វិទ្យុអាស៊ីសេរី
2018-08-25
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន (រូបកណ្ដាល) ពេលនាំខ្លួនមកសវនាការ នៅតុលាការកំពូល នៅថ្ងៃទី១០ ខែសីហា ឆ្នាំ២០១៦។
Photo: RFA
ព្រះមហាក្សត្រព្រះរាជទានការលើកលែងទោសដល់អតីតតំណាងរាស្ត្រគណបក្ស សង្គ្រោះជាតិ លោក អ៊ុំ សំអាន នៅថ្ងៃសៅរ៍ ទី២៥ សីហា តាមសំណើសុំរបស់លោក ហ៊ុន សែន។ តុលាការក្រុងភ្នំពេញ ក៏បានចេញដីកាបង្គាប់ឱ្យដោះលែងអតីតតំណាងរាស្ត្ររូបនេះ នៅថ្ងៃដដែលនេះដែរ។
លោក អ៊ុំ សំអាន ត្រូវបានសមត្ថកិច្ចខេត្តសៀមរាបចាប់ខ្លួនទាំងមានអភ័យឯកសិទ្ធិជាតំណាងរាស្ត្រ កាលពីយប់ថ្ងៃទី១០ ខែមេសា ឆ្នាំ២០១៦ កន្លងទៅ បន្ទាប់ពីលោកបានវិលត្រឡប់ពីសហរដ្ឋអាមេរិកមកដល់កម្ពុជាវិញ និងបានបន្តការបញ្ចេញមតិរិះគន់របបលោក ហ៊ុន សែន អំពីបញ្ហាបូរណភាពទឹកដីរវាងកម្ពុជា និងវៀតណាម។ តុលាការរបបលោក ហ៊ុន សែន បានកាត់ទោសលោកឱ្យជាប់ពន្ធនាគាររយៈពេល ២ឆ្នាំ ៦ខែ និងពិន័យជាប្រាក់ ៤លានរៀល ក្រោមបទចោទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” និងបទ “ញុះញង់ឱ្យមានការរើសអើង” តាមមាត្រា ៤៩៥ និង ៤៩៦ នៃក្រមព្រហ្មទណ្ឌ ក្រោយពេលលោកបានសរសេរ និងនិយាយរិះគន់របបក្រុងភ្នំពេញពីបញ្ហាព្រំដែនជាមួយប្រទេសវៀតណាម។
ការចាប់ខ្លួន ការកាត់ទោស និងការឃុំខ្លួនលោក អ៊ុំ សំអាន ក្នុងពន្ធនាគារនេះ ត្រូវបានអ្នកច្បាប់ចាត់ទុកថា ជាការអនុវត្តដោយបំពាន និងខុសច្បាប់ ដ្បិតលោក អ៊ុំ សំអាន មានអភ័យឯកសិទ្ធិសភា ក៏ប៉ុន្តែទាំងលោក ហ៊ុន សែន និងអាជ្ញាធររបស់លោកបានបកស្រាយថា ការបញ្ចេញមតិរិះគន់រឿងព្រំដែននេះ ជាការប្រព្រឹត្តបទល្មើសជាក់ស្តែង។
No comments:
Post a Comment