2018-09-01
ខ្មែរនៅក្រៅប្រទេសធ្វើបាតុកម្មប្រឆាំងលោកនាយករដ្ឋមន្ត្រី ហ៊ុន សែន នៅមុខអង្គការសហប្រជាជាតិ ក្នុងបុរីញីវយ៉ក (New York) សហរដ្ឋអាមេរិក កាលពីថ្ងៃទី២៦ ខែកញ្ញា ឆ្នាំ២០១៥។
RFA/Yun Samean
ពលរដ្ឋខ្មែរនៅសហរដ្ឋអាមេរិក នឹងនាំគ្នាធ្វើបាតុកម្មនៅមុខស្ថានកុងស៊ុលចិន ប្រចាំរដ្ឋរបស់ពួកគេរស់នៅ ដើម្បីទាមទារឲ្យចិនឈប់គាំទ្ររបបក្រុងភ្នំពេញតទៅទៀត ដោយសារពួកគាត់ចាត់ទុកថា គឺជារដ្ឋាភិបាលខុសច្បាប់ ដែលកើតចេញពីការបោះឆ្នោតក្លែងក្លាយ។
អ្នកនាំពាក្យគណបក្សកាន់អំណាចឆ្លើយតបទៅនឹងការទាមទារដែលប្រព្រឹត្តទៅនៅក្រៅស្រុក ថាគ្រាន់តែសិទ្ធិរបស់ពលរដ្ឋនៅតាមប្រទេសទាំងនោះ ប៉ុន្តែនឹងមិនទទួលបានលទ្ធផលអ្វីនោះទេ។អ្នកចូលរួមបាតុកម្មម្នាក់ នៅរដ្ឋកាលីហ្វ័រញ៉ា (California) លោក ស ស៊ីថាល ឲ្យអាស៊ីសេរីដឹង ថា នៅរដ្ឋរបស់លោក គឺមានអ្នកចូលរួមជាង២០០នាក់។ លោកថា ក្រៅពីពលរដ្ឋនៅរដ្ឋកាលីហ្វ័រញ៉ា ពលរដ្ឋខ្មែររស់នៅរដ្ឋផ្សេងៗទៀតក៏នឹងធ្វើបាតុកម្មនៅតាមស្ថានកុងស៊ុលចិនដែរ។ បាតុកររូបនេះឲ្យដឹងដែរថា ក្រៅពីការទាមទារ ក្រុមបាតុករក៏បានចុះហត្ថលេខាលើញត្តិមួយដាក់ទៅស្ថានទូតចិនប្រចាំសហរដ្ឋអាមេរិក ឲ្យដឹងពីការទាមទាររបស់ពលរដ្ឋ នៅពេលនេះផងដែរ។ «»
អនុប្រធានគណបក្សសង្គ្រោះជាតិ លោក អេង ឆៃអ៊ាង ក៏ប្រកាសចូលរួមធ្វើបាតុកម្មនេះដែរ។ លោកបានសរសេរ នៅលើហ្វេសប៊ុក (Facebook) របស់លោកថា ចេញដំណើរទៅចូលរួមធ្វើបាតុកម្មជាមួយប្រជាពលរដ្ឋខ្មែរ នៅរដ្ឋកាលីហ្វ័រញ៉ា នៅថ្ងៃទី២ កញ្ញា ២០១៨។ អ្នកចូលរួមបាតុកម្ម លោក ស ស៊ីថាល ប្រាប់ថា ការទាមទារនេះគឺមិនចង់ឲ្យប្រវត្តិសាស្ត្រ កម្ពុជាវិលមកជាថ្មី ព្រោះកាលពីជំនាន់របបវាលពិឃាដដោយសារតែចិនគាំទ្ររបប ប៉ុល ពត ទើបធ្វើឲ្យរបបនេះសម្លាប់ពលរដ្ឋខ្មែរជាងពីរលាននាក់។ លោកស្នើទៅពលរដ្ឋផ្សេងដែលកំពុងរស់នៅក្រៅប្រទេសធ្វើការទាមទារទាំងអស់គ្នា។ «»
ទាក់ទងការព្រមាននៃការធ្វើបាតុកម្មរបស់ពលរដ្ឋខ្មែរ នៅសហរដ្ឋអាមេរិកនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បាននិយាយថា ការទាមទារណាមួយគឺជាសិទ្ធិសេរីភាពរបស់ពួកគេ។ ប៉ុន្តែអ្នកនាំពាក្យរូបនេះយល់ថា ទោះមានការទាមទារយ៉ាងណាក្តីគឺគណបក្សប្រឆាំងមិនទទួលបានលទ្ធផលអ្វីឡើយ។ លោក សុខ ឥសាន នៅតែអះអាងដដែលៗថា របបថ្មីក្រុងភ្នំពេញ ជារបបស្របច្បាប់ កើតចេញពីការបោះឆ្នោតត្រឹមត្រូវ។ «»
ក្រោយព្រឹត្តិការណ៍ថ្ងៃទី២៩ កក្កដា ក្រុមអ្នកនិយមប្រជាប្រជាធិបតេយ្យ ជាពិសេសសហគមន៍ខ្មែរ ដែលរស់នៅឯនាយសមុទ្រ បានព្រមានរួចទៅហើយថា ពួកគាត់ នឹងនាំគ្នាទៅធ្វើបាតុកម្ម នៅមុខស្ថានទូតចិន បើប្រទេសនេះ នៅតែគាំទ្ររបបថ្មីលោក ហ៊ុន សែន។
អ្នកវិភាគនយោបាយវ័យក្មេងលោក ហង្ស វិទូ យល់ថា ការធ្វើបាតុកម្ម នេះគឺជាការបង្ហាញអំពីការខ្វល់ខ្វាយរបស់ពលរដ្ឋដែលស្រលាញ់លទ្ធិប្រជាធិបតេយ្យ។ លោកថា ការធ្វើបាតុកម្មនេះ នឹងធ្វើឲ្យអន្តរជាតិបន្តចាប់អារម្មណ៍ ពីស្ថានការណ៍នយោបាយនៅកម្ពុជា។ «»
ក្រៅគម្រោងធ្វើបាតុកម្មនៅមុខស្ថានទូតចិន ពលរដ្ឋខ្មែរនៅសហរដ្ឋ អាមេរិកក៏គ្រោងធ្វើបាតុកម្មនៅចុងខែកញ្ញាខាងមុខនេះ ប្រឆាំងវត្តមានលោក ហ៊ុន សែន ដែលនឹងទៅចូលរួមកិច្ចប្រជុំនៅអង្គការសហប្រជាជាតិ នៅលើទឹកដីនៃសហរដ្ឋអាមេរិក។
ក្រុមបាតុករនឹងទៅស្រែកទាមទារ និងលើកបដានៅមុខទីស្នាក់ការកណ្ដាលរបស់អង្គការសហប្រជាជាតិនៅទីក្រុងញូវយ៉ក (New York) ជាកន្លែង ដែលលោក ហ៊ុន សែន ទៅចូលរួមប្រជុំ៕
No comments:
Post a Comment