Friday 3 August 2018
របបភ្នំពេញនឹងបង្កើតរដ្ឋាភិបាលថ្មីនៅខែក្រោយទោះក្រុមអ្នកនិយមប្រជាធិបតេយ្យមិនទទួលស្គាល់
ដោយ សេក បណ្ឌិត
2018-08-02
ព្រះមហាក្សត្រព្រះបាទសម្ដេចព្រះបរមនាថ នរោត្តម សីហមុនី ថតរូបជាមួយអ្នកតំណាងរាស្ត្រគណបក្សប្រជាជនកម្ពុជា នៅខាងមុខអគាររដ្ឋសភា ក្នុងរាជធានីភ្នំពេញ កាលពីព្រឹកថ្ងៃ២៣ កញ្ញា ២០១៣។
RFA
លោក ហ៊ុន សែន ប្រកាសបង្កើតរដ្ឋាភិបាលអាណត្តិថ្មី នៅថ្ងៃទី២០ ខែកញ្ញា ខាងមុខ បន្ទាប់ពីរបបលោករៀបចំ ការបោះឆ្នោតរួចរាល់ដែលមជ្ឈដ្ឋានមួយចំនួនចាត់ទុកថាជាការបោះឆ្នោតក្លែងក្លាយ។ អ្នកវិភាគមានមតិថា ក្រុមអ្នកនិយមប្រជាធិបតេយ្យ និងប្រទេសប្រជាធិបតេយ្យ មិនគាំទ្ររបបលោក ហ៊ុន សែន ហើយអាចនឹងដាក់ទណ្ឌកម្មជាបន្តបន្ទាប់។
លោក ហ៊ុន សែន ប្រកាសក្រោយគណបក្សកាន់អំណាចអះអាងថា ឈ្នះឆ្នោតដោយគ្មានគណបក្សបក្សប្រឆាំងចូលរួមនោះថា សម័យប្រជុំសភាលើកដំបូង គ្រោងនឹងធ្វើឡើងនៅថ្ងៃទី១៩ ខែកញ្ញា។
បន្ទាប់មក របបលោកនឹងបង្កើតគណៈរដ្ឋមន្ត្រីថ្មី នឹងបង្កើតឡើងនៅថ្ងៃទី២០ ខែកញ្ញា គឺក្រោយ ប្រកាសលទ្ធផល និងបែងចែកអាសនជាផ្លូវការ នៅពាក់កណ្ដាលខែសីហា។ លោក ហ៊ុន សែន ពន្យល់ដែរថា ការពន្យារពេលជាងមួយខែ ក្នុងការបង្កើតរដ្ឋសភាថ្មី និងគណៈរដ្ឋមន្ត្រីថ្មីនេះ គឺដើម្បីទុកពេលឲ្យមានការប្ដឹងតវ៉ាពីគណបក្សនយោបាយនានា ក៏ដូចជាទុកពេលឲ្យគ.ជ.បដោះស្រាយបញ្ចប់នូវវិវាទនានាជាមុនសិន។ «»
ទាក់ទងនឹងការប្រកាសលទ្ធផលផ្លូវការ នៃចំនួនអាសនៈក្នុងរដ្ឋសភា អ្នកនាំពាក្យ គ.ជ.ប លោក ហង្ស ពុទ្ធា បញ្ជាក់ថា គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី១១ ខែសីហា ដើម្បីទទួលពាក្យបណ្ដឹងផ្សេងៗពីគ្រប់គណបក្សទាំងអស់ រហូតដល់ថ្ងៃទី១៥ ខែសីហា។ លោក ហង្ស ពុទ្ធា ឲ្យដឹងដែរថា មកដល់ថ្ងៃទី២ ខែសីហា ពាក្យបណ្តឹងពាក់ព័ន្ធនឹងការបោះឆ្នោត និងការរាប់សន្លឹកឆ្នោតមានជាង២ពាន់បណ្ដឹង(២.៥៥៥) ហើយគ.ប.ជកំពុងដោះស្រាយជាបន្តបន្ទាប់។ លោក បញ្ជាក់ថា បណ្តឹងមានពីរករណីសំខាន់គឺទី១គណបក្សនយោបាយ ប្ដឹងឲ្យផ្ដន្ទាទោសមន្ត្រីរៀបចំការបោះឆ្នោតដែលមិនអនុវត្តតាមនីតិវិធី។ បណ្ដឹងទី២ គឺប្ដឹងរឿងសញ្ញាគូសលើសន្លឹកឆ្នោតដែលសញ្ញាណា ក៏មន្ត្រីរាប់សន្លឹកឆ្នោតផ្ដល់សុពលភាព។ លោក ហង្ស ពុទ្ធា អះអាងថា ទោះបីមានបណ្ដឹងច្រើនក្តី ប៉ុន្តែ គ.ជ.ប នឹងពន្លឿនដោះស្រាយបណ្ដឹងឲ្យចប់សព្វគ្រប់តាមពេលវេលាកំណត់ ហើយគ.ជ.ប ក៏មិនចាប់អារម្មណ៍ចំពោះការរិះគន់នានានោះដែរ។ «»
ប្រធានចលនាសង្គ្រោះជាតិលោក សម រង្ស៊ី រិះគន់ លទ្ធផលនៃការបោះឆ្នោតនៅថ្ងៃទី២៩ កក្កដាថា ជាជ័យជំនះក្លែងក្លាយរបស់លោក ហ៊ុន សែន។ ការរិះគន់នេះ ដោយសារតែការបោះឆ្នោតនេះធ្វើឡើងដោយគ្មានគណបក្សប្រឆាំងដែលជាដៃគូប្រកួតប្រជែងពិតប្រាកដជាមួយគណបក្សកាន់អំណាចចូលរួមបោះឆ្នោត។
អ្នកវិភាគឯករាជ្យ និងជាអតីតទីប្រឹក្សារបស់អនុប្រធានទី១ រដ្ឋសភា លោកបណ្ឌិត ឡៅ ម៉ុងហៃ មានប្រសាសន៍ថា ក្រុមអ្នកនិយមប្រជាធិបតេយ្យ និងប្រទេសប្រជាធិបតេយ្យ នឹងអាចមិនគាំទ្រ ឬមិនទទួលស្គាល់របបរបស់លោក ហ៊ុន សែន ហើយអាចនឹងដាក់សម្ពាធ ឬដាក់ទណ្ឌកម្មជាបន្តបន្ទាប់ប៉ុន្តែលោកជឿថា វាមិនមែនជាបញ្ហាដែលធ្វើឲ្យលោកហ៊ុន សែន ចាប់អារម្មណ៍ឬខ្វល់ខ្វាយឡើយ។
លោកថា តាំងពីក្រោយពេលបោះឆ្នោតឃុំ-សង្កាត់ រហូតដល់រំលាយគណបក្សសង្គ្រោះជាតិ ចាប់លោក កឹម សុខា ដាក់គុក ហាមឃាត់អ្នកនយោបាយបក្សប្រឆាំង ១១៨នាក់ មិនឲ្យធ្វើនយោបាយ ហើយយកអាសនៈរបស់បក្សប្រឆាំងទៅបែកចែកតាមចិត្ត និងរៀបចំការបោះឆ្នោត ជាដើម សុទ្ធតែមានមតិរិះគន់យ៉ាងសម្បើម ប៉ុន្តែគណបក្សកាន់អំណាចមិនដែលបង្ហាញថា ខ្លួនចាប់អារម្មណ៍ ឬខ្វល់ខ្វាយឡើយ។ «»
ទោះយ៉ាងណាក្តី លោកបណ្ឌិត ឡៅ ម៉ុងហៃ ផ្ដល់មតិថា អ្នកនិយមប្រជាធិបតេយ្យ ក៏មិនគួរបាក់ទឹកចិត្តហើយអសកម្មនោះទេ ត្រូវបន្តតស៊ូទៅមុខទៀត បើពុំនោះទេ វានឹងផ្ដល់ចំណុចខ្លាំងដល់រដ្ឋាភិបាលបច្ចុប្បន្ន។
នៅក្រោយការបោះឆ្នោត ដែលរៀបចំផ្ដាច់មុខដោយរបបក្រុងភ្នំពេញ ក្រុមប្រទេសប្រជាធិបតេយ្យធំៗ ដូចជាសហរដ្ឋអាមេរិក កាណាដា អូស្ត្រាលី បារាំង អាល្លឺម៉ង់ និងសហភាពអឺរ៉ុប នាំគ្នាចេញសេចក្ដីថ្លែងការណ៍មិនទទួលស្គាល់ការបោះឆ្នោត ថ្ងៃទី២៩ កក្កដា ទេ ដោយយល់ថា នោះការបោះឆ្នោតមិនមានភាពសេរី ត្រឹមត្រូវ និងបង្ហាញពីបរាជ័យយ៉ាងធំបំផុតនៃប្រព័ន្ធប្រជាធិបតេយ្យ ដែលមានចែងក្នុងរដ្ឋធម្មនុញ្ញរបស់កម្ពុជា។ ការអះអាងបែបនេះ ព្រោះក្រុមប្រទេសប្រជាធិបតេយ្យ យល់ថា បរិយាកាសនយោបាយទាំងមុន និងអំឡុងពេលបោះឆ្នោត មានការរឹតត្បិតយ៉ាងខ្លាំង ដោយសារតែការផាត់ចោលគណបក្សសង្គ្រោះជាតិ ចាប់ប្រធានគណបក្សសង្គ្រោះជាតិលោក កឹម សុខា ដាក់ពន្ធនាគារ ហាមឃាត់សិទ្ធិនយោបាយរបស់មន្ត្រីបក្សប្រឆាំងចំនួន ១១៨រូប និងប្រើប្រព័ន្ធតុលាការ ដើម្បីរឹតត្បិតសិទ្ធិសេរីភាពបក្សប្រឆាំង អ្នកហ៊ានរិះគន់រដ្ឋាភិបាល អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យជាដើម។
ចំណែកបក្សប្រឆាំង បានរំលឹកឲ្យរដ្ឋាភិបាល និងក្រុមហ៊ុនជុំវិញពិភពលោក កុំចុះហត្ថលេខាកិច្ចព្រមព្រៀងនានាជាមួយរបបក្រុងភ្នំពេញ ដោយចាត់ទុកថា ចាប់ពីក្រោយការបោះឆ្នោតក្លែងក្លាយថ្ងៃទី២៩ កក្កដា តទៅ របបក្រុងភ្នំពេញក្លាយជារបបខុសច្បាប់៕
Subscribe to:
Post Comments (Atom)
No comments:
Post a Comment