ដោយ តាំង សារ៉ាដា
2018-03-26
លោកនាយករដ្ឋមន្ត្រី ហ៊ុន សែន
Photo courtesy of SPM Page
លោក ហ៊ុន សែន នៅថ្ងៃច័ន្ទ ទី២៦ មីនា បានប្រកាសម្ដងទៀតថា ដំណើរការប្រជាធិបតេយ្យនៅកម្ពុជា នឹងនៅតែបន្តដើរទៅមុខ ហើយការបោះឆ្នោតនៅក្នុងប្រទេស ក៏នៅតែបន្តធ្វើតាមកាលកំណត់ ដោយគ្មានការប្រែប្រួលឡើយ។
ការប្រកាសរបស់លោក ហ៊ុន សែន ធ្វើឡើងនៅក្នុងពិធីបើកការដ្ឋានសាងសង់កំណាត់ផ្លូវប្រវែងជិត ៨៥គីឡូម៉ែត្រ នៃគម្រោងធ្វើឲ្យប្រសើរឡើងវិញផ្លូវជាតិលេខ៥ ពីខេត្តបាត់ដំបង ទៅក្រុងសិរីសោភ័ណ ខេត្តបន្ទាយមានជ័យ។
អតីតកម្មាភិបាលខ្មែរក្រហមរូបនេះ អះអាងថា កម្ពុជាបានអនុវត្តនូវដំណើរការប្រជាធិបតេយ្យតាមរយៈការបោះឆ្នោតជាសកលរួចរាល់ហើយ កាលពីខែកុម្ភៈ កន្លងទៅនេះ ដើម្បីជ្រើសតាំងសមាជិកព្រឹទ្ធសភា ហើយនៅថ្ងៃទី២៩ ខែកក្កដា ខាងមុខនេះកម្ពុជា នឹងរៀបចំការបោះឆ្នោតជ្រើសតាំងសមាជិករដ្ឋសភាអាណត្តិទី៦ ដូចគ្នាដែរ។
ការប្រកាសរបស់លោក ហ៊ុន សែន នៅពេលនេះធ្វើឡើងក្រោយពីមានការស្នើសុំរបស់ប្រទេសជប៉ុនឲ្យមានការចរចាជាដោយសន្តិវិធីជាមួយគណបក្សសង្គ្រោះជាតិ ដើម្បីបង្កើតបរិយាកាសបោះឆ្នោតដោយសេរី ត្រឹមត្រូវ និងយុត្តិធម៌ដែលមានការចូលរួមពីគ្រប់ភាគីពាក់ព័ន្ធ។
លោក ហ៊ុន សែន អះអាងថា លោកនឹងមិនចរចាជាដាច់ខាតជាមួយក្រុមមេដឹកនាំបក្សប្រឆាំង ដែលកំពុងមានជាប់បណ្ដឹងតាមផ្លូវតុលាការរាប់មិនអស់ និងមេដឹកនាំបក្សប្រឆាំងដែលកំពុងជាប់ឃុំឃាំងនោះ។
ទោះជាយ៉ាងណាក៏ដោយសេតវិមានប្រធានាធិបតី សហរដ្ឋអាមេរិក និងសហគមន៍អឺរ៉ុប បានព្រមានរួចជាស្រេចទៅហើយថា ពួកគេនឹងមិនទទួលស្គាល់ភាពស្របច្បាប់នៃការបោះឆ្នោតជាតិក្នុងប្រទេសកម្ពុជានាពេលខាងមុខទេ ដ៏រាបណារដ្ឋាភិបាលមិនអនុញ្ញាតឲ្យបក្សសង្គ្រោះជាតិចូលរួមការបោះឆ្នោត ដោះលែងអ្នកទោសនយោបាយ បញ្ឈប់ការធ្វើទុក្ខបុកម្នេញ ក្រុមអង្គការសង្គមស៊ីវិល និងបណ្ដាញសាព័ត៌មានឯករាជ្យនោះ៕
1 comment:
Look at Ah Chor Prey Hun Sen's face !!
That's why the leader of other country did not want to sit close to him.
Post a Comment