មួង ណារ៉េត
2018-08-28
លោក កឹម សុខា (ដើរមុខ) ប្រធានគណបក្សសង្គ្រោះជាតិ នាស្នាក់ការកណ្ដាលគណបក្សសង្គ្រោះជាតិ បន្ទាប់ពីប្រជុំផ្ទៃក្នុងគណបក្ស កាលពីថ្ងៃទី៣ ខែមីនា ឆ្នាំ២០១៦។
Photo: RFA
អ្នកវិភាគយល់ថា ប្រធានគណបក្សសង្គ្រោះជាតិលោក កឹម សុខា នឹងត្រូវដោះលែងក្នុងពេលឆាប់ៗ ដោយសារកត្តាធូរស្រាលជាបណ្ដើរៗ ខាងនយោបាយ ក្រោយមានការដោះលែងអ្នកទោសនយោបាយ និងអ្នកទោសមនសិការ ជាបន្តបន្ទាប់ និងកត្តាសម្ពាធអន្តរជាតិ។ ប៉ុន្តែ មន្ត្រីរបបលោក ហ៊ុន សែន អះអាងថារបបនេះ មិនស្ថិតក្រោមសម្ពាធបរទេស។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ មានសុទិដ្ឋិនិយមច្រើន ថាលោក កឹម សុខា ពិតជានឹងត្រូវបានដោះលែង ឲ្យមានសេរីភាពឡើងវិញ ដូចអ្នកទោសនយោបាយ និងអ្នកទោសមនសិការឯទៀតដែរ។ កត្តាសំខាន់ដែលកញ្ញា លី ស្រស្រស់ យកមកធ្វើជាសម្អាងក្នុងការវិភាគនេះ គឺកត្តាដែលរបបថ្មីឯកបក្សរបស់លោក ហ៊ុន សែន បានកើបយកអាសនៈរដ្ឋសភាទាំងអស់ទៅហើយ ហើយម្យ៉ាងទៀតរបបថ្មីឯកបក្សនេះ ក៏គ្រោងនឹងរៀបចំកិច្ចប្រជុំគណៈរដ្ឋមន្ត្រីលើកដំបូងរបស់ខ្លួន ក្នុងពេលឆាប់ៗនេះដែរ ដូច្នេះគ្មានអ្វីដែលរបបនេះ ត្រូវការចាប់ចង ឬបន្តឃុំឃាំងមន្ត្រី ឬសកម្មជនបក្សប្រឆាំង យូរតទៅទៀតនោះទេ៖ «រដ្ឋាភិបាលមិនមានហេតុផលអ្វី ក្នុងការទុកលោក កឹម សុខាទេ។ បើទុកគឺគាត់អត់ចំណេញ។ បើយើងគិតទៅលើផលខាត និងចំណេញ។ ឥឡូវរដ្ឋាភិបាលបង្កើតឡើងហើយ ហើយគាត់ចាប់គណបក្សប្រឆាំង តើមានន័យអ្វី? មានតែធ្វើឲ្យសហគមន៍អន្តរជាតិ មើលកម្ពុជានៅក្នុងផ្លូវអាក្រក់ថែមទៀត។ ជាលទ្ធផល អាចធ្វើឲ្យមានផលលំបាក ក្នុងទំនាក់ទំនងអន្តរជាតិ ជាពិសេសជាមួយបណ្ដាប្រទេស ដែលជាបិតាធិបតេយ្យ»។
កត្តាសម្ពាធអន្តរជាតិនេះ ត្រូវបានអតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិលោក សម រង្ស៊ី ក៏យកមកធ្វើជាសម្អាង ក្នុងការព្យាករណ៍ទុក យ៉ាងប្រាកដក្នុងចិត្ត ថារបបលោក ហ៊ុន សែន នឹងគ្មានជម្រើសអ្វី ក្រៅពីត្រូវតែដោះលែងលោក កឹម សុខា ក្នុងពេលដ៏ខ្លីខាងមុខនេះ។ សរសេរនៅលើទំព័រហ្វេសប៊ុករបស់លោក កាលពីថ្ងៃទី២៨ ខែសីហា លោក សម រង្ស៊ី៖ «លោកដឹងច្បាស់ថាលោក កឹម សុខា ក៏នឹងត្រូវលោក ហ៊ុន សែន បង្ខំចិត្តដោះលែង ក្នុងពេលឆាប់ៗខាងមុខនេះផងដែរ ក្រោមសម្ពាធអន្តរជាតិ ដែលបានដាក់កាលបរិច្ឆេទឲ្យលោក ហ៊ុន សែន ដោះលែង អ្នកទោសនយោបាយទាំងអស់ ជាបន្ទាន់ និងដោយឥតលក្ខខណ្ឌ»។
លោក សម រង្ស៊ី ថែមទាំងបញ្ជាក់ទៀតថា ការដោះលែងអ្នកទោសនយោបាយទាំងអស់ ជាបន្ទាន់ និងដោយឥតលក្ខខណ្ឌ គឺគ្រាន់តែជាលក្ខខណ្ឌទីមួយទេ ដែល លោក ហ៊ុន សែន ត្រូវបំពេញ ក្រោមសម្ពាធអន្តរជាតិ។ លោកថា លក្ខខណ្ឌដែលលោក ហ៊ុន សែន ត្រូវបំពេញជាបន្តបន្ទាប់ថែមទៀត នៅមានច្រើនទៀត រួមទាំងយល់ព្រមឲ្យគណបក្សសង្គ្រោះជាតិ ដំណើរការឡើងវិញ អនុញ្ញាតឲ្យថ្នាក់ដឹកនាំគណបក្សសង្គ្រោះជាតិ ១១៨រូប មានសិទ្ធិធ្វើសកម្មភាពនយោបាយពេញលេញដូចមុន ទម្លាក់ចោលការចោទប្រកាន់ទាំងអស់ មកលើថ្នាក់ដឹកនាំ និងសកម្មជនគណបក្សសង្គ្រោះជាតិទាំងអស់ ព្រមទាំងមន្ត្រីសង្គមស៊ីវិល និងអ្នកសារព័ត៌មានទាំងអស់ ប្រគល់ ឬសងតំណែងសមាជិកក្រុមប្រឹក្សាឃុំ-សង្កាត់ ឲ្យទៅសកម្មជន គណបក្សសង្គ្រោះជាតិ ជាង ៥ ពាន់នាក់ ដែលបានជាប់ឆ្នោត ក្នុងការបោះឆ្នោតឃុំ-សង្កាត់ ខែមិថុនា ២០១៧ និងរៀបចំការបោះឆ្នោត ព្រឹទ្ធសភា និង រដ្ឋសភាឡើងវិញ។
មន្ត្រីនាំពាក្យទីស្តីការគណៈរដ្ឋមន្ត្រី នៃរបបលោក ហ៊ុន សែន គឺលោក ផៃ ស៊ីផាន មិនស្របតាមការយល់ឃើញរបស់អ្នកវិភាគ និងការលើកឡើងរបស់លោក សម រង្ស៊ី នោះទេ។ លោក ផៃ ស៊ីផាន អះអាងថា រាល់ការសម្រេចដោះលែងអ្នកជាប់ឃុំ គឺផ្អែកទៅតាមនីតិវិធីច្បាប់ ដែលផ្ដល់អំណាចដល់លោក ហ៊ុន សែន ក្នុងការស្នើសុំឲ្យមានការលើកលែងទោស។ ម្យ៉ាងទៀតលោកបញ្ជាក់ថា ក្រោយការវាយតម្លៃរួច រកឃើញថា អ្នកជាប់ឃុំទាំងនោះ នឹងគ្មានបង្កអសណ្តាប់ធ្នាប់សាធារណៈ ឬ អស្ថិរភាពសង្គមនោះឡើយ ក្រោយពេលដោះលែង។ លោក ផៃ ស៊ីផាន បន្ថែមទៀតថា ការដោះលែងទាំងនេះ ក៏ដោយសារតែលោក ហ៊ុន សែន ជាមនុស្សមានចិត្តបុណ្យ៖ «ចំណុចទីបី គឺចំណុចគុណធម៌ និងសីលធម៌ ដែលផ្ដល់ដល់នាយករដ្ឋមន្ត្រី ឲ្យមានអំណាចក្នុងការស្នើសុំនេះឯង មិនមែនស្ថិតក្នុងឥទ្ធិពលណា ហើយក៏មិនមែននៅក្នុងលក្ខខណ្ឌរបស់ទណ្ឌិត សម រង្ស៊ី ដែលរត់ចោលស្រុក ដែលគ្មានអំណាច គ្រាន់តែជាតារានៅតាមបណ្ដាញសារព័ត៌មានប៉ុណ្ណោះ អស់តម្លៃជាអ្នកនយោបាយ ហើយលោកមិនហ៊ានអញ្ជើញមកស្រុកខ្មែរវិញផង»។
លោក ផៃ ស៊ីផាន បន្ថែមថា ការចង់បានរបស់លោក សម រង្ស៊ី ដែលចង់ឲ្យថ្នាក់ដឹកនាំគណបក្សសង្គ្រោះជាតិ ១១៨នាក់ មានសិទ្ធិធ្វើសកម្មភាពនយោបាយឡើងវិញដូចមុននោះ នឹងមិនអាចទៅរួចទេ ដោយសារលោកសម្អាងទៅលើសាលដីកាតុលាការកំពូល ដែលសម្រេចរម្លាយគណបក្សសង្គ្រោះជាតិ ជាស្ថាពររួចទៅហើយ។
ទោះជាយ៉ាងនេះ ក្តីអ្នកវិភាគ នៅតែយល់ឃើញថា ដោយសារតែរបបលោក ហ៊ុន សែន ត្រូវការភាពស្របច្បាប់ និងការទទួលស្គាល់ពីសហគមន៍អន្តរជាតិ ដើម្បីស្តារទំនាក់ទំនងល្អរវាងកម្ពុជា និង ពិភពលោក របបនេះ នឹងចៀសមិនផុត ពីបង្ខំចិត្តត្រូវស្វះស្វែងរកការធ្វើសម្បទានជាបន្តបន្ទាប់ទៅទៀត រហូតអាចទទួលយកបានពីគ្រប់ភាគី៕
1 comment:
Before releasing Kem Sokha, Ah Kwack Hun Sen needs assurance from Khmer people and the international community that there will be no new election and he will be the Prime Minister of the new government.
This time, it looks like Ah Kwack's tricks will not work. People will push for a new election.
Post a Comment