ដោយ អាស៊ីសេរី
2018-05-18
រូបថតលោក អ៊ួន ឈិន និង លោក យាង សុធារិន្ធ អតីតបុគ្គលិកអាស៊ីសេរី
RFA
សាលាដំបូងរាជធានីភ្នំពេញនៅថ្ងៃទី១៨ ឧសភា សម្រេចពន្យារពេលឃុំខ្លួនអតីតអ្នកយកព័ត៌មានអាស៊ីសេរីចំនួន ៦ខែបន្តទៀត។
មេធាវី និងមន្ត្រីសិទ្ធិមនុស្សចាត់ទុកការសម្រេចរបស់តុលាការនេះ ជារឿងអយុត្តិធម៌ ដោយសារលោក អ៊ួន ឈិន និងលោក យាង សុធារិន មិនបានប្រព្រឹត្តកំហុស ដូចការចោទប្រកាន់របស់តំណាងអយ្យការនោះទេ។
មេធាវីការពារក្តីឱ្យអតីតអ្នកយកព័ត៌មានអាស៊ីសេរីទាំងពីររូប លោក កែវ វន្នី សម្តែងការសោកស្តាយដែលតុលាការបន្តឃុំខ្លួនកូនក្តីរបស់លោកតទៅទៀត។ លោកយល់ឃើញថា ការសម្រេចរបស់តុលាការក្រុងភ្នំពេញ គឺជារឿងអយុត្តិធម៌ ព្រោះកូនក្តីរបស់លោកទាំងពីរបានសហការគ្រប់នីតិវិធី និងបានអះអាងប្រាប់តុលាការថា នឹងអនុវត្តនូវលក្ខខណ្ឌគ្រប់បែបយ៉ាង ដើម្បីបាននៅក្រៅឃុំ។ លោកថា បញ្ហាសំខាន់មួយទៀត គឺខាងតំណាងអយ្យការមិនមានភស្តុតាងគ្រប់គ្រាន់ ដើម្បីដាក់បន្ទុកលើកូនក្តីរបស់លោកឡើយ ប៉ុន្តែបែរជាតុលាការសម្រេចបន្តឃុំខ្លួនពួកគេទៅវិញ។
អ្នកនាំពាក្យអយ្យការអមតុលាការក្រុងភ្នំពេញ លោក លី សុផាណា បញ្ជាក់ប្រាប់អាស៊ីសេរីតាមប្រព័ន្ធតេលេក្រាម (Telegram) ថា ការពន្យារពេលឃុំខ្លួននេះ គឺដើម្បីរក្សាអ្នកទាំងពីរក្នុងកិច្ចស៊ើបសួរបន្តទៀត។
លោក កែវ វន្នី បញ្ជាក់ថា ខាងមេធាវីនឹងប្តឹងសេចក្តីសម្រេចរបស់តុលាការក្រុងភ្នំពេញនេះ ទៅសាលាឧទ្ធរណ៍បន្តទៀត ដើម្បីឱ្យអ្នកទាំងពីរអាចបាននៅក្រៅឃុំ។
លោក អ៊ួន ឈិន និងលោក យាង សុធារិន ត្រូវបានអាជ្ញាធរក្រុងភ្នំពេញចាប់ខ្លួន កាលពីពាក់កណ្តាលខែវិច្ឆិកា ឆ្នាំ២០១៧ ហើយត្រូវបានតំណាងអយ្យការអមតុលាការក្រុងភ្នំពេញចោទប្រកាន់ពីបទផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិតាមមាត្រា ៤៤៥ នៃក្រមព្រហ្មទណ្ឌ។ អ្នកទាំងពីរអាចប្រឈមមុខនឹងការជាប់ពន្ធនាគាររហូតដល់ ១៥ឆ្នាំ ប្រសិនបើតុលាការសម្រេចថា អ្នកទាំងពីរពិតជាមានទោសមែននោះ។ ជាង ៦ខែកន្លងទៅនេះ អ្នកទាំងពីរត្រូវបានឃុំខ្លួនក្នុងពន្ធនាគារព្រៃស ដោយមិនទាន់ទទួលបានការជំនុំជម្រះនៅឡើយ។
ប្រធានគ្រប់គ្រងការិយាល័យសិទ្ធិមនុស្សនៃអង្គការលីកាដូ (LICADHO) លោក អំ សំអាត ក៏បានសំដែងការសោកស្តាយចំពោះការសម្រេចរបស់តុលាការក្រុងភ្នំពេញនេះដែរ។ លោកថា ការបន្តឃុំខ្លួនអ្នកទាំងពីរ ៦ខែទៀតនេះ គឺជាការរំលោភសិទ្ធិមនុស្សធ្ងន់ធ្ងរ ហើយក្រៅពីនេះ វានឹងធ្វើឱ្យប៉ះពាល់យ៉ាងខ្លាំងដល់ជីវភាពរស់នៅរបស់ក្រុមគ្រួសារអ្នកទាំងពីរ។ លោកបន្តថា ការសម្រេបែនេះ នឹងនាំឱ្យមតិជាតិ និងអន្តរជាតិ រិះគន់កាន់តែខ្លាំងទៅលើរបបក្រុងភ្នំពេញចំពោះការធ្វើទុក្ខបុកម្នេញសារព័ត៌មានឯករាជ្យនៅកម្ពុជា។
ការចាប់ខ្លួន និងចោទប្រកាន់អតីតបុគ្គលិកអាស៊ីសេរីទាំងពីររូបនេះ បានធ្វើឱ្យរបបលោក ហ៊ុន សែន ទទួលរងការរិះគន់ពីសហគមន៍ជាតិ និងអន្តរជាតិជាច្រើន។ អង្គការសង្គមស៊ីវិលជាតិ និងអន្តរជាតិបានថ្កោលទោសចំពោះចំណាត់ការផ្លូវច្បាប់លើអ្នកទាំងពីរ ដោយពួកគេចាត់ទុកថា នេះជាការចោទប្រកាន់ដោយគ្មានភស្តុតាង និងមូលដ្ឋានច្បាប់ត្រឹមត្រូវ។ អង្គការលើកលែងទោសអន្តរជាតិ (Amnesty International) បានហៅអ្នកទាំងពីរថា ជាអ្នកទោសមនសិការ និងទាមទារឱ្យរបបក្រុងភ្នំពេញដោះលែងពួកគេដោយឥតលក្ខខណ្ឌ។ ចំណែកអង្គការ វេទិកាអាស៊ី (FORUM-ASIA) វិញ បានចាត់ទុកការចោទប្រកាន់លើលោក អ៊ួន ឈិន និង លោក យាង សុធារិន ថាជារឿងប្រឌិត និងរំលោភបំពានសិទ្ធិអ្នកទាំងពីរយ៉ាងធ្ងន់ធ្ងរ ហើយថាការមិនដោះលែងអ្នកទាំងពីរ ព្រមទាំងការបន្ថែមបទចោទថ្មីទៀតនោះ បង្ហាញឱ្យឃើញកាន់តែច្បាស់ថា របបក្រុងភ្នំពេញកំពុងរំលោភបំពានច្បាប់ជាតិ និងអន្តរជាតិ។ អង្គការមួយនេះ បានទាមទារឲ្យរបបលោក ហ៊ុន សែន ទម្លាក់ចោលការចោទប្រកាន់ និងដោះលែងអ្នកទាំងពីរឱ្យមានសេរីភាពវិញ៕
No comments:
Post a Comment