ដោយ ហេង សកល
2018-02-01
ប្រធានគណបក្សសិទ្ធិមនុស្ស លោក សឺន ស៊ូប៊ែរ្តិ៍ ថ្លែងក្នុងខួបកិច្ចព្រមព្រៀងសន្តិភាពទីក្រុងប៉ារីស លើកទី២៤ នាទីស្នាក់ការគណបក្សសង្គ្រោះជាតិ ក្នុងក្រុងច្បារមន ខេត្តកំពង់ស្ពឺ កាលពីថ្ងៃទី២៣ ខែតុលា ឆ្នាំ២០១៥។
RFA
ប្រធានគណបក្សសិទ្ធិមនុស្សលើកឡើងថា លោកមិនខ្វល់ឡើយចំពោះលិខិតជូនដំណឹងរបស់ក្រសួងមហាផ្ទៃ ដែលមិនព្រមរំលាយគណបក្សសិទ្ធិមនុស្សតាមការស្នើរបស់លោក។
លោក សឺន ស៊ូប៊ែរ្តិ៍ បានឱ្យអាស៊ីសេរីដឹងកាលពីថ្ងៃទី១ ខែកុម្ភៈ ថា បើទោះបីជាក្រសួងមហាផ្ទៃ បានបដិសេធពាក្យសុំរំលាយគណបក្សសិទ្ធិមនុស្សក៏ដោយ ក៏លោកចាត់ទុកថា គណបក្សនេះបានរំលាយហើយដែរ។ លោកថា មូលហេតុដោយសារតែគណៈកម្មាធិការបក្សសិទ្ធិមនុស្សបានឯកភាពគ្នារំលាយតាំងពីយូរណាស់មកហើយ ក៏ប៉ុន្តែដោយសារមានការជាប់គាំងមួយរយៈពេល ព្រោះមានសមាជិកក្រុមប្រឹក្សាឃុំមួយចំនួនកូតាពីគណបក្សសិទ្ធិមនុស្ស នៅពុំទាន់ផុតអាណត្តិជាសមាជិកក្រុមប្រឹក្សាឃុំ-សង្កាត់នៅឡើយនៅពេលនោះ។
លោក ស ខេង រដ្ឋមន្ត្រីក្រសួងមហាផ្ទៃ កាលថ្ងៃទី១ ខែកុម្ភៈ បានបដិសេធពាក្យសុំរំលាយគណបក្សសិទ្ធិមនុស្ស ដោយលើកមូលហេតុថា គណបក្សសិទ្ធិមនុស្សមិនបានធ្វើសមាជមុននឹងសុំរំលាយ។ លិខិតរបស់លោក ស ខេង បានជូនដំណឹងទៅលោក សឺន ស៊ូប៊ែរ្តិ៍ ឱ្យអនុវត្តនីតិវិធីពាក់ព័ន្ធនឹងការរំលាយគណបក្សសិទ្ធិមនុស្សឱ្យបានត្រឹមត្រូវស្របតាមប្រការ ៥០ថ្មី នៃលក្ខន្តិកៈគណបក្សសិទ្ធិមនុស្ស ដែលបានចែងថា គណបក្សសិទ្ធិមនុស្សត្រូវដាក់ជូនសមាជដើម្បីសុំការអនុម័តតាមសំឡេងគាំទ្រភាគច្រើន២ភាគ៣។ នេះមានន័យថា ទាល់តែមានសមាជឯកភាពគ្នាជាមុនទើបគណបក្សសិទ្ធិមនុស្សអាចដាក់សុំរំលាយបាន។
លោក សឺន ស៊ូប៊ែរ្តិ៍ ប្រតិកម្មថា គណបក្សសិទ្ធិមនុស្សធ្វើបានសមាជ និងបានឯកភាពគ្នារំសាយគណបក្សនេះតាំងពី ៥ឆ្នាំមុនមកម្ល៉េះ៖ «បើខាងក្រសួងថាមិនទាន់គ្រប់គ្រាន់មានតែបង្កើតគណបក្សសង្គ្រោះជាតិឡើងវិញ ដើម្បីយើងស្រង់យកសមាជិកបក្សសិទ្ធិមនុស្សហ្នឹង មកធ្វើសមាជឡើងវិញ»។
ស្ថាបនិកបង្កើតគណបក្សសិទ្ធិមនុស្ស និងជាប្រធានគណបក្សសង្គ្រោះជាតិ លោក កឹម សុខា ត្រូវបានរដ្ឋាភិបាលចាប់ខ្លួនកាលពីថ្ងៃទី៣ កញ្ញា ឆ្នាំ២០១៧ ដោយចោទថា ក្បត់ជាតិ ដែលការចោទនេះត្រូវបានសហគមន៍ជាតិ និងអន្តរជាតិមើលឃើញថា ជារឿងនយោបាយ៕
No comments:
Post a Comment