ដោយ អាស៊ីសេរី
2018-02-05
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន (រូបកណ្ដាល) ថ្លែងទៅកាន់អ្នកសារព័ត៌មាន នៅពេលលោក ត្រូវនាំខ្លួនមកកាន់សាលាឧទ្ធរណ៍ នៅព្រឹកថ្ងៃទី១២ ខែកក្កដា ឆ្នាំ២០១៦។
RFA/Rann Samnang
តុលាការកំពូលកំណត់យកថ្ងៃសុក្រទី៩ កុម្ភៈ ខាងមុខនេះដើម្បីបើកសវនាការជំនុំជម្រះក្ដីលើសំណុំរឿងលោក អ៊ុំ សំអាន តំណាងរាស្ត្រគណបក្សសង្គ្រោះជាតិ។ លោក ជូង ជូងី មេធាវីការពារក្ដីលោក អ៊ុំ សំអាន ឲ្យអាស៊ីសេរីដឹងថា លោកនឹងប្រឹងប្រែងឲ្យអស់លទ្ធភាពដើម្បីការពារឲ្យកូនក្តីរបស់លោករួចផុតការចោទប្រកាន់ពីតុលាការ។ ប៉ុន្តែ ការសម្រេចយ៉ាងណា នោះ លោកថា គឺអាស្រ័យ លើឆន្ទានុសិទ្ធិរបស់តុលាការ៖ «ក្នុងតួនាទីវិជ្ជាជីវៈរបស់ខ្ញុំ ខ្ញុំខំឲ្យអស់ពីបច្ចេកទេសក្នុងការពារសិទ្ធិរបស់គាត់ (លោក អ៊ុំ សំអាន»។
លោកមេធាវី ជូង ជូងី ឲ្យដឹងទៀតថា លោកគ្មានឯកសារបន្ថែមអ្វីទៀតទេ សម្រាប់ការតតាំងក្ដីនៅតុលាការកំពូលនាពេលខាងមុខនេះ។ លោក អ៊ុំ សំអាន ជាអ្នកទោសនយោបាយម្នាក់ក្នុងចំណោមអ្នកទោសជាច្រើននាក់ដែលជាមន្ត្រីគណបក្សសង្គ្រោះជាតិ ត្រូវរដ្ឋាភិបាលលោក ហ៊ុន សែន ចាប់ខ្លួននិងចោទប្រកាន់។
លោករងបទចោទចំនួនពីរ គឺបទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍ទាក់ទងនឹងផ្សព្វផ្សាយឯកសារផែនទីព្រំដែនកម្ពុជា-វៀតណាមក្លែងក្លាយតាមមាត្រា៤៩៥ និងមាត្រា៤៩៦នៃក្រមព្រហ្មទណ្ឌ ដែលត្រូវជាប់ពន្ធនាគាររយៈពេល២ឆ្នាំ ៦ខែ និងពិន័យជាប្រាក់ចំនួន ៤លានរៀល។ អ្នកតំណាងរាស្ត្របក្សប្រឆាំងរូបនេះត្រូវបានអាជ្ញាធរចាប់ខ្លួននៅខែមេសា ឆ្នាំ២០១៦ ទាំងនៅមានអភ័យឯកសិទ្ធិសភា ហើយបន្ទាប់ ចាញ់ក្តីទាំងនៅសាលាដំបូងក្រុងភ្នំពេញ និងសាលាឧទ្ធរណ៍៕
No comments:
Post a Comment