមន៍បុរីកីឡា កើតមានបញ្ហាស្មុគស្មាញ ដោយសារតែអាជ្ញាធរ។ ដូច្នេះលោកស្នើសុំឲ្យអាជ្ញាធរគួរតែផ្ដល់ដំណោះស្រាយផ្ដល់អគាររស់នៅនៅនឹងកន្លែង ដើម្បីផ្ដល់ឱកាសឲ្យពួកគេមានជីវភាពសមរម្យ។ ម្យ៉ាងទៀតលោកយល់ថា ឈ្មួញដែលទទួលបានដីនៅបុរីកីឡា ទទួលបានផលចំណេញច្រើនណាស់ពីការអភិវឌ្ឍនៅទីនោះ ខណៈដែលអ្នកមិនទាន់ទទួលសំណងនៅតិចតួចគ្រួសារប៉ុណ្ណោះ៖ «»។
មន្ត្រីអង្គការសង្គមស៊ីវិលប្រាប់ថា ដោយសារតែស្ថានការណ៍នយោបាយឡើងកម្ដៅខ្លាំង ធ្វើឲ្យអង្គការក្រៅរដ្ឋាភិបាល មិនអាចជួយអន្តរាគមន៍បញ្ហាជម្លោះដីធ្លីនៅសហគមន៍បុរីកីឡាបាន ក៏ព្រោះតែខ្លាចការចោទថា ជាក្រុមធ្វើបដិវត្តន៍ពណ៌។
ចំណែកអង្គការក្រុមការងារពិសេសសិទ្ធិលំនៅឋានវិញ ផ្ដល់យោបល់ថា សាលាក្រុងភ្នំពេញ និងក្រុមហ៊ុនផានអ៊ីម៉ិច របស់អ្នកស្រី ស៊ុយ សុផាន គួរដោះស្រាយវិបត្តិដីធ្លីតំបន់បុរីកីឡា ឲ្យដូចរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ដោះស្រាយបញ្ហាដីធ្លីនៅអគារប៊ូឌីង កាលពីពេលថ្មីៗនេះ គឺពលរដ្ឋចាកចេញពីអគារទាំងញញឹម និងគ្មានការតវ៉ាប្រឆាំង៕
No comments:
Post a Comment