ដោយ អាស៊ីសេរី
2018-05-07
rfa
អតីតនិពន្ធនាយកកាសែត ភ្នំពេញប៉ុស្តិ៍ (Phnom Penh Post) លោក កៃ គឹមសុង (រូបកណ្ដាល) ផ្ដល់បទសម្ភាសន៍ដល់សហការី នៅថ្ងៃទី៧ ខែឧសភា ឆ្នាំ២០១៨។
Photo Facebook
និពន្ធនាយកកាសែត ភ្នំពេញប៉ុស្តិ៍ (Phnom Penh Post) ត្រូវបានបណ្ដេញចេញពីការងារ បន្ទាប់ពីកាសែតនេះ ទើបនឹងត្រូវបានគេលក់ទៅឱ្យម្ចាស់ថ្មីជាជនជាតិម៉ាឡេស៊ី ដែលថា មានទំនាក់ទំនងនឹងលោកនាយករដ្ឋមន្ត្រី ហ៊ុន សែន។
បុគ្គលិកបរទេសនៃកាសែត ភ្នំពេញប៉ុស្តិ៍ លោកអានាន់ បាលីហ្គា (Ananth Baliga)បានបង្ហោះសារនៅលើធ្វីតធើរ (Twitter) របស់លោកថា តំណាងនៃម្ចាស់ថ្មីរបស់កាសែតនេះ ទើបតែបញ្ឈប់និពន្ធនាយកកាសែតនេះ លោក កៃ គឹមសុង នៅរសៀលថ្ងៃទី៧ ឧសភានេះ។
សារព័ត៌មានថ្មីៗ បានស្រង់សម្ដីរបស់លោក កៃ គឹមសុង ក្រោយរងការបណ្ដេញពីការងារថា លោកពិតជារងការបញ្ឈប់ពីការងារមែន ព្រោះតែហេតុផល លោកបានអនុញ្ញាតឱ្យចុះផ្សាយព័ត៌មានអំពីការដោះដូរម្ចាស់ស្ថាប័នសារព័ត៌មានមួយនេះ លើទំព័រមុខនៃកាសែតរបស់ខ្លួន។
កាសែត ភ្នំពេញប៉ុស្តិ៍ ជាស្ថាប័នឯករាជ្យ ដែលមានវ័យចំណាស់ប្រមាណ ២៦ឆ្នាំ។
ពាក់ព័ន្ធនឹងភាពរំជើបរំជួល និងភាពមន្ទិលទៅលើឯករាជ្យភាពរបស់ម្ចាស់ថ្មីនៃកាសែតភ្នំពេញប៉ុស្តិ៍ នេះ ម្ចាស់គេហទំព័ររបស់ក្រុមហ៊ុន អេស៊ា ភីអ នេះបញ្ជាក់ថា ខ្លួនធ្លាប់ធ្វើការឲ្យលោក ហ៊ុន សែន។ ក្រុមហ៊ុនទំនាក់ទំនងសាធារណៈ ឬអេស៊ា ភីអ (ASIA PR) របស់ប្រទេសម៉ាឡេស៊ី ដែលមានលោក ស៊ីវ៉ាគូម៉ា អេស-ហ្គាណាផាស៊ី (Sivakumar S. Ganapathy) ជាប្រធាន ឬ CEO និង ជានាយកផ្នែកគ្រប់គ្រងផងនោះ បានអនុវត្តគម្រោងមួយពាក់ព័ន្ធនឹងប្រទេសកម្ពុជា និងលោក ហ៊ុន សែន ក្នុងការចូលកាន់តំណែងជាប្រមុខដឹកនាំរដ្ឋាភិបាលកម្ពុជា កាលពី ២៥ ឆ្នាំមុន។
ទោះជាយ៉ាងនេះក្តី លោក ស៊ីវ៉ាគូម៉ា ដែលទើបនឹងទិញ កាសែតភ្នំពេញប៉ុស្តិ៍យកមកគ្រប់គ្រងទាំងស្រុងនោះ ថ្លែងនៅក្នុងសេចក្ដីថ្លែងការណ៍របស់លោក នៅថ្ងៃទី៦ ខែ ឧសភា ថា គេមិនត្រូវសន្និដ្ឋាន អំពីទំនាក់ទំនងរបស់ក្រុមហ៊ុននេះ ជាមួយនឹងលោក ហ៊ុន សែន ដែលកើតឡើងតាំងពី ២៥ ឆ្នាំកន្លងផុតទៅហើយនោះទេ។
តាមកាសែតភ្នំពេញប៉ុស្តិ៍ ក្រុមហ៊ុន អេស៊ា ភីអ នេះធ្លាប់គ្រប់គ្រងកាសែតគាំទ្ររបបលោក ហ៊ុន សែន ឈ្មោះ Cambodia Times រាប់ឆ្នាំ កាលពីដើមទសវត្សរ៍ឆ្នាំ១៩៩០។ និពន្ធនាយករបស់កាសែត Cambodia Times នៅពេលនោះ គឺលោក កាម៉ារ៉ាល់-ហ្សាម៉ាន់ តាំប៊ូ (Kamaralzaman Tambu) ធ្លាប់ជាអ្នកគ្រប់គ្រងក្រុមហ៊ុន អេស៊ា ភីអ នេះមុនលោក ស៊ីវ៉ាគូម៉ា អេស-ហ្គាណាផាស៊ី ជំនួសនៅឆ្នាំ ២០១០។
លោក ស៊ីវ៉ាគូម៉ា អេស-ហ្គាណាផាស៊ី បញ្ជាក់ថា លោកពិតជាធ្វើជាអ្នកគ្រប់គ្រងក្រុមហ៊ុន អេស៊ា ភីអ មែន ប៉ុន្តែ មិនមែនកាន់ការនោះនៅឆ្នាំ ២០១០ ដូចកាសែតភ្នំពេញប៉ុស្តិ៍ ចុះផ្សាយទេ តែលោកចូលកាន់តំណែងនោះ នៅឆ្នាំ២០១១។ ក្នុងឆ្នាំ២០១១ នោះ លោក អះអាងថា កាសែត Cambodia Times បិទការផ្សាយយូរហើយ គឺបិទតាំងពីឆ្នាំ ១៩៩៧ មកម្ល៉េះ។
ទោះបីជាមានការបំភ្លឺបែបនេះក្តី ក៏ប្រភពព័ត៌មានអន្តរជាតិជាច្រើន បានដងស្រង់សម្ដីរបស់អតីតបុគ្គលិកជាន់ខ្ពស់ របស់សារព័ត៌មានភ្នំពេញប៉ុស្តិ៍ ដោយសម្ដែងក្តីព្រួយបារម្ភ អំពីភាពបាត់ឯករាជ្យ ផ្នែកនិពន្ធ ដោយសារតែម្ចាស់ថ្មី ដែលមាននិន្នាការជាមួយរបបលោក ហ៊ុន សែន នេះឯង។
នាយករងទទួលបន្ទុកកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូបើតសិន (Phil Robertson) ចាត់ទុកការលក់សារព័ត៌មានភ្នំពេញប៉ុស្តិ៍ ដែលជាសារព័ត៌មានឯករាជ្យនៅសល់ចុងក្រោយគេ ទៅឲ្យអ្នកគ្រប់គ្រងថ្មីនេះ គឺជាដំណើរ ទៅរកភាពបាត់សេរីភាពផ្នែកសារព័ត៌មាន នៅកម្ពុជា៕
No comments:
Post a Comment