ដោយ មាន ឫទ្ធិ
2018-01-28
៧-សីហា-២០១៤៖ គំនរដើមឈើជាច្រើនប្រភេទដែលក្រុមហ៊ុនចិន ឡាន ហ្វេង បានឈូសផ្ដួល ដើម្បីយកដីដាំអំពៅ នៅភូមិសាស្ត្រឃុំប្រមេរ ស្រុកត្បែងមានជ័យ ជាប់នឹងព្រំប្រទល់ស្រុកឆែប ខេត្តព្រះវិហារ។
RFA/Hang Savyouth
ប្រជាសហគមន៍ នៅស្រុកឆែប និងស្រុកជ័យសែន ខេត្តព្រះវិហារ ព្រួយបារម្ភពីវាសនាព្រៃឈើនៅក្នុងតំបន់ព្រៃសហគមន៍ ដែលពួកគាត់បានស្នើសុំអាជ្ញាធររក្សាទុក។ ក្តីបារម្ភនេះ ដោយសារក្រុមហ៊ុនប្រមូលឈើមួយនៅតំបន់នោះ នៅតែបន្តកាប់ឈើ និងជួលពលរដ្ឋឱ្យចូលកាប់ឈើក្នុងតំបន់ព្រៃសហគមន៍ដោយខុសច្បាប់។ ប្រជាសហគមន៍បានរាយការណ៍ និងចាប់បទល្មើសបញ្ជូនទៅមន្ត្រីជំនាញទៀតផង ប៉ុន្តែមិនមានប្រសិទ្ធភាពនោះទេ។
ប្រជាសហគមន៍ ស្នើសុំឱ្យអាជ្ញាធរខេត្ត និងរដ្ឋមន្ត្រីក្រសួងពាក់ព័ន្ធ ចាត់វិធានការទៅលើក្រុមជនល្មើស និងក្រុមហ៊ុនមួយឈ្មោះ ឌី ឌុក ហៅ ក្រុមហ៊ុន សំអឿន សុវណ្ណ ដែលពួកគាត់ចោទថា ក្រុមហ៊ុននេះ កំពុងបំផ្លាញព្រៃឈើនៅក្នុងតំបន់ព្រៃសហគមន៍សាមគ្គីសង្កែពីរ។ បន្ថែមពីនេះ ពួកគេស្នើសុំឱ្យរាជរដ្ឋាភិបាលកំណត់ឱ្យបានជាក់លាក់រវាងដីរបស់ក្រុមហ៊ុនចិននៅតំបន់នោះ និងដីសហគមន៍ ព្រមទាំងដីប្រជាពលរដ្ឋផងដែរ។ លើសពីនេះ អាជ្ញាធរខេត្ត ឬថ្នាក់ក្រសួង គប្បីចេញលិខិតណាមួយដើម្បីប្រគល់ដីសហគមន៍ឱ្យប្រជាពលរដ្ឋជាផ្លូវការនិងត្រូវប្រកាសជាទូទៅ។
តំណាងសហគមន៍ឃុំសង្កែពីរ (២) លោក ផាវ យ៉ន មានប្រសាសន៍ថា ដីសហគមន៍សាមគ្គីសង្កែពីរ ផ្ដល់ផលប្រយោជន៍ច្រើន ដល់ប្រជាពលរដ្ឋក្នុងឃុំសង្កែពីរ ស្រុកឆែបជាង ៣០០ គ្រួសារ (៣០៧)និងពលរដ្ឋនៅឃុំតស៊ូ ស្រុកជ័យសែន ជាច្រើនគ្រួសារទៀត។ លោកបញ្ជាក់ថា កាលពីឆ្នាំ២០១៦ ក្រុមហ៊ុនចិនឈ្មោះ ហេង រួយ ចាប់ផ្ដើមឈូសឆាយដីសហគមន៍ និងដីស្រែដែលពលរដ្ឋធ្លាប់កាន់កាប់ ហើយពួកគាត់បាននាំគ្នាទៅតវ៉ាជាច្រើនលើកច្រើនសា និងបានឃាត់គ្រឿងចក្ររបស់ក្រុមហ៊ុនចិនទៀតផង។ ដោយសារមានការស្នើសុំពីពលរដ្ឋ និងមើលឃើញពីអត្ថប្រយោជន៍របស់ព្រៃសហគមន៍សាមគ្គីសង្កែពីរ កាលពីឆ្នាំ២០១៧ អភិបាលខេត្តព្រះវិហារ លោក អ៊ុន ចន្តា បានប្រកាសឱ្យក្រុមហ៊ុនផ្អាកសកម្មភាពឈូសឆាយ ហើយប្រគល់ដីសហគមន៍ឱ្យពលរដ្ឋ។ លោកអះអាងថា ត្បិតតែអាជ្ញាធរខេត្តបានប្រកាសប្រគល់ជូនពលរដ្ឋក៏ដោយ ប៉ុន្តែបទល្មើសកាប់បំផ្លាញព្រៃឈើក្នុងតំបន់ព្រៃសហគមន៍សាមគ្គីសង្កែ២ កើតមានកាន់តែច្រើន។ ជាក់ស្ដែងក្រុមហ៊ុន ឌី ឌុក ហៅក្រុមហ៊ុន សំអឿន សុវណ្ណ បានចូលកាប់ឈើក្នុងតំបន់ព្រៃសហគមន៍ និងប្រមូលទិញឈើពីជនល្មើសដែលបានចូលទៅកាប់ក្នុងតំបន់អភិរក្សមួយនេះជាដើម៖ «ខាងប្រគល់ឱ្យអភិបាលខេត្ត ឯកឧត្ដម អ៊ុន ចន្តា គាត់នឹងចុះជួបចរចា គាត់ថាសុំឱ្យក្រុមហ៊ុនផ្អាក ហើយកាត់ដីដែលសល់ចោលទាំងអស់ទុកជូនពលរដ្ឋ។ ព្រោះគាត់មើលឃើញថា ពលរដ្ឋនៅឃុំសង្កែពីរ គាត់មើលឃើញជាក់ស្ដែងពីការបាត់បង់ ហើយគាត់ត្រូវការអាស្រ័យផលអនុផលព្រៃឈើ»។
ព្រៃសហគមន៍សាមគ្គីសង្កែ២ ដំបូងឡើយមានទំហំផ្ទៃដីជាង ១ពាន់ ៥០០ហិកតារ (១.៥៤៩) ប៉ុន្តែបច្ចុប្បន្ននៅសល់ពីការឈូសឆាយ របស់ក្រុមហ៊ុនចិន ហេង រួយ ជាង៨ រយហិកតារ (៨៥១) ប៉ុណ្ណោះ។
លោក ផាវ យ៉ន បន្ថែមថា បច្ចុប្បន្នអាជ្ញាធរ មិនទាន់ចុះវាស់វែង ឬឆ្វៀលដីសហគមន៍ ជាមួយក្រុមហ៊ុន និងកាត់ចេញពីដីពលរដ្ឋឱ្យបានច្បាស់លាស់នៅឡើយនោះទេ។ លោកបន្តថា ប្រជាសហគមន៍មានភាពលំបាកក្នុងកិច្ចការពារដី និងព្រៃសហគមន៍របស់ខ្លួន ព្រោះព្រៃសហគមន៍មិនទាន់មានលិខិតទទួលស្គាល់ពីអាជ្ញាធរជាផ្លូវការឡើយ។
ស្រដៀងគ្នានេះ តំណាងសហគមន៍ឃុំតស៊ូ អ្នកស្រី ហួត ម៉ាលី លើកឡើងថា ពួកគាត់បារម្ភណាស់ចំពោះវាសនាព្រៃសហគមន៍ក្នុងតំបន់ពួកគាត់រស់នៅ ព្រោះរងការបំផ្លិចបំផ្លាញពីសំណាក់ក្រុមជនល្មើស ពិសេសក្រុមហ៊ុនធ្វើអាជីវកម្មឈើនៅតំបន់នោះ។ អ្នកស្រីលើកឡើងថា ពេលខ្លះពលរដ្ឋហាក់អស់សង្ឃឹម ដោយសារអាជ្ញាធរខេត្ត គ្មានវិធានការទប់ស្កាត់ក្រុមហ៊ុនធ្វើអាជីវកម្មឈើនោះឡើយ៖ «ប្រជាពលរដ្ឋរាល់ថ្ងៃគាត់មានកង្វល់។ ព្រៃឈើនោះក្រុមហ៊ុនធំៗមក កាប់បំផ្លាញ ហើយទប់ស្កាត់ក៏ទប់មិនកើត»។
អាស៊ីសេរីមិនអាចទាក់ទងតំណាងក្រុមហ៊ុន ឌី ឌុក ឬក្រុមហ៊ុន សំអឿន សុវណ្ណ និងអភិបាលខេត្តព្រះវិហារ លោក អ៊ុន ចន្តា ដើម្បីបំភ្លឺជុំវិញរឿងនេះបានទេ កាលពីថ្ងៃទី ២៨ មករា។
កាលពីខែកញ្ញា ២០១៧ អភិបាលរងខេត្តព្រះវិហារ លោក អ៊ុង វុទ្ធី បានចេញលិខិតមួយឆ្លើយតបទៅនឹងសំណើសុំដីជាង ១ ពាន់ហិកតារ (១៥៤៩) នៅឃុំសង្កែពីរ ទុកសម្រាប់សហគមន៍ ៣ភូមិ ប្រើប្រាស់ គឺអាជ្ញាធរខេត្តមិនទាន់សម្រេចបែបណាឡើយ ដោយសារដីតំបន់នោះជាប់ពាក់ព័ន្ធដីក្រុមហ៊ុន ចិន ឈ្មោះ ហេង រួយ។ លិខិតនោះ ស្នើសុំឱ្យតំណាងសហគមន៍ ជួបពិភាក្សាជាមួយក្រុមហ៊ុនចិន ដោយមានកិច្ចសហការជាមួយមន្ត្រីមន្ទីរកសិកម្ម និងខណ្ឌរដ្ឋបាលព្រៃឈើខេត្តព្រះវិហារ។
តំណាងសហគមន៍អះអាងថា ក្រុមហ៊ុន សំអឿន សុវណ្ណ មានសិទ្ធិធ្វើអាជីវកម្មកាប់ឈើនៅទូទាំងស្រុកឆែប និងអាចមាននៅតំបន់ផ្សេងទៀត។
កាលពីខែសីហា ឆ្នាំ២០១៧ សហគមន៍ភូមិប្រមេរ ស្រុកត្បែងមានជ័យ ជាច្រើនគ្រួសារ បានផ្ដិតមេដៃដាក់ញត្តិទៅរដ្ឋាភិបាលឲ្យដកអាជ្ញាធរប័ណ្ណក្រុមហ៊ុនសម្បទានសេដ្ឋកិច្ចចិន ឈ្មោះ ហេង ហ្វូ ដែលវិនិយោគដាំអំពៅនៅខេត្តព្រះវិហារ មានទំហំផ្ទៃដីជាង ៤ម៉ឺន ២ពាន់ហិកតារ (៤២.០០០)។ ក្រុមហ៊ុននេះ ជាក្រុមហ៊ុនមេ និងមានក្រុមហ៊ុនបុត្រសម្ព័ន្ធចំនួន ៥ ទៀត រួមមាន ក្រុមហ៊ុន ឡាន ហ្វេង រួយ ហ្វេង ក្រុមហ៊ុន ហេង ណុង ក្រុមហ៊ុន ហេង រួយ និងក្រុមហ៊ុន ហេង យូ។ វត្តមានក្រុមហ៊ុនទាំងនេះ បានធ្វើប៉ះពាល់ដល់ជីវភាពរបស់ប្រជាពលរដ្ឋជាច្រើនស្រុក ក្នុងខេត្តព្រះវិហារ ដូចជាស្រុកឆែប ស្រុកជ័យសែន ស្រុកត្បែងមានជ័យជាដើម។ សហគមន៍ចោទថា ក្រុមហ៊ុនទាំងនេះមិនត្រឹមតែធ្វើឱ្យប៉ះពាល់ដល់បរិស្ថានធម្មជាតិប៉ុណ្ណោះទេ គឺថែមទាំងធ្វើឱ្យបាត់បង់ដីស្រែចម្ការ កន្លែងគោរពបូជាសពបុព្វបុរស របស់ពលរដ្ឋជនជាតិដើមភាគតិច ព្រមទាំងបាត់បង់កន្លែងប្រកបរបរចិញ្ចឹមជីវិតរបស់ពួកគាត់ទៀតផង។ ជាងនេះទៀត តំបន់ក្រុមហ៊ុនចិនកំពុងគ្រប់គ្រងមួយចំនួន គឺជាទីតាំងបុរេប្រវត្តិសាស្ត្រដ៏សំខាន់មួយសម្រាប់សិក្សាស្រាវជ្រាវពីជីវិតមនុស្សសម័យបុរាណ តាមរយៈការធ្វើកំណាយ រុករកសម្ភារៈប្រើប្រាស់ និងបំណែកសាកសពមនុស្សសម័យបុរាណ។
អ្នកសម្របសម្រួលកម្មវិធីកសាងសមត្ថភាពសហគមន៍នៃអង្គការពន្លកខ្មែរ ខេត្តព្រះវិហារ លោក ប៉ឹក សុភ័ណ មានប្រសាសន៍ថា ការបណ្ដែតបណ្ដោយក្រុមហ៊ុន ឌី ឌុក ហៅក្រុមហ៊ុន សំអឿន សុវណ្ណ ចូលកាប់ឈើនៅតំបន់ព្រៃសហគមន៍ ហាក់ផ្ទុយគ្នាទៅនឹងយន្តការរបស់អាជ្ញាធរខេត្ត និងមន្ត្រីជំនាញដែលបានខិតខំដោះស្រាយជាមួយពលរដ្ឋ។ លោកមើលឃើញថា យុទ្ធសាស្ត្របែបនេះ គឺជាយុទ្ធសាស្ត្រដើម្បីយកដីសហគមន៍ និងដីស្រែរបស់អ្នកស្រុកឱ្យទៅក្រុមហ៊ុនចិនប៉ុណ្ណោះ៖ «វាមិនត្រឹមតែអស់ព្រៃសហគមន៍ដែលគាតបានស្នើប៉ុណ្ណោះទេ ប៉ុន្តែដីស្រែដីចម្ការ ដីកន្លែងឃ្វាលគោ អីវានឹងអស់។ ត្បិតអី គោលដៅរបស់គេ គឺគោលដីគេយកដី ប៉ុន្តែក្នុងជំហានដំបូងនេះគេត្រូវយកឈើ»។
មន្ត្រីសង្គមស៊ីវិលដដែល មើលឃើញថាប្រជាពលរដ្ឋនៅតំបន់នោះ នឹងរងផលប៉ះពាល់ធ្ងន់ធ្ងរ ព្រោះត្រូវបាត់បង់ព្រៃ និងដីសម្រាប់អាស្រ័យផល។ លោកបន្ថែមថា សកម្មភាពរបស់ក្រុមហ៊ុនចិន គឺផ្ទុយពីគោលនយោបាយស្បែកខ្លារបស់រាជរដ្ឋាភិបាល ដោយតម្រូវឱ្យកាត់ឆ្វៀលដីចេញពីតំបន់ទាំងឡាយណា ដែលប៉ះពាល់ដីរបស់ពលរដ្ឋ។ លើសពីនេះទៀត ប្រសិនបើមានដីបម្រុងទុក សម្រាប់ប្រជាសហគមន៍ អាជ្ញាធរ និងក្រុមហ៊ុនត្រូវរក្សាទុកដីនោះជូនពលរដ្ឋ៕
No comments:
Post a Comment