ដោយ មួង ណារ៉េត
2018-05-26
rfa
រូបលោកនាយករដ្ឋមន្ត្រី ហ៊ុន សែន នៅក្នុងរបាយការណ៍របស់អង្គការឃ្លាំមើលសិទ្ធិមនុស្ស យូមែន រ៉ៃត៍ វ៉ច្ឆ (Human Rights Watch)។
RFA Screenshot
លោកនាយករដ្ឋមន្ត្រី ហ៊ុន សែន ជាមេដឹកនាំផ្ដាច់ការ ដែលបានដឹកនាំ កម្ពុជាជាង៣០ឆ្នាំមកនេះ បានថ្លែងថា ការដឹកនាំរបស់លោក មិនធ្លាប់ធ្វើឲ្យនរណាម្នាក់រងគ្រោះ ឬឈឺចាប់នោះទេ។ តើការលើកឡើងរបស់លោកហ៊ុន សែន នេះ ជាការពិតត្រឹមត្រូវដែរទេ?
អ្នកឃ្លាំមើលសង្គម មន្ត្រីសិទ្ធិមនុស្ស និងប្រជាពលរដ្ឋ មើលឃើញថា ការក្ដោបក្ដាប់អំណាចអស់ជាងបីទសវត្សរ៍កន្លងទៅនេះ បើទោះបីជាលោក ហ៊ុន សែន មិនបានធ្វើឲ្យពលរដ្ឋរងគ្រោះ និងឈឺចាប់ដោយផ្ទាល់ដៃក្តី ក៏ប៉ុន្តែក្រោមការដឹកនាំរបស់លោក មានឃាតកម្ម អំពើនិទ្ទណ្ឌភាព ការជិះជាន់រំលោភបំពាន សិទ្ធិមនុស្ស រំលោភយកដីធ្លី និងផ្ទះសម្បែងពលរដ្ឋស្ទើរពេញផ្ទៃប្រទេស។ ពួកគេយល់ថា អំពើទាំងអស់នេះ សុទ្ធតែជាការទទួលខុសត្រូវ របស់លោក ហ៊ុន សែន ដែលជាមេដឹកនាំ ប៉ុន្តែលោក ហ៊ុន សែន រួចខ្លួនរហូត។
តំណាងពលរដ្ឋរស់នៅភ្នំបាត អ្នកស្រី គឹម សារ៉ាន រៀបរាប់ថា ការលើកឡើងរបស់លោក ហ៊ុន សែន ថាលោកមិនធ្លាប់ធ្វើឲ្យនរណាម្នាក់រងគ្រោះ ឬឈឺចាប់នោះ គឺអ្នកស្រី មិនអាចទទួលយកបានឡើយ ព្រោះថាលោក ហ៊ុន សែន និយាយកុហក ដើម្បីបោកយកសន្លឹកឆ្នោតពីប្រជាពលរដ្ឋតែប៉ុណ្ណោះ។
អ្នកស្រីបន្ថែមថា អតីតអ្នកបុរីកីឡាចំនួន ១៤០គ្រួសារ ដែលអាជ្ញាធរបានយកទៅចាក់ចោល នៅតំបន់ភ្នំបាត ត្រង់ចំណុចភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្ដាល ដោយសារផ្ទះរបស់ពួកគាត់ត្រូវក្រុមហ៊ុន ផាន អ៊ីម៉ិច (Phan Imex) ឈូសបំផ្លាញចោល កាលពីឆ្នាំ២០១២នោះ គឺដោយសារតែរបបលោកហ៊ុន សែន បើកដៃដោយមិនបានជួយរកដំណោះស្រាយត្រឹមត្រូវ ជូនពួកគាត់។ ក្រោយការបណ្ដេញចេញទាំងហិង្សា រហូតមកដល់សព្វថ្ងៃនេះ ពួកគាត់គ្មានផ្ទះសម្បែងត្រឹមត្រូវ បាត់បង់ការងារធ្វើ បែកបាក់គ្រួសារ រស់ទាំងត្រដាបត្រដួស រកព្រឹកខ្វះល្ងាច រកល្ងាចខ្វះព្រឹក រស់ពឹងជំនួយពីសប្បុរសជននៅក្រៅប្រទេស និងរហូតមានប្រជាពលរដ្ឋចំនួន ១៣នាក់ បានស្លាប់ដោយសារដាច់បាយ និងផឹកទឹកមិនស្អាតជាដើម។ ពួកគាត់អះអាងថា ពួកគាត់រងគ្រោះ យ៉ាងវេទនាបែបនេះ ក៏ដោយសារការដឹកនាំខ្វះគុណធម៌ និងខ្វះការទទួលខុសត្រូវពីលោក ហ៊ុន សែន នេះឯង៖ «បើគាត់មិនបញ្ជាក្រុមហ៊ុន ធ្វើម៉េចគេហ៊ានមកវាយដំពួកខ្ញុំ... វេទនាណាស់ក្រោមរបប ហ៊ុន សែន... អភិវឌ្ឍត្រង់ណា រាស្ត្រទឹកភ្នែកកន្លែងហ្នឹង»។
នាយករដ្ឋមន្ត្រី ហ៊ុន សែន កាលពីថ្ងៃទី២១ ខែឧសភា លោកបានថ្លែងក្នុងពិធីបើកការដ្ឋានកសាងកំណាត់ផ្លូវជាតិលេខ៥ ដោយអួតអាងថា លោកមិនធ្លាប់ធ្វើឲ្យពលរដ្ឋណាម្នាក់ ទទួលគ្រោះថ្នាក់នោះឡើយ អំឡុងពេលលោកកាន់អំណាច អស់រយៈពេល ៣៣ឆ្នាំមកនេះ៖ «តៃកុងឡានមួយ បានបើកបររថយន្តមួយនេះ រយៈពេលជិត ៤០ឆ្នាំ មិនទាន់ធ្វើឲ្យមនុស្សគ្រោះថ្នាក់ទេ»។
ការលើកឡើងនេះ គឺវាផ្ទុយស្រឡះទៅនឹងព្រឹត្តិការណ៍ គ្រោះថ្នាក់ដែលកើតឡើងជាបន្តបន្ទាប់ ក្រោមការដឹកនាំរបស់លោក។ ជាឧទាហរណ៍ជាក់ស្ដែង កាលពីដើមខែឧសភានេះ យ៉ាងហោចណាស់ មានប្រជាពលរដ្ឋ ១៨ នាក់នៅខេត្តក្រចេះ បានស្លាប់ដោយសារតែពុលទឹកព្រែក និងប្រហែល ៣០០ នាក់ទៀតរងគ្រោះ ដោយសារតែការធ្វេសប្រហែសរបស់អាជ្ញាធរ ក្នុងការអនុញ្ញាតឲ្យក្រុមហ៊ុនរ៉ែមាស បង្ហូរកាកសំណល់គីមីពុល ចូលក្នុងទឹកដែលពលរដ្ឋប្រើប្រាស់ប្រចាំថ្ងៃ។ រហូតមកដល់ពេលនេះ គ្មានមន្ត្រីអាជ្ញាធរណាមួយរូប ទទួលខុសត្រូវចំពោះសោកនាដកម្មនេះ នៅឡើយទេ។ មិនតែប៉ុណ្ណោះ លោក ហ៊ុន សែន បែរជាព្រមានដកតំណែងរដ្ឋមន្ត្រី ដែលហ៊ាននិយាយប្រាប់សារព័ត៌មាន អំពីសារធាតុគីមីពុលនោះ ថាខ្វះការទទួលខុសត្រូវ ក្នុងការនិយាយស្ដីទៅវិញ។
នៅមានគ្រោះថ្នាក់ដ៏ធំមួយទៀត ដែលលោក ហ៊ុន សែន កំពុងច្រានប្រទេសកម្ពុជាឲ្យធ្លាក់ក្នុងជ្រោះនៃវិបត្តិធំ ដោយសារតែការដាក់ទណ្ឌកម្មពីសហគមន៍អន្តរជាតិ។ គ្រោះថ្នាក់សម្រាប់ប្រទេសជាតិនេះ គឺការបំផ្លាញដំណើរប្រជាធិបតេយ្យ ដោយការរម្លាយគណបក្សសង្គ្រោះជាតិ ដែលមានអ្នកគាំទ្ររហូតជាង ៣លាននាក់ ដែលតំណាងឲ្យ ៤៤% នៃអង្គបោះឆ្នោត។ គ្រោះថ្នាក់ដ៏នៅចំពោះមុខនេះ គឺការបាត់បង់សិទ្ធិសេរីភាព ដែលធានាដោយរដ្ឋធម្មនុញ្ញ ក្នុងការជ្រើសរើសមេដឹកនាំ និង គណបក្សនយោបាយ ដែលខ្លួនពេញចិត្ត ព្រោះគណបក្សប្រឆាំង ត្រូវបានផាត់ចេញពីឆាកនយោបាយ ដោយសារតែអំណាចផ្ដាច់ការ។
អ្នកវិភាគបានសម្ដែងការព្រួយបារម្ភយ៉ាងខ្លាំង និងព្រមានថា ការផ្ទុះការតវ៉ា ដោយសារភាពអយុត្តិធម៌ អាចនឹងកើតឡើងជាយថាហេតុ បើទោះបីជាលោក ហ៊ុន សែន កំពុងខំប្រឹងបង្ក្រាបសំឡេងប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យយ៉ាងចាស់ដៃ នៅពេលនេះយ៉ាងណាក្តី។ មិនតែប៉ុណ្ណោះ បើអន្តរជាតិដាក់ទណ្ឌកម្មផ្នែកសេដ្ឋកិច្ច ជាពិសេសការបញ្ឈប់ការអនុគ្រោះពន្ធ នាំចេញសំលៀកបំពាក់ពីកម្ពុជា ដោយសារតែរបបលោក ហ៊ុន សែន រំលោភសិទ្ធិមនុស្ស និង បំផ្លាញប្រជាធិបតេយ្យបែបនេះ ច្បាស់ណាស់មិនមែនលោក ហ៊ុន សែន ទេ ដែលឈឺចាប់ គឺប្រជាពលរដ្ឋខ្មែរ ជាពិសេសកម្មកររោងចក្ររាប់សែននាក់ ដែលនឹងត្រូវរងការឈឺចាប់ ដោយសារបាត់បង់ឱកាសការងារជាដើម។
ការបង្ក្រាបពលរដ្ឋរបស់ខ្លួន ដែលតវ៉ាទាមទារ រកភាពយុត្តិធម៌ និង ការជួយគិតគូដល់ជីវភាពរស់នៅឲ្យប្រសើរឡើង បានបណ្ដាលឲ្យពលរដ្ឋជាច្រើនបាត់បង់ជីវិត។
កាលពីដើមឆ្នាំ២០១៤ កងកម្លាំងរបស់លោក ហ៊ុន សែន បានបាញ់បង្ក្រាប យ៉ាងហិង្សាទៅលើក្រុមអ្នកតវ៉ា នៅលើផ្លូវវ៉េងស្រេងក្រុងភ្នំពេញ ដែលបណ្ដាលមនុស្សស្លាប់ចំនួន ៧នាក់ របួសជាច្រើននាក់ និងបាត់ខ្លួនយុវជនម្នាក់ឈ្មោះ ខឹម សម្បត្តិ រហូតមកដល់សព្វថ្ងៃនេះ។ ជនរងគ្រោះភាគច្រើនជាកម្មកររោងចក្រ ដែលទាមទារប្រាក់ឈ្នួល ត្រឹមតែ១៦០ដុល្លារប៉ុណ្ណោះ។ ក្រុមសមត្ថកិច្ច និង អាជ្ញាធរដែលពាក់ព័ន្ធ ក្នុងការបាញ់សម្លាប់មនុស្សយ៉ាងព្រៃផ្សៃបែបនេះ នៅតែរួចខ្លួន ស្របពេលដែលក្រុមគ្រួសារជនរងគ្រោះ នៅតែគ្មានទទួលបានយុត្តិធម៌។
ថែមទាំងមិនទទួលខុសត្រូវចំពោះការបង្កគ្រោះថ្នាក់ រហូតដល់ស្លាប់មនុស្សជាច្រើននាក់ប៉ុណ្ណោះទេ បីឆ្នាំក្រោយ គឺនៅថ្ងៃទី១៩ ខែវិច្ឆិកា ឆ្នាំ២០១៧ លោក ហ៊ុន សែន បែរជាទាំងថ្លែងសោកស្ដាយទៅវិញ ថាលោកស្ដាយដែលមិនបានសម្លាប់អ្នកតវ៉ាទាំងនោះឲ្យអស់៖ «បើខ្ញុំឃើញពីពេលហ្នឹង អ្នកទាំងនេះងាប់តាំងពីហ្នឹង! ពេលនេះជាពេលបុណ្យខ្មោចពួកហ្នឹង! ម៉ែ! ឯងទើបតែឃើញឃ្លីបវីដេអូហ្នឹង! ស្ដាយណាស់! សំណាង ដែលខ្ញុំអត់បានមើលឃ្លីបនេះ បើសិនបានមើលឃ្លីបនេះ ថ្ងៃដែលគេប្រកាសនោះ ប៉ុន្មានម៉ោងក្រោយ វ៉ៃសង្គ្រុបយកហ្មង!»។
របាយការណ៍នៃការកាន់អំណាចរបស់លោក ហ៊ុន សែន រយៈពេល ៣០ឆ្នាំ របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ចេញផ្សាយកាលពីឆ្នាំ២០១៣ បង្ហាញថា ការវាយប្រហារ និងបាញ់សម្លាប់សកម្មជនបក្សប្រឆាំង និងសហជីព កើតមានជាច្រើនករណីនៅចន្លោះការបោះឆ្នោតជាតិអាណត្តិទី២ និងទី៣។ នាយកប្រតិបត្តិ ទទួលបន្ទុកកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ លោកប្រ៊ែដ អាដាម (Brad Adams) មានប្រសាសន៍ថា លោក ហ៊ុន សែន ដូចជាកំប្លែងពេកហើយ ដែលហ៊ានអួតអាង ថាក្រោមការដឹកនាំរបស់លោកកន្លងមកនេះ មិនបានធ្វើឲ្យពលរដ្ឋគ្រោះថ្នាក់នោះ។ លោក ប្រ៊ែដ អាដាម លើកឡើងថា តាមពិតគឺលោក ហ៊ុន សែន នេះឯងដែលជាមេដឹកនាំម្នាក់ដែរ នៅលើពិភពលោក ដែលល្បីខាងឃោរឃៅបំផុត។ លោកបញ្ជាក់ប្រាប់អាស៊ីសេរី បន្ថែមថា រាល់ឆ្នាំមានរបាយការណ៍ អង្គការសហប្រជាជាតិ នៅតែរកឃើញអំពីការសម្លាប់មនុស្ស ក្រោមការដឹកនាំរបស់លោក ហ៊ុន សែន នេះ៖ «កន្លងមកលោក ហ៊ុន សែន ធ្លាប់បញ្ជាឲ្យគេសម្លាប់មនុស្ស។ កាលខ្ញុំនៅធ្វើជាមន្ត្រីសិទ្ធិមនុស្ស របស់ការិយាល័យអង្គការសហប្រជាជាតិ ផ្នែកសិទ្ធិមនុស្សនៅស្រុកខ្មែរ ខ្ញុំជាអ្នកកាយ ផ្ទាល់ដៃ គឺកាយសាកសព្វមនុស្ស ដែលលោកហ៊ុន សែន បញ្ជាកម្លាំងគាត់ អោយសម្លាប់ចោល។ វាជារឿងអស់សំណើចខ្លាំងណាស់ ដែលលោក ហ៊ុន សែន អះអាងថា គាត់មិនដែលធ្វើឲ្យខ្មែរណាឈឺចាប់ ឬគ្រោះថ្នាក់នោះ។ មិនបាច់រកឧទាហរណ៍ ឯណាឆ្ងាយទេ មើលការដឹកនាំរបស់គាត់ ដូចជាអំពើពុករលួយ ដែលប្រាក់ពាន់លានដុល្លារ បានធ្លាក់ចូលក្នុងកណ្ដាប់ដៃគាត់។ លុយនេះ គួរតែបានដល់ដៃពលរដ្ឋខ្មែរទូទៅ។ ប៉ុន្តែជាអកុសល ពលរដ្ឋខ្មែរនៅក្រីក្រ និងខ្វះខាតសព្វបែបយ៉ាង។ ពលរដ្ឋខ្មែរនៅតែត្រូវទុកឲ្យឈឺតាមយថាកម្ម ព្រោះគ្មានលទ្ធភាពព្យាបាល។ អ្នកខ្លះនៅតែត្រូវពេទ្យទុកចោល ព្រោះក្រគ្មានប្រាក់ឲ្យពេទ្យ។ អ្នកជំងឺជាច្រើន មិនអាចរកការព្យាបាលជំងឺបាន ព្រោះពេទ្យ គ្មានបុគ្គលិក និងបរិក្ខារពេទ្យគ្រប់គ្រាន់ ដោយសារជំនួយរាប់ពាន់លានដុល្លារ ត្រូវក្រុមគ្រួសារលោក ហ៊ុន សែន និងបក្ខពួករបស់គាត់ កិបកែងដាក់ហោប៉ៅ។ កុមារខ្មែរ នៅតែមិនបានទទួលការអប់រំគ្រប់គ្រាន់ និងត្រឹមត្រូវ ព្រោះប្រទេសខ្មែរនៅតែក្រ និងញាំញីដោយអំពើពុករលួយពេញទំហឹង»។
មន្ត្រីសិទ្ធិមនុស្សអន្តរជាតិរូបនេះ បន្តថានៅមានរឿងច្រើនទៀត រាប់មិនអស់នោះទេ ចំពោះការការណ៍ដែលលោកហ៊ុន សែន ធ្វើឲ្យរាស្ត្រខ្មែរ គ្រោះថ្នាក់ និងឈឺចាប់នោះ។ ដូច្នេះការណ៍ដែលលោក ហ៊ុន សែន អួតអាងថា លោកមិនដែលធ្វើឲ្យខ្មែរគ្រោះថ្នាក់ លោក ប្រ៊ែដ អាដាម ថា លោក ហ៊ុន សែន និយាយទាំងបំពាន និងដោយភាពងងឹតងងុលប៉ុណ្ណោះ។
ចំណែកឯសមាជិកក្រុមអ្នកវិភាគវ័យក្មេង លោក បុង ដែត និយាយថា ការលើកឡើងរបស់លោកហ៊ុន សែន នេះ គឺជាការកេងចំណេញនយោបាយ ម្ល៉ោះហើយទើបបានជាលោកធ្វើមិនដឹង និងព្យាយាមនិយាយបន្លំការពិត។ លោកបន្តថា លោក ហ៊ុន សែន ច្បាស់ជាបានដឹងអំពីការឈឺចាប់របស់ប្រជាពលរដ្ឋ ព្រោះប្រជាពលរដ្ឋ តែងតែឡើងមកតវ៉ាយ៉ាងកក្រើកក្រុងភ្នំពេញ ពាក់ព័ន្ធនឹងជម្លោះដីធ្លីនិងការទាមទារយុត្តិធម៌ផ្សេងៗស្ទើររាល់ថ្ងៃ មានករណីរំលោភដីធ្លីស្ទើរពេញផ្ទៃប្រទេស តាមរយៈការផ្ដល់ដីសម្បទាន និងក្រុមហ៊ុនដែលមានទំនាក់ទំនងយ៉ាងជិតស្និតជាមួយអ្នកកាន់អំណាច។ អ្នកវិភាគវ័យក្មេងរូបនេះ យល់ថា ក្នុងនាម ជាមេដឹកនាំ គឺលោក ហ៊ុន សែន គួរតែមានការទទួលខុសត្រូវចំពោះបញ្ហាដែលបានកើតឡើង៖ «និយាយរួមបញ្ហាចម្បងជាងគេ គឺបង្ហាញដីធ្លីដែលធ្វើឲ្យប្រជាពលរដ្ឋជាច្រើនទឹកភ្នែក»។
របាយការណ៍អង្កេតរបស់អង្គការការពារសិទ្ធិមនុស្ស ឲ្យដឹងថា ប្រជាពលរដ្ឋខ្មែរជិត ១លាននាក់ កំពុងរងគ្រោះដីធ្លីដោយសារអាជ្ញាធរនៃរបបលោក ហ៊ុន សែន បណ្ដេញចេញពីលំនៅឋានក្រោម ហេតុផលអភិវឌ្ឍ និងដីសម្បទានសេដ្ឋកិច្ច។
គិតចាប់តាំងពីឆ្នាំ១៩៩៣ នៅកម្ពុជា មានអ្នកល្បីល្បាញ និងអ្នកចេះដឹងជាច្រើននាក់ ត្រូវបានឃាតកបាញ់សម្លាប់យ៉ាងរន្ធត់ រួមមានទាំងព្រះសង្ឃ ទាំងគ្រហស្ថ ហើយពុំទាន់ទទួលបានយុត្តិធម៌ឡើយ។ ឃាតកម្មធំៗទាំងនោះ រួមមាន លោកបណ្ឌិត កែម ឡី អ្នកស្រាវជ្រាវការអភិវឌ្ឍសង្គម ត្រូវបានឃាតកបាញ់សម្លាប់នៅ Star Mart ស្តុបបូកគោ ក្នុងខណ្ឌចំការមន នៅព្រឹកថ្ងៃទី១០ ខែកក្កដា ឆ្នាំ២០១៦។ ការបាញ់សម្លាប់ព្រះតេជព្រះគុណ សំ ប៊ុនធឿន ក្នុងឆ្នាំ២០០៣ ការបាញ់សម្លាប់លោក ជា វិជ្ជា មេដឹកនាំសហជីពក្នុងឆ្នាំ២០០៤ ការបាញ់សម្លាប់លោក ឈុត វុទ្ធី ប្រធានអង្គការការពារធនធានធម្មជាតិ ក្នុងឆ្នាំ២០១២។ នៅមានឃាតកម្មជាច្រើនទៀត ដូចជាករណីអ្នកស្រី ពិសិដ្ឋ ពីលិកា កញ្ញា ទូច ស៊ុននិច អ្នកស្រី តាត ម៉ារីណា អ្នកកាសែតមនសិការខ្មែរ លោក ឃឹម សំបូរ រួមនឹងឧក្រិដ្ឋកម្មផ្សេងៗទៀត ដូចជាករណីគប់គ្រាប់បែកមុខរដ្ឋសភា និងព្រឹត្តិការណ៍រដ្ឋប្រហារបង្ហូរឈាមកាលពីខែកក្កដា ឆ្នាំ១៩៩៧ ជាដើម ដែលរហូតមកទល់ពេលនេះ គេនៅមិនទាន់ឃើញមានជនដៃដល់ណាម្នាក់ ត្រូវបាននាំខ្លួនយកមកផ្ដន្ទាទោស នៅឡើយទេ។
ចំណែកឯគ្រោះថ្នាក់នៃការរត់ជាន់គ្នា ដែលបណ្ដាលឲ្យស្លាប់មនុស្សរហូត ៣៥៣នាក់ និង របួសជិតបួនរយនាក់ (៣៩៣) ក្នុងរយៈពេលតែប៉ុន្មានម៉ោង កាលពីបុណ្យអុំទូកឆ្នាំ២០១០ ក៏នៅតែបន្សល់នូវស្លាកស្នាមឈឺចាប់ និងសោកសង្រេង ដល់ក្រុមគ្រួសារជនរងគ្រោះ រហូតមកដល់ពេលនេះ។ គ្មានមន្ត្រីអាជ្ញាធរណាមួយ ទទួលខុសត្រូវចំពោះការស្លាប់ យ៉ាងរង្គាលនេះឡើយ។
ក្នុងរបាយការណ៍ របស់អង្គការឃ្លាំមើលសិទ្ធិមនុស្សអន្តរជាតិ Human Rights Watch កាលពីខែ មករា ឆ្នាំ២០១៥នោះ ក៏បានលើកឡើងពីគ្រោះថ្នាក់ ដែលធ្វើឲ្យបាត់បង់អាយុជីវិតពលរដ្ឋខ្មែរស្លូតត្រង់ រាប់ម៉ឺននាក់ ក្នុងទសវត្សរ៍ ៨០ ដោយសារតែការបង្ខំឲ្យទៅធ្វើពលកម្ម និងស្លាប់យ៉ាងរង្គាល ដោយសារការជាន់មីន និងជំងឺគ្រុនចាញ់ នៅតំបន់ព្រៃភ្នំ ក្បែរព្រំដែនថៃ។ តាមរបាយការណ៍ដដែល បានដកស្រង់អនុរដ្ឋមន្ត្រីក្រសួងមហាផ្ទៃ ក្នុងរបបសាធារណៈប្រជាមានិតកម្ពុជា គឺលោក ស៊ិន សេន ដែលបានបញ្ជាក់ថា លោក ហ៊ុន សែន ជាអ្នកដឹកនាំផែនការ ក៥ នេះ។
មជ្ឈដ្ឋានទូទៅ បានបន្ទោសលោក ហ៊ុន សែន ថាជាមេដឹកនាំដែលកំសាក ខ្វះការទទួលខុសត្រូវ ធ្វើឲ្យប្រជាពលរដ្ឋបាត់បង់ជីវិត រងគ្រោះនិងឈឺចាប់គ្រប់បែបយ៉ាងជាហូរហែ ហើយលោក ហ៊ុន សែន ក៏ជាមេដឹកនាំដែលបរាជ័យ ក្នុងការកាត់បន្ថយវប្បធម៌និទ្ទណ្ឌភាព ឬភាពគ្មានទោសពៃរ៍នៅកម្ពុជា៕
No comments:
Post a Comment