ដោយ ញឹម សុផល 15/01/2018 15/01/2018
rfi
ក្រុមសមាជិកសភាគណបក្សហ្វុនស៊ីនប៉ិច ដឹកនាំដោយសម្តេចក្រុមព្រះ
សហការី
បន្ទាប់ពីចប់កិច្ចប្រជុំរដ្ឋសភានៅព្រឹកថ្ងៃទី១៥មករានេះ សម្តេចក្រុមព្រះនរោត្តមរណឫទ្ធិ ប្រធានគណបក្សហ្វុនស៊ីនប៉ិច បានរារែកក្នុងការឆ្លើយសំណួរត្រង់ៗទៅកាន់អ្នកកាសែតពីរឿងតែងតាំងអ្នកជំនួញចិនម្នាក់ជាអនុប្រធានគណបក្ស។ ប្រធានគណបក្សរាជានិយមអង្គនេះ មានបន្ទូលថាការតែងតាំងលោក ចាក់គី សែ ដែលជាអ្នកជំនួញជនជាតិចិននោះ នឹងមិនអាចធ្វើទៅបានទេ។
នៅក្នុងការផ្តល់បទសម្ភាសជាមួយអ្នកកាសែតនៅរដ្ឋសភាជាតិ ប្រធានគណបក្សហ្វុនស៊ីប៉ិច ដែលទទួលបានកៅអីរដ្ឋសភាបន្ទាប់ពីការរំលាយគណបក្សសង្គ្រោះជាតិតាមផ្លូវច្បាប់ កាលពីចុងឆ្នាំមុន មានបន្ទូលថា ការតែងតាំងជនជាតិចិន ជាទីប្រឹក្សាឬជាអនុប្រធានគណបក្ស ហ្វុនស៊ីនប៉ិច គឺអាស្រ័យទៅលើលោកនាយករដ្ឋមន្ត្រីហ៊ុន សែន ជាអ្នកសម្រេច។ សម្តេចក្រុមព្រះបញ្ជាក់ថា ព្រះអង្គបានត្រឹមបញ្ជូនឈ្មោះទៅទេ ក៏ប៉ុន្តែឮថាមិនបានទេ។
ជុំវិញការតែងតាំងជនជាតិចិនជាទីប្រឹក្សាឬជាអនុប្រធានគណបក្សរាជានិយមហ្វុនស៊ីនប៉ិច ត្រូវបានប្រព័ន្ធផ្សព្វផ្សាយមួយចំនួនចុះផ្សាយ និងមានការទិតៀនតាមបណ្តាញសង្គមហ្វេសប៊ុកផងដែរ ពីការដែលគណបក្សមួយនេះ មានបំណងយកជនបរទេសមក ជាសមាជិកនយោបាយរបស់គណបក្ស។
ជាមួយគ្នានេះ លោកញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច ថ្លែងថា គណបក្សហ្វ៊ុនស៊ិនប៉ិចមិនបានតែងតាំង សេដ្ឋីចិន ឈ្មោះចាក់គី សែ នោះ អោយធ្វើជាអនុប្រធាន គណបក្សទេ ប៉ុន្តែគ្រាន់តែជាជនជាតិចិនធម្មតានិងជាទីប្រឹក្សា សេដ្ឋកិច្ចរបស់សម្តេចក្រុមព្រះ នរោត្តម រណឫទ្ធិ តែប៉ុណ្ណោះ។
សូមរំលឹកថា កាសែតរស្មីកម្ពុជាកាលពីថ្ងៃសៅរ៍កន្លងទៅ បានចុះផ្សាយ ពីការលើកឡើងរបស់មន្ត្រីជាន់ខ្ពស់គណបក្សហ្វ៊ុនស៊ិនប៉ិច ដែលថា សម្តេចក្រុមព្រះ នរោត្តម រណឫទ្ធិ ប្រធានគណបក្ស ហ្វ៊ុនស៊ិនប៉ិច បានតែងតាំងសេដ្ឋីជនជាតិចិន ឲ្យធ្វើជាអនុប្រធានគណបក្ស ហ្វ៊ុនស៊ិនប៉ិច។ ការតែងតាំងនេះ បានធ្វើឲ្យមន្ត្រីជាន់ខ្ពស់មួយចំនួននៅក្នុងជួរបក្សមានការមិន ពេញចិត្តផងដែរ។ នេះបើតាមរស្មីកម្ពុជាអនឡាញ៕
1 comment:
ហា ហា ថា កឹម សុខា មានទាកទងជាមួយអាមេរិក ដល់អានេះ វាយកចិនមកធ្វើថំទេម្តង ដល់កតែម្តង។
Post a Comment