ដោយ មួង ណារ៉េត
2018-03-21
rfa
អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គោទែរ៉េស (Antonio Guterres) ថ្លែងក្នុងកិច្ចប្រជុំ កាលពីខែតុលា ឆ្នាំ២០១៦។
Photo courtesy of UN.ORG
ក្រុមប្រឹក្សាសិទ្ធិមនុស្សអង្គការសហប្រជាជាតិ នឹងលើកយកបញ្ហារំលោភសិទ្ធិមនុស្ស និង ប្រជាធិបតេយ្យនៅកម្ពុជា មកពិភាក្សា នៅថ្ងៃពុធ ទី២១ ខែមីនា នេះ នៅទីក្រុងហ្សឺណែវ ប្រទេសស្វីស។
បញ្ហាទាំងនោះ រួមមានការធ្វើទុក្ខបុកម្នេញលើគណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ ជាពិសេសការចាប់ខ្លួនប្រធានគណបក្សសង្គ្រោះជាតិលោក កឹម សុខា និង ការរម្លាយគណបក្សសង្គ្រោះជាតិ។
កិច្ចប្រជុំលើកទី៣៧ នេះ ធ្វើឡើងមួយសប្ដាហ៍ ក្រោយអ្នករាយការណ៍ពិសេសនៃអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) ដែលទើបតែបិទបញ្ចប់ទស្សនកិច្ចរបស់អ្នកស្រី និងរកឃើញបញ្ហារំលោភសិទ្ធិមនុស្ស និងប្រជាធិបតេយ្យកាន់តែរីករាលដាលខ្លាំងនៅកម្ពុជា។ អ្នកស្រី រ៉ូណា ស្មីត ត្រូវបានតែងតាំង ឲ្យធ្វើជាអ្នករាយការណ៍ឯករាជ្យ ដោយក្រុមប្រឹក្សាសិទ្ធិមនុស្សនេះឯង។
កិច្ចប្រជុំនេះ ធ្វើឡើងនៅក្រោយក្រុមប្រឹក្សាសហភាពអឺរ៉ុប ដែលកាលពីខែកុម្ភៈកន្លងទៅនេះ បានព្រមានដាក់ទណ្ឌកម្មលើរបបលោក ហ៊ុន សែន ប្រសិនបើស្ថានភាពរំលោភសិទ្ធិមនុស្ស និង ប្រជាធិបតេយ្យ នៅតែអាក្រក់ដូចពេលបច្ចុប្បន្ន។
ក្រុមប្រឹក្សាសិទ្ធិមនុស្សអង្គការសហប្រជាជាតិ ជាស្ថាប័នអន្តររដ្ឋាភិបាល នៅក្នុងប្រព័ន្ធអង្គការសហប្រជាជាតិ ដែលមានរដ្ឋជាសមាជិកចំនួន ៤៧។ ក្រុមប្រឹក្សានេះ បង្កើតឡើង ដើម្បីពង្រឹង លើកស្ទួយ និងការពារសិទ្ធិមនុស្សនៅលើពិភពលោក និងរកដំណោះស្រាយបញ្ហាសិទ្ធិមនុស្ស ដោយលើកជាអនុសាសន៍ ឲ្យរដ្ឋាភិបាល ដែលរំលោភសិទ្ធិមនុស្សទាំងនោះ យកទៅអនុវត្ត៕
No comments:
Post a Comment