មាន ឫទ្ធិ
2018-08-30
rfa
លោក គឹម សុខ (កណ្ដាល) និងអ្នកនិយមគាំទ្រលោក នៅមុខពន្ធនាគារព្រៃស នៅព្រឹកថ្ងៃទី១៧ ខែសីហា ឆ្នាំ២០១៨។
រូប៖ VOD
អ្នកវិភាគនយោបាយ និងសង្គម លោក គឹម សុខ អះអាងថា លោកគ្មានលុយសងលោក ហ៊ុន សែន នោះទេ លោកមានតែបេះដូងស្នេហាជាតិមួយប៉ុណ្ណោះ។ ការលើកឡើងនេះ បន្ទាប់ពីលោក ហ៊ុន សែន នៅព្រឹកថ្ងៃទី២៩ ខែសីហា ព្រមានប្ដឹងលោក គឹម សុខ ដាក់ពន្ធនាគារវិញ ប្រសិនបើនៅតែព្រហើនហ៊ានរិះគន់របបលោក។ ការប្តឹងនោះ ធ្វើឡើងក្រោមហេតុផលថា លោក គឹម សុខ មិនទាន់ផ្តល់ប្រាក់សំណង៨០០លានរៀលស្មើនឹងប្រមាណ២០ម៉ឺនដុល្លារ ឲ្យគណបក្សកាន់អំណាច ក្រោយចេញពីពន្ធនាគារ។ មន្ត្រីសិទ្ធិមនុស្សចាត់ទុកថា សំដីរបស់លោកហ៊ុន សែន គឺជាការគំរាមកំហែង និងរឹតត្បិតសិទ្ធិសេរីភាពបញ្ចេញមតិ។
ទំនាស់ក្ដីក្ដាំរវាងលោក ហ៊ុន សែន និងលោក គឹម សុខ នៅតែបន្តយ៉ាងក្តៅគគុក ខណៈលោក ហ៊ុន សែន ប្រកាសទាមទារសំណងជំងឺចិត្តយ៉ាងច្រើនសន្ធឹកសន្ធាប់ និងព្រមានចាប់ដាក់ពន្ធនាគារជាថ្មីទៀត ដោយសារក្តៅក្រហាយរឿងលោក គឹម សុខ នៅតែហ៊ាននិយាយរិះគន់របបរបស់លោក។
អ្នកវិភាគនយោបាយ និងសង្គមលោក គឹម សុខ ប្រកាសថា លោកគ្មានលុយសងលោកហ៊ុន សែន នោះទេ គឺមានតែបេះដូងស្នេហាជាតិមួយប៉ុណ្ណោះ ហើយបើលោកហ៊ុន សែន ចង់បានបេះដូងលោក ទៀតនោះ គឺមានតែបញ្ជាឲ្យសភាឯកបក្សថ្មីរបស់លោក បង្កើតច្បាប់ចាប់វះកាត់យកបេះដូងលោក ទៅចុះ។
លោក គឹម សុខ បន្តថា លោកមិនដែលទទួលយកការកាត់ទោសដ៏អយុត្តិធម៌របស់តុលាការកម្ពុជា ម្តងណាទេ។ ម្យ៉ាងទៀត លោកគ្រាន់តែជួយផ្តល់មតិយោបល់ស្របតាមច្បាប់ ដើម្បីនីតិប្រជាធិបតេយ្យជាតិ ប៉ុន្តែការនិយាយ ឬការធ្វើអធិប្បាយនោះ មិនស្របនឹងគោលដៅអំណាចរបស់លោក ហ៊ុន សែន ដូច្នេះលោកមិនចាំបាច់បង់លុយឲ្យលោកហ៊ុន សែន ដើម្បីបានសិទ្ធិនិយាយទៀតនោះទេ៖ «ខ្ញុំគ្មានលុយទេខ្ញុំក្រណាស់ ហើយខ្ញុំគ្មានផែនការរកលុយដើម្បីផ្គាប់ចិត្តគាត់ដែរ ព្រោះការសងជំងឺចិត្តទាំងមិនយុត្តិធម៌បែបនេះ គឺស្មើនឹងលើកទឹកចិត្តអ្នកប្រើអំណាចទាំងបំពានច្បាប់។ ប្រសិនបើខ្ញុំមានលុយរហូតដល់២០ម៉ឺនដុល្លារមែន ក៏គ្មានមូលហេតុអីដែលត្រូវសងលោកហ៊ុន សែន ដែរ ព្រោះរឿងនោះវាអយុត្តិធម៌រួចទៅហើយ។ បើមានលុយខ្ញុំយកទៅអោយចាស់ជរា និងក្មេងកំព្រាវិញ វាប្រសើរជាង»។
នៅព្រឹកថ្ងៃទី២៩ ខែសីហា ក្នុងជំនួបស្វែងរកការគាំទ្រពីកម្មកររោងចក្រ លោក ហ៊ុន សែន បានព្រមានខ្លាំងៗថា នឹងប្ដឹងលោក គឹម សុខ ដាក់ពន្ធនាគារវិញ ប្រសិនបើមិនសងប្រាក់សំណង៨០០ លានរៀលស្មើនឹងប្រមាណ ២០ម៉ឺនដុល្លារមកឲ្យគណបក្សប្រជាជនកម្ពុជាទេនោះ។ លោក ហ៊ុន សែន អះអាងថា អ្នកទោសដែលត្រូវបានព្រះមហាក្សត្រព្រះរាជទានលើកលែងទោស គឺសាលក្រមនឹងផុតរលត់ មិនត្រូវសងសំណងជំងឺចិត្តនោះទេ ប៉ុន្តែករណីលោកគឹម សុខ ដែលបានចេញពីពន្ធនាគារ ដោយសារការអនុវត្តន៍ទោសរួចរាល់។ ដូច្នេះប្រាក់សំណងដែលតុលាការតម្រូវឲ្យសង គណបក្សប្រជាជនកម្ពុជានោះ គឺនៅតែត្រូវសងដដែល៖ «អ៊ីចឹងទេ មេធាវីរបស់គណបក្សប្រជាជនកម្ពុជា ត្រូវបន្តតាមទាមទារលុយ។ កុំព្រហើន..កុំអាលព្រហើន..គុកវានៅចាំ ទ្វាគុកនៅចំហ ហើយកុំថា នីតិមាត់ ព្រោះអាមាត់និយាយនេះ វាចេញពីច្បាប់ វាចេញពីនីតិរដ្ឋ បានវានិយាយចេញទៅអ៊ីចឹង ប៉ុន្តែវាចង់ដើម្បីបន្តុះបង្អាប់ខ្ញុំ។ ហ្អែងចង់សាកមើ អញយកហ្អែងបញ្ចូលគុកវិញ»។
លោក គឹម សុខ ត្រូវបានតុលាការដោះលែងឲ្យមានសេរីភាពកាលពីថ្ងៃទី១៧ ខែសីហា ក្រោយជាប់ពន្ធនាគារ ១៨ខែ ដោយសារតែលោក ហ៊ុន សែន ប្ដឹងចោទលោក គឹម សុខ ថា បាននិយាយចោទគណបក្សប្រជាជនកម្ពុជាថា ជាអ្នកនៅពីក្រោយនៃឃាតកម្មបាញ់សម្លាប់បណ្ឌិត កែម ឡី។ ទោះបីជាសំណុំរឿងទី១ នេះ ត្រូវបានបញ្ចប់ក្តី ប៉ុន្តែលោក គឹម សុខ នៅជាប់សំណុំរឿងមួយទៀតដែលគេនៅមិនទាន់ច្បាស់ថា តើតុលាការនឹងបន្តចាត់ការឬទេ។ សំណុំរឿងនោះគឺ មេធាវីលោក ហ៊ុន សែន បានប្ដឹងចោទលោក គឹម សុខ ថា បានចោទរបបលោក ហ៊ុន សែន ជាអ្នកបង្កើតប្រព័ន្ធសម្លាប់មនុស្ស តែរកឃាតកមិនឃើញ។ អ្នកច្បាប់ថា តុលាការមិនអាចបំបែកសំណុំបែបនេះជាពីរទេ ព្រោះវាជាករណីតែមួយ ឬស្រដៀងគ្នា ហើយលោកគឹម សុខ បានបញ្ចេញមតិរិះគន់រដ្ឋាភិបាលនិងបក្សកាន់អំណាចនោះ គឺស្រដៀងគ្នា ធ្វើឡើងក្នុងពេលតែមួយ ហើយតុលាការបានកាត់ទោសគាត់រួចទៅហើយ។ យោងតាមច្បាប់ព្រហ្មទណ្ឌកម្ពុជា បើបទល្មើសដូចគ្នាឬស្រដៀងគ្នា តុលាការអាចក្រសោបចូលគ្នាហើយកាត់សេចក្ដីតែម្ដង។ តាមច្បាប់គេមិនអាចកាត់ទោសមនុស្សពីរដងទៅលើបទល្មើសដូចគ្នានោះទេ។
លោក គឹម សុខ លើកឡើងថា លោកបានដឹងតាំងពីដំបូងថា លោក ហ៊ុន សែន នឹងមិនអនុគ្រោះឲ្យ លោកនោះទេ ព្រោះលោក ហ៊ុន សែន នៅតែបន្តទាមទារលុយ២០ម៉ឺនដុល្លារ និងបន្សល់ទុកសំណុំ រឿងមួយទៀតដែលមានចរិតដូចសំណុំរឿងទីមួយដែរ ដើម្បីកៀបលោកមិនឲ្យបញ្ចេញមតិយោបល់ បាន។ ទោះយ៉ាងណាក្តី លោកនៅតែមិនបញ្ឈប់បេសកកម្មជួយប្រទេសជាតិនោះទេ៖ «គោលដៅរបស់គាត់គឺចង់សាកល្បងខ្ញុំ ពេលចេញមក តើមានឥរិយាបថនិងជំហរបែបណា ចំពោះការងារដែលខ្ញុំបានធ្វើ ជាពិសេសការនិយាយអំពីអសកម្ម និងអសមត្ថភាព របស់រដ្ឋាភិបាល បើខ្ញុំបញ្ឈប់និងបន្ថយខ្លាំងមែនទែន គឺគាត់ច្បាស់ជាបន្ធូរហើយ ប៉ុន្តែគោលដៅរបស់ខ្ញុំមិនមែនសុំការបន្ធូរ ឬសុំការអនុគ្រោះទេ គោលដៅរបស់ខ្ញុំ គឺលើកតម្កើងស្មារតីនីតិប្រជាធិបតេយ្យជាតិ»។
ប្រធានបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត ថ្លែងថា ប្រទេសកម្ពុជា បានទទួលយកបទដ្ឋានអន្តរជាតិជាច្រើនស្តីអំពីសិទ្ធិមនុស្ស មានសិទ្ធិពលរដ្ឋ និងសិទ្ធិនយោបាយជាដើម។ លើសពីនេះច្បាប់រដ្ឋធម្មនុញ្ញ ក៏ចែងអំពីសិទ្ធិសេរីភាពនៃការបញ្ចេញមតិដែរ ប៉ុន្តែនៅកម្ពុជា នៅមិនទាន់ចែកដាច់ស្រឡះរវាងអ្វីដែលជាសិទ្ធិសេរីភាពបញ្ចេញមតិ និងអ្វីដែលជាបទល្មើសនៃការញុះញង់ និងការបរិហារកេរ្តិ៍នៅឡើយ។ លោកបន្តថា ប្រទេសប្រជាធិបតេយ្យ តែងតែ បើកឱកាសយ៉ាងទូលាយឲ្យប្រជាពលរដ្ឋគ្រប់រូប បានចូលរួមបញ្ចេញមតិនិងយោបល់ ដោយគ្មានការគំរាមកំហែងនិងរឹតត្បិតនោះទេ ដើម្បីចូលរួមអភិវឌ្ឍប្រទេសឲ្យបានរីកចម្រើនត្រឹមត្រូវ៖ «បាទ! ព្រោះរដ្ឋធម្មនុញ្ញយើងមានចែងអំពីសិទ្ធិនិងកិច្ចការពារអំពីសេរីភាពនៃការបញ្ចេញមតិ ហើយច្បាប់ផ្សេងៗក៏មានចែង ប៉ុន្តែទាស់ត្រង់ការអនុវត្តច្បាប់យើងអត់មានបែងចែងឲ្យបានដាច់ស្រឡះហើយការពន្យល់ទៀតសោតអំពីបទល្មើស នៃការបញ្ចេញមតិ វាហាក់ដូចជាស្រពិចស្រពិលដែលងាយក្នុងការបកស្រាយដើម្បីទាញទៅរកបទល្មើស។ នេះហើយដែលធ្វើឲ្យអ្នកវិភាគនយោបាយ ឬអ្នកបញ្ចេញមតិទាំងឡាយ ប្រឈមមុខក្នុងការចោទប្រកាន់នឹងបទល្មើសជាពិសេស បទល្មើសញុះញង់ បទល្មើសបរិហារកេរ្តិ៍ និងបទជេរប្រមាថជាដើម»។
ក្រោយពេលក្រសោបយកអាសនៈសភាមកគ្រប់គ្រងតែម្នាក់ឯង របបក្រុងភ្នំពេញបានដោះលែងអ្នកទោសមនសិការជាបន្តបន្ទាប់ រួមមានអ្នកវិភាគនយោបាយ លោក គឹម សុខ សកម្មជនការពារសិទ្ធិដីធ្លីអ្នកស្រី ទេព វន្នី ព្រមទាំងអតីតបុគ្គលិកអាស៊ីសេរីពីររូប គឺលោក អ៊ួន ឈិន និងលោក យាង សុធារិន្ទ និងបានដោះលែងថ្នាក់ដឹកនាំ និងសកម្មជនគណបក្សសង្គ្រោះជាតិជិត ២០នាក់ថែមទៀត។ ការដោះលែងនេះ ស្របពេលមានការរិះគន់អំពីរឿងរៀបចំការបោះឆ្នោត និងការដាក់ទណ្ឌកម្មពីសហគមន៍អន្តរជាតិជាបន្តបន្ទាប់។
ទោះជាមានការដោះលែងអ្នកទោសមនសិការមួយចំនួនក្តី ក៏របបលោក ហ៊ុន សែន មិនបានទម្លាក់ចោលបទចោទប្រកាន់ទាំងឡាយប្រឆាំងពួកគេនៅឡើយទេ ដែលត្រូវប្រឈមមុខនឹងការចាប់ដាក់ពន្ធនាគារវិញគ្រប់ពេល នៅពេលមានបញ្ជាពីរបបក្រុងភ្នំពេញ៕
1 comment:
Mr. Kim Sok,
Keep yourself outside the cage for Cambodia's interest.
Khmer people need you. Do not say something right at the wrong time because Ah Hun Sen's head is filled with air. He cannot distinguish between wrong and right.
Post a Comment