ដោយ វ៉ែន សុមេធ
2018-02-09
នាយករដ្ឋមន្ត្រីស្តីទី និងជារដ្ឋមន្ត្រីក្រសួងមហាផ្ទៃ លោក ស ខេង ថ្លែងក្នុងពិធីប្រកាសផ្ទេរភារកិច្ច និងតែងតាំងមុខតំណែងអភិបាលថ្មីខេត្តកំពត នាសាលាខេត្តកំពត នៅព្រឹកថ្ងៃទី២២ ខែមីនា ឆ្នាំ២០១៦។
RFA
មន្ត្រីជាន់ខ្ពស់របស់គណបក្សសង្គ្រោះជាតិ សម្ដែងមន្ទិលសង្ស័យថា ការដែលរដ្ឋមន្ត្រីក្រសួងមហាផ្ទៃ លោក ស ខេង បញ្ជាឲ្យគណៈអភិបាលរាជធានីខេត្តទាំងអស់អនុវត្តការងាររបស់ខ្លួនឲ្យស្របតាមច្បាប់ដើម្បីជួយសម្រួលដល់គណបក្សនយោបាយក្នុងការធ្វើសកម្មភាពនយោបាយនោះ គ្រាន់តែជាលេសបន្លំភ្នែកមជ្ឈដ្ឋានជាតិ និងអន្តរជាតិតែប៉ុណ្ណោះ ព្រោះថា គណបក្សកាន់អំណាចបានរំលាយគណបក្សប្រឆាំងមានអ្នកគាំទ្រជាងពាក់កណ្ដាលប្រទេសដែលជាគូប្រកួតនោះរួចទៅហើយ គឺនៅសល់តែគណបក្សរណបបក្សកាន់អំណាចតែប៉ុណ្ណោះ។
សកម្មជននយោបាយគណបក្សប្រឆាំង មិនទាន់ជឿជាក់ថា រដ្ឋាភិបាលមានបំណងជួយគណបក្សនយោបាយដែលជាដៃគូប្រកួតប្រជែងនឹងគណបក្សកាន់អំណាចនោះទេ។ ប្រតិកម្មបែបនេះរបស់គណបក្សនយោបាយ ដោយសារតែលោក ស ខេង បញ្ជាឲ្យគណៈអភិបាលរាជធានីខេត្តទាំងអស់អនុវត្តការងាររបស់ខ្លួនឲ្យស្របតាមច្បាប់ដើម្បីជួយសម្រួលដល់គណបក្សនយោបាយក្នុងការធ្វើសកម្មភាពនយោបាយរបស់ខ្លួនសម្រាប់ការបោះឆ្នោតព្រឹទ្ធសភា និងបោះឆ្នោតសកលខែកក្កដា ឆ្នាំ២០១៨ នេះ។
មន្ត្រីគណបក្សប្រឆាំងចាត់ទុកបទបញ្ជារបស់លោក ស ខេង ឲ្យគណៈអភិបាលរាជធានី ខេត្តទាំងអស់ត្រូវជួយសម្រួលដល់គណបក្សនយោបាយ គ្រាន់តែជាលេសបន្លំភ្នែកមជ្ឈដ្ឋានជាតិ និងអន្តរជាតិ ព្រោះគណបក្សកាន់អំណាចបានសម្លាប់គណបក្សសង្គ្រោះជាតិ មុនការបោះឆ្នោតបាត់ទៅហើយ។
ប្រធានចលនាយុវជនគណបក្សសង្គ្រោះជាតិ លោក ហ៊ីង សុខសាន្ត បច្ចុប្បន្នកំពុងរត់គេចខ្លួនពីការធ្វើទុក្ខបុកម្នេញរបស់រដ្ឋាភិបាលឲ្យដឹងថា ឆាកល្ខោនដែលរៀបចំដោយគណបក្សកាន់អំណាចនៅពេលនេះ មិនអាចបោកបញ្ឆោតមជ្ឈដ្ឋានជាតិ និងអន្តរជាតិបានឡើយ៖ «ខ្ញុំសរុបមកវិញថាការបង្កើតបទបញ្ជានេះគ្រាន់តែជាលេសមួយទេដើម្បីឲ្យគេមើលពីក្រៅទៅថាល្អ មានលំហសេរីភាព»។
មន្ត្រីជាន់ខ្ពស់គណបក្សប្រឆាំងដែលត្រូវរដ្ឋាភិបាលលោក ហ៊ុន សែន ហាមមិនឲ្យធ្វើនយោបាយរយៈពេលប្រាំឆ្នាំរូបនេះឲ្យដឹងទៀតថា កាលពីគណបក្សសង្គ្រោះជាតិ នៅអាចធ្វើសកម្មភាពនយោបាយបាន អាជ្ញាធរតែងតែធ្វើការរារាំង និងបង្ក្រាបរាល់សកម្មភាពរបស់គណបក្សរួមមាន ការជួបជុំនៅទីសាធារណៈ លើកស្លាក និងការចុះជួបពលរដ្ឋមិនមានភាពងាយស្រួលឡើយ។
ចំណែកអនុប្រធានគណបក្សប្រជាធិបតេយ្យមូលដ្ឋាន លោក សាម ស៊ុនឌឿន ប្រាប់អាស៊ីសេរីថា បើការអនុវត្តរបស់អាជ្ញាធរដូចទៅនឹងលិខិតរបស់លោក ស ខេង គឺជារឿងល្អ។ ប៉ុន្តែលោកថា កន្លងមកគណបក្សរបស់លោកមិនបានធ្វើសកម្មភាពដោយងាយស្រួលឡើយ។ លោក សាម ស៊ុនឌឿន ថា លោកនឹងតាមមើលការអនុវត្តរបស់គណៈអភិបាលរាជធានីខេត្តទាំងអស់ចំពោះបទបញ្ជារបស់លោក ស ខេង នេះ៖ «ខ្ញុំចាំមើលសិន មើលចាំមើលការអនុវត្ត អនុវត្តថាដូចធ្វើទេ បើធ្វើមិនដូចថា គឺអស់ហើយ បាត់ហើយ គ្មានប្រជាធិបតេយ្យអីទៀតទេ»។
អ្នកវិភាគនយោបាយលើកឡើងថា គណបក្សសង្គ្រោះជាតិ ដែលជាគណបក្សគូប្រកួតជាមួយគណបក្សកាន់អំណាចត្រូវបានរដ្ឋាភិបាលរំលាយចោលកាលពីខែវិច្ឆិកា ឆ្នាំ២០១៧ ដោយសារតែលោកនាយករដ្ឋមន្ត្រី ហ៊ុន សែន ព្រួយបារម្ភពីប្រជាប្រិយភាពរបស់គណបក្សប្រឆាំង៕
No comments:
Post a Comment